အဖျက်ခံရမည်ဟု သတင်းထွက်နေသော လှိုင်းဘွဲ့မြို့မှ မွတ်စလင်မ်ရွာအား လုံခြုံရေး ချထား

နိုဝင်ဘာ ၂၃၊ ၂၀၁၂
M-Media
နေသစ်ထွန်း

အစ္စလာမ် ဘာသာဝင် အများစုနေထိုင်ရာ ကရင်ပြည်နယ် လှိုင်းဘွဲ့ မြို့နယ် ပိုင်ကျုံမြို့နယ်ခွဲရှိ  အလီမွလ္လဟ် (ယခုခေါ် မိုးနိုင်း တောင်) ရွာ အား နိုဝင်ဘာ ၂၃ ရက်နေ့တွင် ဖျက်ဆီး မည်ဟု သတင်းများ ထွက်ပေါ် သဖြင့် ပိုင်ကျုံ ရဲစခန်းမှ ဗလီနှင့် အနီးတ၀ိုက်တွင် လုံခြုံရေး အစောင့်ချပေးခဲ့ကြောင်း ဒေသခံ များ ပြောပါသည်။

“ပိုင်ကျုံကထိန်ပွဲပြီးရင် ရွာကိုဖျက်မယ်လို့ နိုဝင်ဘာ ၂၀ နေ့လောက်က သတင်းထွက်လာတယ်။ အခု ကထိန် ပွဲပြီး သွားပြီးဆိုတော့ ဖျက်ခံရမှာကို စိုးရိမ်နေကြတာ။အခုတော့ ရဲတွေ ရောက်နေကြတယ်”ဟု ဒေသခံ တစ်ဦးက ပြောပါသည်။

ဘားအံ မဲတောင်ကျောင်းတိုက်မှ မွတ်စလင်များအား ဆန့်ကျင်ရန် ကြေညာချက်ထုတ်ပြန်ပြီး နောက်ပိုင်း ပိုင်ကျုံ မြို့နယ်ခွဲတွင် အစ္စလာမ် ဘာသာဝင်များအားဆန့်ကျင်မှု များဖြစ်ပွားလာခဲ့ခြင်းဖြစ်သည်။

“ဘားအံက ကြေညာချက်ထုတ်ပြီးတော့ မွတ်စလင်တွေနဲ့ အဆက်ဆံ မလုပ်ဖို့ ဒီမှာ လှုံဆော်ကြတယ်။ နောက်ပြီး လွန်ခဲ့တဲ့ တစ်လလောက်က ရွာမှာ ရခိုင်က ပဋိပက္ခ ဗီဒီယို အခွေပြတယ်။  မွတ်စလင်တွေက ရခိုင်တွေ တိုက်ခိုက်တဲ့ အခွေပါ” ဟု ပိုင်ကျုံ ဒေသခံတစ်ဦးက ပြောပါသည်။

အဆိုပါ လှုပ်ရှားမှုကို ပိုင်ကျုံ မြို့နယ်ခွဲ မှ ကျေးရွာအုပ်ချုပ်ရေးမှူး တစ်ဦးနှင့် ဘုန်းကြီးတစ်ပါး တို့က ရွာသား တစ်ချို့ကို ဦးဆောင် လှုပ်ရှားနေကြောင်း သိရသည်။

ရခိုင်ပြည်နယ် အတွင်းဖြစ်ပွားခဲ့သော ပဋိပက္ခ အား ကရင်ပြည်နယ်တွင် ဘာသာရေးအသွင် ပုံဖော်ကာ ဘာသာရေး အဓိကရုဏ်း ဖြစ်ပွားစေရန် ရည်ရွယ်လုပ်ဆောင် လာကြ သည်။

ပိုင်ကျုံမြို့နယ်ခွဲ မိုးနိုင်းအထက်စု ၊ မိုးနိုင်တောင် ၊ နှင့် မိုးနိုင်းအောက်စု ရွာတို့တွင် ဗလီဝတ်ကျောင်းတော် ၃ လုံး တည်ရှိ ပြီး စုစုပေါင်း အိမ်ခြေ အစ္စလာမ် ဘာသာဝင်အိမ်ခြေ (၃၀၀ ) နီးပါးရှိကြောင်း သိရသည်။ ဒေသခံ အစ္စလာမ် ဘာသာဝင်များသည် လယ်ယာစိုက်ပျိုးရေးနှင့် ဈေးရောင်းဝယ် လုပ်ငန်းများ လုပ်ကိုင်ကြသည်။