Tag: iraq

ဒီဇင်ဘာ ၂၈၊ ၂၀၁၅
M-Media

– တစ်ပတ်ကျော်ကြာ အပြင်းအထန်ထိုးစစ်ဆင်မှုများ ပြုလုပ်ခဲ့ပြီးနောက် အီရတ်နိုင်ငံအနောက်ပိုင်းရှိ IS အကြမ်းဖက်အဖွဲ့ သိမ်းပိုက်ထားရာ ရာမာဒီမြို့မှာ လုံးဝ လွတ်မြောက်သွားခဲ့ပြီဟု အီရတ်စစ်တပ်က ယနေ့နေ့လည်ပိုင်းတွင် ကြေငြာခဲ့သည်။

ယမန်နေ့မနက် စောစောပိုင်းကတည်းက အစိုးရတပ်များမှာ မြို့တွင်းရှိ IS ၏ နောက်ဆုံးခံတပ်ဖြစ်သော အစိုးရအဆောက်အအုံအား ထိန်းချုပ်နိုင်ခဲ့ခြင်းဖြစ်သည်ဟု အီရတ် အကြမ်းဖက်တိုက်ဖျက်ရေးဌာနမှ ပြောရေးဆိုခွင့်ရှိသူ ဆာဘာဟ် အလ်-နူမန်က ပြောကြားခဲ့သည်။ ယခုအခါ အဆိုပါအဆောက်အဦးတွင် အီရတ်အလံကို လွှင့်ထူထားနိုင်ပြီဖြစ်သည်။

ရာမာဒီမှာ မဟာဗျူကျသည့် မြို့တစ်ခုဖြစ်ပြီး ယခုနှစ်အစောပိုင်းတွင် IS မှ သိမ်းယူနိုင်ခဲ့ခြင်းဖြစ်သည်။ အီရတ်စစ်တပ်မှာ နောက်ပိုင်းတွင် ထိုးစစ်ဆင်မှုများ တောက်လျှောက်ပြုလုပ်ခဲ့သော်လည်း မြို့၏ အစိတ်အပိုင်းအချို့ကိုသာ ပြန်လည်ရရှိခဲ့ပြီး ယခုမှ တစ်မြို့လုံးကို သိမ်းပိုက်နိုင်ခဲ့ခြင်းဖြစ်သည်။

Ref: PressTV

ဒီဇင်ဘာ ၂၂၊ ၂၀၁၅
M-Media

– အီရတ်နိုင်ငံအလယ်ပိုင်းရှိ IS များထိန်းချုပ်ထားရာ ရာမာဒီမြို့အား ပြန်လည်ရရှိရေးအတွက် အီရတ်စစ်တပ်က ယနေ့တွင် အလုံးအရင်းနှင့် ထိုးစစ်ဆင်နေသည်ဟု သိရသည်။

ယနေ့မနက်က စတင်ခဲ့ခြင်းဖြစ်ပြီး IS ဘက်ကလည်း အသေခံကားဗုံးခွဲသမားများနှင့် ပြန်လည်တုန့်ပြန်ခဲ့သည်ဟု အီရတ်စစ်တပ် အကြမ်းဖက်တိုက်ဖျက်ရေးတပ်ဖွဲ့မှ ပြောရေးဆိုခွင့်ရှိသူ ဆာဘာဟ် အလ်-နူမာနီက ပြောကြားခဲ့သည်။ ထို့ပြင် လေကြောင်းမှတိုက်ခိုက်မှုများကိုလည်း ပြုလုပ်နေသည်။

မြို့တော်ဘဂ္ဂဒတ်မှ ကီလိုမီတာ ၁၂၀ အကွာအဝေးတွင်ရှိပြီး အန်ဘာရ်ပြည်နယ်၏ မြို့တော်ဖြစ်သော ရာမာဒီမြို့ကို IS က ယခုနှစ်မေလတွင် သိမ်းပိုက်ခဲ့ခြင်းဖြစ်ပြီး နောက်ပိုင်းတွင် အီရတ်စစ်တပ်က မြို့၏ အချို့အစိတ်အပိုင်းကို ပြန်လည်သိမ်းယူနိုင်ခဲ့သည်။ စစ်တပ်ကမူ ၎င်းတို့မှာ အဓိက စစ်ဌာနချုပ်တစ်ခုအပါအ၀င် မြို့၏ ထက်ဝက်ကျော်ကို ထိန်းချုပ်ထားနိုင်သည်ဟု ပြောကြားခဲ့သည်။

Ref: Aljazeera

ဒီဇင်ဘာ ၂၊ ၂၀၁၅
M-Media

– IS အကြမ်းဖက်အဖွဲ့အား တိုက်ခိုက်ရန်အတွက် နိုင်ငံခြားတပ်ဖွဲ့များ ထပ်မံမလိုအပ်တော့ဘဲ အစိုးရ၏ ခွင့်ပြုချက်မရရှိပါက နိုင်ငံခြားတပ်များ နိုင်ငံအတွင်းသို့ ၀င်ရောက်တပ်စွဲခြင်းမှာ ဖြစ်လာနိုင်မည်မဟုတ်ဟု အီရတ်ဝန်ကြီးချုပ် ဟိုင်ဒါ အလ်-အာဘာဒီက ပြောကြားလိုက်သည်။

အာဘာဒီ၏ ထိုကဲ့သို့ ပြောကြားမှုမှာ အမေရိကန် ကာကွယ်ရေးဝန်ကြီး အက်ရ်ှတန် ကာတာရ်က ၎င်းတို့မှာ IS အဖွဲ့အား တိုက်ခိုက်ရေးတွင် ကူညီရန်အတွက် အထူးတပ်ဖွဲ့များကို အီရတ်၌ ချထားသွားမည်ဟု စောစောပိုင်းက ကြေငြာခဲ့မှုကို ပြန်လည်တုန့်ပြန်ခြင်းလည်း ဖြစ်သည်။

“အီရတ်မြေပေါ်မှာ နိုင်ငံခြား မြေပြင်တပ်တွေ ကျွန်တော်တို့ မလိုပါဘူး။ အီရတ်နိုင်ငံရဲ့ ဘယ်လိုနေရာမှာမှ ဘယ်လိုနိုင်ငံခြားတပ်ဖွဲ့ရဲ့ ဘယ်လိုတပ်ဖြန့်မှုမျိုး၊ ဘယ်လို စစ်ဆင်ရေးမျိုး – အထူးဖြစ်ဖြစ်၊ ရိုးရိုးဖြစ်ဖြစ် – ဘာကိုမှ ကျွန်တော်တို့ရဲ့ ခွင့်ပြုချက်၊ ပူးပေါင်းဆောင်ရွက်မှု၊ အီရတ်နိုင်ငံရဲ့ အချုပ်အခြာအာဏာကို လေးစားသမှု မရှိဘဲနဲ့ ဖြစ်လာနိုင်မှာ မဟုတ်ပါဘူး” ဟု ယမန်နေ့က ထုတ်ပြန်သည့် ကြေငြာချက်တွင် ဟိုင်ဒါ အလ်-အာဘာဒီက ပြောကြားခဲ့သည်။

ကာတာရ်ကမူ ၎င်းတို့၏ အထူးတပ်ဖွဲ့မှာ ဆီးရီးယားစစ်ပွဲတွင်လည်း ပါဝင်နိုင်မည်ဟု ထည့်သွင်းပြောကြားခဲ့သည်။ အမေရိကန်မှာ ၎င်းတို့၏ အထူးစစ်ဆင်ရေး တပ်ဖွဲ့ ၅၀ ခန့်ကို ဆီးရီးယားသို့ စေလွှတ်မည်ဟု စောစောပိုင်းက ကြေငြာခဲ့သည်။

Ref: Aljazeera

နိုဝင်ဘာ ၁၄၊ ၂၀၁၅
M-Media

– ကာ့ဒ်တပ်ဖွဲ့ဝင်များက IS အဖွဲ့အား ၂ ရက်ကြာ ထိုးစစ်ဆင်မှုများ ပြုလုပ်ခဲ့ပြီးနောက် အီရတ်နိုင်ငံမြောက်ပိုင်းရှိ ဆင်ဂျာဒေသ လွတ်လပ်ကြောင်းကို ကာ့ဒ်ဒေသ သမ္မတ မက်ဆူဒ် ဘာရ်ဇာနီက ယမန်နေ့တွင် ကြေငြာခဲ့သည်ဟု သိရသည်။

အဆိုပါ ထိုးစစ်တွင် ယာဇီဒီလူနည်းစုမှ တိုက်ခိုက်ရေးသမားများအပါအ၀င် တိုက်ခိုက်ရေးသမား ၇၅၀၀ ခန့် ပါဝင်ခဲ့ပြီး အမေရိကန်ဦးဆောင်သည့် မဟာမိတ်တပ်ဖွဲ့က လေကြောင်းမှ တိုက်ခိုက်မှုများ ပြုလုပ်ပေးခဲ့သည်။

“ဆင်ဂျာဒေသ လွတ်မြောက်ကြောင်း ဒီနေရာမှာ ကျွန်တော် ကြေငြာလိုပါတယ်။ ဘယ်ဒေသမှာမဆို ရရှိခဲ့တဲ့ ဘယ်လိုအောင်ပွဲမျိုးမဆို ကျန်ရှိနေတဲ့ဒေသတွေရဲ့ အောင်မြင်မှုအပေါ် သက်ရောက်မယ်ဆိုတာ သံသယရှိစရာ မလိုပါဘူး။ နောက်ပြီး ဆင်ဂျာလွတ်မြောက်ခြင်းဟာ မူဆိုးလ်မြို့ လွတ်မြောက်ဖို့မှာ ကြီးမားတဲ့ သက်ရောက်မှု ရှိပါလိမ့်မယ်” ဟု ဘာရ်ဇာနီက ပြောကြားခဲ့သည်။

ဆင်ဂျာမြို့အား သိမ်းပိုက်နိုင်ခြင်းက အီရတ်နှင့် ဆီးရီးယားရှိ IS ၏ ခြေကုပ်မြို့များဖြစ်သော မူဆိုးလ်နှင့် ရက်ကာမြို့များကို ဆက်သွယ်ထားသည့် ထောက်ပံ့ရေးလမ်းကြောင်းများကို ဖြတ်တောက်နိုင်ခြင်းဖြစ်ပြီး မူဆိုးလ်မြို့အား ပြန်လည်သိမ်းပိုက်ရေး ခြေတစ်လှမ်းတိုးခြင်းလည်း ဖြစ်သည်။

Ref: Aljazeera