နိုဝင်ဘာ ၂၅ ၊ ၂၀၁၄
M-Media
– လွှတ်တော်ဥက္ကဌ သူရဦးရွှေမန်းက ဖွဲ့စည်းပုံအခြေခံဥပဒေပြင်ဆင်ချက်များကို ၂၀၁၅ ရွေးကောက်ပွဲပြီး လွှတ်တော်ပြန်ခေါ်ချိန် အတည်ပြုမည်ဟု ပြောကြား ခဲ့သော်လည်း မိမိနှင့် မိမိအား ထောက်ခံသူများမှာ အခြေခံဥပဒေ ပြင်ဆင်ရေးကို ဆက်လက် တွန်းအားပေးသွားမည်ဟု အတိုက်အခံခေါင်းဆောင် ဒေါ်အောင်ဆန်းစုကြည်က ပြောကြားလိုက်သည်။
VOA မြန်မာပိုင်းဌာနနှင့် အင်တာဗျူးတွင် ဒေါ်အောင်ဆန်းစုကြည်က ယခုကဲ့သို့ ပြောကြားခဲ့ခြင်းဖြစ်ပြီး ထိုသို့ဆောင်ရွက်ခြင်းမှာ အရေးကြီးသော ကိစ္စတစ်ခုဖြစ်သည်ဟုလည်း ဆိုသည်။
“ကျမတို့ အလုပ်စလုပ်ကတည်းက လွယ်နိုင်မယ်လို့တော့ ဘယ်တုန်းကမှ မသုံးသပ်ခဲ့ပါဘူး။ ဒါပေမယ့် ဖြစ်နိုင်မယ် ဆိုတာကတော့ အဓိက ယုံကြည်ပါတယ်။ ဒီဟာက ဘယ်တော့ဖြစ်မှာလဲ ဆိုတဲ့အပေါ်မှာတော့ ဒီဟာက မေးခွန်းရှိတာပေါ့နော်။ အနှေးနဲ့အမြန်ပေါ့။ ဒါပေမယ့် မြန်လေလေ နိုင်ငံအတွက် ကောင်းလေလေပဲ။ ဘာဖြစ်လို့လဲဆိုတော့ ပြင်ဖို့လိုတဲ့ကိစ္စတွေကို မြန်မြန် ပြင်ရဲတဲ့သတ္တိရှိရမယ်။ မြန်မြန်ပြင်နိုင်တဲ့ အရည်အချင်း ကျမတို့မှာ အားလုံးလိုတယ်။ အဲတော့ မြန်လေ တိုင်းပြည် မနာလေပဲ” ဟု ဒေါ်အောင်ဆန်းစုကြည်က ပြောကြားခဲ့သည်။
ထို့ပြင် မိမိတို့ အမျိုးသားဒီမိုကရေစီအဖွဲ့ချုပ်အနေဖြင့် မြန်မာပြည်သူအားလုံးအတွက် အဆင်သင့်ရှိနေသည်ဟုလည်း ထည့်သွင်းပြောကြားခဲ့သည်။
ဖွဲ့စည်းပုံအခြေခံဥပဒေ ပြင်ဆင်ရမည့်အချက်များတွင် ဒေါ်အောင်ဆန်းစုကြည် သမ္မတဖြစ်ခွင့်ကို ပိတ်ပင်ထားသည့် ပုဒ်မ ၅၉ (စ)လည်း ပါဝင်ပြီး ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ကမူ ထိုအပိုဒ်မှာ ဒေါ်အောင်ဆန်းစုကြည် တစ်ဦးတည်းကို ရည်ရွယ်ခြင်းမဟုတ်ဟု ပြောကြားခဲ့သည်။
“ဒီကန့်သတ်ချက်ဟာ လူတစ်ယောက်၊ ဒါမှမဟုတ် အုပ်စုတစ်ခု ဒါမှမဟုတ် တိုင်းရင်းသားလူမျိုးစု တစ်ခုကို ရည်ရွယ်ထားတာ မဟုတ်ပါဘူး။ တစ်နိုင်ငံလုံးကို ကာကွယ်ထားတာပါ။ နောက်ပြဿနာတစ်ခုက လွတ်လပ်ရေးမရခင်က ရှိခဲ့တဲ့အခြေအနေကို ထည့်သွင်း စဉ်းစားရပါတယ်။ ပြီးတော့ လူဦးရေ အလွန်များတဲ့ တိုင်းပြည်တွေကြားမှာ ရှိနေရတာကြောင့် လူဝင်မှုကြီးကြပ်ရေးပြဿနာတွေလည်း အများကြီးရှိနေပါတယ်” ဟု ကာကွယ်ရေး ဦးစီးချုပ်က ပြောကြားခဲ့သည်
ုထို့ပြင် ဖွဲ့စည်းပုံအခြေခံဥပဒေပြင်ဆင်ရေး အတွက် အမျိုးသားဒီမိုကရေစီအဖွဲ့ချုပ်က ၅ သန်းသောပြည်သူများ၏ လက်မှတ်များကို ကောက်ယူထားသော်လည်း အခြားသူများ၏ ဆန္ဒကို ကြည့်ရှုရန် လိုအပ်မည်ဟု ပြောကြားခဲ့သည်။
ဒေါ်အောင်ဆန်းစုကြည်ကမူ ကာကွယ်ရေးဦးစီးချုပ်၏ ထိုသို့ ပြောကြားမှုကိုလည်း တုံ့ပြန်ပြောဆိုခဲ့သည်။
“ဒီလိုဆိုရင် ပြည်လုံးကျွတ် ပြည်သူ့ဆန္ဒခံယူပွဲလုပ်လိုက်လေ။ ကျမတို့ကတော့ အဆင်သင့်ပဲ။ အဲလိုဆိုရင် တခြားလူတွေရဲ့ ဆန္ဒတွေလည်း ပါလာမှာပေါ့” ဟု သူမက ထည့်သွင်းပြောကြားခဲ့သည်။
ref_ VOA
