ထိုင်း-မလေး နယ်စပ်တွင် တံတိုင်းဆောက်မည်

စက်တင်ဘာ ၉၊ ၂၀၁၆
M-Media

– မှောင်ခိုလုပ်ငန်းများကို တားဆီးရန်အတွက် ထိုင်းနှင့် မလေးရှားတို့မှာ ၎င်းတို့နှစ်နိုင်ငံ ထိစပ်နေသည့် နယ်စပ်တစ်လျှောက်တွင် တံတိုင်းတစ်ခု တည်ဆောက်ရန် အစီအစဉ်များကို ဆွေးနွေးတော့မည်ဖြစ်ကြောင်း ထိုင်းတာဝန်ရှိသူများက ယမန်နေ့တွင် ပြောကြားခဲ့သည်။

၆၄၀ ကီလိုမီတာရှည်သော အဆိုပါ နယ်စပ်မှာ လူကုန်ကူးမှု၊ မူးယစ်ဆေးဝါးနှင့် လက်နက်များမှောင်ခိုမှုများ သန္ဓေတည်ပေါက်ဖွားရာ နေရာဖြစ်ပြီး ထိုမှတစ်ဆင့် ရာဇ၀တ်မှုများမှာ ဒေသတွင်းနိုင်ငံများသို့ ပြန့်နှံ့ရောက်ရှိကြသည်။ ထိုင်းနိုင်ငံကမူ ပြီးခဲ့သည့်နှစ်က ဒေသတွင်း တရားမ၀င် ကုန်ကူးမှု လမ်းကြောင်းများကို နှိမ်နှင်းခဲ့သည်။

ထိုင်းနိုင်ငံသို့ ယခုသီတင်းပတ်အတွင်း လာရောက်လည်ပတ်မည့် မလေးရှားဝန်ကြီးချုပ် နာဂျစ်ဘ်မှာ ထိုင်းဝန်ကြီးချုပ် ပရာယွတ် ချန်အိုချာနှင့် တွေ့ဆုံရန် စီစဉ်ထားပြီး လုံခြုံရေးဆိုင်ရာ ပူးပေါင်းဆောင်ရွက်မှု၊ ရင်းနှီးမြှုပ်နှံမှုများအကြောင်း ဆွေးနွေးမည်ဖြစ်သည်။

ထို့ပြင် နယ်စပ်တစ်လျှောက် တံတိုင်းတည်ဆောက်ရေးကိစ္စကိုပါ ထည့်သွင်းဆွေးနွေးမည်ဖြစ်ကြောင်း ထိုင်းနိုင်ငံခြားရေးဝန်ကြီးဌာနမှ တာဝန်ရှိသူတစ်ဦးက ပြောကြားခဲ့သည်။

“နာဂျစ်ရဲ့ လည်ပတ်မှုအတွင်းမှာ ဒါက ကဏ္ဍတစ်ခုအနေနဲ့ ပါဝင်မှာဖြစ်ပေမယ့် ထိပ်တန်းဦးစားပေးတော့ မဟုတ်ပါဘူး။ နားလည်မှုစာချွန်လွှာ ရေးထိုးတဲ့ အဆင့်မှာပဲ ရှိအုံးမှာပါ” ဟု အဆိုပါ တာဝန်ရှိသူက ဆိုသည်။

ထိုင်း-မလေးရှား နယ်စပ်မှာ လူကုန်ကူးမှု အဓိကလမ်းကြောင်းလည်းဖြစ်ပြီး ပြီးခဲ့သည့်နှစ်အတွင်း လူကုန်ကူးသူများ အသုံးပြုခဲ့သည်ဟု ယူဆရသည့် စခန်းများ၊ လူကုန်ကူးခံရသူများဟု ယူဆရသည့် အစုလိုက်အပြုံလိုက် မြှုပ်နှံထားမှုများကို ထိုင်းဘက်အခြမ်းရှိ နယ်စပ်တွင် တွေ့ရှိခဲ့သည်။

Ref : channelnewsasia