Author: M-Media

ဇွန် ၆ ၊ ၂၀၁၄
M-Media
.ဝေယံ

ဇနီးဖြစ်သူမှ ဒေါ်အောင်ဆန်းစုကြည်အား ပုဂ္ဂိုလ်ရေးအရ တိုက်ခိုက်သည့် ဓါတ်ပုံ Share ခဲ့မှု ဦးရဲထွဋ်တောင်းပန်၊ 

အမျိုးသားဒီမိုကရေ အဖွဲ့ချူပ် ဥက္ကဌ နှင့် ပြည်သူလွှတ်တော်အမတ် တစ်ဦးဖြစ်သူ ဒေါ်အောင်ဆန်းစုကြည်အား ပုဂ္ဂိုလ်ရေးအရ စော်ကား တိုက်ခိုက်ထားသည့် ဓါတ်ပုံပါ ပိုစ်တခုကို ပြန်ကြားရေး ဒုဝန်ကြီး နှင့် နိုင်ငံတော်သမ္မတရဲ့ တဦးတည်းသော ပြောေ၇း ဆိုခွင့်ရှိ ပုဂ္ဂိုလ် ဦးရဲထွဋ်၏ ဇနီးဖြစ်သူ ဒေါ်ခင်စန္ဒာထွန်းမှ ၄င်း၏ Facebook စာမျက်နှာမှာ ထပ်ဆင့်မျှဝေခဲ့ပါတယ်။

အဆိုပါ လုပ်ရပ်အပေါ် ဒေါ်အောင်ဆန်းစုကြည်ကို ချစ်ခင်ထောက်ခံသူများ အကြား ဝေဖန်ပြစ်တင်မှုတွေ ကျယ်လောင်စွာ ထွက်ပေါ်ခဲ့ပြီးနောက် ဒေါ်ခင်စန္ဒာထွန်းမှ ၄င်း Facebook စာမျက်နှာကို ပိတ်ထားခဲ့ကြောင်းတွေ့ရပါတယ်။

အဆိုပါဖြစ်ရပ်နဲ့ ပတ်သက်ပြီး ယနေ့ ဇွန်လ ၆ ရက်နေ့တွင် ဒုဝန်ကြီး ဦးရဲထွဋ်မှ ၄င်း၏ ကိုယ်ပိုင် Facebook စာမျက်နှာထပ်မှာ တရားဝင်တောင်းပန်လိုက်ပါတယ်။

တောင်းပန်စာတွင် ၄င်းရဲ့ ဇနီးဖြစ်သူ လုပ်ရပ်ကို ဝန်ခံခဲ့ပြီး အဆိုပါလုပ်ရပ်ဟာ သူလက်ခံထားတဲ့ ဆိုရှယ်မီဒီယာ အသုံးပြုသူများ လိုက်နာရမယ့် ပုဂ္ဂိုလ်ရေးတိုက်ခုိုက်မှု၊ အမုန်းတရားပွားစေတဲ့ ပြောကြားချက်တွေ မဖြစ်ရဘူးဆိုတဲ့ ကျင့်ဝတ်နဲ့ လွဲချော်နေကြောင်း ဝန်ခံခဲ့တာကိုတွေ့ရပါတယ်။

ဒါအပြင် သူဇနီးရဲ့ လုပ်ဆောင်ချက်ဟာ ဒီမိုကရေတစ်စံနှုန်းတွေနဲ့ပါ လွဲချော်နေတဲ့အတွက် ချက်ခြင်း ဖျက်ခိုင်းခဲ့ကြောင်းကို ထည့်သွင်းရေးသားထားပါတယ်။

ဦးရဲထွဋ်မှ အများလိုက်နာတဲ့ စံနှုန်းတွေကို သူမိသားစုအပေါ်ကို အိမ်ထောင်ဦးစီး တယောက် အနေနဲ့  ကျေပွန်အောင် ဆောင်ရွက်နိုင်ခဲ့ခြင်းမရှိကြောင်း ဝန်ခံပြောကြားခဲ့ပြီး ဒေါ်အောင်ဆန်းစုကြည်ကို ချစ်မြတ်နိုး ထောက်ခံသူများနဲ့ သူရဲ့ စာဖတ်ပရိတ်သတ်ကို တောင်းပန်ကြောင်း ရေးသားထားတာကို တွေ့ရပါတယ်။

အလားတူ ဒေါ်ခင်စန္ဒာထွန်းမှာ ပြည်တွင်းမှ အစ္စလာမ်ဘာသာဝင်များနှင့်ပတ်သက်ပြီး အမုန်းပွားစေမည့် ပိုစ်များကိုလဲ ထပ်ဆင့်မျှဝေခဲ့တာကို တွေ့ရရှိရပါတယ်။

တည်ဆဲ အီလက်ထရေနစ် ဆက်သွယ်ဆောင်ရွက်ရေးဥပဒေ ပုဒ်မ ၃၄ တွင် အဖွဲအစည်းတခုခု (သို့) ပုဂ္ဂိုလ်တစ်ဦးဦးကို ထိခိုက်နစ်နာစေရန် ဖြစ်စေ ၊ ဂုဏ်သိက္ခာ ကျဆင်းစေရန်ဖြစ်စေ၊ သတင်းအချက်အလက်ကို အီလက်ထရောတစ်နည်းပညာဖြင့် ပြုလုပ်ခြင်း၊ ပြုပြင်ခြင်း (သို့) ပြောင်းလဲခြင်း၊ ထိုသို့ ပြုလုပ်ထားမှုများကို ဖြန်ချိခြင်းများ ပြုလုပ်ပါက အရေးယူခြင်းခံရမည်ဟု ပြဌာန်းထားပါတယ်။