ပင်လယ်ကူးသင်္ဘောကဏ္ဍကို တစ်ခေတ်ဆန်းစေမည့် လင်းပိုင်အရေပြား ပန်ကာ

ဇူလိုင် ၁၈၊ ၂၀၂၄
M-Media

-ပင်လယ်ကူး သင်္ဘောကြီးတွေရဲ့ ဧရာမပန်ကာကို လင်းပိုင်အရေပြားပုံစံ ဖန်တီး အသုံးပြုတာကြောင့် လောင်စာဆီသုံးစွဲမှုကို လျော့ချနိုင်ပြီး၊ သဘာ၀ပတ်၀န်းကျင်အတွက် ပိုမို ကောင်းမွန်စေတယ် ဆိုတာကို တရုတ်ပညာရှင်တွေက တွေ့ရှိခဲ့ကြပါတယ်။

ပန်ကာတွေရဲ့ တွန်းအားကို ပိုမိုကောင်းမွန်အောင် ရေနေသတ္တ၀ါတွေရဲ့ ကူးလူးသွားလာမှုကို အတုယူ စမ်းသပ်ဖန်တီးရာကနေ အခုလို အောင်မြင်မှုမျိုး ရရှိလာခဲ့တာပါ။ လင်းပိုင်ရဲ့ အရေပြားတည်ဆောက်ပုံနဲ့ အရေပြားမှာရှိတဲ့ အချွဲတစ်မျိုးဟာ အရေပြားနဲ့ ရေတို့အကြား ပွတ်တိုက်မှုကို လျော့ပါးစေပါတယ်။

တန်ချိန် ၃ သိန်းရှိတဲ့ ရေနံတင်သင်္ဘောရဲ့ ပန်ကာကို ဒီလိုပုံစံ ဖန်တီးပြီး ၃ ကြိမ် အသွားအပြန် ခုတ်မောင်းခဲ့ရာမှာ ဆီစား ၂ ရာခိုင်နှုန်း သက်သာတာကို ပညာရှင်တွေက တွေ့ခဲ့ရပါတယ်။ တစ်နှစ်ကို ဆီတန်ချိန် ၃၀၀ လောက် သက်သာသွားမှာပါ။

သင်္ဘောရဲ့ ဒေါက်တစ်ခါ၀င်ရတဲ့ ၂ နှစ်ခွဲကာလမှာ စွမ်းအင်သုံးစွဲမှု ၁ ဒဿမ ၅ ရာခိုင်နှုန်းလောက် ချွေတာနိုင်မှာဖြစ်ပြီး ကာဘွန်ဒိုင်အောက်ဆိုက် ထုတ်လွှတ်မှု တန်ပေါင်း ၉၀၀ လောက်ကိုလည်း လျှော့ချနိုင်မှာ ဖြစ်ပါတယ်။

Ref: Interesting Engineering