မိမိတို့၏ ဒုံးကျည်ပစ်လွှတ်မှု အမေရိကန်ကို တိုက်ခိုက်ရန်ဖြစ်သည်ဟု မြောက်ကိုရီးယားပြော

ဇူလိုင် ၂၀၊ ၂၀၁၆
M-Media

– မိမိတို့ နောက်ဆုံး စမ်းသပ်ပစ်လွှတ်ခဲ့သည့် တိုက်ချင်းပစ် ဒုံးကျည်များမှာ ခေါင်းဆောင်ကြီး ကင်ဂျုံအန်၏ အမိန့်ပေး၊ ကြီးကြပ်မှုဖြင့် ပြုလုပ်ခြင်းဖြစ်ပြီး တောင်ကိုရီးယားတွင် အခြေစိုက်သည့် အမေရိကန် စစ်စခန်းများကို နျူလက်နက်ဖြင့် တိုက်ခိုက်နိုင်ရေး ပုံတူဆောင်ရွက်မှုဖြစ်သည်ဟု မြောက်ကိုရီးယားက ပြောကြားလိုက်သည်။

ယမန်နေ့က တိုက်ချင်းပစ်ဒုံးကျည် ၃ စင်းကို မြောက်ကိုရီးယားက နိုင်ငံအရှေ့ပိုင်း ကမ်းရိုးတမ်းရှိ ရေပြင် ကီလိုမီတာ ၅၀၀ နှင့် ၆၀၀ ကြားသို့ ပစ်လွှတ်ခဲ့ခြင်းဖြစ်သည်ဟု တောင်ကိုရီးယား စစ်တပ်က ဆိုသည်။

မြောက်ကိုရီးယားနိုင်ငံပိုင် သတင်းဌာန KCNA ကမူ ထိုပစ်လွှတ်မှုမှာ အမေရိကန်စစ်လက်နက်များကို လက်ခံထားသော တောင်ကိုရီးယား ဆိပ်ကမ်းများနှင့် လေယာဉ်ကွင်းများကို တိုက်ခိုက်ရေး ရှေ့ပြေးစမ်းသပ်မှုဖြစ်ကြောင်း၊ တိုက်ချင်းပစ်ဒုံးကျည်များတွင် တပ်ဆင်ထားသည့် နျူထိပ်ဖူးမှ ဖောက်ခွဲဖျက်ဆီးရေး ကိရိယာ၏ လုပ်ဆောင်နိုင်မှုကို စစ်ဆေးခြင်းဖြစ်ကြောင်း ဖော်ပြခဲ့သည်။

အမေရိကန်စစ်တပ်ကမူ မြောက်ကိုရီးယားမှ ပစ်လွှတ်သော ဒုံးကျည် ၃ စင်းတွင် ၂ စင်းမှာ စကဒ်ဒုံးကျည်များဖြစ်ပြီး၊ ၁ စင်းမှာ ဆိုဗီယက်ခေတ် စကဒ်ဒုံးကျည်နည်းပညာကို အခြေခံ၍ မြောက်ကိုရီးယားပြည်တွင်းထုတ် Rodong ဒုံးကျည်ဖြစ်သည်ဟု ထုတ်ပြန်ခဲ့သည်။

မြောက်ကိုရီးယားမှာ နျူကလီးယား ထိပ်ဖူများကို ထုတ်လုပ်နေသည်ဟုယုံ ကြည်ရပြီး အဆိုပါထိပ်ဖူးများကို တိုက်ချင်းပစ်ဒုံးကျည်များတွင် တပ်ဆင်နိုင်ရန်အတွက် ကြိုးစားနေသည်။ သို့သော် ကျွမ်းကျင်သူများကမူ ထိုနည်းပညာကို ကိုင်တွယ်နိုင်ရန်အတွက် နှစ်အနည်းငယ် ကြာမြင့်အုံးမည်ဟု ခန့်မှန်းထားသည်။

Ref: Aljazeera