ဇွန် ၂၉၊ ၂၀၂၅
M-Media

၂၀၂၄ ခုနှစ် အောက်တိုဘာလက စတင်တဲ့ ဂါဇာကမ်းမြှောင်က အစ္စရေးရဲ့ တိုက်ခိုက်မှုမှာ သေဆုံးသူ ပါလက်စတိုင်း အရေအတွက်ဟာ ၁ သိန်းနီးပါး ရှိတယ်လို့ အစ္စရေးသတင်းစာ Haaretz က ဇွန် ၂၇ ရက်နေ့မှာ ဖော်ပြပါတယ်။

ဒါဟာ ကမ်းမြှောင်တစ်ခုလုံးမှာရှိတဲ့ လူဦးရေရဲ့ ၄ ရာခိုင်နှုန်းလည်း ဖြစ်ပါတယ်။ ဂါဇာ ကျန်းမာရေး၀န်ကြီးဌာနက သူတို့ ကောက်ယူရရှိတဲ့ စာရင်းအရ သေဆုံးသူအရေအတွက်ဟာ ၅၆၃၀၀ ဦးရှိတယ်လို့ ထုတ်ပြန်ထားပါတယ်။

Haaretz သတင်းစာက အစ္စရေးရဲ့ တိုက်ခိုက်မှုကြောင့် သေဆုံးသူအရေအတွက်က မြင့်မားသလို၊ စစ်ပွဲနဲ့ အစ္စရေးရဲ့ ပိတ်ဆို့မှုနောက်ဆက်တွဲ ကျန်းမာရေးစောင့်ရှောက်မှုစနစ် ပြိုလဲမှု၊ ငတ်မွတ်ခေါင်းပါးမှု၊ ရောဂါထူပြောမှုတို့ကြောင့် သေဆုံးရသူ အရေအတွက်ကလည်း မြင့်မားတယ်လို့ ဖော်ပြခဲ့ပါတယ်။

လန်ဒန်တက္ကသိုလ် Holloway College က ပဋိပက္ခလေ့လာမှုဆိုင်ရာ ကျွမ်းကျင်သူ ပရော်ဖက်ဆာ မီခေလ်း စပါဂတ်ရဲ့ လေ့လာဆန်းစစ်မှုကို သတင်းစာက ကိုးကားဖော်ပြခဲ့တာဖြစ်ပါတယ်။

လေ့လာမှုအရ ဂါဇာမှာ အစ္စရေးရဲ့ တိုက်ခိုက်မှုကြောင့် အမျိုးသမီးနဲ့ ကလေးငယ်တွေ သေဆုံးမှုနှုန်းဟာ ဒုတိယကမ္ဘာစစ်ပြီးနောက်ပိုင်း ဖြစ်ပွားခဲ့တဲ့ ပဋိပက္ခ၊ စစ်ပွဲတွေမှာ အမြင့်မားဆုံး ဖြစ်တယ်ဆိုတာကို တွေ့ခဲ့ရပါတယ်။

“လူဦးရေရဲ့ ၄ ရာခိုင်နှုန်းလောက် အသတ်ခံရတာမျိုးပါ။ ၂၁ ရာစုမှာ ဒီလောက် သတ်ဖြတ်မှုနှုန်း မြင့်မားတာမျိုး နောက်တစ်ခု ထပ်ရှိလားဆိုရင် မသေချာပါဘူး”

Ref: Anadolu

ဇွန် ၂၈၊ ၂၀၂၆
M-Media

ဂါဇာမှာ အတိဒုက္ခရောက်နေတဲ့ ပါလက်စတိုင်းတွေ အကူအညီလာယူရင် ပစ်ခတ်သတ်ဖြတ်ဖို့ အစ္စရေးတပ်မှူးတွေက စစ်သားတွေကို အမိန့်ပေးထားတာ တွေ့ရတယ်လို့ အစ္စရေးသတင်းစာ Haaretz ကဖော်ပြပါတယ်။

အမေရိကန် ကမကထပြုတဲ့ အကူအညီပေးရေးအဖွဲ့ Gaza Humanitarian Foundation (GHF) က ရိက္ခာတွေ ၀ေငှမှုအတွင်း အစ္စရေးစစ်သားတွေက သတ်ဖြတ်မှုမှုကြောင့် အနည်းဆုံး ပါလက်စတိုင်းပြည်သူ ၅၄၉ ဦး သေဆုံးခဲ့ပြီး ဒဏ်ရာရသူ ၄၀၆၆ ဦး ရှိပါတယ်။

“တင့်ကားတွေကနေ ကျွန်တော်တို့ စက်သေနတ်တွေနဲ့ပစ်တယ်။ လစ်ပစ်ဗုံးတွေနဲ့လည်း ထုပါတယ်။ ဖုန်တွေကြားထဲကနေ ပြေးလာတဲ့ အရပ်သားတွေ အပစ်ခံရတဲ့ အဖြစ်အပျက်တစ်ခုလည်း ရှိခဲ့ပါတယ်” လို့ Haaretz သတင်းစာကို စစ်သားတစ်ယောက်က ပြောပါတယ်။

ဂါဇာမှာ စခန်းချနေတဲ့ အခြားစစ်သားတစ်ယောက်ကလည်း အကူအညီပေးရေးနေရာနားမှာ တစ်ရက်ကို ပါလက်စတိုင်း တစ်ဦးကနေ ငါးဦးအထိ အသတ်ခံနေရတယ်လို့ ဆိုပါတယ်။

အစ္စရေးစစ်တပ်ကတော့ ဒီသတင်းကို ငြင်းဆိုခဲ့ပါတယ်။

Ref: Aljazeera

ဇွန် ၁၉၊ ၂၀၂၅
M-Media

၂၀၂၃ ခုနှစ် အောက်တိုဘာလက စတင်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲအတွင်း အစ္စရေးဟာ ဆေးရုံပေါင်း ၃၆ ခုထက်မနည်းကို တိုက်ခိုက်ဖျက်ဆီးခဲ့ပါတယ်။ အဲဒီအထဲက တော်တော်များများဟာ အုတ်ပုံဖြစ်ခဲ့ပါတယ်။
၁၉၄၉ ခုနှစ် ဂျီနီဗာ ကွန်ဗန်းရှင်းအရ ဆေးရုံတွေကို တိုက်ခိုက်မှုဟာ စစ်ရာဇ၀တ်မှုမြောက်ပါတယ်။ ဂါဇာဆေးရုံတွေကို အစ္စရေးက အကြမ်းဖက်တိုက်ခိုက်မှု ဖြစ်ရပ်အချို့ကို ဖော်ပြလိုက်ပါတယ်။
၂၀၂၃ ခုနှစ် အောက်တိုဘာ ၁၇ ရက် – Al-Ahli ဆေးရုံကို အစ္စရေးက ဒုံးကျည်နဲ့ တိုက်ခိုက်ခဲ့ပြီး ဆေးရုံကားပါကင်မှာ တဲထိုးနေတဲ့ ပါလက်စတိုင်း စစ်ရှောင် ရာနဲ့ချီ သေဆုံးခဲ့ပါတယ်။
၂၀၂၃ ခုနှစ် နို၀င်ဘာ ၃ ရက် – Al-Shifa ဆေးရုံ အပြင်ဘက်က လူနာတင်ယာဥ်တန်းကို အစ္စရေးက ပစ်မှတ်ထား တိုက်ခိုက်ခဲ့ပြီး ပါလက်စတိုင်း အများအပြား သေဆုံးခဲ့ပါတယ်။
၂၀၂၃ ခုနှစ် နို၀င်ဘာ ၂၁ ရက် – Al-Awda ေဆးရုံကိုလေကြောင်းကနေ အစ္စရေး တိုက်ခိုက်ခဲ့ပြီး၊ MSFက ဆရာ၀န်တစ်ဦးအပါအ၀င် စုစုပေါင်း ဆရာ၀န် ၃ ဦး သေဆုံးခဲ့ပါတယ်။
၂၀၂၄ ခုနှစ် ဇန်န၀ါရီ ၂၂ ရက် – Nasser Hospital ဆေးရုံကို အစ္စရေးက တိုက်ခိုက်ခဲ့ပြီး ဆေးရုံမှာ ခိုလှုံနေတဲ့ ပါလက်စတိုင်းစစ်ရှောင် အများအပြား သေဆုံးခဲ့ပါတယ်။
၂၀၂၄ ခုနှစ် မတ်လ ၂၀ ရက် – Al-Shifa ဆေးရုံကို အစ္စရေးက ထပ်မံ စီးနင်းတိုက်ခိုက်ခဲ့ပြီး အနည်းဆုံး လူ ၉၀ အသတ်ခံခဲ့ရပါတယ်။ ဒီဆေးရုံကို အစ္စရေးစစ်သားတွေက အချိန်အတော်ကြာ စီးနင်းခဲ့တာဖြစ်ပြီး အသတ်ခံရသူတွေထဲမှာ လူနာတွေ၊ စစ်ရှောင်တွေ အများအပြား ပါ၀င်ပါတယ်။
၂၀၂၄ ခုနှစ် မတ်လ ၃၁ ရက် – Al-Aqsa ဆေးရုံကို အစ္စရေးက လေကြောင်းကနေ တိုက်ခိုက်ခဲ့ပြီး၊ စစ်ရှောင်တွေအပါအ၀င် ပါလက်စတိုင်းပြည်သူ အများအပြား သတ်ဖြတ်ခံခဲ့ရပါတယ်။
၂၀၂၄ ခုနှစ် ဧပြီလ ၁ ရက် – Al-Shifa ဆေးရုံကို အစ္စရေးတို့က ၁၄ ရက်ကြာ စီးနင်းခဲ့ပြီး ဆေး၀န်ထမ်းတွေ အပါအ၀င် လူအများအပြားကို သတ်ဖြတ်ခဲ့ပါတယ်။
၂၀၂၄ ခုနှစ် အောက်တိုဘာ ၁၄ ရက် – Al-Aqsa ဆေးရုံကို ညပိုင်း အစ္စရေးက လေကြောင်းကနေ တိုက်ခိုက်ရာမှာ ၅ ဦးသေဆုံးကာ ၆၅ ဦး ဒဏ်ရာရခဲ့ပါတယ်။
၂၀၂၄ ခုနှစ် ဒီဇင်ဘာ ၂၇ ရက် – Kamal Adwan ဆေးရုံကို အစ္စရေးစစ်သားတွေ ၀င်ရောက်စီးနင်း တိုက်ခိုက်ခဲ့ပြီး အနည်းဆုံး ပါလက်စတိုင်းပြည်သူ ၂၀ ကို သတ်ဖြတ်ကာ အများအပြားကို ဖမ်းဆီးသွားခဲ့ပါတယ်။ နောက်တစ်နေ့မှာတော့ ဆေးရုံဒါရိုက်တာ ဒေါက်တာ ဟာဆန် အဘူ ဆာဖီယာကို ဖမ်းဆီးသွားခဲ့ပါတယ်။
၂၀၂၃ ခုနှစ် နို၀င်ဘာ – အင်ဒိုနီးရှားဆေးရုံကို အစ္စရေးတပ်ဖွဲ့တွေက ရက်အတော်ကြာ စီးနင်းခဲ့ပြီး လူအများအပြားကို သတ်ဖြတ်ကာ ဆေးရုံ၀င်းထောင့်မှာ အလောင်းတွေကို စုပုံထားခဲ့ပါတယ်။
၂၀၂၅ ခုနှစ် မတ်လ ၂၃ ရက် – အစ္စရေးစစ်သားတွေဟာ ပါလက်စတိုင်း လခြမ်းနီအသင်းအတွက် အလုပ်လုပ်ပေးနေတဲ့ ဆေးမှုး ၁၅ ဦးကို ကယ်ဆယ်ရေးခရီးစဥ်တစ်ခုမှာ ဖမ်းဆီးခေါ်ဆောင်သွားပြီး သွေးအေးအေးနဲ့ ညှင်းပမ်းသတ်ဖြတ်ခဲ့ပါတယ်။ သတ်ဖြတ်ခံရတဲ့ ဆေးမှူးတစ်ဦး မသေခင် လျှို့၀ှက်ရိုက်ကူးထားတဲ့ ဗီဒီယိုကနေ အစ္စရေးရဲ့ ယုတ်မာကြမ်းတမ်းမှုကို ကမ္ဘာက မျက်၀ါးထင်ထင် တွေ့ခဲ့ရပါတယ်။
Ref: Aljazeera