သူ့အမည်နဲ့ ဓါတ်ပုံသုံးပြီး လုပ်ကြံသတင်း ဖန်တီးသူများကို တရားစွဲဖို့ လုပ်ဆောင်မည်ဟု ဦးကိုနီကြေညာ

စက်တင်ဘာ ၂၃ ၊ ၂၀၁၆
M-Media
သီဟ

ဘာသာရေး နိုင်ငံရေး အကဲဆတ်တဲ့ ကိစ္စ ရပ်များတွင် သူအမည်နှင့် ဓါတ်ပုံများ အသုံးပြုပြိး မမှန်ကန်သည့် လုပ်ကြံသတင်းများ ဖန်တီးဖြန့်ဝေနေသူတွေကို တရားဥပဒေကြောင်း အရ အရေးယူပြုလုပ်နိုင်ဖို့ ဆောင်ရွက်တော့မှာဖြစ်ကြောင်း တရားလွှတ်တော် ရှေ့နေကြီး ဦးကိုနီက ၄င်း၏ ဆိုရှယ်မီဒီယာ စာမျက်နှာမှာ ရေးသားထားပါတယ်။

၂၀၁၆ မတ် ၁ ရက်နေ့တွင်  မြန်မာ့ရိုးရာ သင်္ကြန်ကို ၂၀၁၇ ခုနှစ်၌ စတင်ဖျက်သိမ်းမည်ဟု ရှေ့နေဦးကိုနီက ပြောဆိုခဲ့ကြောင်း ဒီမိုကရက်တစ်ဗမာ့အသံ လိုဂို အသုံးပြုထားသည့် အကောင့်တခုတွင် ဖော်ပြထားမှုနှင့် ပတ်သတ်၍ ၄င်းအနေဖြင့် လုံးဝ မပြောဆိုခဲ့ကြောင်းနှင့် ဘာသာရေး ပဋိပက္ခ ဖန်တီးလိုခြင်း သက်သက်သာ ဖြစ်ကြောင်း ဖြေရှင်းခဲ့ရပါသေးတယ်။

ရွေးကောက်ပွဲ အနိုင်ရ အာဏာရ ပါတီ အမျိုးသား ဒီမိုကရေစီ အဖွဲ့ချူပ်၏ ဥပဒေ ဆိုင်ရာ အကြံပေး ဖြစ်သည့် တရားလွှတ်တော်ရှေ့နေဦးကိုနီမှာ အစ္စလာမ်ဘာသာဝင်တဦးဖြစ်ပြီး NLD ဆန့်ကျင်ရေးအုပ်စုများ နှင့် အစ္စလာမ် မုန်းတီးဆန့်ကျင့်ရေး အုပ်စုများမှာ ၄င်းနှင့် ပတ်သက်ပြီး သတင်းအမှားများနှင့် ပုဂ္ဂိုလ်ရေး တိုက်ခိုက်မှုများကို ကို ကြိမ်ဖန်များစွာ ရေးသားဖြန့်ဝေခဲ့ကြပါတယ်။

ဦးကိုနီ၏ ထုတ်ပြန်ရေးသားချက် အပြည့်အစုံမှာအောက်ပါအတိုင်းဖြစ်ပါတယ်။

၁။ ကျွန်တော်၏ အမည်ကိုဖြစ်စေ၊ ဓာတ်ပုံကိုဖြစ်စေ အသုံးပြု၍ လုပ်ကြံဖန်တီးထားသော မမှန်မကန်ဓာတ်ပုံများဖြင့် ဘာသာရေး၊ နိုင်ငံရေးအရ အကဲဆတ်သော အကြောင်းချင်းရာများအား ဖန်တီးမျှဝေနေသည်ကို ထပ်မံ၍ တွေ့ရှိနေရပါသည်။

၂။ ကျွန်တော့်အနေဖြင့် အကြိမ်ကြိမ်အခါခါ ရှင်းလင်းချက်ထုတ်ရန် မလွယ်ကူပါ။ အဓိပ္ပါယ်လည်း မရှိပါ။ ထို့အပြင် ယင်းကဲ့သို့သော အပြုအမူမှာ ရာဇဝတ်မှုလည်း မြောက်ပါသည်။

၃။ သို့ပါသောကြောင့် ဥပဒေကြောင်းအရ လိုအပ်သည့် အရေးယူမှုပြုလုပ်နိုင်ရန် ဆောင်ရွက်တော့မည် ဖြစ်သည်။

၎။ ထိုကဲ့သို့ လုပ်ကြံဖန်တီးထားသည့် ဓာတ်ပုံများနှင့် ပုဂ္ဂိုလ်ရေးအရ ပုတ်ခတ်တိုက်ခိုက်ထားသည့် ရိုင်းစိုင်းရင့်သီးသော စာများအား သက်သေခံအဖြစ် စုဆောင်းထားပြီး ဖြစ်ပါသည်။

ကိုနီ
(တရားလွှတ်တော်ရှေ့နေ)