Tag: Japan

သြဂုတ် ၁၀၊ ၂၀၂၄
M-Media

-ဂျပန်နိုင်ငံတောင်ပိုင်းမှာ ပြင်းအား ၇ ဒဿမ ၁ ရှိတဲ့ ငလျင်တစ်ခု ကြာသာပတေးနေ့က လှုပ်ခတ်သွားပြီးတဲ့နောက် နောက်ထပ် ငလျင်ကြီးတစ်ခု လှုပ်ခတ်လာနိုင်တယ်ဆိုတဲ့ စိုးရိမ်မှု မြင့်တက်လာပါတယ်။

မီဒီယာတွေက ငလျင်သတင်းဖော်ပြမှုနောက်ဆက်တွဲ အခြေခံလူသုံးကုန်နဲ့ စားသောက်ကုန်တွေကို ပြည်သူတွေ အလုအယက် ၀ယ်ယူလာကြတာကြောင့် ပြတ်လပ်မှုတွေလည်း ဖြစ်ပေါ်လာပါတယ်။

အာဏာပိုင်တွေက ဒီလို အလုအယက်၀ယ်ယူမှုကို သတိပေးထားပြီး သောက်ရေလို အရေးကြီးတဲ့ ပစ္စည်းတွေကို ခွဲတမ်းစနစ်နဲ့ ရောင်းချတာမျိုးတွေ လုပ်ဆောင်လာပါတယ်။

ပစိဖိတ်သမုဒ္ဒရာက မြေလွှာချပ်ကြီး နှစ်ခုဆုံရာ ဂျပန်တောင်ပိုင်း နန်ကိုင်ဒိုဒေသဟာ ငလျင်ကြီးတွေ ပုံမှန် လှုပ်လေ့ရှိတဲ့ ဒေသဖြစ်ပါတယ်။ နှစ် ၁၀၀ ကနေ ၂၀၀ အတွင်းမှာ နည်းဆုံး ၈ ကြိမ်၊ ၉ ကြိမ်လောက် လှုပ်လေ့ရှိတတ်ပြီး လာမယ့် နှစ်ပေါင်း ၃၀ အတွင်း ငလျင်ကြီးတစ်ခု ထပ်လှုပ်လိမ့်မယ်လို့ ပညာရှင်တွေက ခန့်မှန်းထားတာ ဖြစ်ပါတယ်။

Ref: CNA

ဧပြီ ၁၂၊ ၂၀၂၄

M-Media

-အမေရိကန်နဲ့ ဂျပန် အာကာသအေဂျင်စီတွေဟာ လကမ္ဘာပေါ် လူလွှတ်ရေးနဲ့ စူးစမ်းရှာဖွေရေး စီမံကိန်း Artemis မှာ ပူးပေါင်းဆောင်ရွက်သွားဖို့ ဧပြီလ ၉ ရက်နေ့မှာ လက်မှတ်ရေးထိုးလိုက်ပါတယ်။ 

Artemis စီမံကိန်းကို အမေရိကန်အာကာသအေဂျင်စီ နာဆာက ကမကထပြု ဆောင်ရွက်တာဖြစ်ပြီး လပေါ်ကို တစ်ကျော့ပြန်လူလွှတ်ရေး ရည်ရွယ်တာဖြစ်ပါတယ်။ 

စီမံကိန်းကို ၂၀၁၇ ခုနှစ်က စတင်ခဲ့တာဖြစ်ပြီး ၂၀၂၅ ခုနှစ် စက်တင်ဘာလမှာ လပေါ်ကို လူဆင်းနိုင်ဖို့ ရည်ရွယ်ထားပါတယ်။ 

အမေရိကန် အာကာသအေဂျင်စီ NASA နဲ့ ဂျပန်အာကာသ အေဂျင်စီ JAXA တို့ရဲ့ ဧပြီလ ၉ ရက်နေ့ ပူးတွဲထုတ်ပြန်ချက်မှာ လကမ္ဘာပေါ်ကို ဂျပန်အာကာသယာဥ်မှူးတစ်ဦး ဆင်းသက်နိုင်ရေး ဆောင်ရွက်မယ်လို့ ဆိုပါတယ်။ 

ဒါဟာ အမေရိကန်မဟုတ်တဲ့ အာကာသယာဥ်မှူးတစ်ဦး လပေါ်ကို ပထမဆုံး ဆင်းသက်နိုင်တဲ့ သမိုင်းမှတ်တမ်းတစ်ခု ရရှိမှာလည်း ဖြစ်ပါတယ်။ 

“လကမ္ဘာမှာ အမေရိကတစ်ခုတည်း ခြေချမှာ မဟုတ်တော့ပါဘူး။ ကြယ်ကမ္ဘာတွေ လေ့လာမှုကို နိုင်ငံပေါင်းစုံက ငြိမ်းချမ်းစွာ၊ ပွင့်လင်းစွာ အတူတကွ လုပ်ဆောင်နေကြပြီ ဖြစ်ပါတယ်”လို့ နာဆာအကြီးအကဲ ဘီလ်နယ်ဆင်က ပြောကြားခဲ့ပါတယ်။ 

အမေရိကန်နဲ့ ဂျပန်တို့ဟာ မျိုးဆက်သက် လဆင်းယာဥ် ပူးတွဲ တီထွင်ဖန်တီးရေးအတွက် သဘောတူညီခဲ့ကြပါတယ်။ ဂျပန် အာကာသအေဂျင်စီ JAXA ဟာ နာဆာရဲ့ အခြား အာကာသစီမံကိန်းတွေမှာလည်း ပူးတွဲပါ၀င်သွားမှာ ဖြစ်ပါတယ်။ 

Ref: Interesting Engineering 

ဇန်န၀ါရီ ၂၂၊ ၂၀၂၄

M-Media 

-လပေါ်ကိုဆင်းပြီး စက်သတ်ထားရတဲ့ လသွားယာဥ်ငယ်ဟာ နောက်ပိုင်းမှာ ပြန်လည်အသက်၀င်လာနိုင်မယ်လို့ ယုံကြည်ကြောင်း ဂျပန်အာကာသစူးစမ်းရေး အေဂျင်စီ JAXA က ထုတ်ပြန်ပါတယ်။ 

ဂျပန်ရဲ့ လစူးစမ်းရေးဂြိုဟ်တုက လသွားယာဥ်ငယ် Moon Sniper ဟာ စနေနေ့မှာ လမျက်နှာပြင်ပေါ်ကို အောင်မြင်စွာ ဆင်းသက်နိုင်ခဲ့တာပါ။ 

အဲဒါကြောင့် ဂျပန်ဟာ ကမ္ဘာမှာ လပေါ်ကို စူးစမ်းရေးယာဥ် ဆင်းသက်နိုင်တဲ့ ပဥ္စမမြောက်နိုင်ငံအဖြစ် မှတ်တမ်း၀င်ခဲ့ပါတယ်။ 

ဒါပေမယ့် ဘတ္ထရီကိုအားသွင်းတဲ့ ဆိုလာဆဲလ်တွေ ပြဿနာကြောင့် ဆင်းသက်ပြီး မိနစ် ၂၀ လောက်မှာပဲ စက်ကို သတ်ထားလိုက်ရပါတယ်။ 

JAXA က လသွားယာဥ်ငယ်ရဲ့ ဆိုလာဆဲလ်တွေဟာ လက်ရှိမှာ နေရောင်မရတဲ့ အနောက်ဖက်ကို မျက်နှာမူနေတဲ့အတွက် ဘတ္ထရီကို အားမသွင်းနိုင်ဘဲ အား ၁၂ ရာခိုင်နှုန်းနဲ့ စက်ပိတ်ခဲ့ထားရတယ်လို့ ထုတ်ပြန်ပါတယ်။ 

နောက်ပိုင်း နေရောင်ရတဲ့အခါမှာ စက်ပြန်နှိုးကာ အသုံးပြုနိင်ဖို့ မျှော်လင့်ထားပြီး၊ ဒီအတွက် ပြင်ဆင်နေတယ်လို့လည်း ထုတ်ပြန်ချက်မှာ ဖော်ပြထားပါတယ်။ 

ဂျပန်အာကာစူးစမ်းရေး အေဂျင်စီဟာ Moon Sniper လပေါ်ကို ဆင်းသက်စဥ်က အချက်အလက်တွေကို ရရှိထားပြီး လေ့လာဆန်းစစ်မှုတွေ ပြုလုပ်နေပါတယ်။ 

ဂျပန်ရဲ့ ဒီစီမံကိန်းဟာ လရဲ့ အတွင်းပိုင်းအလွှာကို လေ့လာစူးစမ်းဖို့ ဖြစ်ပါတယ်။ 

Ref: Reuters

အောက်တိုဘာ ၁၊ ၂၀၂၃

M-Media 

• 

• 

• 

• 

– ဂျပန်နိုင်ငံက ကျေးလက်တောရွာဒေသတွေမှာ ၀က်၀ံတွေ ၀င်ရောက်လာမှုကို ကာကွယ်ဖို့အတွက် ၀ံပုလွေစက်ရုပ်ကို အသုံးပြုလာကြပါတယ်။ 

Monster Wolf လို့ အမည်ပေးထားတဲ့ အဲဒီစက်ရုပ်ကို Wolf Kamuy ကုမ္ပဏီက တီထွင်ထားတာပါ။ လယ်ယာတွေထဲ ၀င်ရောက်လာတဲ့ တောရိုင်းကောင်တွေကို ခြောက်လှန့်မောင်းထုတ်ဖို့ ကနဦးက ရည်ရွယ်ခဲ့တာဖြစ်ပါတယ်။ 

၂၀၂၀ ခုနှစ်ကစပြီး ၀က်၀ံတွေကို မောင်းထုတ်ဖို့ အသုံးပြုလာပါတယ်။ အခုအချိန်မှာတော့ ၀က်၀ံအန္တရာယ်နဲ့ ရင်ဆိုင်နေရတဲ့ ပြည်နယ်အစိုးရတွေက ဒီစက်ရုပ်ကို မှာယူကာ ကျယ်ကျယ်ပြန့်ပြန့် သုံးနေကြပါတယ်။ 

ဂျပန်နိုင်ငံ တောစပ်တောင်စပ်က လူသူနည်းတဲ့ ရွာတွေမှာ ၀က်၀ံတွေ ၀င်ရောက်တိုက်ခိုက်မှုဟာ ပြီးခဲ့တဲ့ နှစ်တွေမှာ မြင့်တက်လာခဲ့ပါတယ်။

အရင်က လယ်ယာတွေဟာ လူတွေနဲ့ ၀က်၀ံတွေကြား အဆီးအတားတစ်ခု ဖြစ်ခဲ့တာပါ။ လူငယ်တွေ မြို့ကြီးတွေကို ရွှေ့ပြောင်းမှုကြောင့် ရွာတွေမှာ လယ်ယာလုပ်သူမရှိတော့ဘဲ ၀က်၀ံတွေကလည်း အဆီးအတားမရှိ ရွာတွေထဲ ၀င်ရောက် ကျက်စားလာကြတာ ဖြစ်ပါတယ်။ 

နိုင်ငံမြောက်ပိုင်းက ဟိုကိုင်းဒိုးကျွန်းမှာ နှစ် ၆၀ အတွင်း ၀က်၀ံတွေရဲ့တိုက်ခိုက်မှု ၁၅၀ ကျော် ရှိခဲ့ပြီး ၂၀၂၁ ခုနှစ်က တိုက်ခိုက်မှုတစ်ခုမှာ လူ ၄ ဦးသေဆုံးကာ ၁၀ ဦးလောက် ဒဏ်ရာရခဲ့ပါတယ်။ 

ဂျပန်လူဦးရေ ကျုံ့လာပြီး၊ အသက်ကြီးတဲ့လူတွေ များလာတဲ့အချိန် ၀က်၀ံအရေအတွက်ကတော့ သိသိသာသာ မြင့်တက်လာပါတယ်။ 

ရွာတွေထဲ ၀က်၀ံ၀င်ရောက်မှုဟာ ဆောင်းရာသီအိပ်နေရောကနေနိုးလာပြီး အစာရှာတဲ့အချိန် ဧပြီလနဲ့ မအိပ်ခင် အဆီတွေသိုးမှီးဖို့ အစာရှာတဲ့ စက်တင်ဘာလတွေမှာ အဖြစ်များပါတယ်။ 

ဒါပေမယ့် ဆိုးဆိုးရွားရွား တိုက်ခိုက်မှုကတော့ အဖြစ်နည်းပါတယ်။ 

Ref: BBC