ပြင်သစ်နိုင်ငံတွင် အကြမ်းဖက်တိုက်ခိုက်မှုဖြစ်ပွား၊ လူ ၈၀ သေဆုံး

ဇူလိုင် ၁၅၊ ၂၀၁၆
M-Media

– Bastille Day အထိမ်းအမှတ်အဖြစ် ပြင်သစ်နိုင်ငံတောင်ပိုင်း နိုက်စ်မြို့တွင် ပြုလုပ်နေသည့် အခမ်းအနားသို့ လူတစ်ဦးက လော်ရီကားတစ်စီးဖြင့် ၀င်တိုက်မှုကြောင့် အနည်ဆုံး လူ ၈၀ သေဆုံးခဲ့ပြီး ၁၀၀ ခန့် ဒဏ်ရာရရှိခဲ့သည်ဟု သိရသည်။

ယမန်နေ့ည ၁၁ နာရီခန့်က ဖြစ်ပွားခဲ့ခြင်းဖြစ်ပြီး Promenade des Anglais မြစ်ကမ်းပါးတွင် မီးပန်းပစ်ဖောက်မှုအား ကြည့်ရှုနေသည့် လူအုပ်ကြီးအတွင်းသို့ လော်ရီကားက အရှိန်ပြင်းစွာ ၀င်တိုက်ခဲ့ခြင်းဖြစ်ကာ ရဲတပ်ဖွဲ့ကမူ ကားမောင်းသမားအား အသေပစ်သတ်ခဲ့သည်။

ပြင်သစ်ပြည်ထဲရေးဝန်ကြီး ဘားနဒ် ကာဇီနျူဗီကမူ ထိုတိုက်ခိုက်မှုအတွင်း ကလေးငယ်များအပါအ၀င် လူ ၈၀ သေဆုံးခဲ့ပြီး ၁၈ ဦးမှာ စိုးရိမ်ရသည့်အခြေအနေတွင် ရှိနေသည်ဟု ဆိုသည်။ တိုက်ခိုက်သူမှာ အသက် ၃၁ နှစ်အရွယ်ရှိ ပြင်သစ်-တူနီးရှန်း အမျိုးသားဖြစ်သည်ဟု လော်ရီကားပေါ်တွင် ကျန်နေသည့် အထောက်အထားများအရ သိရကြောင်း ရဲတပ်ဖွဲ့ရင်းမြစ်တစ်ခုက AFP သတင်းဌာနသို့ ပြောကြားခဲ့သည်။

မျက်မြင်သက်သေများကမူ ကားသမားမှာ လူအုပ်ကြီးအတွင်းသုို့ ၀င်တိုက်ပြီးနောက် ကားပေါ်မှဆင်းကာ သေနတ်ဖြင့် ပစ်ခတ်ခဲ့သည်ဟု ဆိုသည်။

ပြင်သစ်သမ္မတ အော်လွန်းကမူ ထိုလုပ်ရပ်က အကြမ်းဖက်လုပ်ရပ်ဖြစ်သည်မှာ ထင်ရှားသည်ဟု ယနေ့မနက် ရုပ်မြင်သံကြားမိန့်ခွန်းတွင် ပြောကြားခဲ့ပြီး ပြီးခဲ့သည့် နိုဝင်ဘာတိုက်ခိုက်မှုပြီးကတည်းက ထုတ်ပြန်ထားခဲ့သည့် အရေးပေါ်အခြေအနေကို ဇူလိုင် ၂၆ ရက်နေ့မှစတင်ကာ နောက်ထပ် ၃ လ ဆက်လက်ထားရှိသွားမည်ဟု ပြောကြားခဲ့သည်။

Ref: Aljazeera