Tag: cambodia

ဇူလိုင် ၂၄၊ ၂၀၂၃

M-Media 

-အထွေထွေရွေးကောက်ပွဲမှာ တောင်ပြိုကမ်းပြို အနိုင်ရတော့မယ်လို့ ကမ္ဘောဒီးယား အာဏာရပါတီ CPP က ထုတ်ပြန်ပါတယ်။ 

၇ ကြိမ်မြောက် အထွေထွေရွေးကောက်ပွဲကို မနေ့က ကျင်းပခဲ့တာပါ။ အသက် ၇၀ အရွယ် ၀န်ကြီးချုပ်ဟွန်ဆန်ဟာ သူ့ကိုယှဥ်နိုင်မယ့် အတိုက်အခံပါတီတွေ၊ နိုင်ငံရေးသမားတွေကို ရွေးကောက်ပွဲမ၀င်နိုင်အောင် စီစဥ်ခဲ့ပြီးမှ ကျင်းပတာဖြစ်ပါတယ်။ 

ရွေးကောက်ပွဲကို CPP နဲ့ အိမ်ဖြည့်ပါတီ ၁၇ ခုက ၀င်ရောက်ယှဥ်ပြိုင်ခဲ့ကြပါတယ်။ CPP ဟာ လွှတ်တော်နေရာ ၁၂၅ လုံးကို အနိုင်ရဖို့ ရှိနေပါတယ်။ 

ပါတီပြောရေးဆိုခွင့်ရှိသူ ဆွတ် အိုင်ဆန်က သူတို့ပါတီဟာ တောင်ပြိုကမ်းပြို အနိုင်ရမယ့်အနေအထား ဖြစ်နေပြီလို့ မဲရုံတွေပိတ်ပြီးတဲ့နောက် AFP သတင်းဌာနကို ပြောကြားခဲ့ပါတယ်။ 

အခုရွေးကောက်ပွဲဟာ ဟွန်ဆန်က သူ့သားကို အာဏာလွှဲပေးမယ့် အခင်းအကျင်းလို့ ကျွမ်းကျင်သူတွေက သုံးသပ်ပါတယ်။ 

အသက် ၄၅ နှစ်အရွယ် ဟွန်ဆန်ရဲ့သား ဟွန်မာနတ်လည်း အခုရွေးကောက်ပွဲမှာ အမတ်အဖြစ် ၀င်အရွေးခံပါတယ်။  

၀န်ကြီးချုပ်ဖြစ်လာရင် ဘာလုပ်ဖို့ စီစဥ်ထားလဲဆိုပြီး AFP သတင်းဌာနက မနေ့က မေးမြန်းရာမှာ ဒီအတွက် မှတ်ချက်မပေးချင်ဘူးလို့ ဟွန်မာနတ်က ဖြေကြားခဲ့ပါတယ်။ 

Ref: AFP 

ဇန်နဝါရီ ၁၉၊ ၂၀၂၂
M-Media

-ကမ္ဘောဒီးယား အတိုက်အခံနိုင်ငံရေးခေါင်းဆောင် ကမ်ဆိုခါအပေါ် နိုင်ငံတော်သစ္စာဖောက်မှုနဲ့ တရားစွဲဆိုထားမှုကို ဒီကနေ့မှာ ပြန်လည်ကြားနာမယ်လို့ သိရပါတယ်။

အာဏာကို နှစ်ပေါင်း ၃၀ ကြာ ချုပ်ကိုင်ထားတဲ့ ဝန်ကြီးချုပ်ဟွန်ဆန် အစိုးရဟာ ကမ်ဆိုခါကို ၂၀၁၇ ခုနှစ်မှာ ဖမ်းဆီးခဲ့ပြီး သူ့ရဲ့ပါတီ CNRP ကိုလည်း ၂၀၁၈ ခုနှစ် ရွေးကောက်ပွဲမတိုင်ခင် မတရားအသင်းအဖြစ် ကြေငြာကာ ပါတီဝင်တွေကို ဖမ်းဆီးထောင်ချခဲ့ပါတယ်။

အတိုက်အခံမရှိတဲ့ ၂၀၁၈ ရွေးကောက်ပွဲမှာ ဟွန်ဆန်ရဲ့ပါတီ CPP က ၁၀၀ ရာခိုင်နှုန်း အနိုင်ရခဲ့ပါတယ်။

ကမ်ဆိုခါဟာ ၂၀၁၉ ခုနှစ်မှာ နေအိမ်အကျယ်ချုပ်ကနေ ပြန်လည်လွတ်မြောက်လာခဲ့ပေမယ့် နိုင်ငံရေး ဆောင်ရွက်လို့ မရပါဘူး။

အမေရိကန်နဲ့ ပူးပေါင်းပြီး အစိုးရကို ဖြုတ်ချဖို့ ကြိုးစားတယ်ဆိုတဲ့ စွဲချက်နဲ့ ဝန်ကြီးချုပ်ဟွန်ဆန်အစိုးရက ကမ်ဆိုခါကို နိုင်ငံတော် သစ္စာဖောက်မှုနဲ့ တရားစွဲဆိုထားတာဖြစ်ပါတယ်။ တရားရုံး ကြားနာမှုကို ကိုဗစ်ကပ်ရောဂါကြောင့် ၂ နှစ်တာ ရပ်ဆိုင်းထားရကနေ ဒီကနေ့ ပြန်လည်စတင်မှာ ဖြစ်ပါတယ်။

ကမ်ဆိုခါက ဒီစွပ်စွဲချက်ကို ငြင်းဆိုထားပြီး ဖနွမ်းပင်မြို့ အမေရိကန်သံရုံးကလည်း အတိုက်အခံတွေအပေါ် နိုင်ငံရေးအရ နှိပ်ကွပ်လိုတဲ့ တရားစွဲဆိုမှုတွေ လုပ်နေတာကို ရပ်တန့်ဖို့ ကြေငြာချက် ထုတ်ပြန်ပါတယ်။

ကမ္ဘောဒီးယား တရားရေးဝန်ကြီးဌာနက တရားစွဲဆိုမှုဟာ နိုင်ငံရေးအရ နှိပ်ကွပ်တာမျိုးမဟုတ်ဘဲ အမေရိကန်အနေနဲ့ ပြည်တွင်းရေးကို ဝင်မစွက်ဖို့ တုန့်ပြန်ခဲ့ပါတယ်။

ကမ်ဆိုခါက တရားရုံးအနေနဲ့ စွဲချက်ကို ပယ်ဖျက်ပြီး အမျိုးသားရင်ကြားစေ့ရေး၊ တိုင်းပြည်ဖွံ့ဖြိုးတိုးတက်ရေး သဘောတူညီချက်တစ်ခု ရရှိလိမ့်မယ်လို့ မျှော်လင့်ကြောင်း သတင်းထောက်တွေကို ပြောကြားခဲ့ပါတယ်။

Ref: CNA

ဇန်နဝါရီ ၁၃၊ ၂၀၂၂
M-Media

-မြေမြှုပ်မိုင်း အလုံး ၁၀၀ ကျော် ရှာဖွေပေးခဲ့ပြီး သူရဲကောင်းဆုတံဆိပ် ရရှိခဲ့တဲ့ ကမ္ဘောဒီးယားက နာမည်ကျော် ကြွက်ကလေး မာဂါဝါဟာ တနင်္ဂနွေ​နေ့က ကွယ်လွန်သွားပြီ ဖြစ်ပါတယ်။

မာဂါဝါကို ပြီးခဲ့တဲ့နှစ် ဇွန်လမှာ အငြိမ်းစားပေးခဲ့တာပါ။ သူ့ကို မိုင်းရှာဖို့ လေ့ကျင်သင်ကြားပေးခဲ့တဲ့ အကူအညီပေးရေးအဖွဲ့ APOPO က ပြီးခဲ့တဲ့တစ်ပတ် အစပိုင်းမှာ ကျန်းမာရေးကောင်းခဲ့ပေမယ့် စနေနေ့လောက်မှာ လှုပ်ရှားသွားလာမှုနှေးကွေးကာ အစားမစားတော့ဘဲ တနင်္ဂနွေနေ့မှာတော့ သေဆုံးသွားခဲ့တယ်လို့ အင်္ဂါနေ့က ထုတ်ပြန်ချက်မှာဖော်ပြထားပါတယ်။

ကွယ်လွန်ချိန်မှာ မာဂါဝါဟာ အသက် ၈ နှစ် ရှိပါပြီ။

ပြည်တွင်းစစ် ဆယ်စုနှစ်ချီဖြစ်ပွားတဲ့ ကမ္ဘောဒီးယားဟာ ကမ္ဘာပေါ်မှာ မြေမြှုပ်မိုင်းအများဆုံးရှိရာ နိုင်ငံတွေထဲက တစ်ခုဖြစ်ပြီး ဧရိယာ ၃၈၆ စကွဲယားမိုင်လောက်က မိုင်းတွေပြည့်နေတာဖြစ်ပါတယ်။

ဘလ်ဂျီယံအခြေစိုက် APOPO အဖွဲ့ဟာ အာဖရိကက အမဲလိုက်ကြွက်တွေကို မိုင်းရှာဖို့ လေ့ကျင့်သင်ကြားပေးကာ အသုံးပြုနေတာဖြစ်ပါတယ်။ သူတို့ကို ‘သူရဲကောင်းကြွက်များ’ လို့ အမည်ပေးထားပါတယ်။

လူတွေမိုင်းရှာဖို့ အန္တရာယ်အလွန်များတဲ့ ဒေသတွေမှာ ဒီမိုင်းရှာကြွက်တွေက အလွန်အသုံးဝင်ပါတယ်။ မာဂါ၀ါဟာ တင်းနစ်ကွင်းပမာဏလောက်ရှိတဲ့ ဧရိယာကို မိနစ် ၃၀ အတွင်း မိုင်းရှာနိုင်ပြီး လူတွေရှာမယ်ဆိုရင် ၃ ရက်လောက် ကြာမြင်တဲ့ လုပ်ငန်းဖြစ်ပါတယ်။

မာဂါဝါရဲ့ သူရသတ္တိနဲ့ တာဝန်ကျေပွန်မှုကို ဂုဏ်ပြုတဲ့အနေနဲ့ ယူကေအခြေစိုက် People’s Dispensary for Sick Animals အဖွဲ့က ၂၀၂၀ ခုနှစ်မှာ သူရဲကောင်းဆု ချီးမြှင့်ခဲ့ပြီး မာဂါဝါဟာ ဒီဆုကိုရတဲ့ ပထမဆုံးကြွက်အဖြစ် မှတ်တမ်းဝင်ပါတယ်။

တန်ဇန်းနီးယားမှာပေါက်တဲ့ မာဂါဝါဟာ ၂၀၁၆ ခုနှစ်မှာ ကမ္ဘောဒီးယားကို ရောက်ရှိကာ မိုင်းရှာရေးလုပ်ငန်းတွေကို လုပ်ဆောင်ခဲ့တာ ဖြစ်ပါတယ်။

Ref: Reuters

ဒီဇင်ဘာ ၁၀၊ ၂၀၂၁
M-Media

-အမေရိကန်ထုတ်လက်နက်တွေကို ဖျက်ဆီးဖို့ ဒါမှမဟုတ် လွှတ်ပစ်ကြဖို့ က​မ္ဘောဒီးယားဝန်ကြီးချုပ် ဟွန်ဆန်က စစ်တပ်ကို အမိန့်ပေးလိုက်ပါတယ်။

ကမ္ဘောဒီယားကို လက်နက်ရောင်းချမှု ပိတ်ပင်ကြောင်း ဗုဒ္ဓဟူးနေ့က အမေရိကန်ရဲ့ကြေငြာမှုကို အခုလို တုန့်ပြန်လိုက်တာပါ။

ဟွန်ဆန်အစိုးရရဲ့ လူ့အခွင့်အရေးချိုးဖောက်မှုတွေ၊ ခြစားမှုတွေ၊ ကမ္ဘောဒီးယားနိုင်ငံမှာ တရုတ်ရဲ့ ချယ်လှယ်မှုတွေကို တားဆီးဖို့အတွက် ကမ္ဘောဒီးယားစစ်တပ်နဲ့ ထောက်လှမ်းအဖွဲ့ကို လက်နက်နဲ့ စစ်ဖက်ပစ္စည်း ရောင်းချမှု ပိတ်ပင်တာဖြစ်ကြောင်း အမေရိကန်အစိုးရရဲ့ ထုတ်ပြန်ချက်မှာ ဖော်ပြထားပါတယ်။

ဒီကနေ့ Facebook စာမျက်နှာက ဟွန်ဆန်ရဲ့ပို့စ်မှာ အမေရိကန်လက်နက်တွေရဲ့ အရည်အသွေးကို ဝေဖန်ခဲ့ပါတယ်။

“ကမ္ဘောဒီးယားမှာ လက်ရှိအသုံးပြုနေတဲ့ လက်နက်နဲ့ စစ်ဖက်ဆိုင်ရာပစ္စည်းတွေကို ပြန်လည်သုံးသပ်ဖို့ စစ်တပ်ကို ကျွန်တော် အမိန့်ပေးထားတယ်။ အမေရိကန် လက်နက်တွေ၊ စစ်ဖက်အသုံးအဆောင်တွေရှိရင် အားလုံးကို ဖယ်ထုတ်ပြီး ​ဂိုထောင်ထဲပို့ထားတာ၊ ဖျက်ဆီးပစ်တာတွေ လုပ်ရပါလိမ့်မယ်”

အမေရိကန်က လက်နက်ရောင်းချမှု ပိတ်ပင်တာဟာ လွတ်လပ်တဲ့ ကာကွယ်ရေးစွမ်းအားမျိုး ရှိဖို့လိုတယ်ဆိုတာ နောင်အစိုးရဖြစ်လာကြမယ့် ကမ္ဘောဒီးယားမျိုးဆက်ကို သတိပေးလိုက်တာဖြစ်ကြောင်း ဟွန်ဆန်က ထည့်သွင်းပြောဆိုခဲ့ပြီး အမေရိကန်လက်နက်တွေကို မသုံးဖို့လည်း တိုက်တွန်းခဲ့ပါတယ်။

“အမေရိကန်လက်နက်တွေ သုံးတဲ့လူ တော်တော်များများ စစ်ရှုံးကြတာပဲ” လို့ အာဖဂန်နစ္စတန်ကို ဥပမာပေးပြီး ပြောခဲ့ပါတယ်။

ဝန်ကြီးချုပ်ဟွန်ဆန်ဟာ အာဏာကို နှစ်ပေါင်း ၃၀ ကျော် ချုပ်ကိုင်ထားတာဖြစ်ပြီး ၂၀၁၈ ခုနှစ် ရွေးကောက်ပွဲမှာ အဓိကအတိုက်အခံ နိုင်ငံရေးပါတီကို မတရားအသင်းကြေငြာ ဖျက်သိမ်းခဲ့ပါတယ်။ ဟွန်ဆန်ဟာ သားဖြစ်သူကို သူ့နေရာဆက်ခံဖို့အတွက်လည်း စီစဉ်နေပါတယ်။

ထိုင်းပင်လယ်ကွေ့နား တရုတ်လောင်းကစားလုပ်ငန်းတွေ ကြီးစိုးတဲ့ သီဟာနုဗီလီမြို့က စစ်စခန်းတစ်ခုကလည်း အမေရိကန်နဲ့ ကမ္ဘောဒီးယားတို့ရဲ့ ဆက်ဆံရေးကို ပိုမိုဆိုးရွားစေပါတယ်။ ကမ္ဘောဒီးယားက ဒီစခန်းကို တရုတ်အခြေစိုက်ဖို့ ပေးထားတယ်လို့ အမေရိကန်က စွပ်စွဲထားပြီး ဝန်ကြီးချုပ်ဟွန်ဆန်က ဒါကို ငြင်းထားကာ တရုတ်ဟာ ဒီစခန်းအဆင်မြှင့်တင်ဖို့ ကူညီပေးနေတာသာဖြစ်တယ်လို့ ဆိုပါတယ်။

Ref: Bangkok Post