ဂျပန်ပင်လယ်ပြင်တွင် တရုတ်ရေတပ် စစ်ရေးလေ့ကျင့်

သြဂုတ် ၂၀၊ ၂၀၁၆
M-Media

– ဂျပန်ပင်လယ်ပြင်အတွင်း ဒုံးကျည်တပ် စစ်သင်္ဘောများ ပါဝင်သည့် စစ်ရေးလေ့ကျင့်မှုတစ်ခုကို မိမိတို့က ပြုလုပ်ခဲ့သည်ဟု တရုတ် ပြည်သူ့လွတ်မြောက်ရေးတပ်မတော်၏ နေ့စဉ်သတင်းစာတွင် ယမန်နေ့က ဖော်ပြခဲ့သည်။

စစ်ရေးလေ့ကျင့်မှုကို ဂျပန်ပင်လယ်ပြင်၏ အစိတ်အပိုင်းတစ်ခုတွင် ပြုလုပ်ခဲ့ခြင်းဟုသာ ရေးသားထားပြီး အသေးစိတ်ကိုမူ ထုတ်ဖော်ခဲ့ခြင်း မရှိပေ။

“များသောအားဖြင့် ပင်လယ်ပြင်ရဲ့ နိုင်ငံတကာရေပိုင်နက်မှာ ကမ္ဘာ့နိုင်ငံအသီးသီးက စစ်တပ်တွေဟာ စစ်ရေးလေ့ကျင့်မှုတွေကို ပြုလုပ်လေ့ရှိပါတယ်၊ ဒီနှစ်မှာတော့ အနောက်ပစိဖိတ်အခြမ်းအထိ စစ်ရေးလေ့ကျင်မှုတွေပြုလုပ်ဖို့ ကျွန်တော်တို့ ရေတပ်ကို ပြင်ဆင်ထားပါပြီးပါပြီ” ဟု သတင်းစာက ဆိုသည်။

ဂျပန်ပင်လယ်ပြင်တွင် ပြုလုပ်ခဲ့သည့် စစ်ရေးလေ့ကျင်မှုတွင် ဖျက်သင်္ဘော Xi’an၊ ဖရီးဂိတ် Hengshui နှင့် ထောက်ပံ့ရေးသင်္ဘော Goyouhu တို့ ပါဝင်ခဲ့သည်။ လေ့ကျင့်မှုကို ကွပ်ကဲခဲ့သည့် တပ်မှူး Xu Haihua ကမူ အဆိုပါ လေ့ကျင့်မှုမှာ နှစ်စဉ်ပြုလုပ်နေကြ လေ့ကျင့်မှုတစ်ခုဖြစ်ပြီး ပင်လယ်ပြင်တွင် ရေတပ်၏ စွမ်းဆောင်ရည်မြင့်မားစေရန် ရည်ရွယ်ခြင်းဖြစ်သည်ဟု ပြောကြားခဲ့သည်။

တရုတ်စစ်ဘက်နေ့စဉ်သတင်းစာကမူ အဆိုပါစစ်ရေးလေ့ကျင့်မှုကို နိုင်ငံတကာဥပဒေနှင့်အညီ လုပ်ကိုင်ဆောင်ရွက်ခြင်းဖြစ်ပြီး မည်သည့်နိုင်ငံ၊ ဒေသ၊ ပစ်မှတ်ကိုမျှ ရည်ရွယ်ခြင်းမရှိကြောင်း ထည့်သွင်းဖော်ပြခဲ့သည်။

Ref; Presstv