သြဂုတ် ၁၉၊ ၂၀၁၅
M-Medai
– တိုင်းရင်းသား လူမျိုးစုများ၏ အခွင့်အရေးအတွက် ဦးဆောင်ဦးရွက်ပြုပေးနေပြီး၊ ပရဟိလုပ်ငန်းများကို လုပ်ဆောင်နေသည့် ဖိလစ်ပိုင် မွတ်စလင် တော်ဝင်မင်းသမီးတစ်ဦးမှာ ပရဟိတလုပ်ငန်းများကို လုပ်ဆောင်နေသော ကမ္ဘာတစ်ဝှမ်းရှိ အိမ်ထောင်ရှိအမျိုးသမီးများ ပါဝင်ယှဉ်ပြိုင်ရသည့် Mrs. Universe ပြိုင်ပွဲကို ၀င်ရောက်ယှဉ်ပြိုင်မည်ဟု သိရသည်။
အဆိုပါတော်ဝင်မင်းသမီးမှာ အသက် ၄၅ နှစ်အရွယ်ရှိပြီဖြစ်သည့် ဂျေး အိန်ဂျလီက် ဂျာဖာရ် ၀မ် ဖြစ်ပြီး အယ်လီဟုလည်း အမည်တွင်သည်။ သူမမှာ လက်ရှိတွင် Mrs.Southeast Asia ဘွဲ့ကို ဆွတ်ခူးထားသူဖြစ်သည်။ Mrs.Southeast Asia ဘွဲ့မှာ အမျိုးသမီးများ၊ ကလေးသူငယ်များ အကြမ်းဖက်ခံရမှုနှင့်ပတ်သက်၍ လှုပ်ရှားဆောင်ရွက်သော အိမ်ထောင်ရှိအမျိုးသမီးများကို ပေးအပ်ချီးမြှင့်သည့် ဆုလည်းဖြစ်သည်။
အယ်လီမှာ ဖီလစ်ပိုင်နိုင်ငံအတွင်း တိုင်းရင်းသားများ၏အရေးနှင့် ၎င်းတို့၏ ဘိုးဘွားပိုင်မြေများ ခေါင်းပုံဖြတ် သိမ်းယူခံရမှုများအတွက် ရင်ဆိုင်ဆောင်ရွက်ပေးနေသူလည်း ဖြစ်သည်။
“ပြဿနာက ဘက်ဂျက်မရှိတဲ့အတွက်ကြောင့် အစိုးရဟာ ဒီမြေတွေကို ဖွံ့ဖြိုးအောင် မလုပ်နိုင်တာပါပဲ။ တိုင်းရင်းသားတွေနဲ့ သဘာဝပတ်ဝန်းကျင်ကို ကာကွယ်ပေးဖို့ တိုင်းရင်းသားပြည်သူများ အခွင့်အရေး အက်ဥပဒေကို ပြဌာန်းပေးထားပါတယ်။ ကျွန်မရဲ့ သဘောထားကတော့ သဘာဝသယံဇာတ အခြေပြု စီးပွားရေးကို ဖန်တီးဖို့ဖြစ်ပြီး သူတို့(တိုင်းရင်းသားတွေ)ရဲ့မြေပေါ်မှာ စက်မှုဇုန်တွေ၊ စီးပွားရေးဇုန်တွေ၊ ကျောင်းတွေနဲ့ လယ်ယာစိုက်ပျိုးရေးနေရာတွေ ပါဝင်တဲ့ မြေတွေဖြစ်ဖို့အတွက် မာစတာပလန်တစ်ခု ရှိဖို့ပါပဲ” ဟု အယ်လီက ခေါင်းပုံဖြတ်ခံနေရသည့် တိုင်းရင်းသားများ၏ မြေယာများနှင့်ပတ်သက်၍ Inquirer.net သို့ ယမန်နေ့တွင် ပြောကြားခဲ့သည်။
ဖိလစ်ပိုင်လူမျိုးစုတစ်ခုဖြစ်သော သောင်ဆဂ် (Tausugs) မျိုးနွယ်မှ တော်ဝင်မင်းသမီးဖြစ်သည့် သူမကို တစ်ကမ္ဘာလုံးမှ ပရဟိတလုပ်ငန်းများနှင့် လူအခွင့်အရေးလုပ်ငန်းများ လုပ်ဆောင်သည့် အမျိုးသမီးများ ယှဉ်ပြိုင်ရသော Mrs. Universe ပြိုင်ပွဲတွင် ၀င်ရောက်ယှဉ်ပြိုင်ရန် MegaStar Productions မှ ရွေးချယ်ခဲ့ခြင်းဖြစ်သည်။
အယ်လီမှာ လွန်ခဲ့သည့် လေးနှစ်က သူမ၏ ဦးလေးဖြစ်သူ ဂျိုးဆက်ပ် ဆီဘဂ်၏ နေရာကို ဆက်ခံခဲ့သူဖြစ်ပြီး ဖိလစ်ပိုင်ရှိ တိုင်းရင်းသားမျိုးနွယ်စုများ စုပေါင်းထားသည့်အဖွဲ့ဖြစ်သော Philippine Organization of United Tribal Initiatives Inc တွင်လည်း ဥက္ကဌအဖြစ် ရွေးကောက်တင်မြှောက်ခြင်း ခံခဲ့ရသည်။
အသိပညာပေးရေး
အယ်လီမှာ ဖိလစ်ပိုင် တိုင်းရင်းသားပြည်သူများထံသို့ နေ့စဉ်သွားရောက်က ပညာရေး၊ ဆေးဘက်ဆိုင်ရာနှင့် အဟာရဆိုင်ရာ ကိစ္စများ အပါအ၀င် ၎င်းတို့မျိုးနွယ်များ ကြုံတွေ့နေရသည့် ပြဿနာများနှင့်ပတ်သက်၍ ဆွေးနွေးအဖြေရှာလေ့ရှိသူဖြစ်သည်။
“ပိုက်ဆံပေးလိုက်တာနဲ့ ပြဿနာကို ဖြေရှင်းလို့ မရပါဘူး။ သူတို့ရဲ့ ဂုဏ်သိက္ခာတွေ မြှင့်တင်ဖို့နဲ့ ဒုက္ခသုက္ခတွေကနေ တိုးတက်လာဖို့အတွက် ပညာရေးက လိုအပ်ပါတယ်” ဟု အယ်လီက ပြောကြားခဲ့သည်။
တော်ဝင်မျိုးနွယ်မှ ဆင်းသက်လာသော်လည်း အစ္စလာမ်ဘာသာဝင်တစ်ဦးဖြစ်သူ အယ်လီမှာ အဘွား၊ မုဆိုးမဖြစ်နေသော အဒေါ်များ၊ ဖတဆိုးဖြစ်နေသာ ၀မ်းကွဲများနှင့် ရိုးသားနှိမ့်ချစွာ ကြီးပြင်းလာခဲ့သူဖြစ်သည်။
၎င်းတို့မိသားစုများထဲမှ အမျိုးသားများမှာ လူမျိုးစုတိုက်ခိုက်သူများ၏ သားကောင်များ ဖြစ်ခဲ့ရပြီး အယ်လီ၏ ဖခင်ဖြစ်သူ အမီရ် ဘာဟာရ် ဟာဂျီ ဂျာဖာရ်မှာလည်း ၎င်းတို့ထဲမှ တစ်ဦး ဖြစ်ခဲ့ရသည်။
“ကျွန်မရဲ့အဖေကို “ဇမ်ဘိုအမ်ဂါဒေသက ရမ်ဘို” လို့ လူသိများပါတယ်။ အဖေက စီးပွားရေးသမားတွေ ပြန်ပေးဆွဲခံရမှု၊ ငွေညှစ်ခံရမှုတွေကို ကာကွယ်ပေးခဲ့သူပါပဲ”
အယ်လီမှာ Dr. Carlos Lanting ကောလိပ်မှ သူနာပြုဘာသာရပ်ဖြင့်လည်းကောင်း၊ La Consolacion ကောလိပ်မှ ခရီးသွားဘာသာရပ်ဖြင့်လည်းကောင်း ဘွဲ့နှစ်ဘွဲ့ရထားသူဖြစ်သည်။ သူမတွင် တိုနီ ဂျာဖာရ် ဟီပိုလီတိုဟု အမည်ရသည့် သမီးတစ်ဦးရှိပြီး ၎င်းမှာလည်း Miss Globe International 2015 ဘွဲ့ကို ရရှိထားသည်။
Ref: Onislam
