ချယ်ဆီးမှာ အသင်းကြီးစိတ်ဓာတ်မျိုးမရှိဟု နည်းပြ ကွန်တီပြော

စက်တင်ဘာ ၁၇၊ ၂၀၁၆
M-Media

– အမှတ်ပေးပြိုင်တွင် ပထမဆုံးအရှုံးနှင့် ကြုံတွေ့ခဲ့ရသည့် ချယ်ဆီးအနေဖြင့် အသင်းကြီးတစ်သင်းတွင်ရှိရမည့် အာရုံစူးစိုက်မှုမျိုး မရှိသေးဟု နည်းပြ အန်တိုနီယို ကွန်တီက ပြောကြားလိုက်သည်။

ယမန်နေ့က ပရီးမီးယားလိဂ်ပွဲစဉ်အဖြစ် စတမ်းဖို့ဘရစ်ခ်ျတွင် လီဗာပူးလ်နှင့် ကစားခဲ့ရာ ပထမပိုင်းတွင်ပင် ၂ ဂိုး ပေးခဲ့ရပြီး တစ်ဂိုးသာ ပြန်သွင်းနိုင်ကာ ယခုနှစ် ပရီးမီးယားလိဂ်တွင် ပထမဆုံးရှုံးပွဲကို ကြုံတွေ့ခဲ့ရသည်။ ချယ်ဆီးမှာ ပြီးခဲ့သည့်တစ်ပတ် ဆွမ်းဆီးနှင့်ပွဲတွင်လည်း နောက်မှလိုက်ကစားကာ ၂ ဂိုးစီ သရေကျခဲ့သည်။

ကွန်တီကမူ မိမိတို့အသင်းမှာ တစ်ခါတစ်ရံတွင် မိမိကိုယ်ကို အားရကျေနပ်မှု လွန်ကဲနေသည်ဟု ဆိုသည်။

“အရှုံးကိုရှာရတာ တစ်ခါတစ်ရံမှာ လွယ်ကူပြီး တစ်ခါတစ်ရံမှာ ခက်ခဲပါတယ်။ (လီဗာပူးလ်နဲ့ပွဲမှာ) ပေးလိုက်ရတဲ့ဂိုးတွေက ထူးဆန်းပါတယ်။ ကျွန်တေ်ာတို့ အန္တရာယ်ကို သိရမှာဖြစ်ပေမယ့် ဒီနေ့မှာ ကျွန်တော်တို့ သိအောင် မလုပ်နိုင်ခဲ့ပါဘူး။ ဒီပွဲကနေပြီးတော့ ကျွန်တော်တို့ သင်ခန်းစာ ယူရမှာဖြစ်ပြီး၊ ပြီးခဲ့တဲ့ရာသီကလို ဆိုးရွားတဲ့ အခြေအနေမျိုးကို မလိုချင်ဘူးဆိုရင်တော့ ဒါကို နားလည်ဖို့ လိုပါတယ်” ဟု ကွန်တီက ပြောကြားခဲ့သည်။

Ref: Goal