မွတ်စလင်မ်လူငယ် ပရဟိတ အဖွဲ့ (MIYF) မှ ရေဘေးသင့်သူများအတွက် သိန်း ၆၀ ဖိုး ပစ္စည်းများလှူ

သြဂုတ် ၁၆၊ ၂၀၁၆
M-Media
သတင်း- မိုးစက်
.   
ရန်ကုန်။    ။ ဧရာဝတီတိုင်း ဒေသရှိ သာပေါင်းမြို့နှင့် ပဲခူးတိုင်း မိုးညို မြို့နယ်များရှိ ရေဘေးသင့် ပြည်သူများကို လူမျိုးဘာသာ မခွဲခြားဘဲ ရန်ကုန်အခြေစိုက် ပရဟိတ ကူညီရေးအဖွဲ့ဖြစ်တဲ့  Myanmar Islamic Youth Foundation (MIYF) မှ သွားရောက် ကူညီခဲ့ကြောင်း သိရပါတယ်။
.
အဆိုပါ အဖွဲ့သည် ယာယီကယ်ဆယ်ရေးစခန်း မှ ရေဘေးသင့်ပြည်သူများအား  ဆန်၊အိတ်၊ ဆီ၊ ကြက်သွန်၊ အာလူး၊ ကုလားပဲ၊ ပေါင်မုန့်၊ မဆလာ၊ ဓါတ်ဆား၊ ငါးသေတ္တာ၊ အသင့်စား လက်ဖက် အကြော်စုံ၊ သောက်ရေသန့် တို့ကို အလျဉ်းသင့်သလို ထောက်ပံ့လှူဒါန်းခဲ့ကြကြောင်း သိရပါတယ်။
.
“ကျွန်တော်တို့ လှူတယ်ဆိုတာ လူမျိုးဘာသာ မရှိပါဘူး။ ရွာက တာဝန်ရှိသူတွေနဲ့ တိုင်ပင်ပြီးတော့ တကယ်လိုအပ်နေတဲ့လူတွေကို လိုသလို ခွဲခြမ်းပြီး လှူဒါန်းခဲ့တာပါ” MIYF  အဖွဲ့ မှ အတွင်းရေးမှူးက  ပြောပါတယ်။
.
MIYF အဖွဲ့ သည် သာပေါင်းမြို့နယ်မှ ရေဘေးသင့်ပြည်သူများအတွက် ၃၅ သိန်းကျော်၊ မိုးညိုမှ ရေဘေးသင့်ပြည်သူများအတွက် ၂၅ သိန်းကျော် လှူဒါန်းခဲ့ပြီးလည်း ဖြစ်ကြောင်း သိရှိရပါတယ်။
.
အလှူငွေများမှာလည်း အဖွဲ့ဝင်များ လစဉ်ကြေးများ အပြင်၊ ရေဘေးအတွက် ပြင်ပမှ သီးသန့် လှူဒါန်းငွေများလည်း ရရှိခဲ့ကြောင်း ဆိုပါတယ်။
.
” ကျွန်တော်တို့ အစ္စလာမ်သာသာနာရဲ့ အဆုံးအမမှာ လူတွေရဲ့ အသက်ကို ကယ်ဖို့၊ တန်ဖိုးထားဖို့လည်း ဆိုထားပါတယ်။ ကျွန်တော်တို့ အခုလုပ်နေရတဲ့ ရည်ရွယ်ချက်တွေကလည်း ဘာသာတရားရဲ့ အဆုံးအမတွေကို လိုက်နာပြီးတော့ လူသားချင်း စာနာစိတ်နဲ့ ကူညီနေတာ ဖြစ်ပါတယ်” လို့ MIYF  အဖွဲ့ မှ အတွင်းရေးမှူးက လှူဒါန်းရခြင်း ရည်ရွယ်ချက်နှင့် ပတ်သက်ပြီး ရှင်းပြပါတယ်။
.
Myanmar Islamic Youth Foundation ကို ၂၀၁၅ ခုနှစ် ဇူလိုင်လ ကစတင်ဖွဲ့စည်းခဲ့ပြီး သဘာဝဘေးအန္တရယ်များ၊ ပညာရေးအတွက် လိုအပ်ချက်ရှိသော နေရာများကို အဓိက လိုက်လံကူညီနေသော အဖွဲ့တစ်ခုလည်း ဖြစ်ပါတယ်။
.
ဓါတ်ပုံ-MIYF Facebook Page