ဂျပန်ရှိ ခရီးသွားလုပ်ငန်းများ မွတ်စလင်များအတွက် အထူးဝန်ဆောင်မှုများ တိုးမြှင့်လုပ်ဆောင်လာ

သြဂုတ် ၁၄၊ ၂၀၁၆
M-Media

– ဖွံဖြိုးတိုးတက်လာသော နိုင်ငံ၏ ခရီးသွားလုပ်ငန်းတွင် မွတ်စလင်ခရီးသွားများ အဆင်ပြေ လွယ်ကူချောမွေ့စေရန်အတွက် အိုဆာကာအခြေစိုက် ခရီးသွားအေဂျင်စီတစ်ခုမှာ မွတ်စလင်ခရီးသွားများအတွက် အထူးဝန်ဆောင်မှုများကို ပေးအပ်နေသည်ဟု သိရသည်။

Miyako International Tourist ကုမ္ပဏီဖြစ်ပြီး ၎င်းတို့ပေးအပ်သည့် အထူးဝန်ဆာင်မှုများတွင် ဂျပန်နိုင်ငံရှိ ဗလီဝတ်ကျောင်းတော်များသို့ ပို့ဆောင်ပေးခြင်း၊ ဟာလာလ်အစားသောက်များ စီစဉ်ပေးခြင်း စသည်တို့ ပါဝင်သည်။ ထိုကုမ္ပဏီ၏ ဂျပန်ခရီးစဉ်များကို တိုကျိုမှစတင်ပြီး အိုဆာကာ၊ ကျိုတိုနှင့် နာရာတို့အပါအ၀င် ကမ္ဘာလှည့်ခရီးသွားများ စိတ်ဝင်စားရာ နေရာအားလုံး ပါဝင်မည်ဖြစ်သည်။

“ကျွန်တော်တို့ရဲ့ ဖောက်သည်တွေက သူတို့စားသောက်ရမယ့်အစားအသောက်နဲ့ပတ်သက်ပြီး စိုးရိမ်သောက ရောက်ကြပါတယ်။ ကျွန်တော်တို့ကတော့ ဘေးအန္တရာယ်ကင်းပြီး စိတ်ငြိမ်းချမ်းတဲ့ ခံစားမှုမျိုးကို ပေးချင်ပါတယ်” ဟု ကုမ္ပဏီမှ တာဝန်ရှိသူတစ်ဦးဖြစ်သူ မိုဟာမက် နာဂျီ မာတာရ်က ပြောကြားခဲ့သည်။

၂၀၁၅ ခုနှစ်တွင် ဂျပန်နိုင်ငံသို့ လာရောက်ကြသည့် ကမ္ဘာလှည့်ခရီးသွားအရေအတွက်မှာ ၁၉.၇၄ သန်းရှိပြီး လွန်ခဲ့သည့် ၁၀ စုနှစ်ကထက် ယှဉ်ပါက ၁၃ သန်း တိုးလာခြင်းဖြစ်သည်။ ထိုအထဲမှ ၂ သန်းကျာ်မှာ မလေးရှာ၊ အင်ဒိုနီးရှားတို့အပါအ၀င် အရှေ့တောင်အာရှ နိုင်ငံများမှဖြစ်သည်။

အရှေ့တောင်အာရှ နိုင်ငံများမှ ဂျပန်နိုင်ငံသို့ လာရောက်လည်ပတ်သူ အရေအတွက်မှာ ယခင်နှစ်ကနှင့် နှိုင်းယှဉ်လျှင် ၂၀ ရာခိုင်နှုန်းကျော် ပိုများလာခဲ့သည်။

Miyako International ခရီးသွားလုပ်ငန်းမှာ ၂၀၁၀ ခုနှစ်ကတည်းက မွတ်စလင်များအတွက် အဆင်ပြေစေမည့် ခရီးသွား အစီအစဉ်များကို စီစဉ်ပေးခဲ့ခြင်းဖြစ်ပြီး ယခုအချိန်တွင် ထိုအစီအစဉ်မှ ရရှိသည့် အမြတ်ငွေမှာ စုစုပေါင်းအမြတ်ငွေ၏ ၃၀ ရာခိုင်နှုန်း ရှိနေပြီဖြစ်သည်။

ဂျပန်အစိုးရနှင့် ခရီးသွားလုပ်ငန်းများမှာ မွတ်စလင်ခရီးသွားများကို ပိုမိုစွဲဆောင်နိုင်ရန်အတွက် အစွမ်းကုန် ဆောင်ရွက်လျက်ရှိနေကြသည်။

Ref: IINA