စက်တင်ဘာ၊ ၈ ရက်၊ ၂၀၁၃
M-Media
အစ္စလမ္မဘာဒ်။ ။ ပါကစ္စတန်မှ မွတ်စ်လင်မ်ကျောင်းသား တစ်ဦးသည် ကျောင်းစာမေးပွဲ ၄၇ ခုအား grade A (၀ါ) A* အဆင့်ဖြင့် အောင်မြင်ခဲ့သောကြောင့် ပါကစ္စတန်နိုင်ငံ၏ အထူးချွန်ဆုံးကျောင်းသားအဖြစ် အသိအမှတ်ပြုခံခဲ့ရသည်။
“ လူအများက ၃ နှစ်လောက်အချိန်ပေးရတဲ့ O-levels ကို ကျွန်တော်က တစ်နှစ်ထဲနဲ့ အောင်မြင်အောင် ဖြေဆိုခဲ့ပါတယ်။
အဲ့ဒီလို ပြီးမြောက်အောင်မြင်ခဲ့တဲ့ အတွက် ကျွန်တော့်ဆီမှာ စာသင်နှစ် ၂ နှစ်စာ အချိန်ပို ကျန်ရှိနေခဲ့တယ်။ အဲံဒီ ၂ နှစ်အတွင်း အများနဲ့မတူတစ်မူ ထူးခြားတဲ့ တစ်စုံတစ်ရာကို လုပ်ဆောင်ဖို့ စဉ်းစားနေပါတယ်။
အခြားသောကျောင်းသားများထက် ပိုမိုသာလွန်လိုတဲ့ အတွက် ဘာသာရပ် အမြောက်အများကို ရယူဖြေဆိုခဲ့ခြင်းဖြစ်ပါတယ် ” ဟု BBC သို့ စက်တင်ဘာလ ၄ ရက်၊ ဗုဒ္ဓဟူးနေ့တွင် ဟာရွန်း တာရစ်ခ်(Haroon Tariq) က ပြောကြားခဲ့ပါသည်။
ပါကစ္စတန်၊ ခိုင်ဘာ ပါခ်တွန်ခုဝါ (Khyber Pakhtunkhuwa) ပြည်နယ်မှလာရောက်ခဲ့သူ အသက် ၁၈ နှစ်အရွယ် ကျောင်းသား ဟာရွန်း၏ စိတ်ဝင်စားဖွယ် ဇာတ်လမ်းသည် လွန်ခဲ့သော ၃ နှစ်ခန့် ၂၀၁၀ ခုနှစ်တွင် သူ့ဇာတိပြည်နယ်တွင်း ပက်ရှဝါ(Peshawar) စစ်သင်တန်းကျောင်းတက်စဉ် ပထမဆုံးဖြေဆိုသည့် စာမေးပွဲမှ စတင်ခဲ့သည်။
သူ့ဖခင်၏စစ်တပ်ရေးရာတာဝန်အရ အစ္စလာမ္မဘာဒ်သို့ပြောင်းရွှေ့လာသောအခါ၊ Froebels International School သို့ဝင်ရောက်ပြီးသည့်နောက် ဟာရွန်းသည် O-levels နှင့် GCSEs များကို ဖိဖိစီးစီး လုပ်ဆောင်ခဲ့သည်။
သုံးနှစ်တာကာလအတွင်း ဟာရွန်းသည် O-level နှင့် A-level ရှိ ဘာသာရပ် ၅၀ ကျော်ကို လေ့လာခဲ့ပြီး၊ O-level တွင် A အဆင့် ၃၈ ခု၊ O-level နှင့် A-level စာမေးပွဲနှစ်ရပ်ပေါင်းတွင် စုစုပေါင်း A အဆင့် ၄၇ ခုရရှိခဲ့ပါသည်။
ထိုစာမေးပွဲများမှာ သီးခြားစာစစ်ဌာနနှစ်ခုဖြစ်သော Cambridge International Examinations နှင့် Edexcel တို့မှ ကိုင်တွယ်ကြပ်မတ်ခဲ့ခြင်းဖြစ်သည်။
လက်ရှိ O-level မှတ်တမ်းသစ်သည် ယခင်ကမ္ဘာ့မှတ်တမ်းဝင် A အဆင့် ၂၈ ခု စာရင်းအား ရိုက်ချိုးကျော်ဖြတ်သွားပြီဖြစ်သည်။
သူလေ့လာခဲ့သည်များ၌ လူသားနှင့် လူမှုဇီဝ၊၊ အစ္စလာမ်ဘာသာရေး နှင့် ယဉ်ကျေးမှု၊ ရူပဗေဒ၊ ဓာတုဗေဒ နှင့် ကမ္ဘာ့ဖွံဖြိုးရေး အပါအ၀င် လူသားဆိုင်ရာ၊ သိပ္ပံဆိုင်ရာဘာသာရပ်များ ဖြစ်ကြသည်။
“ ၂၀ ရာစုနှစ်ခေတ်၊ ကမ္ဘာ့စစ်ပွဲတွေ၊ စစ်အေးကာလ၊ လွန်ခဲ့တဲ့ နှစ်ပေါင်း လေးငါးရာတုန်းက အဖြစ်အပျက်တွေဟာ အလွန်ကို စိတ်ဝင်စားစရာကောင်းပါတယ် ” ဟု ဟာရွန်းက ဆိုသည်။ လက်ရှိကျောင်းက သူ့အား ကျောင်းလခထောက်ပံ့နေသလို စကောလားရှစ်ပ်လည်း ရရှိမည်ဖြစ်ကြောင်းသိရသည်။
၁၉၈၀ ခုနှစ်မှစတင်ကာ GCSE O-level သည် ဗြိတိန်တွင် မှေးမှိန်သွားခဲ့သော်လည်း၊ ပါကစ္စတန်အပါအ၀င် နိုင်ငံတကာရှိ သန်းပေါင်း များစွာသောကျောင်းသားများက ဖြေဆိုနေရဆဲ စာမေးပွဲပင်တစ်ခုဖြစ်သည်။
စံပြစာရင်းဝင်
ဟာရွန်း၏စံချိန်သစ်သည် ပါကစ္စတန်နိုင်ငံအား ကမ္ဘာနိုင်ငံများအလယ် ဂုဏ်တက်စေခဲ့၍ သူ့ကျောင်းမှဆရာများအတွက်လည်း ဂုဏ်ယူစရာဖြစ်စေခဲ့ပါ၏။
“ အနာဂတ်ပါကစ္စတန်နိုင်ငံအတွက် အရည်အချင်းရှိလူငယ်တစ်ဦးအဖြစ် ယခုလို အရေးပါတဲ့အခန်းကဏ္ဍက ပါဝင် ပုံဖော်ပေးနိုင်ခြင်းဟာ အလွန်ကိုဂုဏ်သိက္ခာရှိတယ်လို့ ခံစားရပါတယ် ” ဟု ကျောင်းအုပ်ကြီး ရှမီနာ ကာမလ်(Shahmina Kamal) မှ News Tribe သို့ ပြောကြားခဲ့ပါသည်။
“ အောင်မြင်မှုဆိုတာ စိတ်အားထက်သန်မှုမှရရှိခဲ့ခြင်းဖြစ်တယ်လို့ ကျွန်မက ကျောင်းသားတွေကို အမြဲ ပြောလေ့ရှိပါတယ်။ သူတို့ဟာ ကိုယ်လုပ်နိုင်မယ်လို့ထင်ထားတာထက် ပိုပြီးလုပ်နိုင်တယ်ဆိုတဲ့ အသိတရားနဲ့အတူ မိမိကိုယ်ကို ယုံကြည်ချက်ရှိဖို့ လိုအပ်ပါတယ် ” ဟု စာစစ်ဌာနမှူး စာဟာ ပိရ်ဇဒါ(Sahar Pirzada) ကလည်း News Tribe သို့ ပြောပြခဲ့သည်။
“ ယခုလို ပညာရေးဆိုင်ရာ ကမ္ဘာသိမှတ်တမ်းဝင် ထူးချွန်ကျာင်းသားများကို မွေးထုတ်ပေးနိုင်တဲ့အတွက် ကျွန်တော်တို့အဖို့ ပြည့်ပြည့်၀၀ကျေနပ်သွားပါပြီ ” ဟု ကျောင်းအုပ် က ဆိုသည်။
ရှမီနာကာမလ်က ဟာရွန်းနှင့်အခြားကိုယ်ပိုင်လေ့လာရေးကျောင်းသားများအတွက် ကျောင်းတော်မှ မည်ကဲ့သို့ ထိန်းကျောင်းကူညီခဲ့သည့်အကြောင်းကို ရှင်းလင်းဆွေးနွေးသွားခဲ့သည်။
“ ကျောင်းသားတိုင်းက သူတို့အားထုတ်မှုအလျောက် ထိုက်တန်ရာ ခံစားရတာလို့ မြင်ပါတယ်။ မျှော်လင့်ချက်ထားရှိတဲ့ ကျောင်းသားတိုင်းအတွက် ကျွန်မတို့က ပံပိုးကူညီဖို့အဆင်သင့်ပါ။ ကျွန်မမှာ သူ့အပြင် အခြားကျောင်းသားများလည်း ရှိပါတယ်။ ကျွန်မကိုယ်တိုင်ရော အခြားဆရာ၊ ဆရာမတွေပါ ၀ိုင်းဝန်းကူညီပံပိုးနေကြတဲ့ ကျောင်းသားတွေပေါ့။ အကူအညီလိုအပ်တဲ့ မည်သည့်ကျောင်းသားကိုမဆို သူတို့အတွက် ကျွန်မတို့ကျောင်းတော်က လမ်းကြောင်းဖော်ပေးစမြဲပါဘဲရှင် ” ဟု ရှမီနာက ဆိုသည်။
ကမ္ဘာ့စံချိန်ချိုးနိုင်ခဲ့ပြီးနောက်တွင် ဟာရွန်းသည် အင်ဂျင်နီယာဘာသာရပ်အားသင်ယူရန် ဗြိတိန်တက္ကသိုလ် သို့တက်ရောက်မည်ဟု စိတ်ကူးရည်မှန်းထား၏။
“ လာမည့်အနာဂတ်မှာ အင်ဂျင်နီယာပညာကို ကျွန်တော် သင်ယူလေ့လာချင်ပါတယ်။ ဒါပေမယ့်လည်း ဆော့ဖ်ဝဲ အင်ဂျင်နီယာလား၊ လေကြောင်းသိပ္ပံ အင်ဂျင်နီယာလား ဆိုတာကိုတော့ မဆုံးဖြတ်ရသေးပါဘူး ” ဟု သူက ပြောကြားခဲ့ပါသည်။
