စက်တင်ဘာ ၁၃၊ ၂၀၁၃
M-Media
ဇာဏီ
ပေါင်းတည် စွယ်တော်ပင့်ပွဲလုပ်မည်နေရာတွင် ဗလီဦးထောင်ဆောင်းထားသော မွတ်စလင်မ်အယောင်ဆောင် တစ်ဦးမှ ဗုဒ္ဓဘာသာဝင်များကို ဆဲဆိုမှုဖြစ်ပွားခဲ့၊ မွတ်စလင်မ်များ သတိဖြင့် သွားလာနေထိုင်ကြရန် ပေါင်းတည် ဘာသာရေးခေါင်းဆောင်များ သတိပေး ညွှန်ကြား
ပေါင်းတည် ။ ။ ပဲခူးတိုင်းဒေသကြီး ပေါင်းတည်မြို့တွင် ယခုရက်ပိုင်းများအတွင်း အစ္စလာမ်သာသနာဝင်များအနေနှင့် သွားလာပြောဆို နေထိုင်မှုများတွင် သတိပြုဆင်ခြင်နေကြရန် ဘာသာရေးခေါင်းဆောင်များမှ ညွှန်ကြားထားကြောင်း သတင်းရရှိပါတယ်။
လွန်ခဲ့သော ရက်အနည်းအတွင်းက ပေါင်းတည်မြို့တွင် အစ္စလာမ်သာသနာဝင် မဟုတ်သူ တစ်ယောက်မှ အစ္စလာမ်ဘာသာဝင်များ ၀တ်ပြုချိန် ၀တ်ဆင်သည့် ဦးထုတ်အား ၀တ်ဆင်၍ ဘာသာခြားတို့အား ဆဲဆိုခဲ့သဖြင့် ပြဿနာတစ်ရပ်ဖြစ်ပေါ်စေရန် ဖန်တီးခဲ့သော်လည်း ထိုသူအား ထိန်းသိမ်းလိုက်နိုင်၍ မည်သည့်ပြဿနာမျှ ဖြစ်ပွားသွားခဲ့ခြင်း မရှိကြောင်း စုံစမ်းသိရှိရပါတယ်။
အဆိုပါ ဖြစ်စဉ်နှင့် စပ်လျဉ်း၍ ပေါင်းတည်မြို့သို့ ဆက်သွယ်စုံစမ်းခဲ့ရာ “အခုလာမယ့် ၁၇-ရက်နေ့ကျရင် ပေါင်းတည်မှာ ဘုရား စွယ်တော်ပင့်မယ့် ပွဲရှိတယ်။ အဲလို ရှိနေတာကို လွန်ခဲ့တဲ့ ၄-ရက်လောက်ဖြစ်သွားတာက ဗလီဦးထုတ်ဆောင်းထားတဲ့ လူတစ်ယောက်က ဗုဒ္ဓဘာသာဝင်တွေကို အော်ဆဲတယ်။ စွယ်တော်ပွဲလုပ်မယ့်နေရာမှာ။ အဲဒီတုန်းကတော့ ပွဲမရှိသေး။ အဲလိုဆဲတော့ အနား ဗုဒ္ဓဘာသာဝင်တွေက စိတ်ဆိုးပြီး သူ့ကို ၀ိုင်းချုပ်ကြတဲ့အချိန်မှာ ရဲတွေလည်း ရောက်လာတယ်။ သေချာစစ်တော့မှ သူက ဗုဒ္ဓဘာသာဖြစ်နေတယ်။ သူ့ကို အခု ဘယ်လို အရေးယူမှု ပြုလုပ်လဲတော့ မသိဘူးဗျ။ အခုတော့ ပေါင်းတည်ဗလီမှာလည်း စာကပ်ပြီး ညွှန်ကြားထားတယ်။ ဒီစွယ်တော်ပွဲတော်ကာလအတွင်း မွတ်စလင်မ်များ အနေနဲ့ ပွဲတော်တ၀ိုက်သွားလာမှုများတွင် သတိဖြင့် ၀တ်စားဆင်ယင် သွားလာနေထိုင်ကြဖို့ ညွှန်ကြားလိုက်တယ်။”
ပေါင်းတည်မှာ ဗလီသွားချိန်မဟုတ်ရင် ဗလီသွားတဲ့လမ်းလေးကို ပိတ်ထားတယ်။ ဟိုးတစ်ရက်ကလည်း ညဥ့်တော်တော်နက်မှ လူတစ်ယောက်က ဖြတ်သွားတယ်။ ဘာပဲဖြစ်ဖြစ် ကျွန်တော်တို့ကတော့ ပြဿနာမဖြစ်အောင် သတိထားနေရပါတယ်။
ပေါင်းတည်မှာ အကြမ်းဖက်မှုတွေ ဖြစ်အောင် လှုံ့ဆော်သူတွေရှိနေသလို အကြမ်းဖက်မှုတွေ မဖြစ်ပေါ်လာစေဖို့လည်း ဘာသာပေါင်းစုံ အဖွဲ့ပေါင်းစုံက ၀ိုင်းဝန်းလုပ်ဆောင်နေကြပါတယ်။”လို့ ပေါင်းတည်မြို့ခံမှ M-Media ကို ပြောပြခဲ့ပါတယ်။
၂၀၁၂-ခု ဇွန်လ နောက်ပိုင်းမှစ၍ ယခုအချိန်အထိ ဖြစ်ပေါ်ခဲ့သော အကြမ်းဖက်မှုများသည် ဘာသာရေးအကြောင်းပြသည့် အကြမ်းဖက်မှုများဖြစ်ခဲ့တာတွေ ကြောင့် ပေါင်းတည်မြို့ပေါ်တွင်လည်း အလားတူ အကြမ်းဖက်မှုမျိုး မပေါ်ပေါက်လာစေရန် ထိန်းသိမ်းသည့်အနေဖြင့် ထိုကဲ့သို့ ညွှန်ကြား လိုက်သည်ဖြစ်ကြောင်း သိရပါတယ်။
၂၀၁၃ ခုနှစ် မတ်လ အတွင်း၌ မိထ္ထီလာမြို့မှ အစပြုဖြစ်ပေါ်ခဲ့သော မွတ်စလင်မ်များကို အကြမ်းဖက်မှုများ ပေါင်းတည်မြို့ကို ကူးစက်အောင် လုပ်ဆောင်ခဲ့ကြသေးသည်။ ပေါင်းတည်မြို့ခံနှင့် စစ်တပ်၊ ရဲများမှာ ဝိုင်းဝန်းပြီးထိန်းသိမ်းလုပ်ဆောင်မှုကြောင့် အကြမ်းဖက်မှုများ မဖြစ်ပွားခဲ့ခြင်းဖြစ်ပေသည်။ အဆိုပါ ဖြစ်စဉ်တွင် အကြမ်းဖက်ရန် လုပ်ဆောင်မှုကြောင့် လူ ၁၀ ဦးကို ဖမ်းဆီးထိန်းသိမ်းခဲ့ကြောင်းကို မတ်လ ၂၈ ရက်နေ့ DVB မှာ ဖော်ပြခဲ့တဲ့ သတင်းအရ သိရှိရပါတယ်။
