ရခိုင်မှ ဒုက္ခသည်စခန်း သုံးခုကို ပိတ်သိမ်းခဲ့သည့် သတင်းထုတ်ပြန်ချက် လွဲချော်မှုရှိ

ဇူလိုင် ၇၊ ၂၀၁၇
M-Media
လမင်း

ဧပြီလနှောင်းပိုင်းက တော်ဝင်နှင်းဆီခန်းမတွင် ပြုလုပ်ခဲ့သည့် ကမန်တိုင်းရင်းသားများ၏ သတင်းစာရှင်းလင်းပွဲ

ရခိုင်။ ။ ကျောက်ဖြူ၊ ပေါက်တောနှင့် ရမ်းဗြဲမြို့နယ်များရှိ ဒုက္ခသည်စခန်း ၃ ခုကို ပိတ်သိမ်းခဲ့ပြီး ယင်းဒုက္ခသည်စခန်းမှ အိမ်ထောင်စုပေါင်း ၅၅ စုကို ရန်ကုန်မြို့သို့ ပြောင်းရွေ့နေထိုင်ခွင့် ပြုခဲ့ကြောင်း ဟု ဇူလိုင် ၁ ရက်က ထုတ်ပြန်ခဲ့သည့် ပြည်ထောင်စုအစိုးရအဖွဲ့ အမျိုးသားလုံခြုံရေးဆိုင်ရာ အကြံပေးပုဂ္ဂိုလ် ၏ ရခိုင်ပြည်နယ် မြောက်ပိုင်းလုံခြုံရေးအခြအနေ ထုတ်ပြန်ချက်မှာ လက်တွေ့နှင့် အနည်းငယ် လွဲချော်မှုများ ရှိနေကြောင်း တွေ့ရှိရပါတယ်။

“ရန်ကုန်ကို အိမ်ထောင်စု ၅၅ ခုပြောင်းလာတယ်ဆိုတာတော့ မှန်ပါတယ်။ ဒါပေမယ့် အဲ့ဒီပြောင်းလာတဲ့ အိမ်ထောင်စုက ရမ်းဗြဲ ဒုက္ခသည်စခန်းက လူတွေပဲ။ အခြား စခန်းကလူတွေ မပါဘူး။ ပေါက်တော်နဲ့ ကျောက်ဖြူက ဒုက္ခသည်စခန်းတွေကို ပိတ်လိုက်တယ် ဆိုတာလည်း မဟုတ်ဘူး။ အဲ့ဒီမှာ အခုထိ ကမန် ဒုက္ခသည်တွေ ရှိနေသေးတယ် “ လို့ ကမန်တိုင်းရင်းသား လှုမှုကွန်ရက် ဥက္ကဋ္ဌ ဦးထွန်းငွေက M-Media ကိုဆိုပါတယ်။

မြန်မာ အစိုးရအဖွဲ့ အမျိုးသားလုံခြုံရေးဆိုင်ရာ အကြံပေးပုဂ္ဂိုလ်၏ ထုတ်ပြန်ချက်

ဒီလို ရန်ကုန်ကိုပြောင်းရွေ့နေထိုင်ဖို့ကိုလည်း ကမန်တိုင်းရင်းသားတွေက တောင်းဆိုတာ မဟုတ်ဘဲ အစိုးရဘက်မှ ရန်ကုန်ကိုပြောင်းရွေ့နေထိုင်နိုင်ကြောင်း ပြောဆိုခဲ့တာဖြစ်တယ်လို့လည်း သိရပါတယ်။

“အဲ့ဒီဒေသမှာရှိတဲ့လူတွေကို ပြန်လည်ထူထောင်ရေး လုပ်ဖို့၊ မူလနေရာပြန်ရဖို့အတွက် သက်ဆိုင်ရာ လူတွေနဲ့ ညှိနှိုင်းနေတာ၊ သူတို့ဘက်ကလည်း အိမ်နေရာတွေကို တိုင်းတာတာမျိုးတွေ လာလုပ်နေပြီ။ သိပ်မကြာခင်မှာ ရန်ကုန်ပြောင်းချင်ပြောင်းလို့ရတယ်။ တစ်အိမ်ထောင်ကို (၅) သိန်းပေးမယ်ဆိုပြီး လာပြောကြတော့တာပဲ” လို့ ဦးထွန်းငွေက ဆက်လက်ပြောဆိုခဲ့ပါတယ်။

အဆိုပါ ကမန်တိုင်းရင်းသားများ ပြောင်းရွေ့နေထိုင်လာခြင်းကို ဆိုရှယ်မီဒီယာ စာမျက်နှာများမှာ ဘင်္ဂါလီများ ခိုးဝင်ရောက် လာနေထိုင်ကြပြီဟု ဝါဒဖြန့်နေသူများကိုလည်း ၎င်းတို့ ကမန်တိုင်းရင်းသား လှုမှုကွန်ရက်အနေဖြင့် လက်လှမ်းမှီသလောက် မီဒီယာများမှတစ်ဆင့်၊ သက်ဆိုင်ရာ လမ်းကြောင်းများဖြင့် ရွေ့ပြောင်းနေထိုင်သူများမှာ ဘင်္ဂါလီ(ရိုဟင်ဂျာ) များမဟုတ်ဘဲ ကမန်တိုင်းရင်းသားများ ဖြစ်ကြောင်းကို ရှင်းလင်းသွားမယ်လို့လည်း သိရပါတယ်။

၂၀၁၇ ခုနှစ် ဧပြီ(၄) ရက်နေ့မှာ ကမန်အမျိုးသား တိုးတက်ရေးပါတီ၊ ကမန် တိုင်းရင်းသား လူမှုကွန်ရက်မှ တာဝန်ရှိသူတွေဟာ လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ဝန်ကြီး ဒေါက်တာဝင်းမြတ်အေးနှင့် နေပြည်တော်တွင် တွေ့ဆုံစဉ် ဝန်ကြီးမှ ရမ်းဗြဲမြို့ရှိ ကမန်တိုင်းရင်းသားများကို မူလနေရာတွင် အမြန်ဆုံးပြန်လည်နေရာချထားပေးမည်လို့ ပြောကြားခဲ့ကြောင်း၊ သို့ပေမယ့် ရမ်းဗြဲမြို့မှ ကမန်တိုင်းရင်းသားတွေကို အိမ်ထောင်စုတစုလျှင် (၅) သိန်းနှင့် မိသားစုဝင် တစ်ဦးလျင် ကျပ် (၁) သိန်းပေးကာ ပြောင်းရွှေ့လိုက ပြောင်းရွှေ့ဖို့ ဖိအားဆောင်ရွက်ခဲ့ကြောင်း၊ မြို့နယ်အုပ်ချူပ်ရေးမှူးရုံးမှ ဒုက္ခသည်စခန်းမှခေါင်းဆောင်များ ထံလာရောက်ကာ အနုကြမ်းဝင်စီးနိုင်သည်ဟု ဖိအားပေးမှုကြောင့် ကယ်ဆယ်ရေးစခန်းမှ ကမန်တိုင်းရင်းသား အချို့မှာ ရွေးချယ်စရာမရှိဘဲ ရန်ုကုန်သို့ ပြောင်းရွှေခဲ့ရကြောင်း သိရှိရပါတယ်။

အိမ်ထောင်စု ၅၅ စုမှာ ရန်ကုန်မြို့ရှိ ထောက်ကြံ့၊ မှော်ဘီသို့ ပြောင်းရွှေ့နေထိုင်နေကြပြီး နေရာထိုင်ခင်း အခက်အခဲ၊ ကျန်းမာရေး အခက်အခဲ၊ ပညာရေး အခက်အခဲများကို စတင်ရင်ဆိုင် ကြုံတွေ့နေပြီဖြစ်ကြောင်းလည်း သိရပါတယ်။