နိုင်ငံအသင်းမှ အနားယူရန် ကြေငြာခြင်းမှာ လှည့်စားမှုမဟုတ်ဟု မက်ဆီပြော

စက်တင်ဘာ ၂၊ ၂၀၁၆
M-Media

– နိုင်ငံအသင်းမှ အနားယူမည်ဆိုသည့် ဆုံးဖြတ်ချက်နှင့်ပတ်သက်၍ မည်သူကိုမှ မလှည့်စားခဲ့ဟု ဘာစီလိုနာအသင်း၏ အာဂျင်တိုင်းတိုက်စစ်မှူး လီယွန်နယ်မက်ဆီက ပြောကြားလိုက်သည်။

ဇွန်လက ကိုပါအမေရိကဘောလုံးပြိုင်ပွဲ ဗိုလ်လုပွဲတွင် ချီလီအသင်းအား ရှုံးနိမ့်ခဲ့ပြီးနောက် မက်ဆီမှာ လက်ရွေးစင်အသင်းမှ အနားယူတော့မည်ဟု ကြေငြာခဲ့သည်။ ထိုအရှုံးမှာ အာဂျင်တီးနားအနေဖြင့် ၃ နှစ်အတွင်း အဓိကပြိုင်ပွဲများ၌ ၃ ကြိမ်မြောက် ဒုတိယဖြင့်သာ ကျေနပ်ခဲ့ရခြင်းဖြစ်သည်။

မက်ဆီ၏ ထိုကြေငြာမှုကို ပြင်ဆင်ရန်အတွက် ကမ္ဘာတစ်ဝှမ်းမှ တောင်းဆိုမှုများ ပြုလုပ်ခဲ့သည်။ အဂျင်တီးနားအသင်း၏ နည်းပြသစ် အဒ်ဂါဒို ဘူဇာက စပိန်အထိသွားရောက်ကာ မက်ဆီနှင့်တွေ့ဆုံခဲ့ပြီး ထိုနောက်ပိုင်းတွင် မက်ဆီကလည်း ၎င်း၏ ဆုံးဖြတ်ချက်ကို ပြင်ဆင်ခဲ့သည်။

ယမန်နေ့က ဥရုဂွေးအသင်းနှင့် ကစားခဲ့သည့် ကမ္ဘာဖလားခြေစစ်ပွဲတွင် အာဂျင်တီးနားအသင်းက အနိုင်ရရှိခဲ့ပြီး တစ်လုံးတည်းသော အနိုင်ဂိုးကို မက်ဆီက သွင်းပေးခဲ့ခြင်းဖြစ်သည်။

မက်ဆီကမူ ၎င်း၏ နိုင်ငံအသင်းမှ အနားယူရန် ကြေငြာခဲ့ခြင်းမှာ လှည့်စားခြင်းမဟုတ်ဟု ဆိုသည်။

“(နိုင်ငံအသင်းမှာ ပြန်ပါခွင့်ရတဲ့အတွက်) ကျွန်တော် ကျေးဇူးတင်ပါတယ်။ ဒါပေမယ့် ကျွန်တော် အနားယူမယ်လို့ပြောခဲ့တာဟာ ဘယ်သူ့ကိုမှ လှည့်စားခဲ့တယ်လို့ မထင်ပါဘူး။ ဖြစ်ပျက်ခဲ့တာတွေအတွက် ကျွန်တော်တို့ တော်တော်လေး စိတ်ပျက်ခဲ့ရပါတယ်။ ဒါပေမယ့် အဲဒီနောက်ပိုင်းမှာတော့ ကျွန်တော် ပိုကောင်းတာကို စဉ်းစားနိုင်ခဲ့ပါတယ်။ ပါတွန် (ဘူဇာ) နဲ့ ကျွန်တော် စကားပြောခဲ့တယ်။ ဒီအခြေအနေကို ကျော်ဖြတ်ဖို့ ပရိတ်သတ်တွေကလည်း ဖေးမပေးခဲ့ကြပါတယ်” ဟု မက်ဆီက ပြောကြားခဲ့သည်။

Ref : Goal