အောက်တိုဘာ ၁၅ ၊ ၂၀၁၅
M-Media
အောက်တိုဘာ ၁၅ ရက်နေ့ဟာ အိန္ဒိယနိ်ုင်ငံရဲ့ ဒုံးပျံနှင့် နျူကလီးယား ဖခင်ကြီးလည်းဖြစ် ၁၁ ယောက်မြောက် သမ္မတလည်းဖြစ်တဲ့ အေပီဂျေ အဗ်ဒုလ် ကလာမ် Avul Pakir Jainulabdeen Abdul Kalam ရဲ့ မွေးနေ့ဖြစ်ပါတယ်။ ယခုနှစ် ဇူလိုင်လ ၂၇ ရက် မှာ ကွယ်လွန်သွားပြီဖြစ်တဲ့ Abdul Kalam ၈၄ နှစ်မြောက်မွေးနေ့ အထိမ်းအမှတ်ဖြင့် သူရဲ့ အထုပ္ပတ္တိ ကို အမ်မီဒီယာ စာဖတ်ပရိတ်သတ်အတွက် တင်ဆက်ပေးလိုက်ပါတယ်။
အေပီဂျေ အဗ်ဒုလ် ကလာမ် Avul Pakir Jainulabdeen Abdul Kalam ကို ၁၉၃၁ ခုနှစ် အောက်တိုဘာ ၁၅ ရက် Rameswaram မှာမွေးဖွားပြီး၊ ၂၀၁၅ ခုနှစ် ဇူလိုင်လ ၂၇ ရက် Shillong မှာ ကွယ်လွန်ခဲ့ပါတယ်။ သူဟာ အိန္ဒိယနိုင်ငံ ဒုံးကျည်နဲ့ နျူကလိယ လက်နက် ပရိုဂရမ်များ ဖွံ့ဖြိုးတိုးတက်ရေး အတွက် အဓိကအခန်းကဏ္ဍက ပါဝင်ခဲ့သူ သိပ္ပံပညာရှင်နဲ့ နိုင်ငံရေးသမားတစ်ဦးဖြစ်ပါတယ်။ အိန္ဒိယနိုင်ငံရဲ့ ဧကဒဿမမြောက် သမ္မတအဖြစ် ၂၀၀၂ ခုနှစ်မှ ၂၀၀၇ ခုနှစ်အထိ တာဝန်ထမ်းဆောင်ခဲ့တယ်။
အစောပိုင်းဘ၀နဲ့ ပညာရေး
——————————-
A.P.J အဗ်ဒုလ် ကလာမ်က တမီလ်မွတ်စ်လင်မ်မိသားစုဝင်တစ်ဦးဖြစ်ပါတယ်။ ဇာတိနယ်က Pamban ကျွန်းပေါ် Rameswaram ဒေသ(ယခု Tamil Nadu ပြည်နယ်)ဖြစ်ပါတယ်။ သူ့ဖခင် Jainulabudeen က စက်လှေပိုင်ရှင် တစ်ဦးဖြစ်တဲ့ အပြင် ဒေသခံ ဗလီဝတ်ကျောင်းရဲ့ ရှေ့ဆောင် အိမာမ်လည်း ဖြစ်ပါတယ်။ မိခင်က Ashiamma ဖြစ်ပြီး သာမန်အိမ်ထောင်ရှင်မ တစ်ဦးဖြစ်ပါတယ်။ ကလာမ်မှာ အစ်ကိုသုံးဦးနဲ့ (အကြီးဆုံး)အစ်မ တစ်ဦး ရှိပါတယ်။ သားချင်းများအနက် အငယ်ဆုံးဖြစ်ပါတယ်။ ဘိုးစဉ်ဘောင်ဆက် ကုန်သည်များ၊ မြေပိုင်ရှင်များဖြစ်လို့ ချမ်းသာကြွယ်ဝခဲ့ကြတယ်။ ၁၉၁၄ ခုနှစ်မှာ မိသားစု စီးပွားရေးကျဆုံးပြီး ဆင်းရဲခဲ့ပါတယ်။ ကလေးငယ်လေး ကလာမ်ဟာ အဲ့ဒီအချိန်က မိသားစုဝင်ငွေအတွက် တစ်ဖက်တစ်လမ်းကနေ သတင်းစာရောင်းခဲ့ရသူပါ။
အစောပိုင်းကျောင်းသားဘ၀မှာ သာမန် ပညာရေး အဆင့်သာရှိပေမယ့် ထက်မြက်ပြီး လေ့လာ ဆန္ဒကြီးမားတဲ့ စာကြိုးစားသူအဖြစ် အသိအမှတ်ပြုခံခဲ့ရတယ်။ သင်္ချာပညာရပ်မှာ သူက ပိုပြီးအားစိုက်ခဲ့တယ်။ အထက်တန်းပညာရေးပြီးဆုံးတော့ Tiruchirappalli က စိန့်ဂျိုးဇက်ကောလိပ်ကို တက်ရောက်ပြီး ၁၉၅၄ ခုနှစ်မှာ ရူပဗေဒအဓိကနဲ့ ဘွဲ့ရတယ်။ နောက် ၁၉၅၅ ခုနှစ်မှာ မဒရပ်စ် နည်းပညာ တက္ကသိုလ်မှာ အာကာသ သိပ္ပံအင်ဂျင်နီယာ ဆက်လက် တက်ရောက်ခဲ့တယ်။
သိပ္ပံပညာရှင်ဘ၀
——————-
၁၉၆၀ ခုနှစ်မှာ မဒရပ်စ် စက်မှုတက္ကသိုလ်ကနေ လေကြောင်းအင်ဂျင်နီယာဘွဲ့ရယူခဲ့ပြီးတဲ့အခါ ကာကွယ်ရေးဆိုင်ရာ သုတေသနနဲ့ဖွံ့ဖြိုးရေး အဖွဲ့ DRDO ထဲကို ၀င်ရောက်ခဲ့ပါတယ်။ အစပိုင်းမှာ အိန္ဒိယစစ်တပ်အတွက် အသေးစားရဟတ်ယာဉ် ဒီဇိုင်းဆွဲသူအဖြစ် အလုပ်စတင်ခဲ့တယ်။ များမကြာမီ ၁၉၆၉ ခုနှစ်မှာ အိန္ဒိယ အာကာသ သုတေသနအဖွဲ့အစည်း ISRO ဆီ ပြောင်းရွှေ့တာဝန်ထမ်းဆောင်တယ်။ အဲ့ဒီမှာ အိန္ဒိယရဲ့ ပထမဆုံး ကိုယ်ပိုင်ဒီဇိုင်းဆင်ယင်ထုတ်လုပ်တဲ့ ဂြိုလ်တုလွှတ်တင်ယာဉ် SLV-III စီမံကိန်းရဲ့ ပရောဂျက်ဒါရိုက်တာ ဖြစ်ခဲ့တယ်။ ၁၉၈၂ ခုနှစ်မှာ DRDO ကို ပြန်လည်ဝင်ရောက်လာပြီး ဒုံးကျည်အမျိုးအစား အများအပြားကို အောင်မြင်အောင် စီမံထုတ်လုပ်နိုင်ခဲ့တယ်။ ဒါကိုအစွဲပြုပြီး ကလာမ်ကို “ဒုံးကျည်လူသား” လို့ ခမ်းခမ်းနားနား ခေါ်တွင်ခဲ့ကြတယ်။
၁၉၆၃-၆၄ ခုနှစ်မှာ အမေရိကန်နိုင်ငံ ဗာဂျီးနီးယားပြည်နယ် Hampton က နာဆာ Langley Research Center ၊ Maryland နယ် Greenbelt မှာရှိတဲ့ Goddard Space Flight Center ၊ Wallops Flight Facility တွေကို အလည်အပတ်သွားရောက်လေ့လာခဲ့တယ်။ ၁၉၇၀ နဲ့ ၁၉၉၀ နှစ်များအကြား ကလာမ် က နေစွမ်းအင်သုံး ဂြိုလ်တုလွှတ်တင်ယာဉ် Polar Satellite Launch Vehicle (PSLV) နဲ့ SLV-III project များကို အဆင့်မြှင့်တင်နိုင်အောင် အားထုတ်ရာမှာ နှစ်မျိုးစလုံး အောင်မြင်သွားပါတယ်။
အဗ်ဒုလ် ကလာမ်ဟာ ၁၉၉၂ မှ ၁၉၉၇ ခုနှစ်အထိ ကာကွယ်ရေးဝန်ကြီးဋ္ဌာနရဲ့ သိပ္ပံအကြံပေး(၀န်ကြီးချုပ်ရဲ့ သိပ္ပံအကြံပေးဦးစီးခေါင်းဆောင်) ဖြစ်ခဲ့ပြီး နောက်ပိုင်းကာလမှာ ကက်ဘိနက်ဝန်ကြီးရာထူးနဲ့ သိပ္ပံနည်းပညာဆိုင်ရာ အစိုးရအဖွဲ့ရဲ့အဓိကအကြံပေး(DRDO ရဲ့အတွင်းရေးမှူး) အဖြစ် ၁၉၉၂ ဇူလိုင်လမှ ၁၉၉၉ ဒီဇင်ဘာလအထိ တာဝန်ထမ်းဆောင်ခဲ့တယ်။
အိန္ဒိယနိုင်ငံဟာ ၁၉၉၈ ခုနှစ်မှာ (၁၉၇၄ ခုနှစ်နောက်ပိုင်း ပထမဆုံးအကြိမ်အဖြစ်) နျူကလိယ လက်နက် စမ်းသပ်မှုပြုလုပ်နိုင်ခဲ့တယ်။ နိုင်ငံတကာ အသိုင်းအ၀ိုင်းကို စိုးရိမ်ပူပန်သွားစေခဲ့လင့်ကစား ဒီအရေးပါတဲ့ အခန်းကဏ္ဍကို ဦးဆောင်နိုင်ခဲ့လို့ ကလာမ်ဟာ နိုင်ငံ့သူရဲကောင်း စာရင်းဝင်ခဲ့ပါတယ်။ ၁၉၉၈ ခုနှစ်က ကလာမ်ဟာ Technology Vision 2020 လို့အမည်ရတဲ့ နိုင်ငံလုံးဆိုင်ရာ နည်းပညာအစီအစဉ်တစ်ရပ် ချမှတ်ခဲ့တယ်။ အဲ့ဒီမှာ သူက အိန္ဒိယနိုင်ငံကို ဖွံ့ဖြိုးမှုအားနည်းနေဆဲအဆင့်မှ နှစ် ၂၀ အတွင်း ဖွံ့ဖြိုးပြီးလူ့အဖွဲ့အစည်းအဖြစ်ပြောင်းလဲဖို့ လမ်းပြမြေပုံတစ်ခုကို ရှင်းလင်းတင်ပြခဲ့တယ်။ ဒီအစီအစဉ်က အခြားကဏ္ဍများထက် စိုက်ပျိုးရေးထုတ်ကုန်တိုးမြှင့်ခြင်း၊ စီးပွားရေးတိုးတက်ဖို့တွန်းအားအဖြစ် နည်းပညာရပ်များကို အလေးထားဦးတည်စေခြင်း၊ ကျန်းမာရေးစောင့်ရှောက်မှုနဲ့ပညာရေးကို ကျယ်ကျယ်ပြန့်ပြန့် ရရှိခံစားစေခြင်းတို့အပေါ် တွန်းအားပေးနိုင်ခဲ့ပါတယ်။
သမ္မတဖြစ်လာခြင်း
——————–
သမ္မတရာထူးကိုစွန့်လွှတ်သွားတဲ့ Kocheril Raman Narayanan နေရာမှာ အာဏာရ ဟိန္ဒူအမျိုးသားရေးပါတီ NDA က ကလာမ်ကို မွတ်စ်လင်မ်တစ်ဦးဖြစ်နေလင့်ကစား သမ္မတရာထူးအတွက် ၂၀၀၂ ခုနှစ် ဇွန်လ ၁၀ ရက်မှာ အမည်စာရင်း တင်သွင်းခဲ့ပါတယ်။ ကလာမ်ရဲ့ကျော်ကြားမှုဂုဏ်သတင်းနဲ့ အရေးပါအရာရောက်မှုကြောင့် အတိုက်အခံဖြစ်တဲ့ အိန္ဒိယကွန်ကရက်ပါတီနဲ့ Samajwadi ပါတီတို့ကလည်း ထောက်ခံအားပေးခဲ့တယ်။ ကလာမ်ဟာ ရွေးကောက်ပွဲကို အလွယ်တကူ ကျော်ဖြတ်နိုင်ပြီး ၂၀၀၂ ခုနှစ် ဇူလိုင်လမှာ အိန္ဒိယနိုင်ငံရဲ့ ၁၁ ဦးမြောက်သမ္မတ ဖြစ်သွားပါတယ်။ အိန္ဒိယနိုင်ငံကို ဖွံ့ဖြိုးတိုးတက်ပြီးတိုင်းပြည်တစ်ခုအဖြစ် အသွင်ပြောင်းနိုင်ဖို့ သိပ္ပံနဲ့နည်းပညာအပေါ် ဆက်လက်အားထား အလေးပေးခဲ့ပါတယ်။
ဒေါက်တာ အဗ်ဒုလ် ကလာမ်ဟာ အိန္ဒိယနိုင်ငံရဲ့ အဆင့်အမြင့်ဆုံး လူမှုဂုဏ်ရည်ဆု Bharat Ratna ကို သမ္မတ မဖြစ်မီက လက်ခံရရှိခဲ့သူတစ်ဦးပါ။ အိန္ဒိယသမိုင်းမှာ သူဟာ ဒီဆုတံဆိပ်ကို တတိယမြောက် ရရှိခဲ့သူ၊ ဒါ့အပြင် ဒီဆုကို သိပ္ပံပညာရှင်အဖြစ်နဲ့ ပထမဆုံးဆွတ်ခူးနိုင်သူလည်း ဖြစ်ပါတယ်။ သူ့အလျင် ဂုဏ်ပြုခံရသူနှစ်ဦးကတော့ Dr Sarvepalli Radhakrishnan (၁၉၅၄ ခုနှစ်) နဲ့ Dr Zakir Hussain (၁၉၆၃ ခုနှစ်)(နောက်ပိုင်း သမ္မတဖြစ်လာသူ) တို့ ဖြစ်ကြပါတယ်။
သူ့သမ္မတသက်တမ်းငါးနှစ်အတွင်း “ပြည်သူများရဲ့သမ္မတ” ဆိုပြီး ပြည်သူတို့ရဲ့ လှိုက်လှိုက်လှဲလှဲ အသိအမှတ်ပြုခြင်း ခံခဲ့ရပါတယ်။ သဟဇာတ၊ မေတ္တာတရား၊ ဖွံ့ဖြိုးတိုးတက်ရေး၊ တရားရေး၊ ပညာရေး စတဲ့ ကဏ္ဍများစွာအတွက် အကျိုးပြုထိရောက်တဲ့ လုပ်ဆောင်ချက်များစွာ ရှိခဲ့ပါတယ်။ လူထုထောက်ခံမှု ခိုင်ခိုင်မာမာ ရှိနေလင့်ကစား နိုင်ငံရေးလောကထဲက အရှုပ်အထွေးများနဲ့ ကင်းရှင်းစွာနေထိုင်သွားလိုတဲ့အတွက် ၂၀၀၇ ရွေးကောက်ပွဲ မ၀င်ဖို့ ဆုံးဖြတ်ကြောင်း ကြေငြာခဲ့ပါတယ်။
၂၀၀၇ ခုနှစ် ဇူလိုင်လ ၂၅ ရက်မှာ သမ္မတရာထူးက အနားယူပြီး သူ့နေရာကို အိန္ဒိယရဲ့ ပထမဆုံးအမျိုးသမီးသမ္မတအဖြစ် Pratibha Patil က ဆက်ခံဝင်ရောက်ခဲ့ပါတယ်။ တာဝန်က အနားယူပြီးတဲ့နောက် သာမန်ပြည်သူတစ်ဦးရဲ့ဘ၀ထဲ ပြန်ဝင်ပြီး ပညာရေး၊ စာပေရေးသားမှုနဲ့ လူမှုဝန်ထမ်းလုပ်ငန်းများကို ဆောင်ရွက်ခဲ့တယ်။
အိန္ဒိယရဲ့ ၁၂ ဦးမြောက်သမ္မတ Pratibha Patil သက်တမ်းပြီးဆုံးလုချိန်မှာ မီဒီယာများက ဒေါက်တာ အဗ်ဒုလ် ကလာမ်အနေနဲ့ ဒုတိယအကြိမ်သမ္မတအဖြစ် အမည်စာရင်းတင်သွင်းခံရနိုင်ဖွယ်ရှိကြောင်း အသားပေးဖော်ပြလာကြသလို ဒီသတင်းရဲ့နောက် တအုံတကျင်းသောလူထုရဲ့အားပေးထောက်ခံမှု ထွက်ပေါ်လာခဲ့ပါတယ်။ ပါတီပေါင်းစုံကလည်း အားပေးရပ်တည်ခဲ့သည့်တိုင် အဗ်ဒုလ် ကလာမ်က “ပြည်သူတို့ရဲ့ မေတ္တာ၊ အားပေးမှုတို့အပေါ် လှိုက်လှဲဝမ်းသာအသိအမှတ်ပြုပါကြောင်း၊ သို့သော် ၎င်းသည် ပြည်သူ့ ဆန္ဒဖြစ်သော်လည်း မိမိ၏ဆန္ဒမှာ သမ္မတနေရာမဟုတ်ကြောင်း” ယဉ်ကျေးပျူငှာစွာ ပြောဆိုပြီး ၂၀၁၂ ရွေးကောက်ပွဲဝင်ဖို့ ငြင်းပယ်ခဲ့ပါတယ်။
နောက်ဆုံးကာလများ
————————
သမ္မတရုံးက ထွက်ခွာလာပြီးတဲ့နောက် ဒေါက်တာ အဗ်ဒုလ် ကလာမ်ဟာ Indian Institute of Management Shillong ၊ Indian Institute of Management Ahmedabad နဲ့ Indian Institute of Management Indore မှာ ဧည့်သည်တော်ပါမောက္ခ အဖြစ်လည်းကောင်း – Indian Institute of Science, Bangalore ရဲ့ ဂုဏ်ထူးဆောင် အဖွဲ့ဝင်အဖြစ် လည်းကောင်း – Indian Institute of Space Science and Technology Thiruvananthapuram ရဲ့ အဓိပတိအဖြစ်လည်းကောင်း – Aerospace Engineering at Anna University ရဲ့ ပါမောက္ခအဖြစ်လည်းကောင်း – အိန္ဒိယနိုင်ငံတစ်ဝှမ်းက တက္ကသိုလ်နဲ့ သုတေသနဋ္ဌာနများမှာ အားဖြည့်ထောက်ကူပေးသူအဖြစ်လည်းကောင်း ဆောင်ရွက်နေခဲ့ပါတယ်။
၂၀၁၂ ခုနှစ် မေလမှာ အိန္ဒိယလူငယ်များအတွက် What Can I Give Movement အမည်ရှိ အကျင့်ပျက်ခြစားမှု အနိုင်ယူရေးပရိုဂရမ် တစ်ရပ်ကို စတင်စီစဉ်ပေးခဲ့ပါတယ်။
ကွယ်လွန်ခြင်း
—————-
၂၀၁၅ ခုနှစ် ဇူလိုင်လ ၂၇ ရက်မှာ Institute of Management Shillong ကို “Creating a Livable Planet Earth” အကြောင်းပို့ချပေးဖို့ Shillong သို့သွားရောက်ခဲ့တယ်။ စာသင်ခန်းထဲ ပို့ချချက်ပေးလို့ ငါးမိနစ်ရှိစဉ် အိန္ဒိယစံတော်ချိန် ညနေ ၆း၃၅ နာရီမှာ ရုတ်တရက် လဲကျသွားခဲ့ပါတယ်။ ချက်ခြင်းပဲ အနီးက Bethany Hospital ဆေးရုံကို အရေးပေါ်လူနာအဖြစ် ပို့ဆောင်ခဲ့ကြပေမယ့်လည်း အသက်မမှီခဲ့ပါဘူး။ ရုတ်တရက်နှလုံးရပ်ကွယ်လွန်ခြင်း ဖြစ်ကြောင်း ဒေသစံတော်ချိန် ၇း၄၅ နာရီမှာ အတည်ပြုလိုက်ကြပါတယ်။
ကလာမ်ရဲ့ ရုပ်ကလာပ်ကို အိန္ဒိယလေတပ်မတော်ရဟတ်ယာဉ်တစ်စင်းနဲ့ Shillong ကနေ Guwahati ၊ အဲ့ဒီကတဆင့် နယူးဒေလီသို့ သယ်ယူပို့ဆောင်ခဲ့ကြပါတယ်။ နိုင်ငံတော်သမ္မတ၊ ၀န်ကြီးချုပ်၊ ဒေလီ မြို့တော်ဝန်၊ အိန္ဒိယကြည်းရေလေတပ်မတော်အကြီးအကဲများက လက်ခံကြိုဆိုခဲ့ကြပါတယ်။ သူ့ရဲ့ ဈာပနအခမ်းအနားကို ၀န်ကြီးချုပ်ဟောင်း မန်မိုဟန်ဆင်း၊ ကွန်ကရက်ပါတီဥက္ကဋ္ဌ ဆိုနီယာဂန္ဒီနဲ့ ဒုဥက္ကဋ္ဌ ရာဟူးလ်ဂန္ဒီ၊ ဥတားပရာဒက်ရ်ှဝန်ကြီးချုပ် အခီလက်ရှ် ယာဒက်ဗ် အစရှိတဲ့ ထိပ်တန်းပုဂ္ဂိုလ်များ တက်ရောက်ခဲ့ကြပါတယ်။
ဇူလိုင်လ ၂၉ ရက်နံနက်မှာ သူ့မွေးရပ်မြေဖြစ်တဲ့ Rameswaram ကို ပြန်သယ်လာတယ်။ လေဆိပ်မှာ ကက်ဘိနက်ဝန်ကြီးများစွာမှ ကြိုဆိုခဲ့ကြတယ်။ အဲ့ဒီနောက် အများပြည်သူတို့မှ နောက်ဆုံးဂါရ၀ပြုနိုင်ကြဖို့ မြို့တွင်းလူ့မြင်ကွင်းက ဘတ်စ်ကားဂိတ်တစ်ခုရှေ့မှာ ည ၈ နာရီအထိ ထားရှိပေးခဲ့ပါတယ်။
၂၀၁၅ ခုနှစ် ဇူလိုင် ၃၀ ရက်မှာ သမ္မတဟောင်း ဒေါက်တာ အဗ်ဒုလ် ကလာမ်ကို နိုင်ငံတော်အဆင့် ဈာပနအခမ်းအနားနဲ့ သင်္ဂြိုလ်ခဲ့ပါတယ်။ ၀န်ကြီးချုပ်အပါအ၀င် မြို့တော်ဝန်များစွာနဲ့ တစ်ကွ နောက်ဆုံးခရီးစဉ်ကို ပို့ဆောင်နှုတ်ဆက်ကြတဲ့ပရိသတ် သုံးသိန်းခွဲအထိ ရှိခဲ့ပါတယ်။ အိန္ဒိယ အစိုးရက ကြေကွဲမှု အထိမ်းအမှတ် အဖြစ် ၇ ရက်တိုင်တိုင် တလေးတစား ကြေငြာ သတ်မှတ်ဂုဏ်ပြုခဲ့ပါတယ်။ မြန်မာ့တပ်မတော် အကြီးအကဲ ဗိုလ်ချုပ်မှူးကြီး မင်းအောင်လှိုင် အပါအ၀င် တောင်အာရှနဲ့ အရှေ့တောင်အာရှ ဒေသတွင်းရှိ ခေါင်းဆောင်များ၊ ရုရှသမ္မတ ဗလာဒီမာပူတင်၊ အမေရိကန်သမ္မတ ဘားရက်အိုဘားမားအပါအ၀င် အနောက်နိုင်ငံခေါင်းဆောင်များနဲ့ ကမ္ဘာ့ပညာရှင်များကလည်း ၀မ်းနည်းကြောင်းကို ပုံသဏ္ဍာန်အသီးသီးနဲ့ ထုတ်ဖော်ပြသခဲ့ကြပါတယ်။ ဒလိုင်းလားမားကလည်း “အစားထိုးမရနိုင်တော့တဲ့ ဆုံးရှုံးမှု” လို့ဆိုပြီး ဆုတောင်းပေးခဲ့ပါတယ်။
လူပီသသော လူထဲကလူ
ဒေါက်တာ အဗ်ဒုလ် ကလာမ်မှာ အိမ်ထောင် မရှိခဲ့ပါဘူး။ သူ့သွေးချင်းမိသားစုဝင်များအပေါ် အလွန် အလေးထား ဆက်ဆံခဲ့သူဖြစ်ပါတယ်။ သူ့ရဲ့ရိုးရှင်းသော ဘ၀နေဟန်နဲ့ သမာဓိကြောင့် ကျော်စော ထင်ရှားလှပါတယ်။ ရုပ်မြင်သံကြားစက်တစ်လုံးပင် မပိုင်ဆိုင်ခဲ့ပါဘူး။ နံနက်စောစောထပြီး ညဥ့်နက်မှ အိပ်ရာဝင်ခြင်းက သူ့အကျင့်ပါ။ စာအုပ်တွေ၊ အိန္ဒိယဗျတ်စောင်း၊ အ၀တ်အစားအနည်းငယ်၊ စီဒီစက်ငယ်နဲ့ လက်တော့ပ်တစ်လုံး စတဲ့ ပိုင်ဆိုင်မှုအနည်းငယ်သာ ရှိပါတယ်။ သူကွယ်လွန်ချိန်မှာ သေတမ်းစာ မချန်ရစ်နိုင်ခဲ့ပါဘူး။ သူပိုင်ဆိုင်တဲ့ ပစ္စည်းမှန်သမျှ သူ့ကိုပျိုးထောင်ပေးခဲ့တဲ့ သူ့အစ်ကိုကြီးဆီ ပို့ဆောင်ပေးခဲ့ကြပါတယ်။
နေ့စဉ်ဝတ်ပြုခြင်း၊ ရမဿွာန်လ ဥပုသ် သီတင်းဆောက်တည်ခြင်းတို့ဟာ ဒေါက်တာ အဗ်ဒုလ် ကလာမ်နဲ့ ခွဲခြားမရအောင် တစ်သားတည်းကျခဲ့ပါတယ်။ ဗလီဝတ်ကျောင်းရှေ့ဆောင်ဖြစ်တဲ့ သူ့ဖခင်က သူ့ကို ငယ်စဉ်ကတည်းက အစ္စလာမ့်ကျင့်ဝတ်တွေနဲ့ ပတ်သက်ပြီး ကြပ်မတ်ထိန်းကျောင်းပေးခဲ့တယ်။ အဗ်ဒုလ်ကလာမ်ရဲ့ ဘာသာတရားများအပေါ် လေးစားတန်ဖိုးထားတတ်မှု၊ အပြန်အလှန်ဆွေးနွေးတတ်မှု အပေါ် ဖခင်ဖြစ်သူမှ အားရကျေနပ်နေခဲ့ပါတယ်။ ကလာမ်က ဒီလို အမှတ်တရတွေကို ပြောဆိုလေ့ရှိပါတယ်။
“ညနေခင်းတိုင်း ကျွန်တော့်ဖခင်၊ ဟိန္ဒူဘုရားကျောင်း ဘုန်းတော်ကြီး၊ ချာ့ခ်ျကျောင်း ဆရာတော်တို့နဲ့ အတူ လ္ဘက်ရည်ဝိုင်းခင်း ထိုင်လေ့ရှိကြပြီး ကျွန်တော်တို့ဒေသရဲ့ အရေးအရာများကို ဆွေးနွေးပြောဆိုကြပါတယ်”။
အိန္ဒိယနိုင်ငံရဲ့ များပြားရှုပ်ထွေးလှစွာသော ပြဿနာများရဲ့အဖြေတွေဟာ ဘာသာရေး၊ လူမှုရေး၊ နိုင်ငံရေးခေါင်းဆောင်များရဲ့ အပြန်အလှန်ဆွေးနွေး/ပူးပေါင်းဆောင်ရွက်မှုများထဲ ရှိနေကြောင်း အဲ့ဒီ အစောပိုင်းထိတွေ့မှုက အဗ်ဒုလ် ကလာမ်ကို နားလည်သွားစေပါတယ်။ ဒါ့အပြင် အခြား ဘာသာတရားများ အပေါ် ဂုဏ်ပေးလေးစားရခြင်းဟာ အစ္စလာမ်သာသနာ့ အုတ်မြစ်တစ်ခု အဖြစ် သူ့အနေနဲ့ ယုံကြည်ချက် ရှိပြီးလည်း ဖြစ်နေပါတယ်။ သူ့ရဲ့လက်စွဲစကားကတော့ . . . .
“For great men, religion is a way of making friends; small people make religion a fighting tool.”
“မြင့်မြတ်တဲ့လူသားတွေအဖို့ ဘာသာရေးဆိုတာ မိတ်ဆွေ ဖွဲ့ရေးနည်းလမ်းကောင်းတစ်ရပ်ဖြစ်တယ်။
သေးသိမ်ကျဉ်းမြောင်းတဲ့ လူသားတွေကတော့ ဘာသာရေးကို တိုက်ခိုက်ရေးလက်နက် ကိရိယာတစ်ခု အဖြစ် ဖန်တီးကြတယ်”။
ဒေါက်တာ အဗ်ဒုလ် ကလာမ်ရဲ့ အကြီးအကျယ်အားသာချက်တစ်ခုကတော့ အိန္ဒိယနိုင်ငံရဲ့ မတူကွဲပြားအုပ်စုတွေအကြား နာမ်ပိုင်းဆိုင်ရာ၊ ယဉ်ကျေးမှုပိုင်းဆိုင်ရာ အချက်အလက်များကို ပေါင်းစည်း အသိအမှတ်ပြုတတ်ခြင်းပဲ ဖြစ်ပါတယ်။ ကုရ်အာန်ကျမ်းမြတ်နဲ့ အစ္စလာမ့်ကျင့်ရပ်များအပေါ် ယုံကြည်ချက် ထားရှိယုံတင်မကသေးပါဘူး၊ ဟိန္ဒူတို့ရဲ့ဓလေ့ထုံးတမ်းများကိုလည်း နှံ့စပ်ကျွမ်းကျင်ပါတယ်။ သက္ကဋဘာသာ စကားကိုလည်း သင်ယူပြီး ဘဂ၀ါဂီတကျမ်းကိုဖတ်ရှုတဲ့အပြင် သားသတ်လွတ်သမားလည်း ဖြစ်နေပြန်ပါတယ်။ တမီလ်ကဗျာရေးဖွဲ့တာ၊ တောင်အိန္ဒိယသားတို့ရဲ့(ကြိုးတပ်တူရိယာ)ဗျတ်စောင်းတီးခတ်တာ၊ ဓမ္မတေးတွေကို နေ့စဉ်နားဆင်တာကိုလည်း မွေ့လျော်သူဖြစ်ပါတယ်။
၂၀၀၂ ခုနှစ် သမ္မတဖြစ်လာပြီးနောက် အစောပိုင်းကာလ ပါလီမန်မိန့်ခွန်းစကားထဲမှာ ပိုမိုစုစည်း ညီညွတ်သောအိန္ဒိယ ဖြစ်လာရေး သူ့ဆန္ဒကို ဒီလိုထုတ်ဖော်ပြောကြားခဲ့ပါတယ်။
“ပြီးခဲ့တဲ့ တစ်နှစ်ပတ်လုံးအတွင်း ဘာသာပေါင်းစုံက နာမ်ပိုင်းဆိုင်ရာခေါင်းဆောင် အများအပြားကို တွေ့ဆုံခဲ့ပါတယ်။ ကျွန်တော်တို့နိုင်ငံရဲ့ မတူကွဲပြားဓလေ့ထုံးတမ်းများကြားက တူဆင်ညီညွတ်တဲ့ အသိအမြင်တွေကို ဖော်ဆောင်နိုင်ဖို့ ကျွန်တော် စိတ်အားထက်သန်နေမိပါတယ်”။
ဒါကြောင့် “အိန္ဒိယရဲ့အထူးထူးသောဘက်စုံအမွေအနှစ်ကို သရုပ်ဖော်ပေးတဲ့ အိန္ဒိယသားစစ်စစ်” ၊ “ဧရာမအကွဲအလွဲထဲက အိန္ဒိယညီညွတ်ရေးကို ပုံဆောင်စေရာ ယဉ်ကျေးမှုနဲ့နာမ်ပိုင်းအစဉ်အလာကောင်း အားလုံးကို ဖော်ဆောင်ပေးသူ အကောင်းဆုံး စံပြပုဂ္ဂိုလ်” စသဖြင့် နိုင်ငံရေးပါတီခေါင်းဆောင်အသီးသီးအကြား ပြောစမှတ်တွင်ခဲ့ပါတယ်။
ဂုဏ်ပြုဆု၊ အထိမ်းအမှတ်ဆုများ
——————————–
ကလာမ်က သူ့ကိုယ်တိုင်ရေးအတ္ထုပ္ပတ္ထိ Wings of Fire (၁၉၉၉ ခုနှစ်) အပါအ၀င် စာအုပ်အများအပြား ရေးသားခဲ့ပါတယ်။ ချီးမြှင့်ခံရတဲ့ ဆုပေါင်းများစွာအနက် နိုင်ငံ့အမြင့်ဆုံးဂုဏ်ပြုဆုနှစ်ခုဖြစ်တဲ့ the Padma Vibhushan (၁၉၉၀ ခုနှစ်) နဲ့ the Bharat Ratna (၁၉၉၇ ခုနှစ်) လည်း ပါဝင်ခဲ့ပါတယ်။
သူကွယ်လွန်ပြီးတဲ့နောက်မှာလည်း အထူးထူးသော ချီးကျူးဂုဏ်ပြုခြင်း ခံခဲ့ရပါတယ်။ တမီလ် နဒူး ပြည်နယ်အစိုးရက သူ့မွေးနေ့ အောက်တိုဘာ ၁၅ ရက်ကို “လူငယ်များ နိုးကြားရေးနေ့” အဖြစ် ဂုဏ်ပြုကြေငြာခဲ့ပါတယ်။ ၈ ဂရမ်ရွှေတံဆိပ်၊ ဂုဏ်ပြုလက်မှတ်၊ ငွေသား ၅ သိန်း(အမေရိကန်ဒေါ်လာ ၇၅၀၀) ပါဝင်တဲ့ “ဒေါက်တာ အေပီဂျေ အဗ်ဒုလ် ကလာမ်” ဆုကိုလည်း မတည်သတ်မှတ်ပြီး၊ ၂၀၁၅ ခုနှစ်ကစလို့ နှစ်စဉ် လွတ်လပ်ရေးနေ့တိုင်းမှာ သိပ္ပံရေးရာ၊ ကျောင်းသားရေးရာ၊ လူသားအကျိုးပြုလုပ်ငန်းကို ထူးခြားပေါက်မြောက်အောင် ဆောင်ရွက်နိုင်သူ ဒေသခံများကို ချီးမြှင့်ပေးသွားမှာ ဖြစ်ပါတယ်။
×××××××××××××××××××
မှီး – Britannica & Wikipedia
မင်းထွဋ်ခေါင် မှ ကောက်နှုတ်စုစည်းပြန်ဆိုတင်ပြသည်။
သာမန်ပညာရေး ပြီးဆုံးခဲ့ပြီးနောက် ကင်ဒီဟာ အဆင့်မြင့်ပညာတွေ ဆက်လေ့လာဖို့ အဂ္ဂဒတ်မြို့ကို ပြောင်းရွှေ့ခဲ့ပါတယ်။ အဲဒီအချိန်က အစ္စလာမ့်အင်ပါယာကို ဘုရင် ဟာရွန် အလ်-ရရှစ်ဒ်ရဲ့သား အလ်-မာမွန်က အုပ်ချုပ်နေတာဖြစ်ပြီး ဘဂ္ဂဒတ်ဟာလည်း နိုင်ငံရေးအရ အချက်အချာကြတဲ့ နေရာတစ်ခုပါ။ ဘုရင် အလ်-မာမွန်ဟာ ၀ိဇ္ဇာ သိပ္ပံပညာတွေကို အားပေးမြှင့်တင်ပေးသူ ဖြစ်ပါတယ်။
