ဘိုင်ယန်နဲ့ မန်စီးတီးကလွဲရင် အသင်းကြီးတွေအားလုံး အနိုင်ရခဲ့တဲ့ ကြာသာပတေးနေ့မနက် ချန်ပီယံလိဂ်ပွဲများ

စက်တင်ဘာ ၂၉၊ ၂၀၁၆
M-Media

– ဒီနေ့မနက်မှာ ကစားခဲ့တဲ့ ချန်ပီယံလိဂ် အုပ်စုဒုတိယပွဲစဉ်တွေမှာတော့ အာဆင်နယ်၊ အက်သလက်တီကို၊ ပီအက်စ်ဂျီ၊ ဘာစီလိုနာ၊ နာပိုလီတို့ အနိုင်ရခဲ့ပြီး ဂွာဒီယိုလာရဲ့ မန်စီးတီးက ဒီရာသီ ပထဆုံးအကြိမ် နိုင်ပွဲနဲ့ လွဲချော်ခဲ့ရပါတယ်။

အုပ်စု A
———-
အာဆင်နယ် ၂-၀ ဘေဆယ်
လူဒိုဂိုးရက်စ် ၁-၃ ပီအက်စ်ဂျီ

သီယိုဝေါလ်ကော့ရဲ့ သွင်းဂိုး ၂ ဂိုးနဲ့အတူ အာဆင်နယ်သို့ ဆွစ်ဇ်ကလပ်ကို သက်တောင့်သက်သာ အနိုင်ရရှိခဲ့တာ ဖြစ်ပါတယ်။ ဘောလုံးပိုင်ဆိုင်မှုရော၊ ဂိုးသွင်းခွင့်ပါ အသာရခဲ့တဲ့ အာဆင်နယ်တို့ အဆုံးသတ်ပိုင်းသာ ပိုကောင်းမယ်ဆိုရင် အခုထက်ပိုပြီး ဂိုးပြတ်နိုင်မှာပါ။

အသင်းငယ်ဖြစ်ပေမယ့် ၁၅ မိနစ်မှာ ဦးဆောင်ဂိုးရခဲ့တာကြောင့် အိမ်ရှင်တို့ အပျော်ကြီးပျော်ခဲ့ရပေမယ့် ပီအက်စ်ဂျီက အသင်းကြီးပီပီ ထိန်းကစားသွားပြီး ချေပဂိုးနဲ့ အနိုင်ဂိုးတွေ သွင်းယူခဲ့ပြီး ထိုက်ထိုင်တန်တန် အနိုင်ရရှိခဲ့ပါတယ်။ ပီအက်စ်ဂျီအတွက် သူရဲကောင်းဖြစ်ခဲ့သူကတော့ ကာဗာနီဖြစ်ပြီး ၂ ဂိုးသွင်းယူပေးခဲ့တာပါ။

အုပ်စု B
———
နာပိုလီ ၄-၂ ဘင်ဖီကာ
ဘက်ခီတက် ၁-၁ ဒိုင်နမိုကိဗ်

ခြေစွမ်းသိပ်မကွာပေမယ့် ပထမပိုင်းမှာ ဦးဆောင်ဂိုး သွင်းထားနိုင်ပြီး ဒုတိယပိုင်းမှာ ၇ မိနစ်တွင်း ၃ ဂိုးထပ်ရခဲ့တာကြောင့် နာပိုလီတို့ ရာနှုန်းပြည့် နိုင်ပွဲဆက်နိုင်ခဲ့ပါတယ်။ ဘင်ဖီကာက နောက်ပိုင်းမှာ သိက္ခာဆယ် ဂိုး ၂ ဂိုးကိုတော့ ရအောင် လိုက်သွင်းနိုင်ခဲ့ပါတယ်။

တူရကီမှာ ကစားခဲ့တဲ့ ဘက်ခီတက်နဲ့ ဒိုင်နမိုကိဗ်တို့ပွဲကတော့ အပြန်အလှန် ဂိုးသွင်းခွင့် တော်တော်များများ ရခဲ့ပြီး ပွဲကောင်းတစ်ပွဲဖြစ်ခဲ့ပါတယ်။ အိမ်ရှင်တို့ ၂၈ မိနစ်မှာပဲ ဦးဆောင်ဂိုးသွင်းနိုင်ခဲ့ပေမယ့် ၆၅ မိနစ်မှာ ချေပဂိုး ပြန်ပေးခဲ့တာကြောင့် သရေတစ်မှတ်သာ ယူနိုင်ခဲ့ပါတယ်။ ဒါပေမယ့် မျှတတဲ့ရလဒ်ပါပဲ။

အုပ်စု C
———
မိုချန် ဂလာဘက်ခ်ျ ၁-၂ ဘာစီလိုနာ
ဆဲလ်တစ် ၃-၃ မန်စီးတီး

ဘာကာ ရာနှုန်းပြည့်နိုင်ပွဲ ရခဲ့တယ်ဆိုပေမယ့် ၆၅ မိနစ်အထိ ၁ ဂိုးအရှုံးနဲ့ နောက်က လိုက်ကစားခဲ့ရတာပါ။ ခြေသာတဲ့ ဘာကာအတွက် သူရန်က ချေပဂိုး ပီကေးက အနိုင်ဂိုးတွေ သွင်းယူပေးနိုင်ခဲ့တာကြောင့် အဝေးကွင်းမှာ မျက်နှာပန်း လှခဲ့တာဖြစ်ပါတယ်။

ဆဲလ်တစ်နဲ့ မန်စီးတီးတို့ပွဲကတော့ ဒီတစ်ပတ် ချန်ပီယံလိဂ်ပွဲတွေထဲမှာ စိတ်လှုပ်ရှားစရာအကောင်းဆုံးပွဲ ဖြစ်ခဲ့ပြီး အပိုင်ဂိုးသွင်းခွင့် ၃ ကြိမ်ကနေ ၃ ဂိုးဝင်အောင်သွင်းနိုင်ခဲ့တဲ့ ဆဲလ်တစ်ရဲ့ စွမ်းဆောင်ရည်ကိုတော့ ချီးကျူးရမှာဖြစ်ပါတယ်။ ဘောလုံးပိုင်ဆိုင်မှု အပြတ်အသတ်နဲ့အပိုင်ဂိုးသွင်းခွင့် ၉ ကြိမ်လောက်ရခဲ့တဲ့ မန်စီးတီးတို့ သရေတစ်မှတ်ရဖို့ ၃ ကြိမ်တိုင်တိုင်နောက်က လိုက်ကစားခဲ့ရတာပါ။

အုပ်စု D
———-
အက်သလက်တီကို ၁-၀ ဘိုင်ယန်မြူးနစ်
ရိုစတော့ဗ် ၂-၂ ပီအက်စ်ဗီ

ဘိုင်ယန်နည်းပြအဖြစ် ဆောင်ရွက်တဲ့ အန်ဆယ်လော့တီရဲ့ ပထမဆုံးအရှုံးပါ။ အိမ်ရှင်ကို တစ်ဖက်သက် ဖိအားပေး ကစားနိုင်ခဲ့ပေမယ့် ဂိုးသွင်းခွင့်ကတော့ အက်သလက်တီကိုက ပိုရခဲ့ပါတယ်။ အရေးပါတဲ့ အနိုင်ဂိုးကို ၃၅ မိနစ်မှာ ဂရစ်ဇ်မန်းရဲ့ ဖန်တီးမှုကတစ်ဆင့် ကာရက်စ်ကိုက သွင်းယူပေးခဲ့တာဖြစ်ပါတယ်။

အိမ်ရှင်တို့ ဦးဆောင်ဂိုး ၂ ကြိမ်တိုင်တိုင် ရခဲ့ပေမယ့် မထိန်းနိုင်ခဲ့တာကြောင့် အနိုင် ၃ မှတ်နဲ့ ဝေးခဲ့ရတာဖြစ်ပါတယ်။ ဒါပေမယ့် ပီအက်စ်ဗီက ပရော့ပါရဲ့ပင်နယ်တီကို ကာကွယ်နိုင်ခဲ့တဲ့ ဂိုးသမား ဒါနက်ဗ်ကတော့ သူရဲကောင်း ဖြစ်ခဲ့ပါတယ်။