ဒုက္ခသည်များအပေါ် ရိုက်နှက်မှု စုံစမ်းရန် ဟန်ဂေရီကို ကုလ တိုက်တွန်း

ဇူလိုင် ၁၈၊ ၂၀၁၆
M-Media

– နိုင်ငံအတွင်း ခိုလှုံဖို့ လာရောက်ကြသူတွေကို ရဲတပ်ဖွဲ့ဝင်တွေက ရိုက်နှက်တာ၊ ခွေးများလွှတ်ကာ ကိုက်ခိုင်းတာ စတာတွေနဲ့ပတ်သက်ပြီး စုံစမ်းစစ်ဆေးမှုတွေပြုလုပ်ဖို့ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံးက ဟန်ဂေရီကို တိုက်တွန်းပြောကြားလိုက်ပြီး ပုံမှန်မဟုတ်တဲ့ ပြောင်းရွှေ့အခြေချသူတွေကို နယ်စပ်ခြုံစည်းရိုးအပြင်ဘက် ဆွဲထုတ်ဖို့ ခွင့်ပြုထာတဲ့ ဥပဒေအသစ်ကိုလည်း ရှုတ်ချခဲ့ပါတယ်။

ဟန်ဂေရီတပ်ဖွဲ့တွေဟာ နိုင်ငံအတွင်း ၀င်ရောက်လာခဲ့တဲ့ ဒုက္ခသည်တွေကို ကြမ်းကြမ်းတမ်းတမ်း ဆက်ဆံတယ်ဆိုတဲ့ သတင်းတွေဟာ ပြီးခဲ့တဲ့ရက်ပိုင်းအတွင်းက ထွက်ပေါ်လာခဲ့ပြီး ၀န်ကြီးချုပ်ရုံးအကြီးအကဲ ဂျာနို့စ် လာဇာကတော့ ဒီစွပ်စွဲချက်တွေကို ငြင်းဆိုခဲ့ကာ စစ်သားတွေ၊ ရဲတွေရဲ့ တုံ့ပြန်မှုဟာ ကောင်းမွန်တယ်လို့ တုန့်ပြန်ပြောကြားခဲ့ပါတယ်။

ဥရောပသမဂ္ဂ (EU) အဖွဲ့ဝင်နိုင်ငံဖြစ်တဲ့ ဟန်ဂေရီဟာ တရားမ၀င်ရောက်လာတဲ့ ဒုက္ခသည်တွေကို တစ်ဖက်နိုင်ငံရဲ့ နယ်စပ် ခြံစည်းရိုး ငါးမိုင်ကျော်မှာ ထိန်းသိမ်းထားရမယ်ဆိုတဲ့ ဥပဒေသစ်တစ်ခုကို လက်ခံကျင့်သုံးဖို့ ပြီးခဲ့တဲ့လက ဆုံးဖြတ်ခဲ့ပါတယ်။

“ဒီလိုကန့်သတ်ချုပ်ချယ်မှုတွေဟာ EU ဥပဒေ၊ နိုင်ငံတကာဥပဒေတွေနဲ့ ဆန့်ကျင်ဘက်ဖြစ်နေပါတယ်၊ မတော်တရားပြုတဲ့ သတင်းတွေအပေါ် စုံစမ်းစစ်ဆေးဖို့ လိုအပ်ပါတယ်။ ဒုက္ခသည်တွေကို ခွေးတွေလွှတ်ပြီး ကိုက်ခိုင်းတာ၊ ငရုတ်ကောင်း စပရေးတွေဖြန်းတာ၊ ရိုက်တာနှက်တာတွေလည်း ရှိတယ်လို့ သတင်းတွေ ထွက်ပေါ်ခဲ့ပြီး ဒါတွေကို စုံစမ်းစစ်ဆေးမှုတွေ ပြုလုပ်ဖို့ ဟန်ဂေရီအာဏာပိုင်တွေကို တောင်းဆိုပါတယ်” လို့ ကုလသမဂ္ဂဒုက္ခသည်များဆိုင်ရာ မဟာမင်းကြီး (UNHCR) ရဲ့ ပြောဆိုခွင့်ရှိသူ ၀ီလီယံ စပင်ဒလာက သတင်းစာရှင်းလင်းပွဲမှာ ပြောကြားခဲ့ပါတယ်။

ဆားဘီးယားကနေ ဟန်ဂေရီကို ၀င်ရောက်ဖို့ ကြိုးစားရင် Tisza မြစ်ထဲမှာ ဆီးရီးယားဒုက္ခသည်တစ်ဦး ရေနစ်သေဆုံးမှုနဲ့ ပတ်သက်ပြီး ရာဇ၀တ်မှုနဲ့ ညိစွန်းခြင်း ရှိ၊ မရှိ ဟန်ဂေရီအာဏာပိုင်တွေက ပြီးခဲ့တဲ့လအတွင်းမှာ စုံစမ်းစစ်ဆေးမှုတွေ ပြုလုပ်ခဲ့ပါသေးတယ်။

ဟန်ဂေရီဟာ တစ်နေ့ကို ဒက္ခသည် ၃၀ ကိုသာ ဖြတ်ကျော်ဝင်ရောက်ခွင့်ပေးပြီး စပင်ဒလာက အမျိုးသမီးနဲ့ ကလေးငယ်တွေအများစု အပါအ၀င် ဒုက္ခသည် ၁၄၀၀ ကျော်ဟာ ဆားဘီးယာနယ်စပ်တစ်လျှောက်မှာ သောင်တင်နေတယ်လို့ ဆိုပါတယ်။

Ref : IINA