မြန်မာ့ စတုတ္ထမဏ္ဍိုင်ဝင်တို့ သတိမူဖွယ်

စက်တင်ဘာ၊ ၁၆ ၊ ၂၀၁၂

M-Media

ဇေယျာသူ

မြန်မာနိုင်ငံရဲ့ စတုတ္ထမဏ္ဍိုင်လို့သတ်မှတ်လာကြတဲ့ မြန်မာ့မီဒီယာလောကမှာ ရပ်တည်နေကြသူတွေအနေနဲ့ ဗဟုသုတအပြည့်ရှိဖို့လိုအပ်ပါတယ်။ စတုတ္ထမဏ္ဍိုင်ဆိုတဲ့နေရာမှာ သိက္ခာရှိစွာ ရပ်တည်နိုင်ဖို့လိုပါတယ်။ ကိုယ့်မီဒီယာနာမည်ကြီးဖို့၊ သတင်းဦးသတင်းထူးကိုဖော်ပြနိုင်ဖို့အတွက် ကြိုးစားသင့်ပါတယ်။ အဲလို ကြိုးစားတဲ့နေရာမှာ သတင်း မှန်ကန်မှုကိုလည်း အထူးအလေးထားပြီး စာဖတ်သူ၊ ကြည့်ရှုသူကို အဆိပ်အတောက်ဖြစ်စေမယ့် စကားလုံးအသုံးအနှုန်း၊ အပြောအဆို၊ အရေးအသားတွေကိုလည်း ရှောင်ကြဉ်သင့်ပါတယ်။ ကိုယ့်မီဒီယာကနေ သတင်းဦးရေးရပြီးရောဆိုပြီး မပြုလုပ်သင့်ပါဘူး။ သတင်းဦးရပြီးရော မှန်မမှန်မစိစစ်ပဲ ရေးသားဖော်ပြခြင်းဟာ စာဖတ်သူတွေကို စော်ကားမှုတစ်ရပ်ပါပဲ။ ပြီးတော့ ကိုယ့်မီဒီယာက မှားယွင်းဖော်ပြမိပြီဆိုရင်လည်း ရိုးသားစွာပဲ စာဖတ်သူတွေကို တောင်းပန်သင့်ပါတယ်။ ဒါဟာ ကိုယ့်မီဒီယာရဲ့ ရိုးသားစွာ မှားယွင်းမှုအတွက် စာဖတ်သူတွေကို အလေးထားမှုရှိတယ်ဆိုတာကို ဖော်ပြပါတယ်။ နောက်ပြီးတော့ စာအုပ်ပဲဖြစ်ဖြစ်၊ မဂ္ဂဇင်းပဲဖြစ်ဖြစ်၊ ဂျာနယ်ပဲဖြစ်ဖြစ် အယ်ဒီတာနဲ့ အယ်ဒီတာအဖွဲ့ဝင်တွေဟာလည်း ဗဟုသုတပြည့်ဝသင့်ပါတယ်။ ဥပမာ – ဂျာနယ်တစ်ခုဆိုပါစို့။ ကိုယ့်ဂျာနယ်ရဲ့ သတင်းထောက်ကလည်း ဗဟုသုတအသင့်အတင့်တော့ ရှိသင့်ပါတယ်။ သတင်းထောက်ဆိုတာကလည်း ကိုယ့်ဂျာနယ်က သတင်းဦးဖော်ပြနိုင်ဖို့အတွက် အထူးကြိုးစားပေမယ့် လက်ရှိအဖြစ်အပျက်တစ်ခုတည်းကို မီးမောင်းထိုးရေးသားလိုက်တာထက် သတင်းရဲ့ရင်းမြစ်ကိုလည်းသေချာသိပြီးမှ ရေးသားသင့်ပါတယ်။

ဒီနေ့မျက်မှောက်ကာလမှာ လူတွေအားလုံးက ကိုယ့်နည်းကိုယ်ဟန်နဲ့ ဂျာနယ်လစ်တွေဖြစ်နေကြပါတယ်။ အခုခေတ်စားနေတဲ့စကားလုံးပုံစံနဲ့ပြောရရင် Community Journalist (CJ) တွေပေါ့။ ကိုယ်တိုင်က ကွန်မြူနတီ ဂျာနယ်လစ်ဖြစ်နေတာကို သိသူ၊ ဂျာနစ်လစ်ဖြစ်နေတာကိုမသိသူပဲ ကွာခြားပါတယ်။ အခုလို နည်းပညာတွေ တိုးတက်လာတဲ့အချိန် အင်တာနက်မှာ ဖော်ပြရေးသားနေကြသူတွေဟာလည်း ကွန်မြူနတီ ဂျာနယ်လစ်တွေပါပဲ။ ဒါကြောင့် မိမိရဲ့ရေးသားဖော်ပြလိုက်မှုဟာ တစ်ဘက်သားကို အဆိပ်အတောက်မဖြစ်စေဖို့ သတိထားသင့်ပါတယ်။ ဂျာနယ်၊ မဂ္ဂဇင်း၊ မီဒီယာထောင်ပြီး ဂျာနယ်လစ်လုပ်မှ စတုတ္တုမဏ္ဍိုင်ဖြစ်တာမဟုတ်ပါဘူး။ အွန်လိုင်းမှာရေးသားနေကြတာတွေဟာလည်း ကွန်မြူနတီဂျာနယ်လစ်တွေလို့ ကျွန်မမြင်ပါတယ်။ ဒီတော့ ကျွန်မတို့တွေ(လူတိုင်း)ရဲ့ ရေးသားဖော်ပြချက်တွေဟာလည်း စတုတ္တမဏ္ဍိုင်ထဲမှာသက်ဝင်နေပါတယ်။ ဒါကြောင့် ကိုယ့်သိတဲ့ ကိုယ်ရလိုက်တဲ့ ကိုယ်တွေ့မြင်လိုက်တဲ့ အကြောင်းအရာတွေကို ရေးသားသူတွေအနေနဲ့ အများအတွက် အဆိပ်အတောက်ဖြစ်စေတဲ့အရာတွေကို သတိထားရှောင်ရှားနိုင်ဖို့ အလွန်လိုအပ်ပါတယ်။

လွန်ခဲ့တဲ့ ရက်အနည်းငယ်က FB မှာ တစ်ယောက်က ကောလင်းမြို့ရဲ့သတင်းတစ်ခု တင်ထားတာကို ကျွန်မတွေ့ရှိဖတ်ရှုလိုက်ရတယ်။ အဲဒီသတင်းနဲ့ ပုံတစ်ခုကိုလည်း တွဲပြီးတင်ထားတယ်။ သူဖော်ပြထားတဲ့ သတင်းရဲ့ source က (news from..Royal Hero Media)လို့ပါတယ်။ သတင်းနဲ့ ဖော်ပြထားတဲ့ဓါတ်ပုံကလွဲနေပါတယ်။ အဲဒီဓါတ်ပုံက တကယ်တမ်းတော့ လူတိုင်းသိနေတဲ့ ရခိုင်က မုဒိမ်းမှုကျူးလွန်ခဲ့တယ်ဆိုတဲ့ လူငယ်(၃)ယောက်ရဲ့ပုံပါ။ အဲဒါမျိုးဆိုရင် သတင်းကိုတင်တဲ့သူက သိထားသင့်တဲ့အရာပါ။ ဘယ်လိုမှ မလွဲချော်သင့်ပါဘူး။ ဒါကြောင့် ကျွန်မတို့တွေ အားလုံးဟာ ကွန်မြူနတီ ဂျာနယ်လစ်ဇင်တွေဖြစ်နေတဲ့အတွက် ဒီလိုအကြောင်းကိစ္စတွေမှာလည်း သတိထားရှောင်ကြဉ်ပါလို့ ပြောချင်ပါတယ် စတုတ္ထမဏ္ဍိုင်ဝင်တို့ရေ။