အငြင်းပွားကျွန်းအနီး သင်္ဘောများ ခုတ်မောင်းမှု တရုတ်ကို ဂျပန် ကန့်ကွက်

သြဂုတ် ၆၊ ၂၀၁၆
M-Media

– အရှေ့တရုတ်ပင်လယ်အတွင်းမှာ ဂျပန်နဲ့ တရုတ် ပိုင်ဆိုင်မှုအငြင်းပွားနေတဲ့ ကျွန်းရဲ့ ရေပုိုင်နက်အနီး တရုတ်ရဲ့ ကမ်းခြေစောင့်သင်္ဘောတွေနဲ့ ငါးဖမ်းသင်္ဘောတွေ သွားလာမှုအတွက် ဂျပန်က ဆန့်ကျင်ကြောင်း ပြောကြားလိုက်ပြီး ၂ ရက်အတွင်း ဒုတိယမြောက် ကန့်ကွက်မှုလည်း ဖြစ်ပါတယ်။

ဂျပန်က ဆန်ကာကူလို့ခေါ်ပြီး တရုတ်က ဒေယူးလို့ခေါ်တဲ့ ကျွန်းအနီးမှာဖြစ်ပြီး ဂျပန်နိုင်ငံခြားရေးဝန်ကြီးကတော့ တရုတ်ကမ်းခြေစောင့်သင်္ဘော ၇ စီးနဲ့ ငါးဖမ်းသင်္ဘော ၂၃၀ လောက်ဟာ ဂျပန်က ပိုင်ဆိုင်ကြောင်း ကြေငြာထားတဲ့ ရေပိုင်နက်အနီး ဒီနေ့မှာ ခုတ်မောင်းခဲ့ကြတာဖြစ်ကာ ကမ်းခြေစောင့်သင်္ဘော ၄ စင်းမှာတော့ လက်နက်တွေ ပါဝင်တယ်လို့ ဆိုပါတယ်။

ဝန်ကြီးဌာနက ထုတ်ပြန်တဲ့ ကြေငြာချက်မှာတော့ မိမိတို့ဟာ ဒီလုပ်ရပ်ကို လုံးဝ လက်မခံကြောင်း၊ ဒေသတွင်းမှာ အခြေအနေတွေ တင်းမာအောင် တစ်ဖက်သတ် လုပ်တာဖြစ်ကြောင်း ဖော်ပြထားပြီး ဒီသင်္ဘောတွေကို ချက်ခြင်း ဖယ်ရှားပေးဖို့ တောင်းဆိုထားပါတယ်။

တရုတ်ကလည်း ဒီကျွန်းကို ပိုင်ဆိုင်ကြောင်း ကြေငြာထားပြီး ကမ်းခြေစောင့်ရေယာဉ်တွေကို မကြာခဏလွှတ်လေ့ရှိပေမယ့် ငါးဖမ်းသင်္ဘောတွေကိုတော့ အခုလို လွှတ်လေ့မရှိပါဘူး။ ဂျပန်ရဲ့ ဆန့်ကျင်မှုအတွက် တရုတ်ဖက်က ဘာမှ တုန့်ပြန်မှု မရှိသေးပါဘူး။

Ref: Aljazeera