မြောက်အမေရိကမှ အကြီးဆုံး မွတ်စလင်အသင်း ညီလာခံကျင်းပမည်

စက်တင်ဘာ ၁၊ ၂၀၁၆
M-Media

– မြောက်အမေရိက အစ္စလာမ်အသင်း (ISNA) မှာ ချီကာဂိုမြို့၌ မနက်ဖြန်တွင် ၅၃ ကြိမ်မြောက် နှစ်ပတ်လည်ညီလာခံကို ပြုလုပ်မည်ဖြစ်ပြီး လေးရက်တာကြာမြင့်မည့် အဆိုပါ ညီလာခံခေါင်းစဉ်ကို “Turning Points: Navigating Challenges, Seizing Opportunities” (အလှည့်အပြောင်းများ – စိန်ခေါ်မှုများကို ရှာဖွေခြင်းနှင့် အခွင့်အလမ်းများ အရယူခြင်း) ဟု အမည်ပေးထားသည်။

ISNA အဖွဲ့ အထွေထွေအတွင်းရေးမှူး ဟာဇင်မ် ဘာတာက ညီလာခံမှာ တက်ရောက်လာသူတို့အတွက် အဖိုးမဖြတ်နိုင်သော အတွေ့အကြုံများ ရရှိမည်ဖြစ်ပြီး၊ ညီလာခံသို့တက်ရောက်ရန်လည်း တိုက်တွန်းခဲ့သည်။

ISNA အဖွဲ့ချုပ်ဥက္ကဌ အဇ်ဟရ် အဇီးဇ်၏ ထုတ်ပြန်ကြေညာချက်တွင် “ISNA အဖွဲ့ဟာ လူ့အဖွဲ့အစည်း တိုးတက်ဖွံ့ဖြိုးရေးကို ညီလာခံများ၊ နှီးနှောဖလှယ်ပွဲများ၊ ပညာရေးဖိုရမ်များ၊ ဘာသာပေါင်းစုံ ချစ်ကြည်ရေးလှုပ်ရှားမှုများ၊ လူငယ်စီမံကိန်းများ၊ နိုင်ငံရေးစေ့စပ်ကြောင်းလမ်းခြင်းနဲ့ အခြားသောအစီအစဉ်တွေကိုလည်း အားတက်သရောလုပ်ဆောင်လျက်ရှိပါတယ်” ဟု ဖော်ပြထားသည်။

“ISNA ရဲ့ နှစ်ပတ်လည်ညီလာခံဟာ မွတ်စလင်အသိုင်းအ၀ိုင်းကို စုစည်းရုံသက်သက်သာ မဟုတ်ပါဘူး၊ အစ္စလာမ်ကြောက်ရောဂါကဲ့သို့သော ပြဿနာမျိုးတွေကို ရင်ဆိုင်ဖို့အပြင် ကျွန်တော်တို့ရဲ့ ပန်းတိုင်က ငြိမ်းချမ်းရေးနဲ့ ပိုမိုနားလည်မှုရှိလာစေရေး အမျိုးမျိုးသော ယုံကြည်မှုတွေနဲ့ နောက်ခံအသိုင်းအ၀ိုင်းတွေက လူတွေကို စုစည်းစေဖို့ပဲ ဖြစ်ပါတယ်” ဟု ဥက္ကဌက ထည့်သွင်းပြောကြားခဲ့သည်။

ညီလာခံသို့ ဧည့်သည်တော်ပေါင်း ၂၀၀၀၀ ကျော် တက်ရောက်မည်ဟု ခန့်မှန်ထားပြိး ယနေ့မျက်မှောက်ခေတ်တွင် မြောက်အမေရိကနှင့် ကမ္ဘာတစ်ဝှမ်းရှိ မွတ်စလင်များ ကြုံတွေ့နေရသည့် အခက်အခဲများအား ဖြေရှင်းရေး၊ အစ္စလာမ်ကြောက်ရောဂါ တိုက်ဖျက်ရေး စသည့် ကိစ္စများကို ဆွေးနွေးမည်ဖြစ်သည်။

Ref; IINA