မိမိတို့လေပိုင်နက်ကို ကျူးကျော်မှုမှာ ရန်စခြင်းဖြစ်သည်ဟု ဘူဂေးရီးယားပြော

ဇူလိုင် ၂၆၊ ၂၀၁၆
M-Media

– ရုရှားလေတပ်နဲ့ အရပ်ဖက်လေကြောင်းလိုင်းတွေက မိမိတို့ရဲ့ လေပိုင်နက်ထဲကို ချိုးဖောက်ဝင်ရောက်မှုတွေ မြင့်တက်လာနေပြီး ဒီလုပ်ရပ်ဟာ ရန်စတာဖြစ်တယ်လို့ ဘူဂေးရီးယားနိုင်ငံက ပြောကြားလိုက်ပါတယ်။

ကာကွယ်ရေးဝန်ကြီး နီကိုလေး နန်ရှက်ဗ်က တနင်္ဂနွေနေ့မှာ ပြောကြားလိုက်တာဖြစ်ပြီး ရုရှားလေယာဉ်ဟာ ပြီးခဲ့တဲ့လအတွင်း နေတိုးအဖွဲ့ လေပိုင်နက်ထဲ ဘူဂေးရီးယားက တာဝန်ယူထားရတဲ့ အပိုင်းကို ကျူးကျော်ဝင်ရောက်ခဲ့တာ ၄ ကြိမ်ရှိတယ်လို့ ဆိုပါတယ်။

“ဒီကိစ္စဟာ အလွန်စိုးရိမ်ဖို့ကောင်းပါတယ်၊ ဒါ့ကြောင့်မို့လို့ ကျွန်တော်တို့အနေနဲ့ ကာကွယ်စရာရှိတာ ကာကွယ်ဖို့ လုပ်ထားရပါမယ်” လို့ ၀န်ကြီးက ပြောကြားခဲ့ပါတယ်။

အဲ့ဒီလိုကျူးကျော်မှုတွေ ပြုလုပ်နေတဲ့အခါ ရုရှားလေယာဉ်တွေဟာ တည်နေရာကို အလွယ်တကူရှာဖွေနိုင်မယ့် ဆက်သွယ်ရေးကိရိယာတွေကို ပိတ်ထားပါတယ်လို့လည်း နန်ရှက်ဗ်က ထည့်သွင်းပြောကြားခဲ့ပါတယ်။ ရုရှားရဲ့ အခုလိုကျူးကျော်ဝင်ရောက်မှုအတွက် ဖြေရှင်းချက်ပေးဖို့လည်း ဘူဂေးရီးယားက တောင်းဆိုထားပါတယ်။

တစ်ချိန်က ရုရှားရဲ့အမာခံမိတ်ဖက်ဖြစ်ဖူးပြီး ဘောလ်ကန်ဒေသနိုင်ငံတစ်ခုဖြစ်တဲ့ ဘူဂေးရီးယားနိုင်ငံဟာ ၂၀၀၄ ခုနှစ်မှာ နေတိုးအဖွဲ့ဝင်နိုင်ငံ ဖြစ်လာပြီးနောက်ပိုင်းမှာ ဥရောပနဲ့ ပိုပြီး ဆက်ဆံရေး နီးကပ်လာတာဖြစ်ပါတယ်။ နောက်ပြီး ရိုမေးနီးယားမှာ အခြေစိုက်မယ့် နေတိုးအဖွဲ့ရဲ့ မြေပြင်အခြေစိုက်စခန်းမှာ ပါဝင်ဖို့ အသင့်ဖြစ်နေပြီလို့လည်း ဘူဂေးရီးယားက ပြောကြားထားပါတယ်။

Ref : Presstv