ဂျော်ဒန်ရှိ ဒုက္ခသည်ကလေးများ ပညာသင်ကြားနိုင်ရေး ဂျာမန်ဘဏ် ကူညီ

သြဂုတ် ၁၆၊ ၂၀၁၆
M-Media

– ဂျော်ဒန်နိုင်ငံ၏ ပညာရေးစနစ်အား အထောက်အကူဖြစ်စေရန်အတွက် ယူရို သန်း ၂၀ တန်ဖိုးရှိ ဘဏ္ဍာရေး သဘောတူညီချက်တစ်ခုကို ဂျော်ဒန် စီမံကိန်းနှင့် နိုင်ငံတကာ ပူးပေါင်းဆောင်ရွက်ရေးဝန်ကြီးဌာနက ဂျာမနီဘဏ်တစ်ခုဖြစ်သော KfW Development Bank နှင့် ပြီးခဲ့သည့် တစ်ပတ်အတွင်း လက်မှတ်ရေးထိုးခဲ့သည်ဟု သိရသည်။

ယခုသဘောတူညီချက်မှာ ဂျော်ဒန်အစိုးရက နိုင်ငံအတွင်းရှိ ပညာရေးစနစ် မြှင့်တင်ပေးရန်အတွက် ၂၀၁၆ ခုနှစ် ဖေဖော်ဝါရီလက အဆိုပါဘဏ်အား တောင်းဆိုထားမှုကို ဖြည့်ဆည်းပေးခြင်းလည်း ဖြစ်သည်။

အဆိုပါငွေများကို ၂၀၁၆-၁၇ ပညာသင်နှစ်အတွက် နှစ်ချိန်ကျောင်းများ လုပ်ငန်းလည်ပတ်မှုအတွင်း လိုအပ်သော လစာငွေများ ပေးချရာတွင် အသုံးပြုမည်ဖြစ်ပြီး၊ ဂျော်ဒန်ရှိ ဆီးရီးယားဒုက္ခသည်ကလေးများ ပုံမှန်ပညာရေးသင်ကြားနိုင်ရေးအတွက် ပညာရေးဝန်ကြီးဌာနအား အထောက်အပံ့တစ်ခု ဖြစ်စေမည်ဖြစ်သည်။

လက်ရှိပညာရေးဝန်ကြီးဌာန၏ ဦးဆောင်မှုအောက်တွင် အခြားသော အလှူရှင်များမှ ငွေကြေးထည့်ဝင်မှုများနှင့်အတူ
ဒုက္ခသည်ကလေးငယ် ၁၉၀၀၀၀ ကို ပညာသင်ကြားနိုင်အောင် ဂျော်ဒန်က ပြုလုပ်ပေးထားသည်။ ထို့ပြင် နိုင်ငံအတွင်းရှိ ပညာရေးကဏ္ဍတွင် ကျောင်းဆရာများနှင့် အုပ်ချုပ်ရေးဝန်ထမ်းနေရာများအတွက် အလုပ်အကိုင်များ ဖန်တီးပေးရန် ရှိနေသည်။

Ref : IINA