ဘိုကလေး မွတ်စလင်မ်သုဿာန် မတရား ကျူးကျော်ခံရမှု့ သတင်းအပြည့်အစုံ

အောက်တိုဘာ၊ ၁၂ ၊ ၂၀၁၂

M-Media

သတင်း၊ ဓါတ်ပုံ – ထွန်းတောက်

ဧရာဝတီတိုင်း ဘိုကလေးမြို့ရှိ မွတ်စလင်မ်သုဿာန်အား မတရားသိမ်းပိုက်၍ သင်္ချိုင်းများကိုဖျက်ဆီးရှင်းလင်းပြီး အဆောက်အဦး ဆောက်လုပ်နေသည့်အကြောင်း ၉.၁၀.၁၂  နေ့တွင် M-Media တွင် ဖော်ပြခဲ့သည့်သတင်းအား အကြောင်းစုံသိရရန်အတွက် ဆက်လက်စုံစမ်းခဲ့ပါသည်။

သင်္ချိုင်းမြေပေါ်တွင် ကျူးကျော်ဆောက်လုပ်နေသော အဆောက်အဦးအား အဝေးမှ မြင်ရပုံ

ယင်း ဘိုကလေးမြို့တွင် အစ္စလာမ်သာသနာဝင် မွတ်စလင်မ်ဦးရေ (၁၀၀၀)၀န်းကျင်ရှိပြီး ၀တ်ပြုဆုတောင်းရန် ဗလီ(၂)လုံးရှိခဲ့သည်။ ဤမွတ်စလင်မ်သုသာန်သည် လွတ်လပ်ရေးမရမီ ကိုလိုနီခေတ် ၁၉၂၀-ခုနှစ်ကတည်းက ဘိုကလေးမြို့တွင် ရှိခဲ့သည်မှာ နှစ်တစ်ရာနီးပါးခန့်ရှိပြီး မြေစာရင်းဆိုင်ရာ မြေပုံနှင့်တကွ အထောက်အထားစာရွက်စာတမ်းများလည်းရှိသည်။ ယင်းကဲ့သို့ ရှိနေသောအခြေမှ ယခုအခါတွင် မည်သည့်စီးပွားရေးလုပ်ငန်းရှင်မှန်းမသိသူတစ်ဦးမှ မတရားဝင်ရောက်၍ သင်္ချိုင်းဂူများဖျက်ဆီးပြီး အဆောက်အဦး တစ်ခုကို ဆောက်လုပ်နေခဲ့ပါသည်။ ယင်းကဲ့သို့ ဆောက်လုပ်မည်ကိုလည်း သုဿာန် တာဝန်ရှိသူများအား အသိပေး အကြောင်းကြားခြင်းမရှိပဲ သင်္ချိုင်းမြေအား မတရားသဖြင့် ၀င်ရောက်ကျူးကျော်ခြင်းသာဖြစ်ကြောင်း၊ ထိုကဲ့သို့ လုပ်ဆောင်ခြင်းမှာ တည်ဆဲဥပဒေများကို မထေမဲ့မြင်ပြု၍ လုပ်ပိုင်ခွင့်နှင့်အာဏာကို လွဲမှားလွန်ကျူးစွာ အခွင့်ထူးယူ၍ နိုင်လိုမင်းထက်ပြုမူနေသည်ကို သက်ဆိုင်ရာ အာဏာပိုင်များမှ ထိန်းသိမ်းအရေးယူမှု မပြုလုပ်သည်သာမက တားဆီးခြင်းကိုပင် မပြုသောကြောင့် မွတ်စလင်မ်များအနေဖြင့် မိမိတို့အပေါ် နိုင်လိုမင်းထက် အနိုင်ကျင့်သည်ဟု ခံစားရသောကြောင့် ဘိုကလေးမြို့ရှိ မွတ်စလင်မ်(၈၀၀)ကျော်မှ ၀ိုင်းဝန်း လက်မှတ်ရေးထိုးကာ နိုင်ငံတော် သမ္မတကြီးထံသို့ စာပို့တိုင်ကြားကြားသည်ဟု ထပ်မံသိရှိရပါသည်။

၁၉၃၀-ခုနှစ်က မြှုပ်နှံထားသည့် သင်္ချိုင်းဂူအား ဖျက်ဆီးမခံရမီက

ထိုအကြောင်းအရာနှင့်ပတ်သက်ပြီး “ဒီဘိုကလေးမြို့မှာ မွတ်စလင်မ်တွေရှိနေကြတာ ဟိုးတုန်းကတည်းကပါ။ မြို့ပေါ်မှာတော့ ဗလီ(၂)လုံးရှိပါတယ်။ ပြီးတော့ ဒီသုဿာန်က ဟိုးအရင် ကိုလိုနီခေတ်ကတည်းက ရှိခဲ့တာပါ။ လွတ်လပ်ရေးရပြီးခေတ်နောက်ပိုင်းမှာတော့ မြေပုံတွေ စာရွက်စာတမ်းတွေနဲ့ အထောက်အထားစုံလင်စွာ ရှိခဲ့ပါတယ်။ အဲလို ရှိလာခဲ့ရာကနေ လွန်ခဲ့တဲ့ ၁-နှစ်ခွဲလောက်မှာ အာဏာပိုင်က စာပို့လာပါတယ်။ စာကလည်း သုဿာန် ဖျက်သိမ်း/ပိတ်သိမ်းဖို့အတွက် မဟုတ်ပါဘူး။ အခုဆိုရင် ဘိုကလေးနဲ့သာပေါင်းကို တံတားဆောက်လိုက်တယ်။ အဲဒီတံတားကိုသွားဖို့က သုဿာန်ဘေးလမ်းကနေ ကျော်သွားရတယ်။ အဲဒီအတွက် သုဿာန်တွေကို ဒီနားမှာမထားသင့်ဘူး။ ဒါကြောင့် သဘောထားခံယူချက်ဆိုပြီး စာပို့တာ။ မွတ်စလင်မ်တွေကလည်း သင်္ချိုင်းကို ဘာယ်လိုလုပ်တာမျိုး မဖြစ်စေချင်ဘူး။ ဒါကြောင့် ဘာမှအကြောင်းမပြန်ကြပါဘူး။

သူတို့လည်း ဘာမှထပ်ပြီးပြောတာ မရှိတော့ဘူး။ မွတ်စလင်မ်သုဿာန်နဲ့ ဗုဒ္ဓဘာသာသုဿာန်က ကပ်ရပ်ပါ။ ဟုတ်ကဲ့ အခုလို မွတ်စလင်မ်သုဿာန်မြေပေါ်မှာ မတရားသိမ်းပိုက်ပြီးလုပ်နေပေမယ့် ဟိုဘက်က ဗုဒ္ဓဘာသာသုဿာန်ကတော့ ဘာမှမလုပ်ပါဘူး။ ဒီအတိုင်းပဲ ရှိနေတာပါ။ မွတ်စလင်မ်တွေအနေနဲ့က သုဿာန်ဆိုတာကို အလေးထားကြသူတွေဆိုတော့ ဖျက်ဆီးတာမျိုးမလုပ်စေချင်ပါဘူး။ အခုတော့ သူတို့စက်ရုံဆောက်တာနဲ့ သင်္ချိုင်းဂူတွေကို ဖျက်ဆီးတယ်၊။ မြှုပ်ထားတာတွေကို သူတို့သဘောနဲ့သူတို့တူးပြီး ဘယ်လိုလုပ်ပစ်လိုက်ကြလဲတော့မသိပါဘူး။ ကျွန်တော်တို့ တစ်ခုပြန်သိရတာက အဲဒါကလည်း ဘာသာခြားမိတ်ဆွေတွေဆီကနေပြန်သိရတာပါ။ ဘာလဲဆိုတော့ သူတို့သင်္ချိုင်းဂူတွေကို ဖျက်တဲ့အချိန်မှာ ၁၉၃၀-ခုနှစ်လောက်ကတည်းက ရှိခဲ့တဲ့သင်္ချိုင်းဂူမှာ မြှုပ်ထားတဲ့ရုပ်ကလပ်ဟာ ကဖန်(ပိတ်ဖြူ)တောင် မပျက်စီးသေးပဲ ပုံသဏ္ဍာန်မပျက်ရှိနေတယ်တဲ့။ အဲဒါကို ဘယ်လိုလုပ်ပစ်လိုက်လဲ ကျွန်တော်တို့ မသိလိုက်ရဘူး။ တကယ်ကို စိတ်မကောင်းဝမ်းနည်းဖြစ်မိတယ်။ ပြီးတော့ ကျွန်တော်တို့ဒီမှာရှိတဲ့သူတွေ အားလုံးက တောသူတောင်သားတွေ ရိုးသားကြတယ်။ အဲဒီအပေါ်မှာ အနိုင်ကျင့်တယ်။ အာဏာပိုင်ကလည်း ဘာမှ ဖြေရှင်းမပေးပါဘူး။ ဒါကြောင့် ကျွန်တော်တို့တွေမှာ ဖိနှိပ်ညှဉ်းပန်းခံနေရပါတယ်။”လို့ ဘိုကလေးမြို့ခံတစ်ဦးမှ သူ့ခံစားချက်အား M-Media သို့ ပြောပြခဲ့ပါတယ်။

သင်္ချိုင်း မြေပုံ မိတ္တူ

သမ္မတကြီးထံ တိုင်ကြားစာ

သမ္မတကြီးထံ တိုင်ကြားစာ

ဘိုကလေးမြို့ရှိ မွတ်စလင်မ်(၈၀၀)ကျော်မှ ၀ိုင်းဝန်းလက်မှတ်ရေးထိုး