Tag: Myanmar Military

ဖေဖော်၀ါရီ ၁၉၊ ၂၀၂၂
M-Media

-မြန်မာနိုင်ငံက ပြဿနာဖြေရှင်းရေးမှာ အာဆီယံ အထူးကိုယ်စားလှယ်ရဲ့ ဆောင်ရွက်ရမယ့် ကိစ္စတွေကို လက်ခံအကောင်အထည်ဖော်ပေးဖို့ အာဆီယံအဖွဲ့က အာဏာသိမ်းစစ်ကောင်စီကို တိုက်တွန်းလိုက်ပါတယ်။

ကမ္ဘောဒီးယားနိုင်ငံမှာ ကျင်းပပြုလုပ်တဲ့ အာဆီယံ နိုင်ငံခြားရေး၀န်ကြီးများ အစည်းအ၀ေးအပြီး မနေ့က ထုတ်ပြန်တဲ့ကြေငြာချက်မှာ မြန်မာနိုင်ငံက ကိစ္စအတွက် အာဆီယံ သဘောတူညီချက် ၅ ရပ်ကို အကောင်အထည်ဖော်ရေး အလေးထား ဖော်ပြခဲ့ပါတယ်။

၂၀၂၂ ခုနှစ် အာဆီယံ ဥက္ကအဖြစ်ဆောင်ရွက်မယ့် ကမ္ဘောဒီးယားက ခန့်အပ်တဲ့ မြန်မာနိုင်ငံဆိုင်ရာ အာဆီယံအထူးကိုယ်စားလှယ် ပရက်ဆိုခွန်ကို အာဆီယံနိုင်ငံခြားရေး၀န်ကြီးတွေက အစည်းအ၀ေးမှာ အတည်ပြု လက်ခံခဲ့ပါတယ်။

ပရက်ဆိုခွန်ဟာ ကမ္ဘောဒီးယားနိုင်ငံခြားရေး၀န်ကြီးဖြစ်ပါတယ်။ အာဆီယံ သဘောတူညီချက်အရ အထူးကိုယ်စားလှယ်ဟာ မြန်မာနိုင်ငံကို သွားရောက်ပြီး နိုင်ငံရေးနယ်ပယ်က သက်ဆိုင်သူအားလုံးနဲ့ တွေ့ဆုံဆွေးနွေး အဖြေရှာရမှာ ဖြစ်ပါတယ်။

ပရက်ဆိုခွန်က မတ်လ ဒုတိယပတ်လောက်မှာ မြန်မာနိုင်ငံကို သွားရောက်ဖို့ ရှိတယ်လို့ ကြာသာပတေးနေ့မှာ ပြောကြားခဲ့ပါတယ်။

ဒါပေမယ့် သက်ဆိုင်သူအားလုံးနဲ့ တွေ့ဆုံဖို့ မဖြစ်နိုင်ဘူးလို့ သူက ၀န်ခံခဲ့ပါတယ်။
“ပထမဆုံးအကြိမ်းမှာ အားလုံးနဲ့တွေ့ဆုံဖို့ မဖြစ်နိုင်ဘူးလို့ ထင်ပါတယ်။ မျှော်လင့်ချက် သိပ်ပြီး ကြီးကြီးမားမား မထားတာ ကောင်းပါတယ်”

အထူကိုယ်စားလှယ်ဟာ ဒေါ်အောင်ဆန်းစုကြည့်အပါအ၀င် မြန်မာ့နိုင်ငံရေးနယ်ပယ်က သက်ဆိုင်သူအားလုံးနဲ့ တွေ့ဆုံရမယ်ဆိုတဲ့ ကိစ္စအတွက် စစ်ကောင်စီနဲ့ အာဆီယံအဖွဲ့တို့အကြား တင်းမာမှုနဲ့ ပတ်သက်ပြီး အခြားနည်းလမ်းတစ်ခုနဲ့ ချဥ်းကပ်ဖြေရှင်းသွားမယ်လို့လည်း ပရက်ဆိုခွန်က ထည့်သွင်းပြောဆိုခဲ့ပါတယ်။

မနေ့ကထုတ်ပြန်တဲ့ ကြေငြာချက်မူရင်းမှာ အထူးကိုယ်စားလှယ်ရဲ့ သွားရောက်မှုဟာ ဘယ်အဖွဲ့အစည်းကိုမှ အသိအမှတ်ပြုတာမျိုး မဖြစ်စေရဘဲ၊ သက်ဆိုင်သူတွေအားလုံးနဲ့ တွေ့ဆုံကာ ကြားနေ၀ါဒနဲ့ မှန်မှန်ကန်ကန် ဘက်မလိုက်ဘဲ ဆောင်ရွက်ရမယ်ဆိုတဲ့အချက် ပါ၀င်ပေမယ့် စစ်ကောင်စီက ကန့်ကွက်တဲ့အတွက် ဒီအပိုဒ်ကို ဖြုတ်ခဲ့ရပါတယ်။

အာဆီယံ နိုင်ငံခြားရေး၀န်ကြီးများ အစည်းအ၀ေးမှာ အဖွဲ့၀င်နိုင်ငံ တော်တော်များများက အထူးကိုယ်စားလှယ်ဟာ ဒေါ်အောင်ဆန်းစုကြည်နဲ့တွေ့ဆုံကာ ဒီမိုကရေစီအင်အားစုတွေနဲ့ ဆွေးနွေးခွင့်ရဖို့ လိုအပ်တယ်လို့ ထည့်သွင်းပြောဆိုခဲ့ပါတယ်။

Ref: Reuters

ဖေဖော်ဝါရီ ၁၈၊ ၂၀၂၂
M-Media

-မြန်မာနိုင်ငံမှာ လုပ်ကိုင်နေတဲ့ ရဲတံခွန် သဘာ၀ဓာတ်ငွေ့စီမံကိန်းကနေ ထွက်ခွာတော့မယ်လို့ မလေးရှား စွမ်းအင်လုပ်ငန်း Petronas နဲ့ ဂျပန်စွမ်းအင်လုပ်ငန်း Mitsubishi တို့က ထုတ်ပြန်ကြေငြာလိုက်ပါတယ်။

Mitsubishi ကုမ္ပဏီ ပြောရေးဆိုခွင့်ရှိသူက စီးပွားရေးနဲ့ နည်းပညာဆိုင်ရာ သုံးသပ်မှုအရ မြန်မာနိုင်ငံမှာ ဆက်လက်ရင်းနှီးမြှုပ်နှံဖို့ ခက်ခဲလာတဲ့အတွက် ဒီလိုထွက်ခွာရခြင်းဖြစ်တယ်လို့ ရိုက်တာသတင်းဌာနကို ပြောကြားခဲ့ပါတယ်။

တနင်္သာရီတိုင်းဒေသကြီး ကမ်းလွန်က ရဲတံခွန်သဘာ၀ဓာတ်ငွေ့လုပ်ငန်းမှာ Mitsubishi က ရှယ်ယာ ၁.၉၃ ရာခိုင်နှုန်း ပိုင်ဆိုင်ထားတာပါ။

မလေးရှား စွမ်းအင်လုပ်ငန်း Petronas က ရဲတံခွန်စီမံကိန်းကို လုပ်ကိုင်နေတဲ့ သူတို့ရဲ့ လုပ်ငန်းခွဲ PC Myanmar (Hong Kong) ဟာ ရှယ်ယာတွေကိုရောင်းချဖို့ ဇူလိုင်လမှာ သဘောတူညီချက် ရခဲ့တယ်လို့ ဆိုပါတယ်။ ရောင်းချမှု အပြီးသတ်ဖို့အတွက် စောင့်နေတာဖြစ်ပြီး ဝယ်သူက ဘယ်သူလဲဆိုတာ မပြောခဲ့ပါဘူး။

PC Myanmar (Hong Kong) ဟာ ရှယ်ယာ ၄၀.၉ ရာခိုင်နှုန်းကို ပိုင်ဆိုင်တာဖြစ်ပြီး စစ်တပ်က ထိန်းချုပ်ထားတဲ့ မြန်မာ့ရေနံနှင့် သဘာ၀ဓာတ်ငွေ့လုပ်ငန်းက ၂၀.၅ ရာခိုင်နှုန်း ပိုင်ဆိုင်တာပါ။ ဂျပန်အစိုးရနဲ့ JX Nippon Oil & Gas Exploration တို့ ဦးဆောင်တဲ့ ဂျပန်စီးပွားရေးလုပ်ငန်းစုက ၁၉.၃ ရာခိုင်နှုန်း၊ ကျန်ရှိတဲ့ ရှယ်ယာတွေကို ထိုင်းစွမ်းအင်လုပ်ငန်း PTTEP တို့က အသီးသီး ပိုင်ဆိုင်ကြတာ ဖြစ်ပါတယ်။

JX Nippon Oil & Gas Exploration ကို ပိုင်ဆိုင်တဲ့ Eneos Holdings က ရဲတံခွန် စီမံကိန်းမှာ ဆက်လက်လုပ်ကိုင်မှာလား၊ ထွက်ခွာမလားဆိုတာနဲ့ပတ်သက်ပြီး ဖြစ်နိုင်ချေအားလုံးကို စဉ်းစားသုံးသပ်နေတယ်လို့ ရိုက်တာသတင်းဌာနကို ဖြေကြားခဲ့ပါတယ်။

ရေနံနဲ့ သသာ၀ဓာတ်ငွေ့လုပ်ငန်းဟာ နိုင်ငံတစ်ဝှမ်း အကြမ်းဖက် သတ်ဖြတ်ကာ၊ လူ့အခွင့်အရေးချိုးဖောက်နေတဲ့ မြန်မာစစ်တပ် အဓိကဝင်ငွေရတဲ့လုပ်ငန်းတွေဖြစ်ပြီး ဒီကနေ ထွက်ခွာဖို့ နိုင်ငံခြားလုပ်ငန်းတွေကို နိုင်ငံတကာအသိုင်းအ၀ိုင်းက တိုက်တွန်းထားပါတယ်။

ပြင်သစ်နဲ့ အမေရိကန် စွမ်းအင်လုပ်ငန်းတွေဖြစ်တဲ့ TotalEnergies နဲ့ Chevron တို့က ရတနာ သဘာ၀ဓာတ်ငွေ့ စီမံကိန်းကနေ နှုတ်ထွက်တော့မယ်လို့ ပြီးခဲ့တဲ့လမှာ ထုတ်ပြန်ခဲ့ပါတယ်။

Ref: Reuters

ဖေဖော်ဝါရီ ၁၇၊ ၂၀၂၂
M-Media

-မြန်မာနိုင်ငံကပြဿနာ ဖြေရှင်းရေးမှာ အာဏာသိမ်းစစ်ကောင်စီက ကတိပေးထားတာတွေကို ဖော်ဆောင်မှု မရှိတဲ့အတွက် စိတ်ပျက်မိပြီး၊ သူတာဝန်ယူတဲ့တစ်နှစ်အတွင်း ဖြေရှင်းနိုင်မှာ မဟုတ်တော့ဘူးလို့ ကမ္ဘောဒီးယားဝန်ကြီးချုပ် ဟွန်ဆန်က ​ဗုဒ္ဓဟူးနေ့မှာ ပြောကြားလိုက်ပါတယ်။

ကမ္ဘောဒီးယားဟာ ၂၀၂၂ ခုနှစ်အတွက် အာဆီယံဥက္ကဌအဖြစ် ဆောင်ရွက်ရမှာဖြစ်ပြီး မြန်မာနိုင်ငံက နိုင်ငံရေးအကြပ်အတည်းကို ဖြေရှင်းနိုင်ဖို့ ဟွန်ဆန်က စိတ်အားထက်သန်ခဲ့တာပါ။ ဇန်နဝါရီလ နေပြည်တော်ကို ဟွန်ဆန်ကိုယ်တိုင်လာရောက်ကာ စစ်ကောင်စီတာဝန်ရှိသူတွေနဲ့ တွေ့ဆုံခဲ့သလို၊ အာဆီယံအစည်းအဝေးတွေမှာလည်း စစ်ကောင်စီကိုယ်စားလှယ်တွေ တက်ရောက်နိုင်ဖို့ ကြိုးပမ်းခဲ့ပါတယ်။

မနေ့က တံတားသစ်ဖွင့်ပွဲအခမ်းအနားမှာ မြန်မာနိုင်ငံနဲ့ပတ်သက်ပြီး မှတ်ချက်ပေးရာမှာတော့ ဟွန်ဆန်က စစ်တပ်ဟာ ပြဿနာပြေလည်ရေးအတွက် ဘာမှလုပ်ဆောင်တာမရှိကြောင်း ပြောကြားခဲ့သလို၊ ကမ္ဘောဒီးယား အာဆီယံဥက္ကဌအဖြစ် တာဝန်ယူတဲ့ အခုနှစ်အတွင်း ဖြေရှင်းနိုင်ဖွယ် မရှိတော့ဘူးလို့လည်း ဝန်ခံခဲ့ပါတယ်။

“ကျွန်တော့်အခြေအနေက လုပ်တော့လည်း ဝေဖန်ခံရ၊ မလုပ်တော့လည်း ဝေဖန်ခံရတဲ့ အနေအထားပါ။ အဲဒီတော့လည်း ကမ္မသကာပေါ့ဗျာ။ သူတို့မှမလုပ်ချင်တာ ကျွန်တော်တို့လည်း မပူတော့ဘူး။ နွားက ပေတေရပ်နေတော့ လှည်းက အရှေ့ဘယ်ရောက်တော့မလဲ”

မြန်မာနိုင်ငံက ပြဿနာ​ကို ဖြေရှင်းဖို့ ကြိုးစားတဲ့ အချိန်တစ်လကျော်လောက်မှာပဲ ဟွန်ဆန်က ဒီလိုစိတ်ပျက်ကြောင်း ပြောကြားလာတာ ဖြစ်ပါတယ်။

ကမ္ဘောဒီးယားရဲ့ အာဆီယံဥက္ကဌသက်တမ်းဟာ ၁၀ လကျော်သာ ကျန်တော့ပြီး လာမယ့်နှစ် ဥက္ကဌတာဝန်ယူမယ့် နိုင်ငံက ဒီပြဿနာကို ဆက်လက်ဖြေရှင်းဖို့ ဟွန်ဆန်က အကြံပြုခဲ့ပါတယ်။

၂၀၂၀ ခုနှစ် ဖေဖော်ဝါရီလ ၁ ရက်နေ့ အာဏာသိမ်းပြီးနောက်ပိုင်း မြန်မာနိုင်ငံမှာ ဖြစ်ပေါ်လာတဲ့ မတည်ငြိမ်မှုတွေကို ဖြေရှင်းရေး ဧပြီလမှာ အာဆီယံထိပ်သီးအစည်းအဝေး ကျင်းပခဲ့ပြီး သဘောတူညီချက် ၅ ချက်ကို ရရှိခဲ့ပါတယ်။

စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် တက်ရောက်လက်ခံခဲ့တဲ့ အဲဒီသဘောတူညီချက်တွေထဲမှာ အကြမ်းဖက်မှု ရပ်တန့်ရေး၊ ဖမ်းဆီးထားသူတွေကို ပြန်လွှတ်ပေးရေး၊ အာဆီယံ အထူးကိုယ်စားလှယ်တစ်ဦး ခန့်အပ်ကာ သက်ဆိုင်သူတွေအကြား ကြားဝင်ညှိနှိုင်းပေးရေး စတာတွေ ပါဝင်ပါတယ်။

ဒါပေမယ့် အဲဒီသဘောတူညီချက်တွေကို စစ်ကောင်စီဖက်က အကောင်အထည်ဖော်ခြင်းမရှိပါဘူး။

Ref: RFA

ဖေဖော်ဝါရီ ၁၆၊ ၂၀၂၂
M-Media

-အာဏာသိမ်းမှုကို ဆန့်ကျင်တဲ့သူတွေရဲ့ ဖုန်းခေါ်ဆိုမှုမှတ်တမ်းနဲ့ နောက်ဆုံး တည်နေရာတွေကို စစ်ကောင်စီက တယ်လီနောထံကနေ တောင်းယူခဲ့ပြီး တယ်လီနောကလည်း ပေးအပ်ခဲ့တယ်လို့ မနေ့က ရိုက်တာသတင်းတစ်ပုဒ်မှာ ဖော်ပြထားပါတယ်။

အမည်မဖော်လိုတဲ့ တယ်လီနောဝန်ထမ်း နှစ်ဦးရဲ့ ပြောကြားမှုကို ကိုးကားပြီး ဖော်ပြခဲ့တာပါ။ တယ်လီနောရဲ့ ပြောရေးဆိုခွင့်ရှိသူက ဝန်ထမ်းတွေရဲ့ လုံခြုံရေး စိုးရိမ်ရတဲ့အတွက် စစ်တပ်က ဘာတွေညွှန်ကြားခဲ့သလဲဆိုတာ ထုတ်ဖော်ပြောဆိုလို့မရဘူးလို့ ရိုက်တာရဲ့ မေးမြန်းမှုကို ပြန်လည်ဖြေကြားခဲ့ပါတယ်။

မြန်မာနိုင်ငံကနေ ထွက်ခွာတော့မယ့် တယ်လီနောအနေနဲ့ အသုံးပြုသူတွေရဲ့ အချက်အလက် လုံခြုံရေး ဘယ်လိုဆောင်ရွက်မလဲဆိုတဲ့ မေးခွန်းတွေလည်း ကျယ်ကျယ်ပြန့်ပြန့် ထွက်ပေါ်နေပါတယ်။

မြန်မာနိုင်ငံက တယ်လီဖုန်းဆက်သွယ်ရေးလုပ်ငန်းကို လက်ဘနွန်အခြေစိုက် ကုမ္ပဏီ M1 ထံ ရောင်းချဖို့ တယ်လီနောက စီစဉ်ခဲ့ပေမယ့် စစ်တပ်က သူတိုနဲ့နီးစပ်တဲ့ ပြည်တွင်းက ရွှေဗျိုင်းဖြူကုမ္ပဏီနဲ့ ပူးပေါင်းဝယ်ယူဖို့ ဖိအားပေးခဲ့ပါတယ်။

ဒီလက်လွှဲမှုဟာ မကြာခင်အပြီးသတ်ဖို့ရှိနေပြီး ရွှေဗျိုင်းဖြူကုမ္ပဏီက တယ်လီနောမြန်မာ ဆက်သွယ်ရေးလုပ်ငန်းကို ၈၀ ရာခိုင်နှုန်း ပိုင်ဆိုင်မှာ ဖြစ်ပါတယ်။

Ref: Reuters

ဖေဖော်ဝါရီ ၁၅၊ ၂၀၂၂
M-Media

-နိုင်ငံခြားရေးဝန်ကြီးကို မဖိတ်ဘဲ နိုင်ငံရေးဘက်ကမဟုတ်တဲ့ ကိုယ်စားလှယ်တစ်ဦးကို ဖိတ်ကြားတဲ့အတွက် အခုတစ်ပတ်နှောင်းပိုင်းမှာ ကျင်းပမယ့် အာဆီယံ နိုင်ငံခြားရေးဝန်ကြီးများအစည်းအဝေးကို တက်မှာမဟုတ်ဘူးလို့ မြန်မာအာဏာသိမ်းစစ်ကောင်စီက ထုတ်ပြန်ပါတယ်။

အစည်းအဝေးကို ကမ္ဘောဒီးယားနိုင်ငံမှာ ဖေဖော်၀ါရီ ၁၇ ရက်နေ့ ကျင်းပမှာ ဖြစ်ပါတယ်။ ၂၀၂၂ ခုနှစ် အာဆီယံဥက္ကဌအဖြစ်ဆောင်ရွက်မယ့် ကမ္ဘောဒီးယားဝန်ကြီးချုပ် ဟွန်ဆန်က ဇန်နဝါရီ မြန်မာခရီးစဉ်မှာ အာဆီယံ နိုင်ငံခြားရေးဝန်ကြီးများ အစည်းအဝေးကို တက်ရောက်ဖို့ စစ်ကောင်စီခန့် နိုင်ငံခြားရေးဝန်ကြီး ဦး၀ဏ္ဏမောင်လွင်ကို ဖိတ်ကြားခဲ့ပါတယ်။

ဒါပေမယ့် အာဆီယံအဖွဲ့ဝင်နိုင်ငံတွေရဲ့ ကန့်ကွက်မှုကြောင့် ဇန်နဝါရီမှာလုပ်မယ့် အစည်းအဝေးကို ရွှေ့ဆိုင်းခဲ့ရပါတယ်။ နောက်ပိုင်းမှာ ဟွန်ဆန်က အာဆီယံသဘောတူညီချက် ၅ ချက်ကို အကောင်အထည်ဖော်မှ အာဆီယံအစည်းအဝေးတွေမှာ စစ်ခေါင်းဆောင် ကိုယ်စားယ်လှယ်တွေကို တက်ရောက်ခွင့် ပေးမယ်လို့ ပြန်လည်ပြောကြားခဲ့ပါတယ်။

၂၀၂၁ ခုနှစ် ဧပြီလက စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် တက်ရောက်သဘောတူခဲ့တဲ့ အာဆီယံ သဘောတူညီချက် ၅ ချက်ထဲမှာ အာဆီယံအထူးကိုယ်စားလှယ်တစ်ဦး ခန့်အပ်ကာ မြန်မာ့နိုင်ငံရေးနယ်ပယ်က သက်ဆိုင်သူတွေအားလုံးနဲ့ တွေ့ဆုံဆွေးနွေး ညှိနှိုင်းပေးရေးလည်း ပါဝင်ပါတယ်။

စစ်ကောင်စီက ဒီသဘောတူညီချက်တွေကို အကောင်အထည်မဖော်တဲ့အတွက် ပြီးခဲ့တဲ့နှစ် ထိပ်သီးအစည်းအဝေးတွေမှာ မြန်မာစစ်ခေါင်းဆောင်တွေကို အာဆီယံက ဖိတ်ကြားခြင်း မပြုပါဘူး။

တန်းတူဆက်ဆံရေးဆိုတဲ့ အာဆီယံရဲ့မူကို သွေဖည်တဲ့အတွက် အခုတစ်ပတ်ကျင်းပမယ့် နိုင်ငံခြားရေးဝန်ကြီးများအစည်းအဝေးကို မတက်ရောက်တာဖြစ်ကြောင်း၊ အာဆီယံက တစ်ချို့နိုင်ငံတွေဟာ တစ်ဖက်သက် ဆုံးဖြတ်ချက်တွေ ချနေကြောင်း စစ်ကောင်စီက ပြစ်တင်ပြောဆိုခဲ့ပါတယ်။

Ref: CNA