ယာယာတိုးယေး နိုင်ငံတကာကစားသမားဘ၀မှ အနားယူ

စက်တင်ဘာ ၂၀၊ ၂၀၁၆
M-Media

– မန်ချက်စတာစီးတီးအသင်း၏ အိုက်ဗရီကို့စ်ကွင်းလယ်လူ ယာယာ တိုးယေးက ၎င်းအနေဖြင့် နိုင်ငံတကာ ကစားသမားဘ၀မှ အနားယူလိုက်ပြီဟု ကြေငြာခဲ့သည်။

အသက် ၃၃ နှစ်အရွယ်ရှိ တိုးယေးမှာ ၂၀၀၄ ခုနှစ်မှစ၍ အိုက်ဗရီကို့စ် လက်ရွေးစင်အသင်းတွင် ပါဝင်ကစားခွင့် ရခဲ့သူဖြစ်ပြီး ၂၀၁၅ ခုနှစ် ဖေဖော်ဝါရီလတွင် အိုက်ဗရီကို့စ်အသင်းက အာဖရိကနိုင်ငံများဖလားကို ဆွတ်ခူးခဲ့ပြီးနောက်ပိုင်း နိုင်ငံအသင်းမှ အနားယူထားသည်။

မတ်လက အသင်းလူစာရင်းတွင် ပါဝင်ခဲ့သော်လည်း ယနေ့တွင်မူ တိုးယေးက အနားယူကြောင်း Twitter စာမျက်နှာမှတစ်ဆင့် ကြေငြာခဲ့သည်။

“ချမှတ်ဖို့ခက်ခဲတဲ့ ဆုံးဖြတ်ချက်တွေ ရှိပါတယ်။ ဒါပေမယ့် ကျွန်တော့်အနေနဲ့ မျိုးဆက်သစ်တွေကို လမ်းဖွင့်ပေးရပါမယ်။ နိုင်ငံအသင်းအတွက် ၁၄ နှစ်ကြာ ကစားပြီးတဲ့နောက်ပိုင်းမှာ အိုက်ဗရီကို့စ်နဲ့အတူ စွန်စားမှုကို ကျွန်တော် အဆုံးသတ်ပါတော့မယ်။ အားပေးသူတွေ၊ ကျွန်တော့ပရိသတ်တွေအားလုံးကို ကျေးဇူးတင်ပါတယ်” ဟု တိုးယေးက ၎င်း၏ ကြေငြာချက်တွင် ဖော်ပြထားသည်။

လက်ရှိတွင် တိုးယေးမှာ မန်စီးတီးအသင်းတွင် ရုန်းကန်နေရပြီး နည်းပြသစ် ဂွာဒီယိုလာအောက်တွင် အရေးပါသည့်ပွဲ တစ်ပွဲသာ ပါဝင်ကစားခွင့် ရထားသည်။

Ref: Goal