ဇွန် ၁၄၊ ၂၀၂၂

M-Media 

-မြန်မာနိုင်ငံက မတည်ငြိမ်မှုတွေဟာ စစ်တပ်က အာဏာသိမ်းပြီးတဲ့နောက်ပိုင်း ပိုဆိုးရွားလာသလို ဘက်ပေါင်းစုံမှာလည်း နိမ့်ကျဆုတ်ယုတ်လာတယ်လို့ မြန်မာနိုင်ငံဆိုင်ရာ ကုလအထူးကိုယ်စားလှယ် နိုလင်း ဟေဇာက ပြောကြားလိုက်ပါတယ်။ 

တိုင်းရင်းသားဒေသတွေမှာ စစ်တပ်ရဲ့  တိုက်ခိုက်မှုတွေကြောင့် ဖြစ်လာတဲ့ ဒုက္ခသည်ပြဿနာဟာ လွတ်လပ်ရေးရပြီးကတည်းက ရှိလာတာဖြစ်ပြီး ရခိုင်ပြည်နယ်မြောက်ပိုင်းက ရိုဟင်ဂျာ ပြဿနာကို ပြီးခဲ့တဲ့နှစ်တွေအတွင်း ကမ္ဘာတစ်၀ှမ်းက အထူးအာရုံစိုက်ခဲ့ကြပါတယ်။

အာဏာသိမ်းမှုကို ဆန့်ကျင်တဲ့ လက်နက်ကိုင်တော်လှန်မှုကို စစ်တပ်က တုန့်ပြန်ရာမှာလည်း ပြည်သူအများအပြား အိုးအိမ်စွန့်ခွာ ထွက်ပြေးခဲ့ရပြီး ဒုက္ခသည်ပြဿနာဟာ ပိုမိုဆိုးရွားခဲ့ပါတယ်။ 

လူမှုရေး၊ ကျန်းမာရေး၊ စီးပွားရေး၊ ဘဏ်လုပ်ငန်း အပါအ၀င် နိုင်ငံရဲ့ အခြေခံ အသင်းအဖွဲ့တွေ၊ အဆောက်အဦးတွေ ပြိုလဲပျက်ဆီးလုနီးနီးဖြစ်လာခဲ့ပြီး အလုပ်လက်မဲ့နှုန်းများလာသလို ရာဇ၀တ်မှုတွေလည်း ထူပြောလာပါတယ်။

ပြီးခဲ့တဲ့ ၅ နှစ်အတွင်း ဆင်းရဲမွဲတေမှု ၂ ဆက်တက်လာကာ စုစုပေါင်းလူဦးရေရဲ့ ထက်၀က်နီးနီး ရှိလာပါတယ်။ 

“စုစုပေါင်းလူဦးရေရဲ့  ၄ ပုံ ၁ ပုံဖြစ်တဲ့ ၁၄.၄ သန်းလောက် လူသားချင်း စာနာထောက်ထားမှုဆိုင်ရာ အကူအညီတွေ ချက်ခြင်း လိုအပ်နေပါတယ်” လို့ မြန်မာနိုင်ငံဆိုင်ရာ ကုလအထူးကိုယ်စားလှယ် နိုလင်း ဟေဇာက ပြောပါတယ်။ 

ကျောင်းမတက်ရတဲ့ ကလေးငယ်အရေအတွက်က ၂ နှစ်အတွင်း ၈၀ ရာခိုင်နှုန်းအထိ မြင့်တက်လာပြီး ၇.၈ သန်း ရှိလာပါတယ်။

ဒီမိုကရေစီအသွင်ကူးပြောင်းမှုမှာ ဟန်ကျခဲ့တဲ့ မျိုးဆက်တွေဟာ လက်ရှိမှာတော့ အနာဂတ်၀ေ၀ါးပြီး ဘ၀ရပ်တည်ရေး ဆိုးရွားခက်ခဲလာတာကြောင့် လက်နက်ကိုင်တာကလွဲရင် တစ်ခြား ရွေးစရာ မရှိတော့ဘူးလို့ ထင်လာကြကြောင်း ကုလအထူးကိုယ်စားလှယ်က ထည့်သွင်းပြောဆိုခဲ့ပါတယ်။ 

လက်နက်ကိုင်တော်လှန်ရေးကို ဖြိုခွင်းရာမှာ စစ်တပ်က အရပ်သားတွေကို ပစ်မှတ်ထား တိုက်ခိုက်တာမျိုး ရှိနေပြီး အကြမ်းဖက်မှုတွေ ကျူးလွန်မှုတွေဟာ မြန်မာနိုင်ငံမှာ သမရိုးကျဖြစ်စဥ်တွေ ဖြစ်လာတာကိုလည်း ဟေဇာက ထောက်ပြပါတယ်။ 

မြန်မာအရေး ဖြေရှင်းပေးနိုင်ဖို့အတွက် အာဆီယံအဖွဲ့နဲ့ အနီးကပ် ဆက်သွယ်ဆောင်ရွက်နေတယ်လို့ ကုလအထူးကိုယ်စားလှယ်က ပြောပါတယ်။ 

ဒါပေမယ့် ဒေသတွင်း၊ နိုင်ငံတကာနဲ့ ကုလသမဂ္ဂ အဖွဲ့အစည်းအတွင်းမှာ မြန်မာ့အရေးကို အမြင်မတူကြတာကြောင့် မြန်မာြပည်သူတွေဟာ အစွန်ပစ်ခံအဖြစ် စိတ်အားငယ်နေကြကြောင်း နိုလင်း ဟေဇာက ထည့်သွင်း သတိပေးခဲ့ပါတယ်။

Ref: UN News 

ဇွန် ၁၂၊ ၂၀၂၂
M-Media

-စစ်ကောင်စီက လာမယ့်နှစ်မှာလုပ်ဖို့ စီစဉ်ထားတဲ့ ရွေးကောက်ပွဲဟာ လွတ်လပ်ပြီး၊ တရားမျှတဲ့ ရွေးကောက်ပွဲမျိုး ဖြစ်လာမှာ မဟုတ်ဘူးလို့ အမေရိကန်အစိုးရ အကြံပေး ဒဲရစ်ခိုလက်က ပြောကြားလိုက်ပါတယ်။

၂၀၂၁ ဖေဖော်ဝါရီ ၁ ရက်နေ့က အာဏာသိမ်းခဲ့တဲ့ စစ်တပ်ဟာ တစ်နှစ်အတွင်း ရွေးကောက်ပွဲလုပ်ပေးမယ်လို့ အဲဒီတုန်းက ကတိပေးခဲ့တာပါ။ ဒါပေမယ့် နောက်ပိုင်းမှာ တိုင်းပြည်မတည်ငြိမ်တာကိုအကြောင်းပြကာ ရွှေ့ဆိုင်းခဲ့ပြီး ၂၀၂၃ ခုနှစ် ဩဂုတ်လမှာ ရွေးကောက်ပွဲလုပ်မယ်လို့ နောက်ဆုံး ထုတ်ပြန်ထားပါတယ်။

ဒဲရစ်ခိုလက်က စစ်ကောင်စီရဲ့ ဒီအစီအစဉ်ဟာ ဒေသတွင်းနဲ့ နိုင်ငံတကာအသိုင်းအဝိုင်းကို လှည့်စားဖို့ဖြစ်တယ်လို့ စင်ကာပူမှာ မနေ့ကလုပ်တဲ့ ဆွေးနွေးပွဲတစ်ခုမှာ ပြောကြားခဲ့ပါတယ်။

“လွတ်လပ်ပြီး၊ တရားမျှတတဲ့ ရွေးကောက်ပွဲမျိုးဖြစ်လာဖို့ အလားအလာမရှိဘူးလို့ ကျွန်တော်ထင်ပါတယ်။ ဒေသတွင်းနဲ့ နိုင်ငံတကာကို လှည့်စားဖို့ ကြိုးပမ်းမှုသာ ဖြစ်ပါလိမ့်မယ်”

စစ်အာဏာသိမ်းမှုဆန့်ကျင်တဲ့ ပြည်သူလူထုရဲ့လှုပ်ရှားမှုတွေကို စစ်ကောင်စီက အကြမ်းပတမ်း တုန့်ပြန်ရာမှာ အခုအချိန်အထိ လူ ၂ ထောင်ကျော်သေဆုံးခဲ့ပြီး ထောင်သောင်းချီ ဖမ်းဆီးခံထားရပါတယ်။ လက်နက်ကိုင်တော်လှန်ရေး အားကောင်းတဲ့ ဒေသတွေမှာ စစ်တပ်က ရွာလုံးကျွတ် မီးရှို့ဖျက်ဆီးမှုတွေလည်း နေ့စဉ်ရက်ဆက် ဖြစ်နေပါတယ်။

မြန်မာနိုင်ငံဆိုင်ရာ ကုလအထူးကိုယ်စားလှယ် နိုလင်းဟေဇာက စစ်တပ်ကလုပ်ဖို့ စီစဉ်ထားတဲ့ တရားမဝင် ရွေးကောက်ပွဲဟာ ပြည်သူ့ဆန္ဒကို အလေးထားပြီး၊ အရပ်သားအုပ်ချုပ်ရေးကို ပြန်သွားမယ့် ရွေးကောက်ပွဲမျိုး မဟုတ်ဘူးလို့ ပြည်သူလူထုက ‌ယူဆရင် တိုင်းပြည်မှာ မတည်ငြိမ်မှုကိုသာ ထပ်ဖြစ်စေလိမ့်မယ်လို့ သုံးသပ်ပါတယ်။

Ref: AFP