ဂွါတာနာမိုတွင် အပြစ်မရှိဘဲ ထိန်းသိမ်းထားသည့် အကျဉ်းသားများကို ယူအေအီးသို့ ကန် လွှဲပေး

သြဂုတ် ၁၇၊ ၂၀၁၆
M-Media

– အမေရိကန်စစ်တပ်က စီမံခန့်ခွဲပြီး မကောင်းသတင်းဖြင့် ကျော်ဇောသည့် ဂွါတာနာမိုအကျဉ်းစခန်းမှ အကျဉ်းသား ၁၅ ဦးကို ယမန်နေ့က အာရပ်စော်ဘွားများပြည်ထောင်စု (ယူအေအီး) နိုင်ငံသို့ အမေရိကန်က လွှဲပြောင်းပးခဲ့သည်ဟု သိရသည်။

အဆိုပါ အကျဉ်းသားများမှာ ယီမင်နိုင်ငံသား ၁၂ ဦး၊ အာဖဂန် ၃ ဦးတို့ဖြစ်ကြပြီး ၎င်းတို့ထဲမှ အချို့မှာ မည်သည့် အပြစ်မှ မကျူးလွန်ခဲ့သောကြောင့် တရားစွဲဆိုမှု မခံရဘဲ ၁၄ နှစ်ကြာ ချုပ်နှောင်ခံခဲ့ရသူများ ဖြစ်သည်။ ၎င်းတို့ကို ယူအေအီးတွင် ပြန်လည်နေရာချထားပေးမည်ဖြစ်ပြီး အိုဘားမားလက်ထက် ဂွါတာနာမို အကျဉ်းသားများကို တစ်ကြိမ်းတည်း အများဆုံး လွှဲပြောင်းပေးမှုလည်း ဖြစ်သည်။

ပင်တဂွန်မှထုတ်ပြန်သော ကြေငြာချက်တွင် ဂွာတာနာမိုအကျဉ်းစခန်းအား ပိတ်ပစ်ရေးအတွက် အမရိကန်၏ အားထုတ်မှုကို လိုလိုချင်ချင် ပံ့ပိုးပေးမှုနှင့် လူသားချင်း စာနာထောက်ထားမှုဆိုင်ရာ အပြုအမူများအတွက် ယူအေအီးကို ကျေးဇူးတင်သည်ဟု ဖော်ပြထားသည်။

၂၀၀၁ ခုနှစ် စက်တင်ဘာ ၁၁ အကြမ်းဖက်တိုက်ခိုက်မှု နောက်ပိုင်းတွင် ဂွာတာနာမိုအကျဉ်းစခန်း၌ ထိန်းသိမ်းထားသည့် အကျဉ်းသားအရေအတွက်မှာ ၇၈၀ ခန့် ရှိခဲ့သည်။

လူ့အခွင့်အရေးအဖွဲ့ဖြစ်သော Amnesty International USA ကမူ အမေရိကန်အစိုးရ၏ ထိုဆောင်ရွက်မှုကို ကြိုဆိုခဲ့ပြီး နာမည်ဆိုးဖြင့်ကျော်ကြားသည့် ဂွါတာနာမိုအကျဉ်းစခန်းအား ရာထူးသက်တမ်းမကုန်ခင် ပိတ်ပစ်ရေး အိုဘားမား၏ အလေးထားဆောင်ရွက်မှုလက္ခဏာ ဖြစ်သည်ဟု ပြောကြားခဲ့သည်။

ဂွါတာနာမိုအကျဉ်းစခန်းမှ ထိန်းသိမ်းထားသူများတွင် ၉ ဦးမှာ ထိန်းသိမ်းခံရစဉ်အတွင်း သေဆုံးခဲ့သည်။ သမ္မတဘုရ်ှလက်ထက်တွင် အကျဉ်းသား ၅၃၂ ဦးကို လွှတ်ပေးခဲ့ပြီး၊ သမ္မတအိုဘားမား လက်ထက်တွင် ၂၄၂ ဦး လွှတ်ပေးခဲ့ကာ၊ လက်ရှိတွင် အကျဉ်းစခန်း၌ ၆၁ ဦး ကျန်ရှိနေသည်။

ထိုအထဲမှ ၂၁ ဦးမှာ အပြစ်မရှိကြောင်း လုံးဝ ရှင်းလင်းနေပြီဖြစ်သည်။ ဂွါတာနာမိုအကျဉ်းစခန်းသက်တမ်းတစ်လျှောက် ထိန်းသိမ်းခဲ့သည့် အကျဉ်းသား ၇၈၀ တွင် ၉/၁၁ တိုက်ခိုက်မှုမှ ၅ ဦး အပါအ၀င် ၁၀ ဦးသာ အပြစ်ရှိကြောင်း တွေ့ရှိရ၍ တရားစွဲဆိုနိုင်ခဲ့သည်။

Ref : Aljazeera