သေဖေါ် သေဖက်ပါ။ ရှင်ဖေါ် ရှင်ဖက် မဟုတ်ဘူးလား

ဗမာပြည် ကွန်မြူနစ်ပါတီ၊ ဆိုရှယ်လစ်ပါတီ၊ မျိုးချစ်ပါတီ၊ ကရင်ဗဟိုအဖွဲ့၊ ရခိုင်အမျိုးသား ကွန်ဂရက်၊ ဗမာမွတ်စလင် ကွန်ဂရက်၊ ကရင်လူငယ်အဖွဲ့၊ မွန်အစည်းအရုံး၊ တို့ဗမာအစည်းအရုံး၊ ဆင်းရဲသား ဝံသာနုအဖွဲ့၊ ဗမာနိုင်ငံလုံးဆိုင်ရာ လူငယ်များအဖွဲ့စတဲ့ မြန်မာ့လွတ်လပ်ရေးတိုက်ပွဲဝင် ဦးဆောင်အဖွဲ့ပေါင်း (၁၅)ဖွဲ့ တက်ရာက်ခဲ့တဲ့ ၁၉၄၆ ဇန္နဝါရီလ (၁၇)မှ (၂၃)အထိ ရွှေတိဂုံအလယ်ပစ္စယံတွင် ကျင်းပသော ဖဆပလ နိုင်ငံလုံးကျွတ် ညီလာခံကြီးသည် အနာဂတ် လွတ်လပ်သော ပြည်ထောင်စု မြန်မာနိုင်ငံရဲ့ အသက်ဝိညာဉ်၊ ပင်လုံကို မွေးဖွားခဲ့တဲ့ မိခင်ဆိုတာကို အလေးအနက်ထား သိရှိသူ နည်းမယ်ထင်ပါတယ်။

ခုနှစ်ရက်တိုင် ကျင်းပခဲ့တဲ့ အဲဒီညီလာခံကြီးမှာ ဆုံးဖြတ်ချက်ပေါင်း (၈)ခု ချမှတ်ခဲ့တယ်။ ရှမ်းပြည်၊ ချင်းတောင်၊ ကချင်တောင်တန်းဒေသများမှ တိုင်းရင်းသား ခေါင်းဆောင်များနှင့် ဗမာခေါင်းဆောင်များကသာ (ဗြိတိသျှ စွက်ဖက်မှု မပါဘဲ) လွတ်လပ်ပြီး မြန်မာနိုင်ငံတော်နှင့် ခွဲရေး၊ တွဲရေးကို ဆုံးဖြတ်ရမည်ဆိုတဲ့ ဆုံးဖြတ်ချက် အမှတ်(၇)ကိုသာ မချမှတ်နိုင်ခဲ့ရင် ယနေ့မြင်တွေ့နေရတဲ့ ပြည်ထောင်စု မြန်မာနိုင်ငံတော်ဆိုတာ ပေါ်ပေါက်လာဖို့မရှိဘဲ ရှမ်းပြည်၊ ကချင်ပြည်၊ ချင်းပြည်၊ ကယားပြည်တွေမပါတဲ့ တစ်ခြမ်းပဲ့ မြန်မာနိုင်ငံငယ်ကလေးသာ ဖြစ်သွားနိုင်တာက ငြင်းမရတဲ့ သမိုင်းဖြစ်ပါတယ်။ ဒါကြောင့် ရွှေတိဂုံအလယ်ပစ္စယံ ညီလာခံသည် အနာဂတ် လွတ်လပ်သော ပြည်ထောင်စု မြန်မာနိုင်ငံတော်ကြီးအတွက် အခြေခံအုတ်မြစ်ကို ချမှတ်ပေးခဲ့တဲ့ တိုင်းပြု ပြည်ပြု ညီလာခံကြီးဖြစ်ပါတယ်။ (အဆို(၇)ကို ပင်လုံပိသုကာ တစ်ဦးလည်းဖြစ်တဲ့ ဗမာမွတ်စလင် ကွန်ဂရက် ကိုယ်စားလှယ် ဦးဖေခင်က တင်သွင်းခဲ့တယ်။)

ဒီတိုင်းပြုပြည်ပြု ညီလာခံကြီးမှာဘဲ ဆရာကြီး ဒီးဒုတ်ဦးဘချို တင်သွင်းခဲ့တဲ့ အဆိုအမှတ်(၆)မှာ ဗမာမွတ်(စ)လင်များကို တိုင်းရင်းသားအဖြစ် အသိအမှတ်ပြုကြောင်းကိုလည်း ဆုံးဖြတ်ခဲ့ပါတယ်။

ဘာကြောင့် ဗမာမွတ်စလင်တွေကို တိုင်းရင်းသားအဖြစ် အခုလို ဆုံးဖြတ်သတ်မှတ်ရပါသလဲ။

သခင်မျိုးဟေ့ ဒို့ဗမာကစခဲ့တဲ့ သခင်အမည်ခံ လွတ်လပ်ရေးတိုက်ပွဲဝင်ခဲ့သူတွေဟာ မြန်မာ့သမိုင်းမှာ အင်မတန် ဂုဏ်ယူစရာကောင်းသူတွေ ဖြစ်ပါတယ်ဆိုရင် မှန်ပါတယ်။ သို့သော် သခင်လှုပ်ရှားမှုအစမှာ ဗမာတွေက ရဲရဲတောက် အလုံးအရင်းနှင့် သခင် သခင်မ အမည်တွေခံပြီး အင်္ဂလိပ်ကို အံတုဆန့်ကျင်ခဲ့ကြတယ်ဆိုရင်တော့ တက်တက်စင်အောင် လွဲပါတယ်။ သခင်ပေါက်စ ထောင်ခြောက်လလို့ အလှောင်အပြောင်ခံခဲ့ရတဲ့ သခင်ဘွဲ့ခံသူတွေဟာ အထင်သေးခံ၊ နှာခေါင်းရှုံ့ခံရတဲ့၊ အချိန်မရွေး ပုလိပ်အဖမ်းခံရနိုင်တဲ့၊ သမီးရှင်တွေ နှာခေါင်းရှုံ့တတ်တဲ့ ပျက်ရယ်ပြုခံ လူတန်းစားတစ်ရပ် အမှန်ဖြစ်ခဲ့ပါတယ်။ ဒီကာလမျိုးမှာလည်း မြန်မာမွတ်စလင် သခင်တွေ အများအပြား ပေါ်ထွက်ခဲ့ရုံမက ဒို့ဗမာမွတ်စလင် အစည်းအရုံးကိုပင်တည်ထောင်ပြီး မြန်မာ့လွတ်လပ်ရေးအတွက် အခြားသခင်များနှင့် ရင်ဘောင်တန်း တိုက်ပွဲဝင်ခဲ့ကြပါတယ်။

ကျောင်းအုပ်ကြီးတွေ့ရင် ဆလံပေး၊ အလေးပြူရတဲ့ ခေတ်ကြီး(ဦးနုရဲ့ တာတေစနေသား)မှာ၊ တက္ကသိုလ်က အခမ်းအနားတွေ၊ အစည်းအဝေးတွေမှာ God Save the King သီဆိုပြီးမှ ဖွင့်လှစ်ရပြီး အင်္ဂလိပ်ကို ဘုရားထူးနေရတဲ့ ခေတ်ကြီးမှာ ဗမာမွတ်စလင် ကိုထွန်းစိန် (တကသ ဥက္ကဌ)က ဒီကျွန်သီချင်းကို မဆိုနိုင်ပါဘူး။ ငါတို့ဟာ သခင်တွေဖြစ်လို့ ဒို့ဗမာအစည်းအရုံးရဲ့ သခင်သီချင်းကိုဘဲ ဆိုရမယ်လို့ ကျောင်းသားအစည်းအဝးမှာ ပထမဆုံး အဆိုတင်တောင်းဆိုခဲ့တယ်။ အဲဒီကစပြီး တက္ကသိုလ်အခမ်းအနားတွေမှာ ဒို့ဗမာအစည်းအရုံး သီချင်းကိုသာ အစဉ်အဆက် သီဆိုကြပါတော့တယ်။

ဗိုလ်ချုပ်အောင်ဆန်းနှင့် ရဲဘော်သုံးကျိပ်က ဂျပန်နှင့်အတူ မြန်မာပြည်ကို ဝင်ရောက်လာပြီးနောက် မရှေးမနှောင်းမှဘဲ ဂျပန်ရဲ့ ဂတိမတည်၊ ရက်စက်ယုတ်မာမှုတွေကြောင့် ဂျပန်ကိုပြန်ချဖို့ ဖဆပလ(ဆတပလ)ကို လျှို့ဝှက်ဖွဲ့စည်းခဲ့ပါတယ်။ အထက်ဗမာပြည်ကို ဦးဆောင်ဖို့ မန္တလေးခရိုင် ဖဆပလအတွက် ခေါင်းဆောင် ရှာခဲ့ကြတယ်။ အထက်ဗမာပြည်မှာရှိတဲ့ ထင်ရှားသော နိုင်ငံရေးခေါင်းဆေင်များကို ဥက္ကဌတာဝန်ယူဖို့ လက်လှမ်းမီရာ ချဉ်းကပ်စည်းရုံးခဲ့တယ်။ ရက်စက်ကြမ်းကြုတ်တဲ့ ဖက်ဆစ်ဂျပန်ကို အံတုမဲ့ မြေအောက် သူပုန် ဖဆပလ ဥက္ကဌနေရာကို ယူဝံ့သူ မရှိခဲ့ကြဘူး။

မင်းတို့ အစိုးရကျောင်းက အိုင်စီအက်စ် (Indian/Imperial Civil Service အင်္ဂလိပ်သစ္စာတော်ခံ အရာရှိ) တစ်ယောက်ထွက်ရင် ငါ့အမျိုးသားကျောင်းက လွတ်လပ်ရေးတိုက်ပွဲဝင် သူပုန်ဆယ်ယောက် ထွက်စေရမယ်ဟေ့လို့ ကြုံးဝါးခဲ့တဲ့ ဆရာကြီး ဦးရာဇတ်က လူတကာ မလုပ်ရဲတဲ့ ဖဆပလ ဥက္ကဌတာဝန်ကို ကြေကြေနပ်နပ်ကြီး ယူခဲ့ပြီး ဓါးသွား(ဖက်ဆစ်)ပေါ်က ပျားရည်စက်(လွတ်လပ်ရေး)ကို ရဲရဲကြီး လျှက်ခဲ့တယ်။ (အခုတော့ ကုလားလူလိမ် ရာဇတ်ဆိုပြီး ဖေ့စ်ဘွတ်တွေမှာ စော်ကားလာကြပါပြီ။)

ဂျပန်ပြေး၊ အင်္ဂလိပ်ပြန်ဝင်ပြီး သခင်တွေ၊ ဘီအိုင်အေတွေ ခေတ်ကောင်းတော့ လူတိုင်း သခင်ဖြစ်ချင်ကြတယ်။ တစ်မတ်ပေးရင် ဒို့ဗမာအစည်းအရုံးဝင် သခင်လက်မှတ်ရတာမို့ တစ်မတ်သခင်လို့တောင် ခေါ်လာကြပြီ။ ဖဆပလကလည်း ပျိုတိုင်းကြိုက်တဲ့ နှင်းဆီခိုင်ဖြစ်လာတယ်။ ဖဆပလ တန်ခိုးထွားလာတယ်။ အဲဒီအခါကျမှ မဟာတစ်ချို့က ဆရာကြီးဦးရာဇတ် ကုလားဖြစ်ကြောင်း သိလာကြဟန်တူပါတယ်။ ကုလားကြီး ဦးရာဇတ်ကို မြန်မာ့ဦးစွန်း နေပြည်တော် အထက်မြန်မာပြည်ရဲ့ ဖဆပလ ဥက္ကဌနေရာ မခန့်သင့်ဘူးလို့ ကန့်ကွက်ကြပါတော့တယ်။  သံဃာတော်များအပါအဝင် ရဟန်းရှင်လူတွေက ဘယ်သူမှ မလုပ်ချင်တုန်းက အသေခံပြီးလုပ်ခဲ့တဲ့ ဆရာကြီးဦးရာဇတ်ကလွဲပြီး ဘယ်သူကိုတင်တင် လုံးဝ လက်မခံနိုင်ဘူးလို့ ပြင်းပြင်းထန်ထန် ကန့်ကွက်ပယ်ချခဲ့ကြတယ်။ ဒါက သမိုင်းပါ။

ကုလား၊ ပသီ၊ ဇေတဘာဒီ၊ မြန်မာမွတ်စလင်ဆိုတဲ့ အမည်တွေဟာ ကျောက်စာတင် သမိုင်းဝင် စကားလုံးတွေဖြစ်ပါတယ်။ ပထမမြန်မာနိုင်ငံတော် စတည်ထောင်တဲ့ လွန်ခဲ့သော နှစ်တစ်ထောင်ကျော်ကပင် တည်ရှိခဲ့တဲ့ တိုင်းကျိုးပြည်ဆောင်၊ တိုင်းပြု ပြည်ပြု အစ္စလာမ်ဘာသာဝင် မြန်မာပြည်သားတွေကို ခေါ်ဆိုတာဖြစ်ပါတယ်။ မြန်မာမွတ်စလင်တွေဟာ ပတ်စ်ပို့နှင့် ခုန်ချလာသူ၊ မလွယ်ပေါက်က ခိုးဝင်လာသူ၊ မနေ့တနေ့ကမှ နိုင်ငံသားအဖြစ် ကျမ်းကြိမ်ခဲ့သူတွေ တစ်ယောက်မှ မဟုတ်ဘူးဆိုတာကို သိသိကြီးနှင့် မိမိကိုယ်ကို အိမ်ရှင်အတင်းလုပ်ပြီး ဘာဖြစ်လို့ အခုမှ ဧည့်သည်သဖွယ်၊ နိုင်ငံခြားသားသဖွယ် ခွဲခြားဆက်ဆံနေကြတာလဲ။ အစ္စလာမ်ဘာသာကို နိုင်ငံခြားဘာသာလို့ ဆိုလာရတာလဲ။ မြန်မာပြည်မှာ နိုင်ငံခြားက မလာတဲ့ ဘာသာရှိလို့လား။ မသိလို့ မရှက်တာလား။ မရှက်တတ်လို့ဘဲ မသိချင်ယောင် ဆောင်နေကြတာလား။

 ဒုတိယကမ္ဘာစစ်မတိုင်မီ ဦးစောနန်းရင်းဝန်အဖြစ် တာဝန်ယူစဉ်က အစ္စလာမ်ဘာသာဝင် မြန်မာပြည်သားတွေကို မြန်မာမွတ်စလင် အဖြစ်သာ တစ်ပြေးညီ သတ်မှတ်ခေါ်ဝေါ်ဖို့၊ ၁၀နှစ် တစ်ကြိမ်ကောက်သော သန်းခေါင်စာရင်းတွင်လည်း မြန်မာမွတ်စလင် အဖြစ်သာ ကောက်ယူဖို့ အမိန့်ပြန်တမ်း ထုတ်ပြန်ခဲ့တယ်။

၁၉၆၀လောက်မှာ ဝန်ကြီးချုပ်ဦးနုက မြန်မာမွတ်စလင်ဆိုတာက ဘာသာရေးနှင့် လူမျိုးအမည်ကို တွဲဖက်ထားခြင်းဖြစ်၍ မသင့်လျော်သဖြင့် မြန်မာမွတ်စလင်လို့ မသုံးကြဘဲ အစ္စလာမ်ဘာသာကို ကိုးကွယ်သော မြန်မာတွေ၊ မြန်မာလူမျိုး အဖြစ်သာ ခေါ်ဝေါ်ဖို့၊ လက်ခံဖို့ တိုက်တွန်းခဲ့တယ်။ ဦးနု ထောက်ပြချက်က မှန်ပါတယ်။ ဒါနဲ့ အစ္စလာမ်ဘာသာဝင် မြန်မာ၊ ကရင်၊ ရှမ်း၊ ရခိုင်စသဖြင့် ခေါ်ဝေါ်စေလိုသူနှင့် ပသီဟူ၍ ခေါ်စေလိုသူဆိုပြီး မြန်မာမွတ်စလင် အုပ်စုအတွင်း အကြမ်းအားဖြင့် အယူအဆနှစ်ခု ပေါ်ပေါက်ခဲ့တယ်။

မရှေးမနှောင်းမှာဘဲ ကျေးဇူးရှင် ဗိုလ်ချုပ်ကြီးနေဝင်းက အာဏာသိမ်းလိုက်တော့ တိုင်းရင်းသားရေး၊ ပြည်ထောင်စုရေး အပါအဝင် လူ့အခွင့်အရေး၊ ဒီမိုကရေစီရေးတွေ အားလုံးရပ်သွားပြီး တစ်နိုင်ငံလုံး နောက်ပြန်ဆုတ် အမှောင်တိုက်ကျခဲ့ရတယ်။ မြန်မာလား၊ ပသီလား၊ မြန်မာမွတ်စလင်လားဆိုတဲ့ အသုံးအနှုံးတွေဟာ မတင်မကျနဲ့ ယနေ့ထိအောင် ရှုပ်ထွေးနေဆဲဖြစ်နေတယ်။ ဒါကြောင့်လဲ ကုလားဆိုတဲ့ အသုံးအနှုံးက ခေါင်းပြန်ထောင်လာခဲ့တယ်။

မြန်မာပြည်မှာ တိုင်းရင်းသား (၁၄၄)မျိုးရှိတယ်လို့ ဗိုလ်နေဝင်းက သတ်မှတ်ပြီး၊ ဗိုလ်စောမောင်က (၁၃၅)မျိုးလို့ သတ်မှတ်တယ်။ အခု ဒီမိုကရေစီ ဗိုလ်ဦးခင်ရီက (၁၀၁)မျိုးလို့ သတ်မှတ်ထားတယ်။ ထူးဆန်းတာက တိုင်းရင်းသားဖြစ်မှုကို တိုင်းရင်းသားပြည်သူလူထုကို တစ်ခါဘူးမျှ ချပြဆွေးနွေးခြင်းမလုပ်ဘဲ အာဏာရှင်များကသာ တိုင်းရင်းသားဖြစ်စေ သတည်းဆိုပြီး တစ်ချက်လွှတ်အမိန့်နှင့် သတ်မှတ်တာချည်းဘဲ ဖြစ်နေတယ်။ ပိုထူးဆန်းတာက တိုင်းပြည်လုံခြုံရေး အတွက် ဒီလောက်အရေးကြီးတဲ့ တိုင်းရင်းသားဖြစ်ခြင်းကို အုပ်ချုပ်သူများက အခုလိုအကြိမ်ကြိမ် တာဝန်မဲ့ ထင်ရာစိုင်း ပြဌာန်းနေတာကို ဝတ်ကြေ တန်းကြေ ကန့်ကွက်ရုံအပြင် ဘယ်တိုင်းရင်းသားကမှ အလေးအနက်ထားဟန် မတွေ့ရတာဘဲ။

ဗိုလ်ချုပ်နေဝင်း သတ်မှတ်တဲ့ တိုင်းရင်းသား (၁၄၄)မျိုးမှာ မြန်မာမွတ်စလင်ပါသလို၊ ဦးနုခေတ်က တိုင်းရင်းသား သတ်မှတ်ခဲ့တဲ့ ရိုဟင်ဂျာကိုလည်း ရခိုင်စစ်တကောင်းအဖြစ် ထဲ့သွင်းထားတယ်။ ရှစ်လေးလုံးအပြီး အာဏာသိမ်းတက်လာတဲ့ ကျန်စစ်သားမင်း ဗိုလ်စောမောင်က ဗိုလ်နေဝင်းရဲ့ (၁၄၄)ကို မာရှယ်လောနှင့် (၁၃၅) လုပ်လိုက်တယ်။ တိုင်းရင်းသား(၉)မျိုးကို ဘယ်ချောင်မှာ လူမသိ သူမသိ သတ်ပစ်လိုက်သလဲ မသိပါဘူး။ (၁၄၄)တုန်းက တရုပ်ဖြစ်လို့ ချန်ထားခဲ့တဲ့ ကိုးကန့်ကို (၁၃၅)မှာ တိုင်းရင်းသားဖြစ်စေသတည်းဆိုပြီး ထည့်လိုက်ပြန်သေးတယ်။ အခု ဒီမိုကရေစီ ဗိုလ်ခင်ရီက (၁၃၅)ကနေ (၁၀၁) လူမျိုးအဖြစ် ဒီမိုကရေစီလွှတ်တော်ကို ဘေးချိတ်ပြီး သတ်မှတ်လိုက်ပြန်တယ်။

ဘယ်လောက်ထိ ပေါက်တတ်ကရတွေ လုပ်နေသလဲဆိုရင် အဲဒီဗိုလ်ခင်ရီရဲ့ လူမျိုး(၁၀၁)မျိုးထဲမှာ ဇိုမီးမပါတော့ ဇိုမီးပါတီကို နိုင်ငံရေးပါတီအဖြစ်ထောင်ဖို့ ငြင်းပယ်ခဲ့တယ်။ ဇိုမီးက တင်းခံတော့ ဇိုမီးကို တိုင်းရင်းသားပြန်ဖြစ်စေ လုပ်လိုက်ပြန်တယ်။ ဒါဆို တိုင်းရင်းသား (၁၀၂)မျိုးဖြစ်ရမှာပေါ့။ မဟုတ်ပါဘူး။ ဇိုမီးကို ထပ်တိုးပြီးလဲ တိုင်းရင်းသားက (၁၀၁)မျိုးဘဲလို့ ထပ်ပြောပြန်တယ်။ ဒါဆို (၁၀၁)မျိုးထဲက ကံဆိုးသူမောင်ရှင် ဘယ်လူမျိုးကို မျိုးဖြုတ်လိုက်ပြီး ဇိုမီးကို အစားထဲ့ခဲ့သလဲ။ တိုင်းရင်းသား (၁၃၅)ကနေ (၁၀၁)လုပ်တုန်းက ဒီမိုကရေစီအစိုးရဆိုသူက ဘယ်လူမျိုး (၃၄)မျိုးကို လူမသိ သူမသိ Genocide လုပ်လိုက်သလဲ။ တိုင်းရင်းသားဖြစ်စေ မဖြစ်စေကို အပျင်းပြေ ဂေါက်သီးရိုက်နေတယ်လောက် အောင်းမေ့နေတဲ့ ရှက်ကြောပြတ်နေသော အာဏာရှင်များက နိုင်ငံတော်လုံခြုံရေးကို အလေးထားပါတယ်ဆိုတာကို ယုံတဲ့သူတွေက ယုံနေဆဲပါ။ ဒို့မြန်မာပြည်ဖြစ်ပါတယ်။

မေးစရာ ဆက်ဖြစ်လာတာက လူမျိုး(၁၀၁)ပါးဆိုတာကကော ဘာသဘောလဲ။ ဇိုမီးမရှိခင်က (၁၀၁)မျိုး၊ ဇိုမီးကို ပြန်ထဲ့ပြီးလဲ ဘာကြောင့် (၁၀၁)ဘဲ ဘာကြောင့် ဖြစ်နေရတာလဲ။ တစ်ရာ့တစ်ပါးသောမင်းတွေ ပဏ္ဍာကြို့ရတဲ့ ဗမာထီးဆောင်းမင်း လုပ်ချင်နေတုန်းဘဲလား။ အရင်ရောဂါဟောင်းက အကင်းမသေသေးဘူးလား။ ဒါလား ဒီမိုကရေစီ။ ဒါလား တိုင်းရင်းသား စည်းလုံးညီညွတ်ရေးကို အလေးထားတာ။

တိုင်းပြည်လွတ်လပ်ရေးနှင့် တိုင်းပြုပြည်ပြုရေးတွေဖြစ်တဲ့ လူမှုရေး၊ ယဉ်ကျေးမှု၊ စာပေ၊ ပညာရေး၊ အနုပညာ၊ အားကစား၊ စီးပွါး၊ ငြိမ်းချမ်းရေး၊ တိုင်းပြည်ကာကွယ်ရေး၊ ပြည်ထောင်စု စည်းလုံးညီညွတ်ရေး၊ ဒီမိုကရေစီရေး၊ လူ့အခွင့်အရေး၊ ရှစ်လေးလုံး၊ ရွှေဝါရောင် သံဃာအရေးအခင်းစတဲ့ ကဏ္ဍစုံမှာ မြန်မာမွတ်စလင် မပါခဲ့တဲ့နေရာ ရှိရင် ထောက်ပြပါ။ တိုင်းပြည်ကို ဆူပူအောင်၊ အကျိုးပျက်အောင်၊ အကြမ်းဖက်အောင်၊ မငြိမ်းချမ်းအောင်၊ မတိုးတက်အောင်၊ မစည်းလုံးအောင် မြန်မာမွတ်စလင်တွေ လုပ်ခဲ့တယ်ဆိုရင်လဲ ထောက်ပြပါ။ တိုင်းပြည်က တောင်းဆိုတဲ့အခါ မိမိရဲ့ အသက် သွေး ချွေးပေးဆပ်ရာမှာ မြန်မာမွတ်စလင်တွေ နောက်တွန့်ခဲ့ဘူးတယ်ဆိုရင်လဲ ထောက်ပြလိုက်ပါ။

၁၉၄၇ခု ဖေဖေါ်ဝါရီလ(၁၁)ရက်နေ့ ပင်လုံစာချုပ် လက်မှတ်မထိုးမီညမှာ ဗိုလ်ချုပ်အောင်ဆန်း ဂတိပြုပြောကြားခဲ့တာက

– – – ရှေးခေတ်က အော်လာကြတဲ့ အမျိုး၊ ဘာသာ၊ သာသနာ၊ ပညာဆိုတဲ့ စကားမျိုးကို လက်သုံးပြုလို့ မလုံလောက်တော့ဘူး။ ဗမာ၊ ကရင်၊ ကချင်၊ ချင်းနှင့် အခြားအမျိုးများလဲ ရှိသေးတယ်။ – – – သာသနာဆိုတာကတော့ ကိုယ်ကိုးကွယ်ချင်တဲ့ ဘာသာ သသနာကို ကိုးကွယ်နိုင်ကြတာဘဲ။ ဗမာပြည်မှာ လူများစုက ဗုဒ္ဓဘာသာဖြစ်ပေမဲ့ ခရစ်ယာန်ဘာသာ ကိုးကွယ်သူ၊ မဟာမေဒင်ဘာသာ ကိုးကွယ်သူ၊ နတ်ကိုးကွယ်သူ အမျိုးမျိုး ရှိတာဘဲ။ သည်တော့ ဒါတွေကိုစွဲပြီး လူမျိုးရေးတရား လုပ်လို့ မဖြစ်နိုင်ဘူး။ – – -(ဗိုလ်ချုပ်အောင်ဆန်း မိန့်ခွန်းများ၊ စာပေဗိမာန်)

– – – ဒီမှာဆရာ၊ ကျနော်တို့က လူကြိုက်အောင် လုပ်နေကြတာမဟုတ်ဘူး။ ဒီလို မဟုတ်မဟတ်ကို စိတ်ထင်ရာတွေ ရှောက်လုပ်ကြမယ်ဆိုရင် ကျနော်တို့တိုင်းပြည်ကြီးဟာ မကြာခင် ပျက်စီးပြိုကွဲပြီး ကျွန်သဘောက် ဖြစ်သွားကြမှာဘဲ။ ကျနော်တို့တိုင်းပြည်ထဲမှာ အလောင်းဘုရားလက်ထက်ကတည်းက ရှိခဲ့ကြတဲ့ မွတ်စလင်တွေရှိတယ်။ ဘရင်ဂျီတွေ ရှိတယ်။ အစကတည်းက ရှိလာခဲ့ကြတဲ့ နတ်ကိုးကွယ်တဲ့ တောင်တန်းသားတွေ ရှိတယ်။ တချို့ခရစ်ယာန်တွေဖြစ်ပြီး အရိုးစွဲနေကြတာတွေ ရှိတယ်။ သူတို့တွေဟာလဲ အားလုံး နိုင်ငံသားတွေဘဲ။ တိုင်းပြည်ကို ကျွန်တွင်းက လွတ်အောင် တိုက်ထုတ်ကြတုန်းက ကျနော်တို့ချည်း မဟုတ်ဘူး။ သူတို့တတွေပါ ပါကြပါတယ်။ အခုကျွန်တွင်းက လွတ်မယ်မှ မကြံသေးဘူး၊ သူတို့တတွေအပေါ်မှာ အနိုင်ကျင့်ပြီး ငါတို့လူများစုရဲ့ ဘာသာကို နိုင်ငံတော်ဘာသာဖြစ်ရမယ်လို့ လုပ်လိုက်ရင် ကျုပ်တို့ဟာ ခွေးလောက်တောင် သောက်သုံးမကျတဲ့အကောင်တွေ ဖြစ်သွားကြမှာပေါ့။ ဆရာ တိုင်းပြည်ကို တိုင်းပြည်ရေးလို့ တွေးစမ်းပါ။ ဘာသာတွေ ဘာတွေ ညာတွေ လုပ်မနေပါနဲ့။ ကျနော်တို့ဟာ ကျနော်တို့ တိုင်းပြည်တစ်ခုလုံး စည်းရုံးနေဖို့လိုတယ်။ အမျိုး၊ ဘာသာ သာသနာဆိုတာတွေဟာ ရှေးရှေး ပဒေသရာဇ်မင်းတရားကြီးတွေရဲ့ စိတ်ကူးယဉ် ဘဝင်လေပင့်ပြီး ပြောခဲ့တဲ့စကားတွေပါ။ အခုအချိန်မှာ ကျနော်တို့လိုကြတာက ပြည်ထောင်စုကြီးထဲမှာရှိနေကြတဲ့ လူမျိုးအားလုံး ဘာသာအားလုံး ဘယ်တော့မှ မပြိုကွဲသွားဘဲ ခွဲထွက်သွားမဲ့သူတွေ ပေါ်မလာစေဘဲ နိုင်ငံစိတ်ဓါတ် တစ်ခုထဲရှိနေအောင် သွင်းပေးဖို့ စည်းရုံးပေးဖို့ လိုနေတယ်။ နိုင်ငံတော်ဘာသာ ဗုဒ္ဓဘာသာလုပ်ချင်ရင် ဆရာကိုယ်တိုင် ဘဝရှင်မင်းတရားကြီး အမည်ခံပြီး သာသနာ့ဒါယကာတော် တက်လုပ်။ ပြီးတော့ စည်ကုံးခရိုင်နှင့်တကွ စိုးမိုးအုပ်ချုပ်တော်မူသော သီရိပရဝဓမ္မရာဇာ ဘဝရှင်မင်းတရားကြီး သာသနာ့ဒါယကာ ဘချို၏ ဗုဒ္ဓဘာသာနိုင်ငံတော်လို့ ဆရာ့ဟာ ဆရာကြေညာ၊ ကျနော် မပါဘူး။ – – – (နိုင်ငံတော်ဖွဲ့စည်းပုံရေးဆွဲရာတွင် ဗိုလ်ချုပ်အောင်ဆန်းက ဒီးဒုတ်ဦးဘချိုသို့ ပြောကြားချက်- မီးဒုတ်သတင်းစာ၊ စက်တင်္ဘာ ၂၊ ၁၉၆၀)

၁၉၄၇ခုနှစ် မြန်မာနိုင်ငံသားဥပဒေ၊ ၁၉၄၈ခုနှစ်နှင့် ၁၉၇၄ခုနှစ် ပြည်ထောင်စုမြန်မာနိုင်ငံ ဖွဲ့စည်းအုပ်ချုပ်ပုံ အခြေခံ ဥပဒေများအရ မြန်မာနိုင်ငံသား တိုင်းရင်းသားဖြစ်ပြီးသူ မြန်မာမွတ်စလင်များသည် ၁၉၈၂ခုနှစ် နိုင်ငံသားဥပဒေအရ နိုင်ငံခြားသားများ၊ သံသယများ၊ နိုင်ငံမဲ့များ၊ ဧည့်သည်များ၊ ဧည့်နိုင်ငံသားများသဖွယ် ဆက်ဆံခံနေရလာတယ်။ မွတ်စလင်ဖြစ်လျှင် မြန်မာမဖြစ်ရဟု လူမျိုးရေးအစွန်းရောက် ဥပဒေများကို သိက္ခာမဲ့စွာ ချမှတ် ကျင့်သုံးလာတယ်။ ရုပ်ရှင်မင်းသား မောင်မောင်တာသည် မွတ်စလင်ဖြစ်သဖြင့် မြန်မာလူမျိုးဖြစ်ခွင့် မရှိ။ ဘင်္ဂလီ-မြန်မာဟု မှတ်ပုံတင်တွင် စာရင်းသွင်းခံလိုက်ရတယ်။ သူ့ညီအရင်းကမူ ဗုဒ္ဓဘာသာကိုးကွယ်သဖြင့် မြန်မာဖြစ်ခွင့် ရရှိသွားသည်။ တစ်မိ တစ်ဖရင်းမှ မွေးဖွားသူများကိုပင် ကိုးကွယ်သည့်ဘာသာ အပေါ်အခြေခံပြီး လူမျိုးအမည်ကို ဗလောင်းဗလဲ ပြောင်းလဲသတ်မှတ်နေသော ကမ္ဘာပေါ်ရှိ တစ်ခုတည်းသော ထူးဆန်းသည့် အူကြောင်ကြောင် နိုင်ငံဖြစ်လာသည်။ လွတ်လပ်ရေးအတွက် အသက်စွန့် တိုက်ပွဲဝင်တုန်းက တို့အားလုံး၏ နိုင်ငံဟု ဆိုခဲ့ကြပြီး လွတ်လပ်ရေးရပြီးနောက် နင်တို့ မပါ၊ ငါတို့သာ ပိုင်တဲ့နိုင်ငံအဖြစ် သူရဲဘောကြောင်သူ ကြောင်သူတော် မဟာများက မရှက်မကြောက် ဆိုရဲလာသည်။

မြန်မာတိုင်းရင်းသား မိဘ၊ ဘိုးဘွားစဉ်ဆက်က ဆင်းသက်လာခဲ့ကြသော ကျနော်တို့ မြန်မာမွတ်စလင်များတွင် ချစ်ရန်၊ သေရန်၊ အသက်စွန့်ရန် ဇာတိချက်ကြွေ အမိမြန်မာနိုင်ငံမှတစ်ပါး အခြားမရှိပါ။ မြန်မာပြည်သည် ဒို့ပြည်။ မြန်မာစာသည် ဒို့စာ။ မြန်မာစကားသည် ဒို့စကား၊ မြန်မာ့ယဉ်ကျေးမှုသည် ဒို့ယဉ်ကျေးမှုဖြစ်ပါတယ်။

ကျနော်တို့ရဲ့ မွေးရာပါနိုင်ငံသားဖြစ်မှုကို ဦးသိန်းစိန်က ပေးမှ၊ ဦးသိန်းညွန့်က သဘောတူမှ၊ တစ်ဦးတစ်ယောက်က ခွင့်ပြုမှ၊ ၁၉၈၂နိုင်ငံသားဥပဒေနှင့် ကိုက်ညီမှ၊ ၂၀၁၄ခု သန်းခေါင်စာရင်းတွင် အမည်မှန်ထဲ့ပေးမှ ရရှိမည်ဟု လုံးဝ မယုံကြည်ပါ။

ကျနော်တို့၏ မွေးရာပါအခွင့်အရေးကို စာနာနားလည်မှုရှိသော ပြည်ထောင်စုသားများနှင့် လက်တွဲ၍ ကာကွယ်သွားမည်။ အစ္စလာမ်ဘာသာကိုးကွယ်ခြင်းကို အကြောင်းပြု၍ မြန်မာမွတ်စလင်များကို ဖိနှိပ် ခွဲခြားဆက်ဆံခြင်း မှန်သမျှကို တည်ဆဲဥပဒေဘောင်အတွင်းမှ ဆန့်ကျင်သွားမည်။ အစ္စလာမ်ဘာသာကို ကိုးကွယ်သော မြန်မာများ၏ တိုင်းရင်းသားအခွင့်အရေးနှင့် တာဝန်များကို အပြည့်အဝ အသိအမှတ်ပြု ပြန်လည်ပေးအပ်ရမည်။ မြန်မာအပါအဝင် တိုင်းရင်းသားပေါင်းစုံက ဆင်းသက်ပေါက်ဖွားလာတဲ့ ကျနော်တို့၏ လွတ်လပ်စွာ ရွေးချယ်မှု၊ ကိုးကွယ်မှု၊ အသက်ရှင် ရပ်တည်မှု၊ တင်းပြည့်ကျပ်ပြည့် နိုင်ငံသားဖြစ်မှုကို ပြီးပြည့်စုံစေရမည်။