Cobra Gold စစ်ရေး လေ့ကျင့်မှုတွင် မြန်မာပါဝင်ဖို့ စင်ကာပူ ကြိုဆို

နိုဝင်ဘာ ၁၇ ၊၂၀၁၂
M-Media
www.asiaone.com

နိုင်ငံအများစုပေါင်းပါဝင်သည့် လာမည့်နှစ် Exercise Cobra Gold စစ်ရေးလေ့ကျင့်မှုတွင် မြန်မာနိုင်ငံအနေဖြင့် လေ့လာသူအဆင့်မှ ပါဝင်နိုင်ဖို့ ကြိုဆိုကြောင်း စင်ကာပူနိုင်ငံ၊ ကာကွယ်ရေးစီနီယာ ၀န်ကြီး၊ ချန်ချွန်ဆင်းက စင်ကာပူပါလီမန်တွင် ယနေ့ (နိုဝင်ဘာ ၁၆) ပြောကြားလိုက်ကြောင်း စင်ကာပူပို့စ်သတင်းတစ်ရပ်တွင် ဖော်ပြသည်။

စင်ကာပူပါလီမန်အတွက် မန်ဘာအဖြစ် အဆိုပြုခံထားရသူ မစ္စတာ နီကိုလပ်စ်ဖန်း၏ မြန်မာနိုင်ငံနှင့် ပတ်သတ်သည့် ဒေသဆိုင်ရာလုံခြုံရေးကိစ္စကို စင်ကာပူပါလီမန်တွင် မေးမြန်းခဲ့ရာ ချန်ချွန်ဆင်းက အထက်ပါအတိုင်း ဖြေကြားခဲ့ခြင်းဖြစ်သည်။

Cobra Gold သည် ထိုင်းနိုင်ငံနှင့် အမေရိကန်နိုင်ငံတို့ ၊ နှစ်စဉ် ၂ နိုင်ငံပူးပေါင်းလေ့ကျင့်သည့် စစ်ရေးအစီအစဉ်ဖြစ်သည်။ ယခုနှစ်တွင်မူ စင်ကာပူ၊ မလေး၊ အင်ဒို၊ ဂျပန်နှင့် တောင်ကိုရီးယားတို့ပါ ပါဝင်လေ့ကျင့်ခဲ့ကြသည်။ ဘရူနိုင်း၊ လာအို၊ တရုတ်၊ နယ်သာလန်၊ ရုရှ၊ တောင်အာဖရိက၊ သီရိလင်္ကာနှင့် ယူအေအီးတို့က ယခုနှစ် Cobra Gold  သို့ စောင့်ကြည့်လေ့လာရန် အဖွဲ့များစေလွှတ်ခဲ့ကြသည်။

အောက်တိုဘာလကမူ မြန်မာနိုင်ငံအား ယင်းအစီအစဉ်တွင် လေ့လာရေးအဖွဲ့စေလွှတ်ဖို့ ဖိတ်ကြားမည်ဟု ကြေငြာခဲ့သည်။ ကျွမ်းကျင်သူများကမူ အမေရိကန် အနေဖြင့် မြန်မာစစ်တပ်နှင့် ယင်းသို့ ပြန်လည် ဆက်ဆံခြင်းဖြင့် မြန်မာ၏ တရုတ်အပေါ်မှီခိုနေခြင်းအား ယုတ်လျော့သွားစေနိုင်မည်ဖြစ်ကြောင်း ရိုက်တာ သတင်းဌာနသို့ ပြောကြားသည်။