ပါကစ္စတန်ရှိ ဆေးရုံ၌ အသေခံဗုံးခွဲတိုက်ခိုက်မှု ဖြစ်ပွား

သြဂုတ် ၈၊ ၂၀၁၆
M-Media

– ပါကစ္စတန်နိုင်ငံ ဘာလိုချစ္စတန်ပြည်နယ် ကွေတာမြို့ရှိ ဆေးရုံ၌ ရှေ့နေတစ်ဦး၏ ဈာပနအခမ်းအနား ကျင်းပနေစဉ် အသေခံဗုံးခွဲသမားတစ်ဦးက ဗုံးခွဲတိုက်ခိုက်ခဲ့သောကြောင့် အနည်းဆုံး လူ ၆၀ သေဆုံးခဲ့ပြီး ၅၀ ကျော် ဒဏ်ရာရရှိခဲ့သည်ဟု သိရသည်။

ယနေ့မနက်ပိုင်းက သေနတ်ပစ်ခတ်မှုအတွင်း သေဆုံးခဲ့သည့် ဘာလိုချစ္စတန် ရှေ့နေများအသင်းမှ ဥက္ကဌဖြစ်သူ ဘီလာလ် အန်ဝါရ် ကာစီ၏ ဈာပနအခမ်းအနားဖြစ်ပြီး ဆေးရုံ၏ အရေးပေါ်ဌာနတွင် ပြုလုပ်ခဲ့ခြင်းဖြစ်ကာ ရှေ့နေများ၊ ဂျာနယ်လစ်များအပါအ၀င် လူပေါင်း ရာချီတက်ရောက်ခဲ့ကြသည်။

တိုက်ခိုက်မှုမှာ အရေးပေါ်ဌာန၏ အ၀င်အ၀တွင် ဖြစ်ပွားခဲ့ခြင်းဖြစ်ပြီး သေဆုံးသူများတွင် ဂျာနယ်လစ် ၂ ဦး ပါဝင်ခဲ့ကာ ကျန်ဂျာနယ်လစ်များမှာလည်း ဒဏ်ရာများရရှိခဲ့ကြသည်ဟု ဒေသတွင်း မီဒီယာများက ဖော်ပြခဲ့ကြသည်။

ကာစီအသတ်ခံရမှုနှင့် ယခု အသေခံဗုံးခွဲတိုက်ခိုက်မှုအတွက် မည်သည့်အဖွဲ့ကမှ တာဝန်ယူခြင်းမရှိသေးပေ။

အီရန်နှင့် အာဖဂန်နစ္စတန်တို့နှင့် နယ်နမိတ်ချင်း ထိစပ်သေနည့် ဘာလိုချစ္စတန်ပြည်နယ်မှာ ရေနံနှင့် သဘာဝဓာတ်ငွေ့ ရင်းမြစ်များ ပေါကြွယ်ဝပြီး စွန်နီ၊ ရှီယိုက်နှင့် ခွဲထွက်ရေးသူပုန်များအကြား တိုက်ခိုက်မှုများ၊ အကြမ်းဖက်မှုများဖြစ်ရာ ဒေသဖြစ်သည်။

Ref: Aljazeera