“Animism” ရဲ့ အကျဉ်းချုပ်

အောက်တိုဘာ၊ ၆ ၊ ၂၀၁၂

ငြိမ်းချမ်းအေး

“Animism” ဆိုတာ ဘာမှန်း မသိ..၊ ဘာသဘောလဲဆိုတာ နားမလည်..၊ ဆိုင်လား မဆိုင်လား မသိ..၊ သူတပါး ကိုးကွယ် ယုံကြည်မှု ကို စော်ကားချင်တာနဲ့ ရမ်းသုံး..။ ဘာသာပြန် ရမ်းပြန်တော့ တိရိစ္ဆာန်ဝါဒတဲ့..။

အပြစ် တင်ချင်တဲ့ ဘာသာ နဲ့ “Animism” နဲ့ “ပြဒါးတလမ်း၊ သံတလမ်း” လားလားမှ မဆိုင်ဆိုတာလဲ မသိ..။

ရန်ကုန်မြို့ရှိ ဘင်္ဂလားဒေ့ရ်ှသံရုံးရှေ့တွင် သံဃာတော်များ ဆန္ဒထုတ်ဖော်စဉ် ကိုင်ဆောင်ထားသည့် ပိုစတာ

ကိုယ် ကိုယ်စားပြုတဲ့ ဘာသာ ရဲ့ အခွဲတွေ နဲ့ သဘော၊ လုပ်နည်း၊ လုပ်ဟန်၊ ဓလေ့ ထုံတမ်း တချို့ မှာ “Animism” သဘော ပါတယ် ဆိုတာလည်း ဘာသာ ကိုယ်စားပြုတဲ့ ပုဂ္ဂိုလ်တွေ လို့ ခံယူထားပေမယ့် နားမလည်..။

“စိတ် နဲ့ ငါ နဲ့ ညစ် တယ်” လို့ပဲ ဆိုရတော့မယ်..။

ဒီလို သောက်တလွဲ တွေချည်းပဲ လိုက်ဖြေရှင်း နေရသလို ဖြစ်နေတယ်..။

ဒါက “Animism” ရဲ့ အကျဉ်းချုပ်..။

“Animism” သဘော မှာ လူ၊ တိရိစ္ဆာန်၊ သတ္တ လောက၊ ကမ္ဘာ့ ပထဝီ မြေကြီး၊ ရေ၊ မြေ၊ တောတောင် သဘာဝ ဖြစ်စဉ် အားလုံးမှာ ရုပ်/နမ် မခွဲဘဲ (spiritual ရော physical နှစ်မျိုးလုံးမှာ) ဝိညဉ် တည်ရှိ နိုင်တယ်..။ ဒီလို ဝိညဉ် က ဝတ္ထု ပစ္စည်း တိုင်း မှာ တည်ရှိပြီး တည်ရှိမှု ဖြစ်စဉ်ကို ချုပ်ထိန်းနိုင်တယ်..၊ လူသား ဘဝ နဲ့ ဖြစ်စဉ် တွေကို လွှမ်းမိုးနိုင်တယ် လို့ ယုံကြည်တာမျိုးဟာ “Animism” သဘော ဖြစ်တယ်..။

ဒီလို သဘော၊ အယူ နဲ့ ဆက်စပ်တဲ့ သဘောထား၊ ဖြစ်ရပ် တွေကို ရှင်တို ဘာသာ၊ ဟိန္ဒိူ ဘာသာ၊ ဗုဒ္ဓဘာသာ၊ ဂျိန်းဘာသာ တွေမှာလည်း တွေ့နိုင်တယ်..။

တကယ်တော့ “Animism” သဘောက ကမ္ဘာဦး ရှေး လူသားတွေ ကိုးကွယ်ယုံကြည်မှု ဘာသာတရား ကို စတင် လိုအပ်၊ ဖန်တီး လာတဲ့ အခြေအနေမျိုး ဖြစ်တယ်..။ သဘာဝ တရား နဲ့ နေစဉ် ဘဝ ခက်ခဲကြမ်းတမ်းမှုတွေကို ရင်ဆိုင် ဖြေရှင်းရာမှာ တခုခုကို ယုံကြည်ဖို့ လိုလာတယ်..။ တခုခုကို အားကိုးရာရှာဖို့လိုလာတယ်..။ ဒါကြောင့် တောင်အကြီးကြီး (သို့) ကျောက်တုံးအကြီးကြီး (သို့) နေမင်း စတဲ့ အရာဝတ္ထု တခုခု မှာ မမြင်နိုင်တဲ့ (တန်ခိုးလည်းရှိတဲ့) တစုံတရာ ရှိတယ်..။ သူက နေ့စဉ် လူသားဘဝ ကို တခုခု လွှမ်းမိုးတယ် လို့ ယုံကြည်လာတယ်..။ ဒါကြောင့် သူ့ကို ပူဇော်တယ်..။ သူ့ရဲ့ အစောင့်အရှောက်ကို ခံယူတယ်.. စတဲ့ သဘောပဲ ဖြစ်တယ်..။

ဒါဟာ အလွယ်ပြောရရင် ဘာသာတရား၊ ကိုးကွယ် ယုံကြည်မှုတွေ စပေါ်လာတဲ့ အဆင့်လို့ ဆိုနိုင်တယ်..။

ဒီသဘောဟာ ကမ္ဘာ့ ရှေးဟောင်းလူ့အဖွဲ့အစည်းတိုင်းမှာ ရှိတယ်…။ ဌာနေ အမေရိကန် တွေရဲ့ ကိုးကွယ်ယုံကြည်မှု တွေ ဆိုရင် “Animism” လို့ ပြောလို့ ရတယ်..။ ခုအချိန် ထိ “Animism” ကို အများစု ကျင့်သုံးနေကြတဲ့ အထဲက ကိုယ်နဲ့ နီးစပ်တဲ့…၊ မြင်သာတဲ့ နိုင်ငံ ပြရရင် အာဆီယံ နိုင်ငံတနိုင်ငံ ဖြစ်တဲ့ လာအိုး(စ်) ကို ပြရမယ်..။ သူ့ဆီမှာ ဆိုရင် ဗုဒ္ဓဘာသာ ပြီးရင် ဒုတိယ အများဆုံးက “Animism” လို့ ဆိုနိုင်တယ်..။

နိဂုံးချုပ်ရရင်.. အမှောင်တကာ အမှောင်မှာ အဝိဇ္ဇာ အမှောင် က အကြီးဆုံးပါ..။ အဝိဇ္ဇာ “မသိမှု” က လောကမှာ အဆိုးဆုံးပဲ..။ “မသိမှု” ကို “သိမှု” ဖြစ်စေတဲ့ ပညာ မျက်စိ ကန်းရင် ဘာဆို ဘာမှ မမြင်နိုင်တော့ဘူး..။ အကျိုးအကြောင်း မစဉ်းစားတတ်တော့ဘူး..။ အဲ့လို ဖြစ်ရင် လုပ်တဲ့ အလုပ်၊ ကျင့်တဲ့ အကျင့်၊ ယူတဲ့ အယူ ကလည်း မမှန်တော့ဘူး..။

အားလုံး “အဝိဇ္ဇာ အမှောင်” ဖယ်ရှားနိုင်ပြီး “ပညာ အလင်း” ရပါစေ..။

ငြိမ်းချမ်းအေး
၀၆ ၊ အောက်တိုဘာ ၊ ၂၀၁၂

ဆောင်းပါးတိုကို ဆောင်းပါးရှင်း ငြိမ်းချမ်းအေးရဲ့ FB စာမျက်နှာမှ ကူးယူဖော်ပြပါသည်။