အီးယူ – မြန်မာပြည်မှ ပဋိပက္ခများ အဆုံးသတ်ဖို့ တောင်းဆိုပြီး အကူအညီပေးရန် ကတိက၀တ်ပြု

M-Media

နိုဝင်ဘာ ၃၊ ၂၀၁၂
သတင်း – ရိုက်တာ

ဥရောပသမ္မဂ၏ ဥက္ကဌဖြစ်သူ ဟိုဆေးမာနြူရယ်လ် ဘာရိုဆိုမှ မြန်မာပြည်တွင်း လူမျိုးရေးအခြေခံ သတ်ဖြတ်နေမှုများ အဆုံးသတ်ဖို့ ယမန်နေ့က နှိုးဆော်လိုက်သည်။ ၄င်းနှိုးဆော်မှုကို မြန်မာသမ္မတနှင့် ဆွေးနွေးမှုအပြီးတွင် ပြုလုပ်ခဲ့ခြင်းဖြစ်ကြောင်း ရိုက်တာသတင်းတစ်ရပ်က  ဖော်ပြသည်။

မြန်မာပြည်၏ ရခိုင်ပဋိပက္ခနှင့်ပတ်သတ်ပြီး ဘာရိုဆိုက “ဒီကိစ္စနဲ့ပတ်သတ်ပြီး ကျနော်တို့ နက်နက်ရှိုင်းရှိုင်းကို စိတ်ဝင်စားမှုရှိပါတယ်။ ဒါက နိုင်ငံရဲ့ ဒီမိုကရေစီအသွင်ကူးပြောင်းရေးမှာ အကျိုးဆက်တွေလည်းဖြစ်နိုင်တယ်။ ဘာသာရေးခေါင်းဆောင်တွေအားလုံး အခြေအနေကို ထိန်းချုပ်ဖို့ နှိုးဆော်ကြလိမ့်ဆိုတာ ကျွန်တော်တို့ မြော်လင့်ပါတယ်။” ဟု ၄င်း၏မိန့်ခွန်းတွင် ပြောကြားခဲ့ကြောင်း ဘရက်ဆဲလ်တွင်ထုတ်ပြန်သည့် မိန့်ခွန်းကော်ပီ၌ ဖော်ပြထားသည်။

“အီးယူက လူ့အခွင့်အရေးလိုအပ်ချက်တွေဖြည့်ဆီးဖို့နဲ့ ပဋိပက္ခဖြစ်ခဲ့တဲ့ဒေသတွေကို ၀င်ရောက်ဖို့ ယူရို ၄ မီလီယံ (ဒေါ်လာ ၅.၁၄ မီလီယံ) ထုတ်ပေးဖို့ အသင့်ရှိနေပါတယ်။ အာမလည်းခံပါတယ်” ဟု ဘာရိုဆိုက ဖြည့်စွက်ပြောကြားခဲ့သည်။

ဘာရိုဆိုသည် ၄င်း၏မြန်မာပြည်ခရီးစဉ်အတွင်း မြန်မာပြည်ငြိမ်းချမ်းရေးစီစဉ်ဆောင်ရွက်နိုင်ဖို့ လုပ်ဆောင်နေကြသည့် ဘက်ပေါင်းစုံမှ ပုဂ္ဂိုလ်များအားလုံးကို အသစ်ဆောက်လုပ်ထားသည့် ငြိမ်းချမ်းရေးစင်တာတွင် ကူညီထောက်ပံ့ရေးတွေ့ဆုံဆွေးနွေးခဲ့သလို မြန်မာသမ္မတ ဦးသိန်းစိန်နှင့်လည်း တွေ့ဆုံဆွေးနွေးခဲ့သည်ဟု ရိုက်တာသတင်းက ဖော်ပြသည်။

ထိုငြိမ်းချမ်းရေးစင်တာ စတင်နိုင်ဖို့အတွက်လည်း အီးယူမှ ယူရို ၇ သိန်း ထောက်ပံ့ပေးခဲ့ကြောင်း၊ လာမည့် ၂၀၁၃ တွင် မြန်မာတိုင်းရင်းသား ငြိမ်းချမ်းရေးအကောင်အထည်ဖော် ဆောင်ရွက်နိုင်ဖို့ ယူရို ၃၀ မီလီယံထောက်ပံ့ပေးသွားဦးမည်ဖြစ်ကြောင်း အီးယူကော်မရှင် မှ ကြေငြာချက်တွင် ဖော်ပြထားသည်။