News @ M-Media

Author: M-Media

  • နိုက်ဂျီးရီးယား မုစ်လင်မ်များ လူမှုကျင့်ဝတ်များ ကျေပွန်ခြင်း အလေးပေး ဆောင်ရွက်

    နိုက်ဂျီးရီးယား မုစ်လင်မ်များ လူမှုကျင့်ဝတ်များ ကျေပွန်ခြင်း အလေးပေး ဆောင်ရွက်

    တမန်တော် မုဟမ္မဒ် (ငြိမ်းချမ်းသာယာမှု အဖြာဖြာ ကျရောက်ပါစေ)၏ လမ်းစဉ်ကို ဖ၀ါးခြေထပ်လိုက်သည့် အနေနှင့် နိုက်ဂျီးရီးယား မုစ်လင်မ်လူငယ်များ အဖွဲ့သည် သူတို့၏ အဖွဲ့အစည်းတွင် ပူးပေါင်း ပါဝင်မှုမှတဆင့် အစ္စလာမ်သာသနာ နှင့် ပတ်သက်သော သတင်းစကားများကို အများသိရှိစေရန် လုပ်ဆောင်ပေးမည့် လုပ်ငန်းစဉ် တစ်ရပ်ကို စတင် အကောင်အထည်ဖော် လုပ်ဆောင်ခဲ့ပါသည်။

    အစ္စလာမ် ဆိုင်ရာ ယဉ်ကျေးမှု နှင့် အသိပညာပေးရေး လှုပ်ရှားမှု အဖွဲ့ အနေနှင့် မိမိတို့၏ အဖွဲ့ဝင်များ နှင့် အဖွဲ့အစည်းကို နှုတ်အားဖြင့် သတင်းစကားပေးခြင်း မှ လက်တွေ့ပြုမူဆောင်ရွက်ခြင်း အားဖြင့် မိမိတို့၏ လူမှုအဖွဲ့အစည်းများကို အပြုသဘောဆောင်သည့် အကျိုးသက်ရောက်မှု ဖြစ်ပေါ်စေပြီး ပိုမိုကောင်းမွန်သည့် အပြောင်းအလဲအဖြစ် ဦးဆောင်လွှမ်းမိုးထားနိုင်သည့် အနေအထားတစ်ရပ်သို့ ပြောင်းလဲ ဖြစ်ပေါ်လာစေရန် မျှော်လင့်လျက်ရှိသည် ဟု MICA ၏ အမှုဆောင် အတွင်းရေးမှူး Mallam Sulayman Olokodana က OnIslam.net ကို ပြောကြားခဲ့ပါသည်။

ူမှုရေး ကျင့်ဝတ်များကို တာဝန်ကျေပွန်စွာ လုပ်ဆောင်မှု ပြုခြင်းမှ တဆင့် ဒါဝဟ်ပြုခြင်း (ဖြန့်ချိခြင်း) ဆိုသည့် သဘောတရားအားဖြင့် လူမှု အဖွဲ့အစည်းတစ်ရပ်အား အစ္စလာမ်သာသနာ နှင့် ပတ်သက်ပြီးပိုမို သိရှိနားလည် သဘောပေါက်စေရန် နည်းလမ်းတစ်ရပ်အသွင်ဖြင့်  ဤလုပ်ငန်းစဉ်ကို စတင်ခဲ့ခြင်းဖြစ်သည်။

    “အခုလုပ်ဆောင်နေတဲ့ MICA ရဲ့လုပ်ငန်းစဉ်ကတော့ လူတစ်ချို့ရဲ့ ဖန်တီးမှုကြောင့် သာသနာအပေါ် အထင်မြင်လွဲမှားမှု တွေကို ဖယ်ရှားဖို့ ကျွန်တော်တို့ အမျိုးသားထုရဲ့ သမိုင်းမှာ တွင်ကျန်ဖို့ အမှတ်အသား အဖြစ်ပါ ”ဟု Olokodana က ဆိုပါသည်။

    တမန်တော်မြတ်သည် လူသားတို့၏ ပုဂ္ဂိုလ်ရေးရာ အဖြစ်အပျက်များမှ တဆင့် လက်တွေ့ပြသကာ အစ္စလာမ်သာသနာကို လူသားထုသိရှိအောင် လက်တွေ့ ကျင့်သုံးပြသသကဲ့သို့ ယနေ့ခေတ် မုစ်လင်မ်ထု အနေနှင့် ပြုမူမည်ဆိုပါက စကြာဝဠာတစ်ရပ်လုံးဆိုင်ရာ လူသားညီနောင်များ အဖြစ် ချစ်ခင်ရင်းနှီးစွာ နေထိုင်နိုင်ခြင်းကို ပုံဖော်နိုင်မည် ဟုသူက ယုံကြည်ပါသည်။

    ယခု လုပ်ငန်းစဉ်မှာ လူငယ်မျိုးဆက်သစ်များ အကြား အစ္စလာမ်သာသနာ၏ အခြေခံသဘောတရားကို မီးမှောင်းထိုးပြရန် နှင့် မုစ်လင်မ်တို့၏ နိုးကြားစိတ်ကို ပြန်လည် ရှင်သန်နိုးထလာစေရန် လုပ်ဆောင်နေသည့် ၎င်းတို့၏ အားထုတ်ကြိုးပမ်းမှုများ အနက် တစိတ်တဒေသသာ ဖြစ်သည်ဟု Olokodana က ဆိုပါသည်။

    “ဤလှုပ်ရှားမှုဟာ ကမ္ဘာတစ်လွှားမှာရှိတဲ့ လူငယ်တွေကို အခြားသော အစ္စလာမ်ဆိုင်ရာ အဖွဲ့အစည်းတွေနဲ့ ပူးတွဲ ချိတ်ဆက်မိလာစေဖို့ ရည်ရွယ်တယ်” ဟု သူက ဆိုပါသည်။

    ၁၉၉၄ ခုနှစ်တွင် တည်ထောင်ခဲ့သော MICA သည် အစ္စလာမ်သာသနာကို လူထုသိရှိစေရန် လှုံ့ဆော်ပေးမည့် ဘွဲ့ရ၊ ဘွဲ့ကြို၊ ဘွဲ့လွန် စသည့် ပညာတတ် မုစ်လင်မ်လူငယ်များ ပါဝင်သည့် အသင်းအဖွဲ့ တစ်ရပ်ပင် ဖြစ်ပါသည်။

    MICA သည် ယနေ့မျက်မှောက်ခေတ် ကမ္ဘာလုံးဆိုင်ရာ မုစ်လင်မ်ထု တွေ့ကြုံရင်ဆိုင်နေရသည့် လူမှုရေး ယုံကြည်ချက်ဆိုင်ရာ ပြဿနာများကို ဆန့်ကျင်တားဆီးနေသော အဖွဲ့အစည်းတစ်ရပ် အဖြစ် ကိုယ်စားပြု ဖော်ပြလျက် ရှိသည်။

    ၎င်းတို့ အနေနှင့် အစ္စလာမ်သာသနာ၏ အမှန်တရားကို လူအများသိရှိစေရန် ပုံဖော်ခြင်း၊ အစ္စလာမ့် ယဉ်ကျေးမှု၊ မျက်မှောက်ခေတ် လူမှုအဖွဲ့အစည်း တိုးတက်ဖွံ့ဖြိုးလာမှု အပေါ် မုစ်လင်မ်ထုအား တန်ဖိုးထားမှု၊ အလ္လာဟ်အရှင်မြတ်  ဖြစ်ပေါ်တည်ရှိခြင်း တို့ နှင့် ပတ်သက်၍ လူအများ မှန်ကန်စွာ သိရှိရန် ဖြန့်ချိခြင်းတို့ ပြုလုပ်ရန် ရည်ရွယ်သည်ဟု ဆိုပါသည်။

    ထိုအဖွဲ့အစည်း အနေနှင့် နိုက်ဂျီးရီးယားရှိ မုစ်လင်မ် မိသားစုများကို ကူညီရန် အထူးသဖြင့် ပညာရေးကဏ္ဍတွင် ရင်းနှီးမြှုပ်နှံမှု များစွာ ရှိနေပါသည်။

ူမှုရေး ကျင့်ဝတ်များကို တာဝန်ကျေပွန်စွာ လုပ်ဆောင်မှု ပြုခြင်း

    ၎င်းတို့၏ အဖွဲ့သည် လူမှုရေးတာဝန်များကို ကျေပွန်စွာလုပ်ဆောင်ခြင်း မှတဆင့် အစ္စလာမ်သာနာတော် နှင့် ပတ်သက်၍ ဖြန့်ချိခြင်းပြုခြင်းလုပ်ငန်းစဉ်ကို အရှိန်မြှင့် ဆောင်ရွက်နိုင်ရန် လုပ်ငန်းသစ်များစွာကို အစပြု ဆောင်ရွက် လျက်ရှိသည် ဟု Olokodana က ဆိုပါသည်။

    “ဒီစီမံကိန်းကတော့ တစ်ခါမှ မစတင်ခဲ့ဘူးတဲ့ လုပ်ငန်းစဉ် အသစ်ပါ။ ဒါပေမဲ့ LASUTH (လာဂို့စ်ပြည်နယ် သင်ကြားရေး ဆေးရုံ) မှာရှိတဲ့ ကလေးဆောင်ကို သွားရောက်လည်ပတ်ပြီး ကျန်းမာရေးဆိုင်ရာ ပစ္စည်းများ ပေးအပ်ခြင်းကို တော့ ပြုလုပ်ခဲ့ပါတယ်” ဟု သူက OnIslam.net ကို ပြောကြားခဲ့ပါသည်။

    “အခြားသော အကျိုးပြု စီမံကိန်းများစွာ အနက် လာဂို့စ် ပြည်နယ်တွင် အသိအမှတ်ပြုခံရသည့် ၀တ်ကျောင်းတော်များ၏ ဖွံ့ဖြိုးတိုးတက်ရေး ကိစ္စများကို ကျွန်တော်တို့ လုပ်ဆောင်နေတယ်”

    ပိုမို ကောင်းမွန်လုံခြုံသော ပတ်ဝန်းကျင် ဖန်တီးရေးစီမံကိန်းများတွင် တစ်စိတ်တစ်ဒေသ ပါဝင်ခြင်းဖြင့် လည်းကောင်း၊ ရွေးချယ်ခံထားရသော တာဝန်ရှိသူများကို စံနမူနာ ကောင်းများ ဖြစ်စေရန် ဖိအားပေးခြင်း၊ သို့မဟုတ် အလုပ်မှ နှုတ်ထွက်စေခြင်း၊ လူမှုရေးလုပ်ငန်းများတွင် ပါဝင်ခြင်း စသည်တို့အားဖြင့် လူထုအကျိုးပြု လုပ်ငန်းရပ်ပေါင်း များစွာတွင် မိမိတို့ အဖွဲ့အနေနှင့် ပါဝင်ဆောင်ရွက်လျက် ရှိသည်ဟု သူက ပြောခဲ့ပါသည်။

    “တကယ်လို့ အစ္စလာမ်ကသာ အစီအစဉ်ကျနပြီး ပျက်စီးမှု ကင်းမဲ့တဲ့ လူအဖွဲ့အစည်း တစ်ရပ်ကို တောင်းဆိုလိုလား မယ်ဆိုရင် ကျွန်တော်တို့ မုစ်လင်မ်ထု အနေနဲ့ အလ္လာဟ်ကသွန်သင်ထားတယ်၊ အလ္လာဟ်က လမ်းညွှန်ထားတယ် ဆိုရုံသာ မပြောနေဘဲ အလ္လာဟ်သွန်သင်ထားတဲ့ အဲဒီ အမူအကျင့် အပြုအမူများကို ကျွန်တော်တို့ရဲ့ လူမှု ၀န်းကျင်မှာ လက်တွေ့ အကောင်အထည်ဖော် လုပ်ဆောင်ပြဖို့ တာဝန်ရှိပါတယ်”

    “ဒီလိုနည်းအားဖြင့် ကျွန်တော်တို့ဟာ အစ္စလာမ်ရဲ့ အမှန်တရား သတင်းစကားကို တောင့်တင်းခိုင်မာတဲ့ အနေအထား တစ်ရပ်ကနေ ပို့ဆောင် ဖြန့်ချိပေးနိုင်မှာပါ။ အဲလိုမဟုတ်ဘဲ သာသနာရဲ့ လမ်းညွှန်ချက်ကနေ လွဲချော်တဲ့ အနေအထား နဲ့ သာသနာက ရှောင်ကြဉ်အပ်တယ်လို့ သင်ပြထားတဲ့ စိတ်ဓာတ် အလွဲအမှားနဲ့ ပါဝင်လုပ်ဆောင်နေမယ်ဆိုရင် ကျွန်တော်တို့ဟာ အစ္စလာမ်သာသနာရဲ့ ဖြစ်တည်မှုကို အများသိရှိအောင် လုပ်ဆောင်နေတာ မဟုတ်တော့ပါဘူး” ဟု သူက ဆိုပါသည်။

    “ဒါကြောင့်မုစ်လင်မ်ထု တစ်ရပ်လုံးသည် ကောင်းမွန်ပြီး လူသားဆန်သော ညီအစ်ကိုစိတ်ဓာတ်ကို ပုံဖော်နေသာ စံပြလူသားများဖြစ်တယ်ဆိုတာကို သက်သေပြနိုင်ဖို့ဟာ MICA မှ ကျွန်တော်တို့ အားလုံးရဲ့ ခိုင်မာသော ယုံကြည်ချက်တစ်ရပ်ပါဘဲ”

    ” ကျမ်းတော်မြတ် ကုရ်အာန်ကလည်း အဲလိုဘဲ ညွှန်ကြားထားသလို တမန်တော်မြတ် နှင့် တမန်တော်၏ နောက်လိုက်သာဝက များကလည်း မက္ကာမြို့တော်မှာ အခြေခံကာ မဒီနာ ၌လည်းကောင်း၊ ကမ္ဘာ အနှံအပြား အရပ်ရပ်မှ လည်းကောင်း သူတို့ရရှိခဲ့သော သတင်းစကားများ အပေါ်မှာ အခြေပြုပြီး ကောင်းမွန်သော စံနမူနာတွေနဲ့ သက်သေပြ ကျင့်သုံးခဲ့တယ်။ ယနေ့ မုစ်လင်မ်ထု အနေနဲ့လည်း သူတို့ရဲ့ ခြေရာကို ဖ၀ါးခြေထပ် လိုက်နာ ကျင့်သုံးရပါမယ်”

    ခရစ်ယာန်များ အနေနှင့် အကျိုးပြုလုပ်ငန်း ၄၀ရာခိုင်နှုန်းခန့်သာ လုပ်ဆောင်နိုင်ခဲ့ချိန်တွင် မုစ်လင်မ်များ အနေနှင့် လူဦးရေ သန်းပေါင်း ၁၄၀ ရှိသော နိုက်ဂျီးရီးယား ပြည်သူများ၏ ၅၅ရာခိုင်နှုန်း နီးပါးကို အကျိုးပြုပေးခဲ့ပါသည်။

    Source: http://www.onislam.net/english/news/africa/456999-promoting-islam-by-social-responsibility.html

  • စစ်တွေ GTC တိုက်ခိုက်ခံရသည့် သတင်းမှားကြောင်း ရခိုင်ပြည်နယ် အစိုးရပြော

    စစ်တွေ GTC တိုက်ခိုက်ခံရသည့် သတင်းမှားကြောင်း ရခိုင်ပြည်နယ် အစိုးရပြော

    ရခိုင်ပြည်နယ် အစိုးရအဖွဲ့မှ ဒေသတွင်းတည်ငြိမ်အေးချမ်းမှု ပျက်ပြားစေမည့် သတင်းမှားများ ထုတ်ပြန်ခြင်း မပြုရန် မေတ္တာရပ်ခံ

     

    ဇူလိုင် ၂၇ရက် ၂၀၁၂

    Soure: News Watch Weekly

    ရခိုင်ပြည်နယ် အစိုးရအဖွဲ့ သတင်းထုတ်ပြန်ရေးအဖွဲ့ သတင်းစာရှင်းလင်းပွဲကို ဇူလိုင် ၂၄ ရက် မွန်းတည့် ၁၂ နာရီက ပြုလုပ်ခဲ့ရာ သတင်းထောက်များ အနေဖြင့် ဒေသတွင်းတည်ငြိမ်မှု ပျက်ပြားစေမည့် သတင်းမှားများ ထုတ်ပြန်ခြင်း မပြုကြရန် သတင်းထုတ်ပြန်ရေး အဖွဲ့ခေါင်းဆောင် ရခိုင်ပြည်နယ် ရှေ့နေချုပ် ဦးလှသိန်းက ပြောကြားခဲ့သည်။

    နိရဉ္စရာ သတင်းဌာနမှ ဇူလိုင် ၁၇ ၂၀၁၂ တွင်ဖော်ပြခဲ့သော စစ်တွေ GTC ကျောင်းသားများတိုက်ခိုက်ခံရသော သတင်းအမှား
    မူရင်း သတင်း Link

    ယခင်အပတ်ထုတ် ဂျာနယ်တစ်စောင်တွင် ဂျီတီစီကျောင်းသားများ တိုက်ခိုက်ခံရ ခေါင်းစဉ်ဖြင့် ရေးသားဖော်ပြခဲ့ခြင်းမှာ ဖြစ်ရပ်မှန်နှင့် လုံးဝကွဲလွဲပြီး မသိသူများအနေဖြင့် ရခိုင်ပြည်နယ်အတွင်း တည်ငြိမ်အေးချမ်းမှု မရှိသေးကြောင်း အထင်မှားစရာဖြစ်သလို တစ်ဖက်နှင့်တစ်ဖက် ရန်လိုမုန်းတီးမှုများ ပြန်လည်ဖြစ်ပွားစေနိုင်ပြီး ဒေသတွင်း တည်ငြိမ်အေးချမ်းမှုကို ပျက်ပြားနိုင်သည်အထိ ဖြစ်သွားနိုင်ကြောင်း၊ ဖြစ်ရပ်မှန်မှာ ဂျီတီစီကျောင်းတွင် တာဝန်ကျနေသည့် လုံခြုံရေးဝန်ထမ်းများနှင့် အရပ်သားများအကြား အထင်လွဲမှား ဖြစ်ပွားမှုသာ ဖြစ်ကြောင်း၊ ကျောင်းသားများနှင့် အရပ်သားများ မည်သူမျှ သက်ဆိုင်မှုမရှိကြောင်း၊ ထို့ကြောင့် ဂျီတီစီကျောင်းမှာလည်း ပုံမှန်ဖွင့်လှစ်သင်ကြားကာ ကျောင်းသားများ တက်ရောက် ပညာသင်ကြားနေကြကြောင်း ပြောကြားခဲ့သည်။

    ထို့အတူ စစ်တွေတက္ကသိုလ်ကိုလည်း မကြာမီ ဖွင့်လှစ်နိုင်ရန် ညှိနှိုင်းဆောင်ရွက်လျက်ရှိကြောင်း၊ တက္ကသိုလ် ကျောင်းသားအချို့ ကျောင်းတက်ရောက်နိုင်ရန် အခက်အခဲရှိပါက ၄င်းတို့အား အဝေးသင်တက္ကသိုလ်သို့ ပြောင်းလဲသင်ကြားပေးနိုင်ရန် ညှိနှိုင်းဆောင်ရွက်လျက်ရှိကြောင်း ပြောကြားခဲ့သည်။ အရေးအခင်းများ ဖြစ်ပွားခဲ့ရာ မောင်တော၊ ဘူးသီးတောင်၊ ရသေ့တောင်၊ စစ်တွေမြို့နယ်များရှိ အခြေခံပညာသင် ကျောင်းများအားလည်း ပုံမှန်အတိုင်း ဖွင့်လှစ်သင်ကြားနိုင်ရန် ဆောင်ရွက်လျက်ရှိကြောင်းလည်း အဖွဲ့ခေါင်းဆောင်မှ ရှင်းလင်းပြောကြားခဲ့သည်။ သတင်းမှားများ ထုတ်ပြန်ခြင်းအတွက် ဒေသတည်ငြိမ်ရေးကို ထိခိုက်ပါက ဥပဒေနှင့်အညီ တရားစွဲဆိုခံရနိုင်မည် ဖြစ်ကြောင်းလည်း အသိပေးရှင်းလင်း ပြောကြားခဲ့ပြီး ယခုအချိန်အထိ အရေးယူခြင်း မရှိသေးသော်လည်း သတင်းမှား ဖော်ပြခြင်းအတွက် အမှားပြင်ဆင်ချက်နှင့် မှားယွင်းကြောင်း တောင်းပန်စာများကိုသာ ထည့်ရန် သတိပေး ဆောင်ရွက်ထားရှိကြောင်း သိရသည်။ အဆိုပါကိစ္စနှင့် ပတ်သက်၍ ဒေသခံ သတင်းထောက်တစ်ဦးက “ဂျာနယ်အချို့မှာ ဒေသခံ သတင်းထောက်တွေ ထားရှိပါတယ်။

    YPI သတင်းဌာနတွင် ဇူလိုင် ၁၈ ၂၀၁၂ တွင်ဖော်ပြခဲ့သော စစ်တွေ GTC ကျောင်းသားများ တိုက်ခိုက်ခံရသော သတင်းအမှား
    သတင်းအပြည့်အစုံဖတ်ရန် ပုံပေါ်တွင် နှိပ်ပါ။
    YPI သတင်းဖော်ပြခဲ့သည့် Link
    သစ်ထူးလွင် ဆိုဒ်တွင် ဖော်ပြခဲ့သော် ဇူလိုင် ၁၈ ၂၀၁၂ တွင်ဖော်ပြခဲ့သော စစ်တွေ GTC ကျောင်းသားများ တိုက်ခိုက်ခံရသော သတင်းအမှား
    မူရင်း သတင်း Link

    တချို့လည်း အလွတ်တန်း သတင်း ရေးနေသူတွေ ရှိပါတယ်။ ဒေသသတင်းများကို ရေးသားမယ်ဆိုရင် ဒေသခံ သတင်းထောက်တွေဆီက ပြန်လည်စုံစမ်းသင့်ပါတယ်။ အရပ်သတင်း၊ အရပ်စကားကြားရုံနှင့် ရန်ကုန်တိုက်ကနေပြီး တိုက်ပိုင်သတင်းထောက်တွေက အမှားရေးတော့ ဒေသခံသတင်းထောက်တွေအပေါ် အထင်သေးမှုတွေ ဖြစ်ပေါ်ပြီး ဌာနတွေနှင့် ဆက်ဆံရာမှာ အဖုအထစ်များ ဖြစ်ပေါ်စေနိုင်ပါတယ်” ဟု ပြောကြားခဲ့ကြောင်း ၂၀၁၂ ခုနှစ် ဇူလိုင်လ ၃၁ ရက်နေ့ထုတ် News Watch Weekly ဂျာနယ်တွင် ဖော်ပြထားပါသည်။

     

    News Watch Weekly ဂျာနယ်မှကူးယူဖော်ပြချက်

  • နှစ် ၁၀၀ ကျော်သက်တမ်းရှိ ပြည်မြို့မှ မွတ်စလင်မ် သုဿာန်အား သော့ခတ်ပိတ်သိမ်းခံရ

    နှစ် ၁၀၀ ကျော်သက်တမ်းရှိ ပြည်မြို့မှ မွတ်စလင်မ် သုဿာန်အား သော့ခတ်ပိတ်သိမ်းခံရ

    ဇူလိုင် ၂၆ရက်၊ ၂၀၁၂

    ရန်ကုန်။

    M-Media

    သတင်း – ပြည့်ပြည့်

    ပြည်မြို့ရှိ မွတ်စလင်မ်သုဿာန်အဟောင်းအား အာဏာပိုင်များမှ မနေ့ညပိုင်းက လာရောက်၍ သော့ခတ်သွားကြောင်းသိရပါတယ်။

    နှစ်ပေါင်း ၁၀၀-ကျော်သက်တမ်းရှိ ပြည်မြို့မှ မွတ်စလင်မ်သုဿာန် အားသော့ခတ်ထားပုံ

    ဤသုဿာန်မြေသည် လွန်ခဲ့သော နှစ်ပေါင်း ၁၀၀ ကျော်ကတည်းက တည်ရှိခဲ့သော သုဿာန်ဖြစ်ပြီး ကိုယ်ပိုင်ဝယ်ယူထားခဲ့ကြသော မြေနေရာဖြစ်ကြောင်း၊ ၂၀၀၈-ခုနှစ်တွင် မြို့နယ်စည်ပင်မှ မြို့နယ်အင်္ဂါရပ်နှင့်မညီညွတ်ဟုပြောသဖြင့် မြို့နယ်အုပ်ချုပ်ရေးမှပိတ်သိမ်းရန် အမိန့်ထုတ်ခဲ့ကြောင်း၊ သုဿာန်မြေအဟောင်းအား ပိတ်သိမ်းပြီး အသစ်သို့ပြောင်းရွှေ့ရန် နေရာအသစ်ပေးခဲ့သော်လည်း အဆိုပါနေရာမှာ အဆင်မပြေသောကြောင့် မပြောင်းရွေ့ပဲ နေခဲ့ကြကြောင်း၊ ယခုအခါ ထပ်မံ၍ နေရာအသစ်တစ်ခုသို့ ပြောင်းရွှေ့ရန် လွန်ခဲ့သော ၁-လကျော်မှ သတ်မှတ်ပေးခဲ့ကြောင်း၊ ဒေသခံများမှ သုဿာန်အသစ်သို့ ပြောင်းရွှေ့ခြင်းမပြုသေးတာကြောင့် ဇူလိုင်လ ၂၅-ရက်နေ့ ည ၉-နာရီခန့်တွင် ရဲများမှ လာရောက်ပြီး သော့ခတ်သွားကြောင်း သတင်းရရှိပါသည်။

    နှစ်ပေါင်း ၁၀၀-ကျော်သက်တမ်းရှိ ပြည်မြို့မှ မွတ်စလင်မ်သုဿာန်

    အဆိုပါ ဖြစ်စဉ်နှင့်စပ်လျဉ်း၍ ပြည်မြို့ခံ မွတ်စလင်မ်တစ်ဦးအား ဆက်သွယ်စုံစမ်းမေးမြန်းခဲ့ပါသည်။

    “ဒီသုဿာန်မြေဟာ လွန်ခဲ့တဲ့ နှစ်ပေါင်း ၁၀၀-ကျော်ကတည်းက ရှိခဲ့တာပါ။ မွတ်စလင်မ်လူကြီးတွေက ကိုယ်ပိုင်ငွေနဲ့ဝယ်ထားခဲ့ကြတာ။ ၂၀၀၈-ခုနှစ်မှာကျတော့ မြို့နယ်စည်ပင်ကနေ မြို့အင်္ဂါရပ်နဲ့ မညီညွတ်ဘူးဆိုပြီး ကတက်ကုန်းသုဿာန်ဆိုတဲ့ နေရာအသစ်ပေးတယ်။ အဲဒီနေရာက မြေကျင်းတူးရင်ရေတွေထွက်တော့ မြှုပ်နှံဖို့အဆင်မပြေဘူး။ ဒါကြောင့် အဲဒီမပြောင်းပဲနဲ့ ဒီသင်္ချိုင်းအဟောင်းမှာပဲ မြှုပ်နေခဲ့တာ။ အခုတော့ နောက်ထပ် ဧငြိမ်းသာဆိုတဲ့သင်္ချိုင်းမြေနေရာအသစ်တစ်ခုထပ်ပေးတယ်။ စက်မှုဇုံနဲ့ မျက်နှာချင်းဆိုင်မှာ။ အဲဒါ လွန်ခဲ့တဲ့ ၁-လကျော်လောက်က ချပေးလိုက်တာ။ အဲဒီကို ဘယ်သူမှ မရွှေ့သေးပဲ ဟောင်းမှာပဲ ဆက်ပြီး မြှုပ်နေကြတာ။

    သင်္ချိုင်းအသစ်မှာ မြှုပ်တာ ၃-ယောက်လောက်ပဲရှိသေးတယ်။ ကျန်တဲ့ အဟောင်းမှာပဲ မြှုပ်နှံသူတွေကို မြို့နယ်တရားရုံးမှာ တရားစွဲခံရတာကြောင့် တရားရုံးရောက်တာပဲ။ မနေ့ညကတော့ လာပြီးသော့ခတ်သွားတာ ရဲတွေပါ။ အဲဒါ ရဲစခန်းကိုမေးတော့လည်း မဟုတ်ဘူးပြောတယ်။ ကျွန်တော်တို့က သုဿာန်အဟောင်းကို ပိတ်သိမ်းတယ်ဆိုတာအထိတော့လက်ခံတယ်။ ဒီမြေနေရာဟာ ကိုယ်တိုင်ဝယ်ယူထားခဲ့ကြတဲ့နေရာပါ။ ဌာနဆိုင်ရာအဆင့်ဆင့်ကိုလည်း စာပို့ထားပါတယ်။ အဖွဲ့ကြီး ၅-ဖွဲ့ကလည်း စာပို့တယ်။ ဒါပေမယ့် မနေ့ညကတော့ သော့လာခတ်သွားကြတယ်။ ကျွန်တော်တို့အနေနဲ့က ဖျက်သိမ်းမယ်ဆိုတာမျိုးတော့ လက်မခံနိုင်ဘူး။ ဒါကြောင့် ဖျက်သိမ်းခြင်းမပြုဖို့ ထပ်မံကြိုးစားလုပ်ဆောင်နေပါတယ်” လို့ ပြောကြားသွားခဲ့ပါတယ်။

  • “ရခိုင်မြောက်ပိုင်းဟာ အာရှရဲ့ ကိုဆိုဗို ဖြစ်လာနိုင်မလား” ၏ အခြားတဘက်

    “ရခိုင်မြောက်ပိုင်းဟာ အာရှရဲ့ ကိုဆိုဗို ဖြစ်လာနိုင်မလား” ၏ အခြားတဘက်

     ဒေါက်တာနေလင်းအောင်

    ရခိုင်အရေးနှင့်ပတ်သက်၍ အတွေးရှုထောင့်တစ်ခုရရှိစေရန် ရည်ရွယ်ပြီး ပြန်လည်မျှဝေ ဖော်ပြပါသည်ဟုဆိုကာ Weekly Eleven News No. 42, Vol: 7, July 25 2012  တွင် ဖော်ပြခဲ့သော “ရခိုင် မြောက်ပိုင်းဟာ အာရှရဲ့ ကိုဆိုဗိုဖြစ်လာမလား” ဆောင်းပါးကို ဖတ်ရှုပြီးသည့်နောက် ရခိုင်အရေးနှင့် ပတ်သက်၍ အခြားအတွေးရှုထောင့်တစ်ခုကို ထပ်မံရရှိစေရန်လည်းကောင်း၊ ဆောင်းပါးရှင် ကိုအောင်ဇင်လတ်၏ ပြည်တွင်းမြန်မာနိုင်ငံသား အစ္စလာမ်ဘာသာဝင်များကို မေးမြန်းထားသော မေးခွန်း တစ်ခုအား မြန်မာမွတ်စလင်မ် တစ်ဦးအနေဖြင့် ပြန်လည်ဖြေကြားလိုသည်ကတစ်ကြောင်းကြောင့် ရေးသား လိုက်ရပါသည်။ စာဖတ်ပရိတ်သတ်များ ဖတ်ရှုနိုင်အောင် ဖော်ပြလိုခြင်း (သို့) ဖော်ပြနိုင်ခြင်း မရှိပါကလည်း ပြည်တွင်းမီဒီယာမိသားစုများ ယခုတင်ပြသည့် ရှုထောင့်တစ်ခုအား ဖတ်ရှုနိုင်ကြပါလျှင် ကျွန်တော်အနေနှင့် တင်ပြရကျိုးနပ်သည်ဟု ယူဆမိပါသည်။

    Weekly Eleven News No. 42, Vol: 7, Page No 25&28 July 25 2012 တွင် ဖော်ပြခဲ့သော “ရခိုင် မြောက်ပိုင်းဟာ အာရှရဲ့ ကိုဆိုဗိုဖြစ်လာမလား” ဆောင်းပါး

    မီဒီယာနှင့် ဘက်လိုက်မှု

    ကျွန်တော်သည် မီဒီယာသမားတစ်ဦး မဟုတ်သော်လည်း မီဒီယာလောကနှင့် စိမ်းသူမဟုတ်ပါ။ လွန်ခဲ့သော သုံးလေးနှစ်ခန့်မှစ၍ ရန်ကုန်၊ အမေရိကန်စင်တာတွင် ဖွင့်လှစ်သော မီဒီယာသင်တန်းတစ်ခုကို တက်ရောက်ခဲ့စဉ်မှစ၍ မီဒီယာလောကနှင့် ထိတွေ့ခွင့်ရရှိခဲ့သလို မီဒီယာအလုပ်ရုံဆွေးနွေးပွဲအချို့ တို့ကိုလည်း တက်ရောက် ခွင့်ရရှိခဲ့ပါသည်။ ပြည်တွင်း မီဒီယာလောကသားများ၏ မီဒီယာဆိုင်ရာအတွေး အမြင်များ၊ ပညာများကို လေ့လာမှတ်သားဘူး၍ ယနေ့ပြည်တွင်းဂျာနယ်အချို့မှ အယ်ဒီတာများနှင့် သတင်း ထောက်တို့မှာ ကျွန်တော်၏ ဆရာများဖြစ်သည်ဟု မှတ်ယူထားပါသည်။

    ကျွန်တော် မီဒီယာလောကနှင့် စတင်ကျွမ်းဝင်ခဲ့ချိန်ကတည်းက ယိုင်နဲ့နေပြီးဖြစ်သော “မီဒီယာသည် ဘက်လိုက်မှုကင်းရမည်” ဟူသော အယူအဆအား ကျွန်တော် သဘောမတွေ့ခဲ့ပါ။ လူသားသည် ခံစားချက် ရှိသည်။ တွေးခေါ်မြော်မြင်ဆင်ခြင်နိုင်သော အသိဉဏ်ရှိသည်။ ထို့ကြောင့် လူသားတစ်ဦးဖြစ်သော သတင်း သမားသည်လည်း ထိုခံစားချက်၊ အသိဉာဏ်တို့ကို ဘေးဖယ်၍ သတင်းတစ်ပုဒ်၊ ဆောင်းပါးတစ်ပုဒ်ရေးသား ရန်မှာ လက်တွေ့၌ မဖြစ်နိုင်ဟု ယုံကြည်ပါသည်။ ထို့ကြောင့် ဘယ်ဘက်ကိုမှ မလိုက်ဘဲ ရေးသားထားသော သတင်းဟူ၍ မရှိနိုင်ဟု ရိုးသားစွာ ယုံကြည်မိပါသည်။ သို့သော် အရေးကြီးသော သတင်းကျင့်ဝတ်တစ်ခုဖြစ် သည့် “မျှတမှု” ရှိရန်ကိုမူ သတိထားသင့်သည်ဟု ယူဆမိပါသည်။ အုပ်စုနှစ်ခု (သို့) လူနှစ်ဦးအကြား ဖြစ်ပွား သော ကိစ်္စများ၌ နှစ်ဘက်အမြင်ကိုဖော်ပြပြီးကာမှ သတင်းသမား၏ အမြင်၊ အယူအဆ၊ ဝေဖန်မှုတို့ကို ပြုလုပ်သင့်ပါသည်။ သို့မှသာ သတင်းဖတ်သူတို့မှလည်း နှစ်ဘက်အမြင်ကို သိမြင်နိုင်ပြီး ဝေဖန်သုံးသပ်နိုင် ပေမည်။ ရခိုင်အရေးနှင့် ပတ်သက်၍ ပဋိပက္ခအရှိန်မြင့်နေစဉ်တွင် နှစ်ဘက်အမြင်ကို ဖော်ပြရန် ခက်ခဲနိုင် သော်လည်း ယခုအေးချမ်းစပြုသော အချိန်၌ပင်လျှင် အချို့မီဒီယာတို့မှာ နှစ်ဘက်အမြင်ကို တင်ပြရန် ပျက်ကွက်ခဲ့သည်ကို ၀မ်းနည်းစွာ တွေ့မြင်နေရပါသည်။

    ရခိုင်အရေးနှင့် ပတ်သက်၍ တွေ့မြင်ရသော နောက်မီဒီယာပြဿနာတစ်ခုမှာ အမြင်နှစ်ခုနှင့် နေရာ ပြဿနာဟု ဆိုရပေမည်။ ပြင်ပမီဒီယာအချို့က ဘက်လိုက်ရေးသားသည်ဟုဆိုကာ ပြည်တွင်းမီဒီယာအချို့က အခြားတဘက်သို့ ဘက်လိုက်ရေးသားခြင်းဖြင့် ချိန်ခွင်လျှာညှိရန် ကြိုးစားခဲ့ကြသည်။ သို့သော် ထိုမီဒီယာ တို့မှ ဖော်ပြသောနေရာမှာ မတူပေ။ ပြည်တွင်းမီဒီယာများ၏ ဖော်ပြချက်ကို ပြင်ပစာဖတ်သူတို့က လက်လှမ်း မမီသလို ပြည်တွင်း စာဖတ် ပရိသတ်တို့ကလည်း ပြင်ပမီဒီယာများမှ ဖော်ပြချက်တို့ကို မသိကြပါ။ ထို့ကြောင့် အစွန်းထွက်မူ နှစ်ခုကြားမှ ကွာခြားချက်က ပိုမိုကြီးမားလာခဲ့သည်။ အထူးသဖြင့် မရင့်ကျက်သေးသော ပြည်တွင်းမီဒီယာနှင့် ပြည်တွင်းစာဖတ်သူတို့၏ အစွန်းရောက်မှုကြောင့် ပြဿနာအချို့စတင်ခံစားနေရပြီ ဖြစ်သည်။ ထိုပြဿနာကို နောက်မှ ဆွေးနွေးပါမည်။

    ရခိုင်ပဋိပက္ခ

    ရခိုင်ပဋိပက်္ခနှင့်ပတ်သက်၍ အမြင်အမျိုးမျိုးရှိသည်မှာ အမှန်ပင်ဖြစ်သည်။ သမ္မတကြီး၏ မိန့်ခွန်း အမျိုးသားဒီမိုကရေစီအဖွဲ့ချုပ်၏ သဘောထားထုတ်ပြန်ချက်၊ နိုင်ငံတော်သံဃမဟာ နာယကအဖွဲ့ ဥက္ကဌ ဆရာတော်၏ သြ၀ါဒကထာ၊ အစ္စလာမ်အဖွဲ့အစည်းကြီးများမှ တာဝန်ရှိ ပုဂိ်္ဂုလ်တို့၏ ဖော်ပြချက်တို့၌ ထိုဖြစ်ရပ်တို့သည် လူတစ်စု၏ တရားလက်လွတ်ပြုလုပ်မှု၊ တရားဥပဒေချိုးဖောက်မှု၊ အကြမ်းဖက်မှုတို့ကြောင့် ဖြစ်ပေါ်လာရသည် ဟုသုံးသပ်ခဲ့ကြသည်။ မြန်မာနိုင်ငံသား အစ္စလာမ်ဘာသာဝင်တို့ကလည်း ဤပဋိပက္ခကို အကြမ်းဖက်သူနှင့် အကြမ်းဖက်ခံရသူတို့အကြားမှ ပြဿနာအဖြစ် ရှုမြင်ကြသည်။ မည်သည့်လူမျိုး၊ မည်သည့်ဘာသာဝင်မဆို မုဒိမ်းကျင့်၊ လူသတ်၊ လူအုပ်စုဖွဲ့လူသတ်၊ အပြစ်မဲ့ပြည်သူတို့၏ အသက်အိုးအိမ်စည်းစိမ်ကို ဖျက်ဆီး၊ ဘုန်းကြီးကျောင်း၊ ဗလီစသည့် သာသနိကအဆောက်အအုံများကို ဖျက်လိုဖျက်ဆီးပြုကြသည့် အကြမ်းဖက် သမားများသည် ယဉ်ကျေးသည့် လူအစုအဝေး၏ ဘုံရန်သူဖြစ်ပြီး၊ တရားဥပဒေနှင့်အညီ အရေးယူရပေမည်။ ထို့အတူ မည်သည့်လူမျိုး၊ မည်သည့်ဘာသာဝင်ပင်ဖြစ်စေ အကြမ်းဖက်ခံရပါမူ မေတ္တာ၊ ဂရုဏာရှေ့ထား၍ ကူညီစောင့်ရှောက်ကာကွယ်ကြရမည်သာဖြစ်သည်။ ထို့ကြောင့် မြန်မာနိုင်ငံသား အစ္စလာမ်ဘာသာဝင်အများစုသည် ကျောက်နီမော်အမူမှစ၍ နောက်ဆုံး အကြမ်းဖက်မှုများ အထိ ဖြစ်ရပ်တို့သည် လူမျိုးရေးပြဿနာလည်း မဟုတ်၊ ဘာသာရေးပြဿနာလည်းမဟုတ်၊ အကြမ်းဖက်သူနှင့် အကြမ်းဖက်ခံရသူတို့၏ ပြဿနာဖြစ်ကြောင်း ခံယူလိုကြသည်။ မြန်မာနိုင်ငံ အစ္စလာမ်အဖွဲ့အစည်း အသီးသီးမှ တာဝန်ရှိ ပုဂ်္ဂိုလ်များကလည်း ဤကဲ့သို့ပင် ကြေငြာချက်များ ထုတ်ပြန်ခြင်း၊ သတင်းမီဒီယာများသို့ ပြောကြားခြင်းများ ပြုခဲ့ပြီး ဖြစ်သည်။

    လူမျိုးရေးပဋိပက္ခ

    သို့သော် ရခိုင်အရေးကို လူမျိုးရေးပဋိပက္ခ၊ ဘာသာရေးပဋိပက္ခများအဖြစ် ပုံဖော်ရန် ကြိုးပမ်းမှု များရှိသည်မှာ ငြင်းမရသော အချက်ပင်ဖြစ်သည်။ ထိုကြိုးပမ်းမှုများ၌ လူမျိုးရေး ပဋိပက္ခအဖြစ် ပုံဖော်မှုမှာ အောင်မြင်ခဲ့သည်ဟုဆိုရမည်။ ထိုကဲ့သို့ လူမျိုးရေးပဋိပက္ခအဖြစ် ပုံဖော်မှုနှင့် ပြည်တွင်းမီဒီယာအချို့တို့၏ “တန်ပြန်” ဘက်လိုက်ရေးသားမှုတို့၏ အကျိုးဆက်ကြောင့် အကြမ်းဖက်လူမျိုးစုနှင့် အကြမ်းဖက်ခံလူမျိုးစု ဟူ၍ ပေါ်ပေါက်လာတော့သည်။ အကြမ်းဖက်ခံလူမျိုးစု အဖြစ် ဖော်ပြခြင်းခံရသူတို့အနက်မှ အကြမ်းဖက် မှုကျူးလွန်းခဲ့သူများကို အမျိုးဘာသာ၊ သာသနာကို ကာကွယ်ကြသူများအဖြစ် ချီးမွမ်းဂုဏ်ပြုကာ တရားဝင် လက်နက်တပ်ဆင်ပေးရန် ကြိုးပမ်းလာကြသည်။ အကြမ်းဖက်လူမျိုးစု အဖြစ် ဖော်ပြသတ်မှတ်ခံရ သူတို့အနက် မှ အကြမ်းဖက်ခံရသူတို့မှာမူ ပြည်တွင်းစေတနာရှင်များ၏ ရွံရှာမုန်းတီးခြင်းခံရ၍ မည်သည့်အကူအညီမှ မရရှိကြဘဲ ကြီးမားသော ဘေးဒုက္ခဖြင့် ကြုံတွေ့နေကြရတော့သည်။ ဤအခြေအနေမှတဆင့် အလွန် အန္တရာယ်ကြီးသော အခြေအနေများ ပေါ်ပေါက်လာနိုင်သော အရိပ်အခြေတို့ကို တွေ့မြင်နေရပြီ ဖြစ်သည်။ ထိုသို့ဖြစ်ပေါ်လာခဲ့ပါမူ မည်သူကို အပြစ်တင်ရမည်ကို မဝေခွဲတတ်တော့ပေ။

    ဘာသာရေးပဋိပက္ခ

    အာဏာပိုင်အဖွဲ့အစည်းများ၊ ဘာသာရေးပုဂိ်္ဂုလ်များ၊ သတင်းမီဒီယာများ၊ လူမှုအဖွဲ့အစည်းများမှ ရခိုင်အရေးကို ဘာသာရေး ပဋိပက္ခအသွင်မဆောင်ရန် ကြိုးပမ်းဆောင်ရွက်မှုများခဲ့ပါသော်လည်း ဘာသာရေး ပဋိပက္ခ အသွင်ဆောင်စေသော အချက်များရှိနေသည်ကို တွေ့ရသည်။ ကျောက်နီမော်အမှု၌ ကျူးလွန်ခဲ့သူ တရားခံများနှင့် တောင်ကုတ်တွင် အကြမ်းဖက်အသတ်ခံရသူ ဆယ်ဦးတို့၏ ဆက်စပ်မှုကို လေ့လာကြည့်ပါက ထိုသူတို့သည် ဆွေမျိုးသားချင်းများလည်း မဟုတ်၊ လူမျိုးချင်းတူသူများလည်းမဟုတ်၊ နေထိုင်ရာ အရပ်ဒေသ တူသူများလည်းမဟုတ်ဘဲ ဘာသာရေးအရသာ ဆက်စပ်မှုရှိသည်ကို တွေ့မြင်ရသည်။ တဖန် အကြမ်းဖက် လူမျိုးများဟု ဖယ်ကြဉ်ခံရ၍ အတိဒုက္ခကြီးစွာရောက်နေကြသူများ အထဲတွင် အခြားနိုင်ငံမှ တရားမ၀င် ခိုးဝင်လာသူဆိုသူများအပြင် မြန်မာနိုင်ငံအတွင်းပိုင်းမှ ရခိုင်ဒေသသို့ သွားရောက်အခြေချကြသူများ၊ မိဘ ဘိုးဘွားဘီဘင်လက်ထက်ကတည်းက မြန်မာမြေပေါ်တွင် နေထိုင်ခဲ့ကြသော နိုင်ငံသားစစ်စစ်များ၊ နှစ်ပေါင်းထောင်ချီကတည်းက ရခိုင်မြေပေါ်တွင် အခြေချခဲ့၍ နိုင်ငံတော်အစိုးရအဆက်ဆက်က ရခိုင် မျိုးနွယ်ဝင်အဖြစ် အသိအမှတ်ပြုခဲ့သော၊ ယခုတိုင် အသိအမှတ်ပြုထားသော ကမန်အမျိုးသားများ ပါဝင်နေသည်ကို ကြည့်ခြင်းအားဖြင့်လည်း ဘာသာရေး ခွဲခြားမှုအသွင်ဆောင်နေသည်ကို တွေ့မြင်နိုင်ပေ မည်။

    ကိုအောင်ဇင်လတ်၏ ဆောင်းပါး၌ပင် ဘာသာရေး ပဋိပက္ခမဟုတ်ပါဟု ဆိုသော်လည်း အစ္စလာမ်ဘာသာဝင်၊ မွတ်ဆလင်မ်ဟု အကြိမ်ကြိမ် သုံးစွဲဖော်ပြထား ချက်တို့က ဘာသာရေး အသွင်ယူလိုသည်မှာ ထင်ရှားလှပါသည်။ ထို့ကြောင့်လည်း မြန်မာနိုင်ငံသား အစ္စလာမ် ဘာသာဝင်များက ဘာသာရေးပြဿနာ မဟုတ်ဟု တထစ်ချ မယုံရဲကြခြင်းဖြစ်ပါသည်။

    အဆင့်သုံးဆင့်

    မည်သို့ပင်ဖြစ်စေ၊ ယခုဖြစ်ပေါ်လာခဲ့သော ရခိုင်အရေးကို ဖြေရှင်းပြီး နောက်ထပ် ဤကဲ့သို့ ဖြစ်ရပ် မျိုးထပ်မံမပေါ်ပေါက်အောင် ဆောင်ရွက်ကြရမည်ဖြစ်သည်။ ထိုသို့ဆောင်ရွက်ရာတွင် ကျွန်တော်အနေဖြင့် အဆင့်သုံးဆင့်နှင့် ပြုလုပ်သင့်သည်ဟု ယူဆပါသည်။

    ၁။ အပြစ်ရှိသူ အပြစ်ပေးရေးနှင့် အပြစ်မဲ့သူ ကာကွယ်ရေး

    အထက်က ဖော်ပြခဲ့သလို တရားဥပဒေချိုးဖောက်ပြီး မုဒိမ်းကျင့်လူသတ်၊ အုပ်စုဖွဲ့လူသတ်၊ အပြစ်မဲ့ ပြည်သူတို့၏ အသက်အိုးအိမ်စည်းစိမ်တို့ကို ဖျက်ဆီးသူ၊ အကြမ်းဖက်သမားများကို မည်သည့်လူမျိုး၊ မည်သည့် ဘာသာဝင်၊ မည်သည့်နိုင်ငံသားပင်ဖြစ်ပါစေ ထိရောက်သော အရေးယူမှုများ ပြုလုပ်သင့်ပါသည်။ သို့မှသာ နောက်နောင် ဤကဲ့သို့ အကြမ်းဖက်မှုမျိုး မကျူးလွန်ရဲကြမည်ဖြစ်သည်။ ထို့အတူ အပြစ်မဲ့ အကြမ်းဖက်ခံ လူသားအားလုံးကိုလည်း မည်သည့်လူမျိုး၊ မည်သည့်ဘာသာဝင်၊ မည်သည့်နိုင်ငံသား ပင်ဖြစ်ပါစေ ကာကွယ် စောင့်ရှောက်ပေးရန် လူ့ဂုဏ်သိက္ခာနှင့် အညီ ဆက်ဆံရန် လိုအပ်ပါသည်။ မြန်မာနိုင်ငံသားမဟုတ်သူများကို ပင် ဤအခြေအနေမျိုး၌ လူသားချင်းစာနာစွာ ကာကွယ်စောင့်ရှောက်ပေးပြီး လုံခြုံစိတ်ချဘေးကင်းသော အချိန်ကျမှ နိုင်ငံတကာ မိသားစုများနှင့် တိုင်ပင်၍ အကောင်းဆုံးနည်းလမ်း ရှာဖွေဖြေရှင်းသင့်ပါသည်။

    ၂။ မျှတသော ဥပဒေနှင့် ဥပဒေစိုးမိုးရေး

    လူထုခေါင်းဆောင် ဒေါ်အောင်ဆန်းစုကြည်၏ ရခိုင်အရေးနှင့် ပတ်သက်၍ အကြိမ်ကြိမ်ပြောကြား ခဲ့သော အချက်ပင်ဖြစ်ပါသည်။ မျှတမှုရှိသော နိုင်ငံတကာ စံချိန်စံညွှန်းနှင့် ပြည့်စုံသော ဥပဒေတစ်ရပ်ရှိရန် လိုအပ်ပါသည်။ မျှတမှုမရှိလျှင် အေးချမ်းမှုလည်းရှိမည် မဟုတ်ပါ။ မျှတမှုမရှိသော ဥပဒေကို လက်တွေ့ အကောင်အထည်ဖော်ရန်လည်း ခက်ခဲမည်ဖြစ်၍ ဥပဒေစိုးမိုးရေးလည်း ရှိနိုင်မည်မဟုတ်ပါ။ ထိုသို့ မျှတသော ဥပဒေတစ်ရပ်ပေါ်ပေါက်လာပါက ထိုဥပဒေအသက်ဝင်စိုးမိုးပြီး အကျင့်ပျက်ခြစားမှုများ ပပျောက်အောင် ဆောင်ရွက်ကြရမည်ဖြစ်ပါသည်။

    ၃။ လူမျိုး၊ ဘာသာ၊ နိုင်ငံသား

    လူမျိုး၊ ဘာသာ၊ နိုင်ငံသားဆိုသည့် ပင်ကိုယ်အမှတ်သညာ  (Identity) သုံးခုကို မြန်မာတိုင်းရှင်းရှင်း လင်းလင်းသိမြင့်လက်ခံနိုင်ဖို့ ရေရှည်လုပ်ငန်းစဉ်အဖြစ် ကြိုးပမ်းသင့်ပါသည်။

    လူမျိုးဆိုသည်မှာ လူအစုအဝေးတစ်ရပ်သည် နှစ်ပရိစေ်္ဆဒကြာမြင့်စွာ အတူတကွနေထိုင်ကြပြီးနောက် တူညီသော ဘာသာစကား၊ ယဉ်ကျေးမှု၊ ဓလေ့ထုံးစံတို့ကို လက်ခံထားကြသူများကို ဆိုလိုသည်။ လူမျိုးစု တစ်စုဝင် မိဘနှစ်ပါးမှ မွေးဖွားလာသူတစ်ဦးသည် နှစ်သက်သည်ဖြစ်စေ၊ မနှစ်သက်သည်ဖြစ်စေ ထိုလူမျိုးကို ဆက်ခံရမည်သာဖြစ်သည်။ ဥပမာအားဖြင့် ဗမာလူမျိုး မိဘနှစ်ပါးမှ မွေးဖွားလာသူသည် ဗမာလူမျိုးသာဖြစ် ပေမည်။ ကချင်လူမျိုးဖြစ်ချင်၍လည်းမရ၊ ကိုးရီးယားလူမျိုးဖြစ်ချင်၍လည်းမရပေ။

    ဘာသာတရားဟူသည်မှာ နှလုံးသား၏ ယုံကြည်မှု၊ ဦးနှောက်၏ လက်ခံမှုတို့ဖြင့် ယုံကြည်လက်ခံ ရခြင်းဖြစ်သည်။ မည်သည့်လူမျိုး၊ မည်သည့်နိုင်ငံသား၊ မည်သည့် ဘာသာဝင်မိဘနှစ်ပါးမှ မွေးဖွားလာသည် ဖြစ်စေ ထိုလူသားတစ်ဦးသည် မိမိ၏ ဦးနှောက်နှင့် နှလုံးသားမှ ယုံကြည်လက်ခံသော ဘာသာတရားကို လက်ခံနိုင် သည်။ မိဘနှစ်ပါးယုံကြည်သော မိရိုးဖလာယုံကြည်မှုကို ဆက်လက်လက်ခံယုံကြည်နိုင်သလို နှစ်သက်ရာ ဘာသာတရားတစ်ခုကိုလည်း ပြောင်းလဲယုံကြည်နိုင်ပေသည်။

    နိုင်ငံသားဆိုသည်မှာ – သက်ဆိုင်ရာနိုင်ငံအသီးသီးမှ ပြဋ္ဌာန်းထားသော နိုင်ငံသားဥပဒေနှင့် အညီ သတ်မှတ်ထားသော အရည်အချင်းများနှင့် ပြည့်စုံ၍ နိုင်ငံသားအဖြစ် အသိအမှတ်ပြုခံရပါက ထိုသက်ဆိုင်ရာ နိုင်ငံ၏ နိုင်ငံသားဖြစ်ပေမည်။ နိုင်ငံတစ်ခု၏ နိုင်ငံသားသည် အခြားနိုင်ငံ၏ နိုင်ငံသား အဖြစ်ပြောင်းလဲ ခံယူနိုင်သည်။ ထို့အတူ မည်သည့်လူမျိုး၊ မည်သည့်ဘာသာဝင်မဆို သက်ဆိုင်ရာနိုင်ငံ၏ သတ်မှတ်ပြဋ္ဌာန်း ထားသော အရည်အချင်းများနှင့် ပြည့်စုံပါက ထိုနိုင်ငံ၏ နိုင်ငံသားဖြစ်ပေမည်။ မြန်မာနိုင်ငံ၏ လက်ရှိ တည်ဆဲဥပဒေအရ နိုင်ငံသားဖြစ်ခွင့်၌ ဘာသာရေးသတ်မှတ်ချက်မရှိသဖြင့် မည်သည့် ဘာသာကို သက်ဝင် ယုံကြည်သူမဆို သတ်မှတ်ထားသော အရည်အချင်းနှင့် ပြည့်စုံပါက မြန်မာနိုင်ငံသားအဖြစ် အသိအမှတ် ပြုရမည်ဖြစ်သည်။

    လူမျိုး၊ ဘာသာနှင့် နိုင်ငံသားဟူသော ပင်ကိုယ်အမှတ်သညာ (Identity) သုံးခုကို လူအများစုသည် ရောယှက်၍ ခွဲခြားနိုင်ခြင်းမရှိသည်ကို တွေ့မြင်ရသည်။ “ဗမာမွတ်ဆလင်မ်၊ ဘင်္ဂါလီဗုဒ္ဓဘာသာဝင်၊ ဂျူးခရစ်ယာန်၊ တိဘက်ဘာသာမဲ့” စသည့် အသုံးအနှုန်းများသည် မြန်မာအများစုနား၌ ယုတိ်္တမရှိ၊ ရယ်စရာ စကားများ သဖွယ်ထင်မြင်မှတ်ယူနေကြသည်။ ဧကန်စင်စစ် မည်သည့်လူမျိုးပင်ဖြစ်စေ မိမိနှစ်သက်ရာ ဘာသာတရားကို လက်ခံယုံကြည်ကိုးကွယ်ခွင့်ရှိလေရာ ထိုအခေါ်အဝေါ်ဖြင့် ခေါ်ဆိုနိုင်သော ပုဂိ်္ဂုလ်များ သည် ယခင်ကလဲရှိခဲ့သည်။ ယခုလည်းရှိသည်၊ နောင်တွင်လည်းရှိနေဦးမည်ဖြစ်သည်။ ထို့အတူ ယခုလတ် တလောကြားနေရသော “ပြည်တွင်းနေ အစ္စလာမ်ဘာသာဝင်များ”ဟူသော အသုံးအနှုန်းသည်လည်း ဘာသာရေးနှင့် နိုင်ငံသားဖြစ်ရေးအပေါ်တွင် ရောထွေးကာ ပြဿနာ ပေါ်ပေါက်လာမည်ကို စိုးရိမ်ဖွယ်ရာ ဖြစ်ပေသည်။ လူမျိုးဘာသာနှင့် နိုင်ငံသားကို ခွဲခြားသိမြင်လက်ခံနိုင်မှသာလျှင် မြန်မာနိုင်ငံသားတိုင်း တက်ညီ လက်ညီနိုင်ငံထူထောင်နိုင်မည် ဖြစ်ပေသည်။

    မြန်မာ့မြေမှာနေ၊ မြန်မာ့ရေကိုသောက်၊ မြန်မာနိုင်ငံတော်အပေါ် သစ်္စာစောင့်သိရိုသေကြသည့် လူမျိုးကွဲပြား ဘာသာခြား မြန်မာနိုင်ငံသားအားလုံး “ဒါဒို့ပြည်၊ ဒါဒို့မြေ၊ ဒို့ပိုင်တဲ့မြေ”ဟုသံပြိုင်ဟစ်ကြွေးရင်း ငြိမ်းချမ်းသာယာခေတ်မီဖွံ့ဖြိုးတိုးတက်သည့် ဒီမိုကရေစီနိုင်ငံတော်ကြီး တည်ဆောက်နိုင်မည့်အချိန်ကာလကို မျှော်မှန်းရင်းနိဂုံးချုပ်လိုက်ပါသည်။

    ငြိမ်းချမ်းသာယာမှုအပေါင်း ခညောင်းပါစေ။

    ဒေါက်တာနေလင်းအောင်၏  FB စာမျက်နာမှ ဆောင်းပါးကို ပြန်လည်ကူးယူဖော်ပြပါသည်။

  • တရုတ်အမျိုးသား D T F Wong ရဲ့ အစ္စလာမ့်အေးရိပ်ဆာရာသို့ ခရီး

    တရုတ်အမျိုးသား D T F Wong ရဲ့ အစ္စလာမ့်အေးရိပ်ဆာရာသို့ ခရီး

    ကျနော် “အဗဒူ ဟက်”ပါ။ ကျနော် တရုတ်လူမျိုးဖြစ်ပြီး “ဘရူနိုင်း”နိုင်ငံမှာ မွေးဖွားခဲ့သူပါ။ အမည်ရင်းက “ဝေါင်”ဖြစ်ပြီး နဂိုက မိဘတွေအတိုင်း ခရစ်ယာန်ဘာသာ ကိုးကွယ်ခဲ့ပါတယ်။ အခုအသက် ၃၆-နှစ်ရှိပါပြီ။ ၁၉၇၇-ခုနှစ်မှာ “ဘရူနိုင်း”နိုင်ငံကနေ “အင်္ဂလန်”နိုင်ငံကို ပညာသင်ထွက်ခဲ့ပြီး “အင်္ဂလန်”နိုင်ငံမှာပဲ အခြေချခဲ့ပါတယ်။ ငယ်စဉ်ကတည်းက ခရစ်ယာန်သာသနာပြုကျောင်းမှာ တက်ရောက်ခဲ့ပြီး “အင်္ဂလန်”နိုင်ငံရောက်တော့လည်း ကောလိပ်မတက်ခင် ခရစ်ယာန်အလွတ်တန်းကျောင်းတစ်ခုမှာ ၂-နှစ်တက်ရောက်ခဲ့ပါတယ်။ အသက် ၂၇-နှစ်အထိ ခရစ်ယာန်ဘာသာဝင်အဖြစ်ရှိခဲ့ပြီး အခုတော့ အစ္စလာမ်ဘာသာဝင်ဖြစ်လာတာ ၉-နှစ်တိုင်ခဲ့ပါပြီ။

    အသက် ၂၃-နှစ်လောက်ကစပြီး ဘာသာရေးကိုစိတ်ဝင်စားစပြုလာပြီး ဘုရားသခင်ဆိုတာကို ပိုမိုသိရှိလိုစိတ်တွေ ပေါပေါက်လာပါတယ်။ အိမ်ပြတင်းပေါက်ကနေ အပြင်ကိုကြည့်ပြီး ကောင်းကင်၊ သစ်ပင်၊ လူ စတာတွေကို ကြည့်ရင်း ဖန်ဆင်းခြင်းကိုစိတ်ဝင်စားလာပြီး ဖန်ဆင်းရှင် တည်ရှိကြောင်းအသိ ဖြစ်ပေါ်တိုးပွါးလာပါတယ်။ ကောလိပ်မှာ ဗိသုကာပညာရပ်သင်ကြားတဲ့အခါ အဆောက်အဦးဆိုတာ တစ်စုံတစ်ယောက်က ဒီဇိုင်းဆွဲ၊ ဆောက်လုပ်ရတာဆိုသလို နေ့နဲ့ည ပြောင်းလဲခြင်း၊ ခန္တာကိုယ်ဖြစ်တည်နေမှု စတာတွေဟာ ဖန်ဆင်းရှင်ရှိလို့ဆိုတာကို လေးလေးနက်နက် ယုံကြည်လာခဲ့ပါတယ်။

    “ဘရူနိုင်း”နိုင်ငံမှာ မွေးဖွားကြီးပြင်းခဲ့မယ့် အစ္စလာမ်သာသနာအကြောင်း မလေ့လာဖြစ်၊ မသိရှိဖြစ်ခဲ့ပါဘူး။ “ဘရူနိုင်း”နိုင်ငံမှာ အစ္စလာမ်ဘာသာဝင်မဟုတ်သူများအတွက် အစ္စလာမ်သာသနာ ပညာရေး သင်ခန်းစာ ကင်းလွတ်ခွင့်ရှိပါတယ်။ တစ်နေ့မှာ အစ္စလာမ်ဘာသာရေးရာ စာအုပ်ဆိုင်တစ်ဆိုင်အနား ဖြတ်လျှောက်အသွား ဘာရယ်မဟုတ် ဝင်ကြည့်ဖို့ ဆုံးဖြတ်ခဲ့ပါတယ်။ အဲဒီမှာ “ကုရ်အာန်ကျမ်းမြတ်”ကို တွေ့ရှိပြီး ဝယ်ယူဖို့ ဆုံးဖြတ်ချက်ချလိုက်ပါတယ်။ “ကုရ်အာန်ကျမ်းမြတ်”ရဲ့ ညွှန်ကြားပြသမှုတွေ၊ သင်ကြားရှင်းလင်းမှုတွေက အချိန်အတော်ကြာ ကျနော် ခံစားယုံကြည်နေတဲ့ ဖန်ဆင်းရှင်အသိ မှန်ကန်ကြောင်းအပြင် ခရစ်ယာန်ဘာသာရဲ့ယုံကြည်မှုနဲ့ သမ္မာကျမ်းစာတို့ကို ထပ်လောင်းလင်းဝင်းပြမှုတွေကို ပထမဆုံးအကြိမ် သိရှိလိုက်ရပါတော့တယ်။

    ဒီလိုနဲ့ ရှာဖွေလေ့လာဖတ်ရှုရင်း တဖြည်းဖြည်း  အစ္စလာမ်သာသနာဘောင်တွင်း ဝင်ရောက်ဖို့ ဆုံးဖြတ်လိုက်ပါတယ်။  အစ္စလာမ်သာသနာဟာ အလွန်ရိုးရှင်းပြီး သန့်စင်တဲ့ သာသနာပါ။ မိဘတွေကိုဖွင့်ပြောလိုက်တဲ့အခါ အမေက သူ့ရဲ့ အကိုတော်တဲ့ ခရစ်ယာန်ဘုန်းကြီးနှစ်ယောက်ကို ဆက်သွယ်ပြီး ခရစ်ယာန်ဘာသာ မှန်ကန်ကြောင်း ဟောပြောပြန်ဆွယ်ပါတယ်။ သို့သော်လည်း ကျနော့်ကို သူတို့ပြန်ဆွယ်လို့မရခဲ့ပါဘူး အစ္စလာမ်သာသနာရဲ့ အဆုံးအမတွေ ဆက်လက်လေ့လာဖတ်ရှုရင်း ကျနော့်ယုံကြည်ချက်က ပိုမိုခိုင်မာလာပါတယ်။

    ဒီနေ့လို လူတွေတီထွင်တဲ့ ဥပဒေသတွေ၊ မတရားမှုတွေနဲ့ လွှမ်းမိုးနေတဲ့ ခေတ်ကြီးမှာ ဖန်ဆင်းရှင်ရဲ့ သင်ကြားမှုဆီ ပြန်လှည့်ဖို့ရာ အချိန်တန်ပါပြီ။ ကျနော် မှန်ကန်တဲ့ ဆုံးဖြတ်ချက်ကို ချခဲ့တယ်ဆိုတာ ကျနော် အသိဆုံးပါ။

    လင်းယုန်နက် (ခြင်္သေ့မြို့တော်)

    ကိုးကား

    http://wechooseislam.wordpress.com/2010/03/27/guidance-to-the-truth-by-abdulhaqq-dtf-wong-china/, http://islam100.wordpress.com/2009/01/24/guidance-to-the-truth-by-abdulhaqq-dtf-wong-china/