အီရန်ဒရုန်းနည်းပညာကို ရုရှားက အားကိုးနေရပြီလား

အောက်တိုဘာ ၂၂၊ ၂၀၂၂

M-Media 

-ယူကရိန်းကျူးကျော်စစ်မှာ ရုရှားဟာ အီရန်လုပ်ဒရုန်းတွေကို ပိုမို အသုံးပြုလာသလို အီရန် ဒရုန်းပညာရှင်တွေကလည်း ရုရှားတပ်ဖွဲ့ကို လေ့ကျင့်သင်ကြားပေးနေတယ်ဆိုတဲ့ သတင်းတွေ ထွက်လာပါတယ်။ 

ပြီးခဲ့တဲ့တနင်္လာနေ့က ယူကရိန်းမြို့တော်ကိဗ်မှာ ရုရှားရဲ့ ဒရုန်းတွေနဲ့ အကြီးစားတိုက်ခိုက်မှုတစ်ခု ဖြစ်ပွားခဲ့ပါတယ်။ 

ဒီတိုက်ခိုက်မှုအတွင်း အီရန်လုပ် ‘အသေခံဒရုန်း’ (Kamikaze Drone) တွေကို အသုံးပြုခဲ့တယ်လို့ ယူကရိန်းနဲ့ အမေရိကန်တာ၀န်ရှိသူတွေက ပြောပါတယ်။ 

အိမ်ဖြူတော် နိုင်ငံတော်လုံခြုံရေးအကြံပေး ဂျွန် ကီရ်ဘီက ရုရှားကသိမ်းထားတဲ့ ခရိုင်းမီးယားကျွန်းဆွယ်မှာ အီရန် ဒရုန်းတပ်ဖွဲ့ တပ်စွဲထားပြီး ရုရှားစစ်သားတွေကို အီရန်ထုတ် ဒရုန်းမောင်းနှင်မှုသင်တန်း ပေးနေတယ်လို့ မနေ့က သတင်းထောက်တွေကို ပြောကြားခဲ့ပါတယ်။ 

ရုရှားကို အီရန်က လက်နက်တွေထာက်ပံ့မှုဟာ ယူကရိန်း အရပ်သားတွေ ထိခိုက်သေကြေမှုမှာ တစ်စိတ်တစ်ပိုင်း တာ၀န်ရှိသလို ဖြစ်နေတယ်လို့လည်း ကီရ်ဘီက သတိပေးပါတယ်။

အီရန်ဒရုန်း 

———–

ရုရှားက သုံးသွားတဲ့ အသေခံဒရုန်းတွေဟာ အီရန်ထုတ် Shahed-136 ဒရုန်းတွေပါ။ 

အခုနှစ်သြဂုတ်လမှာ ရုရှားက အစင်းရေ ၂၄၀၀ လောက် ၀ယ်ယူခဲ့ပြီး စက်တင်ဘာလကစတင်ပြီး ယူကရိန်းစစ်ပွဲမှာ အသုံးပြုခဲ့ပါတယ်။ 

Shahed-136 ဟာ ကန်ဒေါ်လာ ၂ သောင်းလောက်သာ ရှိပြီး သူနဲ့အဆင့်တူ နောက်နိုင်ငံထုတ်တွေထက် ၁၀ ဆလောက် စျေးသက်သာပါတယ်။ 

ဖောက်ခွဲရေးပစ္စည်း ပေါင် ၉၀ လောက်သာ တင်နိုင်ပြီး အစင်းရေ အများအပြားနဲ့ အုပ်ဖွဲ့အသုံးပြုရတာပါ။ ရေဒါက ဖမ်းမမိနိုင်တဲ့ အရမ်းနိမ့်တဲ့ အမြင့်မျိုးမှာ ကောင်းကောင်းပျံသန်းနိုင်ပါတယ်။ 

စက်တင်ဘာမှာ ဒီဒရုန်းကို ရုရှားက စသုံးတုန်းက အစင်းရေ ၁၀၀ လောက် အုပ်ဖွဲ့ပျံသန်းလာတာဖြစ်ပြီး ဒါဇင်နဲ့ချီ ပစ်ချနိုင်ခဲ့တယ်လို့ ယူကရိန်းအာဏာပိုင်တွေက ပြောပါတယ်။ 

ပစ်ခတ်ဖျက်ဆီးတဲ့အချိန် သူတို့မှာပါလာတဲ့ ဖောက်ခွဲရေးပစ္စည်းတွေက ပေါက်ကွဲပြီး ပတ်၀န်းကျင်ကို လာစင်တဲ့အတွက် ဒီဒရုန်းတွေကို ဖျက်ဆီးမှုကလည်း အန္တရာယ်မကင်းပါဘူး။

ဒီဒရုန်းကိစ္စနဲ့ပတ်သက်ပြီး အမေရိကန်၊ ယူကေနဲ့ အနောက်နိုင်ငံတစ်ချို့က အီရန်ကို ပိတ်ဆို့မှုတွေ ပြုလုပ်ထားပါတယ်။ 

ယူကရိန်းကို ရုရှားရဲ့ ကျူးကျော်စစ်မှာ အီရန်ရဲ့ ဒရုန်းနည်းပညာက နောက်ထပ် ဘယ်လောက်အထိ တွင်ကျယ်လာမလဲဆိုတာ ဆက်လက် စောင့်ကြည့်ရမှာ ဖြစ်ပါတယ်။ 

Ref: BBC, Aljazeera