တ.က.သ/ဗ.က.သ ဥက္ကဋ္ဌ ဦးရာရှစ် ရာပြည့်အခမ်းအနား

နိုဝင်ဘာ ၅၊ ၂၀၁၂
M-Media
သတင်း – အမ်တူးအေ

ရန်ကုန် ။     ။    တ.က.သ/ဗ.ကသ ဥက္ကဋ္ဌ ဦးရာရှစ် (၁၉၁၂-၂၀၁၂)၏ ရာပြည့်အခမ်းအနားတစ်ရပ်ကို ဒီနေ့ နိုဝင်ဘာလ ၅-ရက်၊ ၂၀၁၂-ခုနှစ် ရန်ကုန်မြို့ ဗဟန်းရှိ တော်ဝင်နှင်းဆီခန်းမ၌ကျင်းပပြုလုပ်ပြီးစီးခဲ့ပါသည်။

ဦးရာရှစ် ရာပြည့်အခမ်းအနားသို့ ဘာသာကြီးလေးခုမှ ဘာသာရေးခေါင်းဆောင်များ၊ ဗ.က.သ၊ တ.က.သ များ၊ နိုင်ငံရေးပါတီအဖွဲ့များ၊ နိုင်ငံရေးခေါင်းဆောင်များ၊ လူမှုရေးအဖွဲ့အစည်းများ နှင့် ဦးရာရှစ်ကို လေးစားမြတ်နိုးသူ ၇၀၀-ကျော် ပါဝင်တက်ရောက်ခဲ့ကြောင်းသိရသည်။

ယင်းအခမ်းအနားတွင် ကျောင်းသားသမဂ္ဂသီချင်းဖြင့် အခမ်းအနားဖွင့်လှစ်ပြီးနောက်၊ နိုင်ငံတော်အလံ၊ ကျောင်းသားသမဂ္ဂ အလံတော်၊ လွတ်လပ်ရေး ဗိသုကာကြီး ဗိုလ်ချုပ်အောင်ဆန်းနှင့် တကွ ကျဆုံးလေပြီးသော အာဇာနည်ခေါင်းဆောင်ကြီးများ၊ မြန်မာနိုင်ငံ ခေတ်အဆက်ဆက် ဒီမိုကရေစီ အရေးတော်ပုံ တိုက်ပွဲတွင် ကျဆုံးခဲ့သော ရဟန်းရှင်လူ ပြည်သူ ကျောင်းသားကျောင်းသူများ အလေးပြုခဲ့ကြပြီး၊ အခမ်းအနားကျင်းပရခြင်း ရည်ရွယ်ချက်ကို ပြောကြားခဲ့ပါသည်။

၎င်းနောက် အခမ်းအနားကို အပိုင်း ၃-ပိုင်းခွဲ၍ ကျင်းပခဲ့သည်။ အစီအစဉ် ပထမပိုင်းတွင် ခေတ်အဆက်ဆက် ကျောင်းသားသမဂ္ဂ ခေါင်းဆောင်များမှ တ.က.သ/ဗ.က.သ ဥက္ကဋ္ဌ ဦးရာရှစ် ရာပြည့် အထိမ်းအမှတ်အတွက် ဂုဏ်ပြုစကားပြောကြားပြီး၊ အစီအစဉ် ဒုတိယပိုင်းအနေဖြင့် ဘာသာကြီး ၄-ဘာသာမှ ဦးရာရှစ် ရာပြည့်အထိမ်းအမှတ် ဂုဏ်ပြုစကားပြောကြားများ ပြောကြားခဲ့ပြီးနောက် တတိယပိုင်းအစီအစဉ်တွင် နိုင်ငံရေး ခေါင်းဆောင်များမှ ဦးရာရှစ်ရာပြည့် အထိမ်းအမှတ် ဂုဏ်ပြုစကားပြောကြားပြီး ဦးရာရှစ်၏သား ဦးဘီလားလ်ရာရှစ်ပြောကြားသော ဗီဒီရိုဖိုင်ကို ပြသခဲ့ပါသည်။ နောက်ဆုံးတွင် ကျောင်းသားများမှ ကျောင်းသား သီချင်းများဖြင့် ဖျော်ဖြေကာ အခမ်းအနားကို ပြီးဆုံးခဲ့ကြပါသည်။

တ.က.က/ဗ.က.သ ဥက္ကဋ္ဌ ဦးရာရှစ် အခမ်းအနားကျင်းပရေးကော်မတီမှ သဘောထားကြေညာချက်တစ်ရပ် ကိုလည်း ထုတ်ပြန်ကြေညာခဲ့ပါသည်။

အခမ်းအနားကျင်းပရခြင်း ရည်ရွယ်ချက်(၃) ချက်ဖြစ်တဲ့

(၁) ဒုတိယကျောင်းသားသပိတ်ခေါင်းဆောင်၊ တ.က.သ ဥက္ကဌနှင့် ပထမဆုံး ဗ.က.သ ဥက္ကဌ၊ အမျိုးသားလွတ်မြောက်ရေးနှင့် ပါလီမန် ဒီမိုကရေစီစနစ်ကို ကာကွယ် စောင့်ရှောက်ရာတွင် ထင်ရှားခဲ့သော ဦးရာရှစ်၏ ရာပြည့်နေ့ကို ဂုဏ်ပြုသောအားဖြင့် ထိုအခမ်းအနားကို ကျင်းပရခြင်း၊
(၂) ခေတ်အဆက်ဆက် ကျောင်းသားသမဂ္ဂ မျိုးဆက်များ အကြား ပိုမိုထိတွေ့ရင်းနှီးမှုရှိစေရန်၊
(၃) ကျောင်းသားသမဂ္ဂ၏ အခန်းကဏ္ဍနှင့် သမိုင်းကြောင်းများကို မျိုးဆက်သစ်များ ပိုမိုသိရှိလာစေရန်၊

ကို အခမ်းအနားကျင်းပရေးကော်မတီဝင် ဦးခင်မောင်ချိုဖတ်ကြားခဲ့ပါတယ်။

တ.က.က/ဗ.က.သ ဥက္ကဋ္ဌ ဦးရာရှစ် အခမ်းအနားကျင်းပရေး ကော်မတီကိုယ်စား ၁၉၆၂-ရန်ကုန် ခရိုင်လုံးဆိုင်ရာ ကျောင်းသားများ သမဂ္ဂအမှုဆောင် ဦးနေ၀င်းစံမှ ဖတ်ကြားသည့်

တ.က.က/ဗ.က.သ ဥက္ကဋ္ဌ ဦးရာရှစ် အခမ်းအနားကျင်းပရေး ကော်မတီမှ သဘောထားကြေညာချက် –

ရက်စွဲ ၊ ၁၃၇၄-ခုနှစ်၊ သီတင်းကျွတ်လပြည့်ကျော် (၆)ရက်။
၂၀၁၂-ခုနှစ် နိုဝင်ဘာလ (၅)ရက်

ပြည်ထောင်စုမြန်မာနိုင်ငံတွင် မှီတင်းနေထိုင်ကြသော တိုင်းရင်းသားလူမျိုးပေါင်းစုံတို့သည် နယ်ချဲ့ဆန့်ကျင်ရေး၊ အမျိုးသားလွတ်မြောက်ရေး၊ ပြည်သူ့လွတ်လပ်ရေးတို့အတွက် လူမျိုးဘာသာ မခွဲခြားဘဲ အတူတကွ လက်တွဲ၍ စည်းလုံးညီညွတ်စွာ တိုက်ပွဲဝင်ခဲ့ကြပေသည်။ ယင်းတိုက်ပွဲများအားလုံးသည် ကျောင်းသူကျောင်းသားအပေါင်းတို့သည် ရှေ့တန်းမှ ပါဝင်လှုပ်ရှားခဲ့ကြသည်မှာ ယနေ့တိုင်အောင်ပင်ဖြစ်သည်။ မြန်မာပြည်၏ သမိုင်းအစဉ်လာတွင် ပြန်ကြည့်ပါက ၁၉၂၀-ခုနှစ်တွင် ဖြစ်ပွားခဲ့သော ကျောင်းသား သပိတ်ကြီးသည် မြန်မာဘုရင်သီပေါမင်းပါတော်မူပြီးနောက် ဗမာပြည်၏ နယ်ချဲ့ဆန့်ကျင်ရေး၊ အမျိုးသားလွတ်မြောက်ရေးအတွက် ပထမဆုံးသော သပိတ်တိုက်ပွဲကြီးတွင်ဖြစ်သည်။

ထိုမှစပြီး ၁၉၃၁-ခုနှစ်တွင် ရန်ကုန်တက္ကသိုလ် ကျောင်းသားများသမဂ္ဂ (တ.က.သ) ပေါ်ပေါက်လာခဲ့သည်။ ထိုမှတဆင့် ၁၉၃၆-ခုနှစ်တွင် ဒုတိယတက္ကသိုလ်ကျောင်းသားသပိတ်၊ ၁၃၀၀-ပြည့် အရေးတော်ပုံကြီးနှင့်တကွ ပေါ်ပေါက်လာခဲ့သော ၁၉၃၈-ခုနှစ်တွင် ဗိုလ်အောင်ကျော်ကျဆုံးသော တတိယကျောင်းသားသပိတ်များ ပေါ်ပေါက်လာခဲ့သည်။

ယနေ့ နိုဝင်ဘာလ ၅-ရက်နေ့သည် ဗမာနိုင်ငံလုံးဆိုင်ရာ ကျောင်းသားများ သမဂ္ဂ (ဗ.က.သ)၏ ပထမဆုံး ဥက္ကဋ္ဌဖြစ်သော ဦးရာရှစ်၏ နှစ်တစ်ရာပြည့်မွေးနေ့ဖြစ်ပေသည်။ ဦးရာရှစ်သည် တ.က.သ/ဗ.က.သ ဥက္ကဋ္ဌ တစ်ဦးဖြစ်ခဲ့သည့်အပြင် မြန်မာ့လွတ်လပ်ရေး ဖခင်ကြီး၊ မြန်မာ့တပ်မတော် ဖခင်ကြီး ဗိုလ်ချုပ်အောင်ဆန်း၊ နိုင်ငံတော် ၀န်ကြီးချုပ် ဦးနုတို့ အပြင် အခြားထင်ရှားသော ခေါင်းဆောင်ကြီးများနှင့်အတူ နယ်ချဲ့ဆန့်ကျင်ရေး၊ အမျိုးသားလွတ်မြောက်ရေးနှင့်၊ ပြည်သူ့လွတ်လပ်ရေးတို့အတွက် စွမ်းစွမ်းတမံဆောင်ရွက်ခဲ့သူတစ်ဦးလည်း ဖြစ်ပေသည်။ သို့ပါသောကြောင့် ဤနေ့တွင် တ.က.က/ဗ.က.သ ဥက္ကဋ္ဌ ဦးရာရှစ် ရာပြည့်အထိမ်းအမှတ် ကျင်းပရေးကော်မတီမှ အောက်ပါအတိုင်း သဘောထားထုတ်ပြန် တောင်းဆိုလိုက်သည်။

(၁)     ၁၉၆၂-ခုနှစ် ဇူလိုင်လ ၇-ရက်နေ့တွင် စစ်အာဏာရှင် ဗိုလ်နေ၀င်း၏ ရက်စက်ရမ်းကားမှုကြောင့် ဖောက်ခွဲဖျက်ဆီးခံလိုက်ရသော တ.က.သ အဆောက်အဦးကို မူလနေရာတွင် ပြန်လည်တည်ဆောက်ရေး။
(၂)     ကျောင်းသားသမဂ္ဂများသမိုင်းကို ကျောင်းသုံးစာအုပ်တွင် ထည့်သွင်း ပြဋ္ဌာန်းရေး၊ သင်ကြားရေး။
(၃)     လက်ရှိဖွဲ့စည်းထားပြီးသော ကျောင်းသားသမဂ္ဂများ လွတ်လပ်စွာ လှုပ်ရှားဆောင်ရွက်နိုင်ရေး။
(၄)     အမျိုးသားပြန်လည်သင့်မြတ်ရေးကို အချိန်ဆွဲမနေပဲ အမြန်ဆုံး အကောင်အထည်ဖော် ဆောင်ရွက်ပေးရေးတို့ဖြစ်သည်။

တ.က.က/ဗ.က.သ ဥက္ကဋ္ဌ ဦးရာရှစ် ရာပြည့်အခမ်းအနားကျင်းပရေး ကော်မတီ