အချုပ်ခန်းအတွင်း မြန်မာလုပ်သားများ အခြေအနေဆိုးရွားနေကြောင်း မလေးရှားရက်ပါတစ်ဦး ရေးသားမှု မြန်မာသံရုံးသတင်းထုတ်ပြန်

စက်တင်ဘာ ၊ ၄ ၊ ၂၀၁၆
M-Media
သတင်း- သီဟ
.
မကြာသေးမီက အဖမ်းခံခဲ့ရသည့် မလေးရှားမှ ရက်ပါအဆိုတော် နာမီဝီမှာ ဖမ်းဆီးခံ မြန်မာရွှေ့ပြောင်းလုပ်သားများ အချုပ်ခန်းထဲတွင် ရင်ဆိုင်နေရသည့် အခြေအနေဆိုးများကို ၄င်း၏ ဆိုရှယ်မီဒီယာ စာမျက်နှာမှ တဆင့် ရေးသားဖော်ပြခဲ့သည်။
.
အဆိုပါကိစ္စရပ်နှင့် ပတ်သက်ပြီး မြန်မာသံရုံး (ကွာလာလမ်ပူ) ၏ တရားဝင် Facebook စာမျက်နှာမှ အောက်ပါအတိုင်း သတင်းထုတ်ပြန်ဖော်ပြထားတာကို တွေ့ရှိရပါသည်။
.
မလေးရှား Rapper အဆိုတော် Namewee ၏ လူမှုကွန်ယက် စာမျက်နှာတွင် ဖေါ်ပြခဲ့သည့် အချုပ်ခန်းအတွင်း တွေ့ဆုံခဲ့သည် ဆိုသော မြန်မာနိုင်ငံသား ၁၅ ဦးနှင့်ပတ်သက်၍ မြန်မာသံရုံး၊ ကွာလာလမ်ပူမြို့မှ သွားရောက်စိစစ်ခဲ့ခြင်း
.
၁။ မလေးရှားနိုင်ငံမှ ရက်(ပ်)ပါ အဆိုတော်တစ်ဦးဖြစ်သူ Namewee သည် ပီနန်းမြို့ Bayan Baru အချုပ်ခန်းတွင် သြဂုတ်လ ၂၂ ရက်နေ့မှ ၂၅ ရက်နေ့ အထိ ထိန်းသိမ်းခံခဲ့ရပြီး ၎င်း ထိန်းသိမ်းခံနေရစဉ် အတွင်း မြန်မာနိုင်ငံသား (၁၅) ဦးနှင့် တွေ့ဆုံခဲ့ရသည့် အခြေအနေတို့ကို ၎င်း၏ လူမှုကွန်ယက် စာမျက်နှာ (Facebook) တွင် သြဂုတ်လ ၂၅ ရက်နေ့က ဖေါ်ပြခဲ့ခြင်းနှင့် ပတ်သက်၍ မြန်မာသံရုံး၊ ကွာလာလမ်ပူမြို့မှ ပထမအတွင်းဝန် ဦးတင်ဝင်းအောင်သည် ပီနန်းမြို့ Timur Laut ရဲစခန်းမှ တာဝန်ခံရဲအရာရှိအား ၁-၉-၂၀၁၆ ရက်နေ့တွင်လည်းကောင်း ၊ ၂-၉-၂၀၁၆ ရက်နေ့တွင် လည်းကောင်း သွားရောက်တွေ့ဆုံမေးမြန်းကာ အဆိုပါဖြစ်စဉ် မှန်ကန်မှု ရှိ-မရှိ စိစစ်အတည်ပြုပေးပါရန် ဆွေးနွေးညှိနှိုင်းခဲ့ပါသည်။
.
၂။ စုံစမ်းသိရှိရသည့် သတင်း အချက်အလက်အရ အဆိုပါရက်များအတွင်း ပီနန်းမြို့တွင် တရားမဝင်နေထိုင်သူများအား ဖမ်းဆီးမှုများပြုလုပ်ခဲ့ရာ အခြားနိုင်ငံသားများနှင့်အတူ တရားမဝင် မြန်မာနိုင်ငံသားအချို့လည်း ဖမ်းဆီထိန်းသိမ်းခံရပါကြောင်း၊ လူဝင်မှုကြီးကြပ်ရေးဥပဒေအရ ဖမ်းဆီးထိန်းသိမ်းခံရသူများကို ရဲစခန်း အချုပ်ခန်းအတွင်း ရမန်ဖြင့် အများဆုံး ၁၄ ရက်သာ ထိန်းသိမ်းထားခွင့်ရှိပါကြောင်း ၊ အချုပ်ခန်းအတွင်း ကျန်းမာရေး မကောင်းသူများအား အခြားအချုပ်သားများသို့ ရောဂါ မကူးစက်စေရန် သီးခြားခွဲထားပါကြောင်း၊ နောက်ဆုံး သြဂုတ်လ ၂၁ ရက်နေ့က ဖမ်းဆီးထိန်းသိမ်းထားသူများအား စက်တင်ဘာလ ၂ ရက်နေ့တွင် Juru ထိန်းသိမ်းရေးစခန်းသို့လွှဲပြောင်း၍ လူဝင်မှုကြီးကြပ်ရေးဥပဒေအရ ဆက်လက်အရေးယူသွားမည်ဖြစ်ကြောင်း၊ အဆိုတော် Namewee အနေဖြင့် လူထုအား ၎င်းရင်ဆိုင်နေရသော ပြသနာမှ အာရုံလွှဲပြောင်းစေရန် ရည်ရွယ်ကာ မြန်မာနိုင်ငံသားများနှင့်ပတ်သက်၍ မဟုတ်-မမှန် ဖေါ်ပြခဲ့သည် ဟု ယူဆပါကြောင်း စသည်ဖြင့် စုံစမ်းသိရှိခဲ့ရပါသည်။
.
၃။ အထက်ဖော်ပြပါကဲ့သို့ ကိစ္စရပ်များသည် လူမှုကွန်ယက်ကို အသုံးချကာ လူထုအား အထင်အမြင်လွှဲမှားမှုများ ဖြစ်ပေါ်စေနိုင်သဖြင့် မြန်မာသံရုံး၊ ကွာလာလမ်ပူမြို့မှ တာဝန်ရှိသူများအား တိုက်ရိုက်မေးမြန်းစိစစ်ခဲ့ပြီး သတင်းမှန်ကို သိရှိနားလည်နိုင်ပါရန် ပြန်လည်ဖော်ပြပေးခြင်း ဖြစ်ပါသည်။ ထို့ပြင် မြန်မာသံရုံး ၊ ကွာလာလမ်ပူမြို့အနေဖြင့် မလေးရှားနိုင်ငံ၏ လူဝင်မှုကြီးကြပ်ရေး ဥပဒေအရ အရေးယူခံရသည့် မန်မာနိုင်ငံသားများ ပြစ်ဒဏ်ကျခံပြီးနောက် သက်ဆိုင်ရာလူဝင်မှုကြီးကြပ်ရေး ထိန်းသိမ်းရေးစခန်းများသို့ ရောက်ရှိပါက ၎င်းတို့အား သွားရောက်တွေ့ဆုံကာ နိုင်ငံသား စိစစ်၍ မြန်မာနိုင်ငံသား မှန်ကန်သူများ အား မြန်မာနိုင်ငံသို့ အမြန်ဆုံး ပြန်လည်ထွက်ခွာနိုင်ရေး စီစဉ်ဆောင်ရွက်ပေးလျက်ရှိပါကြောင်း သိသာနိုင်ရန် ဖေါ်ပြအပ်ပါသည်။
.
လေးစားမှုဖြင့်
မြန်မာသံရုံး၊ ကွာလာလမ်ပူမြို့
၂၀၁၆ ခုနှစ် စက်တင်ဘာလ ၃ ရက်

ဆက်စပ်သတင်းဖတ်ရှုရန်
—————————
အချုပ်ခန်းအတွင်း မြန်မာလုပ်သားများ အခြေအနေဆိုးရွားမှုကို မလေးရှားရက်ပါတစ်ဦး ဖွင့်ချ
http://www.m-mediagroup.com/news/59517