ပြည်သူအပေါ် မလျော်မကန်ပြုသည့် အထူးရဲတပ်ဖွဲ့တစ်ခုလုံး ဖျက်သိမ်းခံရ

ဇန်န၀ါရီ ၃၀၊ ၂၀၂၃

M-Media 

-လူမည်းအမျိုးသားတစ်ဦးကို အင်အားအလွန်အကျွံသုံးကာ ဖမ်းဆီးမှု ဖြစ်ပွားပြီးတဲ့နောက် အမေရိကန်ပြည်ထောင်စု တန်နက်ဆီပြည်နယ် မမ်ဖစ်မြို့က အထူးရဲခွဲတစ်ခုလုံး ဖျက်သိမ်းလိုက်ရပါတယ်။ 

အသက် ၂၉ နှစ်အရွယ် လူမည်းအမျိုးသား နီကိုလက်စ်ကို မမ်ဖစ်မြို့ အထူးရဲတပ်ဖွဲ့၀င်တွေက ဇန်န၀ါရီ ၇ ရက်နေ့မှာ အင်အားသုံးဖမ်းဆီးခဲ့ပြီး အဲဒီအဖြစ်အပျက်အတွင်း ရိုက်နှက်ခံရတဲ့ ဒဏ်ရာတွေကြောင့် နီကိုလက်စ်ဟာ နောက် ၃ ရက်အကြာမှာ သေဆုံးသွားခဲ့ပါတယ်။ 

ဖမ်းဆီးစဥ် ရိုက်ကူးထားတဲ့ ရဲတပ်ဖွဲ့ရဲ့ ဗီဒီယိုမှာ နီကိုလက်စ်ဟာ ကားမောင်းနေစဥ် မီးပွိုင့်မှာ တားဆီးစစ်ဆေးခံရတာကို တွေ့ရပါတယ်။ နီကိုလက်စ်တစ်ယောက် ထွက်ပြေးခဲ့ပေမယ့် ရဲတပ်ဖွဲ့၀င်တွေကို ခုခံတိုက်ခိုက်တာမျိုးတော့ မရှိပါဘူး။ 

မမ်ဖစ် အထူးရဲတပ်ဖွဲ့၀င်တွေက နီကိုလက်စ်ကို ပြန်ဖမ်းမိစဥ်မှာ နံပါတ်တုတ်တွေနဲ့ အဆက်မပြတ် ရိုက်နှက်ခဲ့တာကိုလည်း ဗီဒီယိုမှာ တွေ့ရပါတယ်။

ဒီကိစ္စနဲ့ပတ်သက်ပြီး အမေရိကန်ပြည်သူတွေက အပြင်းအထန် ၀ေဖန်ကန့်ကွက်နေပြီး၊ ချီတက်ဆန္ဒပြမှုတွေလည်း နိုင်ငံတစ်၀ှမ်းမှာ ပြုလုပ်နေကြပါတယ်။

မမ်ဖစ်မြို့ ရဲတပ်ဖွဲ့အကြီးအကဲ စီဂျေ ဒေးဗစ်က ဒီကိစ္စဟာ ရဲတပ်ဖွဲ့ကို အလွန်အမင်း သိက္ခာကျစေတဲ့အတွက် ဒီကိစ္စမှာ တာ၀န်ရှိတဲ့ တပ်ဖွဲ့၀င် ၃၀ ပါ အထူးတပ်ခွဲတစ်ခုလုံးကို ဖျက်သိမ်းခဲ့တယ်လို့ မနေ့က ထုတ်ပြန်ခဲ့ပါတယ်။ 

နီကိုလက်စ်ရဲ့ မိသားစု၀င်တွေ၊ လူ့အဖွဲ့အစည်းခေါင်းဆောင်တွေ၊ သက်ဆိုင်ရာတာ၀န်ရှိသူတွေနဲ့ စကားပြောဆိုခဲ့ပြီး၊ လူ့အဖွဲ့အစည်းက ခွင့်လွှတ်နိုင်ရေး လုပ်ငန်းစဥ်တွေကို တက်တက်ကြွကြွ ဆောင်ရွက်သွားမယ်လို့လည်း ပြောပါတယ်။ 

အဖြစ်အပျက်မှာပါ၀င်တဲ့ ရဲတပ်ဖွဲ့၀င် ၅ ဦးကို ရဲတပ်ဖွဲ့က ထုတ်ပယ်ပြီး လူသတ်မှု၊ အပြင်းအထန် နာကျင်စေမှု၊ ပြန်ပေးဆွဲမှု၊ အခြားရာဇ၀တ်မှုတွေနဲ့ ကြာသာပတေးနေ့မှာ တရားစွဲဆိုခဲ့ပါတယ်။ 

Ref: Reuters