ငှပ်တုပ်ကွေး မျိုးကွဲသစ်ကြောင့် တရုတ်တွင် လူသေဆုံးမှုဖြစ်

ဧပြီ ၁၂၊ ၂၀၂၃

M-Media 

-တရုတ်နိုင်ငံမှာ ငှက်တုပ်ကွေး H3N8 ကြောင့် ပထမဆုံး လူသေဆုံးမှု ဖြစ်ပေါ်ခဲ့တယ်လို့ ကမ္ဘာ့ကျန်းမာရေးအဖွဲ့ WHO က ထုတ်ပြန်ပါတယ်။ 

H3N8 ဟာ ငှပ်တုပ်ကွေး မျိုးကွဲတစ်ခုဖြစ်ပြီး အရင်က တိရစ္ဆာန်တွေမှာသာ တွေ့ရတာပါ။ ပြီးခဲ့တဲ့နှစ် ဧပြီနဲ့ မေလအတွင်း တရုတ်မှာ လူသားကို ကူးစက်မှုနှစ်ခု ဖြစ်ခဲ့တာကို စတွေ့ရပြီး အခုနှစ်မှာတော့ လူသေဆုံးမှုပါ ရှိလာတာ ဖြစ်ပါတယ်။ 

သေဆုံးသူဟာ ကင်ဆာရောဂါအခံရှိတဲ့ အမျိုးသမီးတစ်ဦးဖြစ်ပြီး ဖေဖော်၀ါရီလက အဆုပ်ရောင်ရောဂါကြောင့် ဆေးရုံတင်ရကာ မတ်လအတွင်းမှာ သေဆုံးသွားတာ ဖြစ်ပါတယ်။ 

သေဆုံးသူနဲ့ အနီးကပ်နေထိုင်သူတွေမှာ ကူးစက်မှု မတွေ့ရသေးဘူးလို့ WHO ရဲ့ထုတ်ပြန်ချက်မှာ ဖော်ပြထားပါတယ်။ ပြီးခဲ့တဲ့နှစ်ကနဲ့ ဒီနှစ် ကူးစက်သူ ၃ ဦးစလုံးဟာ ကြက်ဘဲစျေးကနေ ဒီဗိုင်းရပ်စ်ကို ကူးစက်လာကြတာဖြစ်ပါတယ်။ 

လက်ရှိမှာ တရုတ်အစိုးရက စောင့်ကြည့်မှုတွေ တိုးမြှင့်လုပ်ဆောင်နေပြီး ကူးစက်ပြန်နှံ့ဖို့အန္တရာယ် နည်းပါးတယ်လို့ WHO က ဆိုပါတယ်။ ဒါပေမယ့် ကမ္ဘာတစ်၀ှမ်းကလည်း စောင့်ကြည့်မှုတွေလုပ်ဖို့ တိုက်တွန်းခဲ့ပါတယ်။ 

ငှက်တုပ်ကွေးတွေထဲမှာ H5N1 က လူတွေမှာ ကူးစက်မှုပိုများပြီး H3N8 ထက်လည်း ပြင်းထန်ပါတယ်။ ဒီဗိုင်းရပ်စ်နှစ်ခုဟာ ဆက်စပ်မှု မရှိဘူးလို့ WHO က ဆိုပါတယ်။ 

Ref: Reuters