ဆီးရီးယားမှ အကူအညီပေးရေးအဖွဲ့ နိုင်ငံတကာဆုတစ်ခု ရရှိ

စက်တင်ဘာ ၂၃၊ ၂၀၁၆
M-Media

– ဆီးရီးယား ပြည်တွင်းစစ်တွင် စစ်ဘေးသင့်ပြည်သူများကို ကူညီပေးနေသည့် ပရဟိတအဖွဲ့တစ်ခုဖြစ်သော White Helmets မှာ နိုဘယ်ဆုကဲ့သို့ ဂုဏ်သိက္ခာကြီးမားသည့် Right Livelihood Award ဆုကို ရရှိခဲ့သည်ဟု သိရသည်။

The Right Livelihood Award ဖောင်ဒေးရှင်းက အဆိုပါအဖွဲ့အား ရွေးချယ်မှုကို ယမန်နေ့က ကြေငြာခဲ့ခြင်းဖြစ်ပြီး White Helmets အဖွဲ့မှာ ‘စစ်ဘေးသင့်ပြည်သူများကို ကူညီရာတွင် ထူးချွန်ပြောင်မြောက်သော ရဲစွမ်းသတ္တိ၊ ဂရုဏာစိတ်၊ လူသားချင်းစာနာထောက်ထားမှုနှင့် ဆောင်ရွက်ခဲ့သည်’ ဟု ချီးမွမ်းခဲ့သည်။ White Helmets အဖွဲ့ကို ဆီးရီးယားပြည်သူ့ ကာကွယ်ရေးအဖွဲ့ (Syria Civil Defence) ဟုလည်း ခေါ်ဆိုသည်။

‘ဒုတိယမြောက် နိုဘယ်ဆု’ (the alternative Nobel prize) ဟု အမည်တွင်သည့် အဆိုပါဆုအတွက် နိုင်ငံ ၅၀ မှ အမည်စာရင်းတင်သွင်းခံရသည့် ၁၂၅ ဖွဲ့မှ အဖွဲ့ ၄ ခုကို ရွေးချယ်ခဲ့ခြင်းဖြစ်သည်။

ဆီးရီးယားနိုင်ငံမှ ပထမဆုံး ဆုရရှိသည့် White Helmets မှာ အဖွဲ့ဝင် ၃၀၀၀ ခန့်ရှိပြီး ဗုံးထိအဆောက်အအုံများမှ လူများကို ကယ်ဆယ်ခြင်း၊ မီးဘေးမှ ကယ်တင်ပေးခြင်းနှင့် ရှေးဦးသူနာပြုအကူအညီများ ပေးခြင်း၊ တစ်ခါတစ်ရံတွင် အလွန်အမင်း စွန့်စားရမှုများလည်း ရှိခဲ့သည်ဟု ဆုရွေးချယ်ရေးအဖွဲ့က ပြောကြားခဲ့သည်။

White Helmets အဖွဲ့နှင့်အတူ ဆုရရှိသည့် အခြားအဖွဲ့များမှာ ဒုက္ခသည်များ၊ ပြောင်းရွှေ့အခြေချသူများအတွက် ဥပဒေပိုင်းဆိုင်ရာနှင့် ပညာရေးဆိုင်ရာ အကူအညီများပေးနေသော Civic Assistance Committee အဖွဲ့ကို တည်ထာင်သည့် ရုရှား လူ့အခွင့်အရေး တက်ကြွလှုပ်ရှားသူ ဆက်ဗ်လာနာ ဂန်နုရ်ှကီနာ၊ တူရီနိုင်ငံတွင် စာနယ်ဇင်းလွတ်လပ်ခွင့်ရရေး တိုက်ပွဲဝင်နေသည့် Cumhuriyet နေ့စဉ်သတင်းစာ၊ ကျား၊ မ တန်းတူညီမျှရေးနှင့် အမျိးသမီးအခွင့်အရေး မြှင့်တင်ပေးနေသူ အီဂျစ်အမျိုးသမီး မိုဇန် ဟာဆန်နှင့် Nazra for Feminist Studies အဖွဲ့တို့ဖြစ်သည်။

၎င်းတို့မှာ ဆုကြေးငွေအဖြစ် ကန်ဒေါ်လာ ၈၈၀၀၀ ကို ရရှိမည်ဖြစ်သည်။

Ref; Aljazeera