News @ M-Media

Tag: cambodia

  • အမေရိကန်လက်နက်များကို ဖျက်ဆီးရန် က​မ္ဘောဒီးယားဝန်ကြီးချုပ် အမိန့်ထုတ်

    အမေရိကန်လက်နက်များကို ဖျက်ဆီးရန် က​မ္ဘောဒီးယားဝန်ကြီးချုပ် အမိန့်ထုတ်

    ဒီဇင်ဘာ ၁၀၊ ၂၀၂၁
    M-Media

    -အမေရိကန်ထုတ်လက်နက်တွေကို ဖျက်ဆီးဖို့ ဒါမှမဟုတ် လွှတ်ပစ်ကြဖို့ က​မ္ဘောဒီးယားဝန်ကြီးချုပ် ဟွန်ဆန်က စစ်တပ်ကို အမိန့်ပေးလိုက်ပါတယ်။

    ကမ္ဘောဒီယားကို လက်နက်ရောင်းချမှု ပိတ်ပင်ကြောင်း ဗုဒ္ဓဟူးနေ့က အမေရိကန်ရဲ့ကြေငြာမှုကို အခုလို တုန့်ပြန်လိုက်တာပါ။

    ဟွန်ဆန်အစိုးရရဲ့ လူ့အခွင့်အရေးချိုးဖောက်မှုတွေ၊ ခြစားမှုတွေ၊ ကမ္ဘောဒီးယားနိုင်ငံမှာ တရုတ်ရဲ့ ချယ်လှယ်မှုတွေကို တားဆီးဖို့အတွက် ကမ္ဘောဒီးယားစစ်တပ်နဲ့ ထောက်လှမ်းအဖွဲ့ကို လက်နက်နဲ့ စစ်ဖက်ပစ္စည်း ရောင်းချမှု ပိတ်ပင်တာဖြစ်ကြောင်း အမေရိကန်အစိုးရရဲ့ ထုတ်ပြန်ချက်မှာ ဖော်ပြထားပါတယ်။

    ဒီကနေ့ Facebook စာမျက်နှာက ဟွန်ဆန်ရဲ့ပို့စ်မှာ အမေရိကန်လက်နက်တွေရဲ့ အရည်အသွေးကို ဝေဖန်ခဲ့ပါတယ်။

    “ကမ္ဘောဒီးယားမှာ လက်ရှိအသုံးပြုနေတဲ့ လက်နက်နဲ့ စစ်ဖက်ဆိုင်ရာပစ္စည်းတွေကို ပြန်လည်သုံးသပ်ဖို့ စစ်တပ်ကို ကျွန်တော် အမိန့်ပေးထားတယ်။ အမေရိကန် လက်နက်တွေ၊ စစ်ဖက်အသုံးအဆောင်တွေရှိရင် အားလုံးကို ဖယ်ထုတ်ပြီး ​ဂိုထောင်ထဲပို့ထားတာ၊ ဖျက်ဆီးပစ်တာတွေ လုပ်ရပါလိမ့်မယ်”

    အမေရိကန်က လက်နက်ရောင်းချမှု ပိတ်ပင်တာဟာ လွတ်လပ်တဲ့ ကာကွယ်ရေးစွမ်းအားမျိုး ရှိဖို့လိုတယ်ဆိုတာ နောင်အစိုးရဖြစ်လာကြမယ့် ကမ္ဘောဒီးယားမျိုးဆက်ကို သတိပေးလိုက်တာဖြစ်ကြောင်း ဟွန်ဆန်က ထည့်သွင်းပြောဆိုခဲ့ပြီး အမေရိကန်လက်နက်တွေကို မသုံးဖို့လည်း တိုက်တွန်းခဲ့ပါတယ်။

    “အမေရိကန်လက်နက်တွေ သုံးတဲ့လူ တော်တော်များများ စစ်ရှုံးကြတာပဲ” လို့ အာဖဂန်နစ္စတန်ကို ဥပမာပေးပြီး ပြောခဲ့ပါတယ်။

    ဝန်ကြီးချုပ်ဟွန်ဆန်ဟာ အာဏာကို နှစ်ပေါင်း ၃၀ ကျော် ချုပ်ကိုင်ထားတာဖြစ်ပြီး ၂၀၁၈ ခုနှစ် ရွေးကောက်ပွဲမှာ အဓိကအတိုက်အခံ နိုင်ငံရေးပါတီကို မတရားအသင်းကြေငြာ ဖျက်သိမ်းခဲ့ပါတယ်။ ဟွန်ဆန်ဟာ သားဖြစ်သူကို သူ့နေရာဆက်ခံဖို့အတွက်လည်း စီစဉ်နေပါတယ်။

    ထိုင်းပင်လယ်ကွေ့နား တရုတ်လောင်းကစားလုပ်ငန်းတွေ ကြီးစိုးတဲ့ သီဟာနုဗီလီမြို့က စစ်စခန်းတစ်ခုကလည်း အမေရိကန်နဲ့ ကမ္ဘောဒီးယားတို့ရဲ့ ဆက်ဆံရေးကို ပိုမိုဆိုးရွားစေပါတယ်။ ကမ္ဘောဒီးယားက ဒီစခန်းကို တရုတ်အခြေစိုက်ဖို့ ပေးထားတယ်လို့ အမေရိကန်က စွပ်စွဲထားပြီး ဝန်ကြီးချုပ်ဟွန်ဆန်က ဒါကို ငြင်းထားကာ တရုတ်ဟာ ဒီစခန်းအဆင်မြှင့်တင်ဖို့ ကူညီပေးနေတာသာဖြစ်တယ်လို့ ဆိုပါတယ်။

    Ref: Bangkok Post

  • ကမ္ဘာဒီးယားဝန်ကြီးချုပ်က စစ်ကောင်စီနိုင်ငံခြားရေးဝန်ကြီးကို တွေ့ဆုံရန် ဖိတ်ကြားထား

    ကမ္ဘာဒီးယားဝန်ကြီးချုပ်က စစ်ကောင်စီနိုင်ငံခြားရေးဝန်ကြီးကို တွေ့ဆုံရန် ဖိတ်ကြားထား

    ဒီဇင်ဘာ ၂၊ ၂၀၂၁
    M-Media

    -စစ်ကောင်စီခန့် နိုင်ငံခြားရေးဝန်ကြီး ဦး၀ဏ္ဏမောင်လွင်ကို လာမယ့်တစ်ပတ်မှာ လာရောက်ဖို့ ကမ္ဘောဒီးယားဝန်ကြီးချုပ် ဟွန်ဆန်က ဒီကနေ့မိန့်ခွန်းမှာ ဖိတ်ကြားလိုက်ပါတယ်။

    ကမ္ဘောဒီးယားဟာ လာမယ့်ဇန်နဝါရီမှာ အာဆီယံဥက္ကဌအဖြစ် တာဝန်ယူမှာပါ။ အခုဖိတ်ကြားမှုဟာ မြန်မာနိုင်ငံက မတည်ငြိမ်မှုတွေ ပြေလည်ရေးအတွက် သံတမန်နည်းလမ်းနဲ့ ဆောင်ရွက်ဖို့ ကမ္ဘောဒီးယားက ခြေလှမ်းစလှမ်းတာလို့ ကျွမ်းကျင်သူတွေက သုံးသပ်ပါတယ်။

    ဝန်ကြီးချုပ်ဟွန်ဆန်ကိုယ်တိုင် အာဏာရှင်ဖြစ်ပြီး နှစ်ပေါင်း ၄၀ နီးပါးလောက် အာဏာဆုပ်ကိုင်ထားတာဖြစ်ပါတယ်။ အတိုက်အခံတွေကို ညှင်းပမ်းနှိပ်ကွပ်မှုအတွက်လည်း နိုင်ငံတကာအသိုင်းအ၀ိုင်းရဲ့ ဝေဖန်မှုကို ခံနေရပါတယ်။

    စစ်ကောင်စီ နိုင်ငံခြားရေးဝန်ကြီး ဦး၀ဏ္ဏမောင်လွင်ဟာ လာမယ့်တစ်ပတ် တနင်္လာနေ့၊ အင်္ဂါ နှစ်ရက် လာရောက်ဖို့ ဟွန်ဆန်က ဖိတ်ကြားခဲ့တာပါ။

    ဟွန်ဆန်ဟာ မြန်မာနိုင်ငံက ပြဿနာ ဖြေရှင်းရေးအတွက် အာဆီယံအထူးကိုယ်စားလှယ်တစ်ဦး ခန့်အပ်ဖို့ စဉ်းစားနေတယ်လို့လည်း ယခင်က ပြောကြားဖူးပါတယ်။

    အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် တက်ရောက်ခဲ့တဲ့ ဧပြီလက အာဆီယံထိပ်သီးအစည်းအဝေးမှာ မြန်မာ့အရေးဖြေရှင်းဖို့ အထူးကိုယ်စားလှယ်တစ်ဦး ခန့်အပ်ရေး သဘောတူခဲ့ပြီး ဘရူနိုင်းဒုတိယနိုင်ငံခြားရေးဝန်ကြီးကို ဩဂုတ်လမှာ ခန့်အပ်နိုင်ခဲ့ပါတယ်။

    ဒါပေမယ့် စစ်ကောင်စီက ပူးပေါင်းဆောင်ရွက်မှုမရှိတဲ့အတွက် အာဆီယံဟာ မြန်မာအာဏာသိမ်းစစ်ခေါင်းဆောင်ကို ဒေသတွင်း ထိပ်သီးအစည်းအဝေး ၃ ခု တက်ရောက်ခွင့် မပေးခဲ့ပါဘူး။

    Ref: Bangkok Post

  • ကမ္ဘောဒီယား ၀န်ကြီးချုပ်က သားဖြစ်သူကို အာဏာအမွေ​ပေးမည်

    ကမ္ဘောဒီယား ၀န်ကြီးချုပ်က သားဖြစ်သူကို အာဏာအမွေ​ပေးမည်

    ဒီဇင်ဘာ ၂၊ ၂၀၂၁
    M-Media

    -အာဏာရှင်စာရင်းဝင်တဲ့ ကမ္ဘောဒီယားဝန်ကြီးချုပ် ဟွန်ဆန်က သူ့နေရာကို သားဖြစ်သူ ဆက်ခံလိမ့်မယ်လို့ ဒီကနေ့မှာ ကြေငြာပါတယ်။

    တိုင်းပြည်ကို ၃၆ နှစ်ကြာ စိုးမိုးအုပ်ချုပ်လာတဲ့ ဟွန်ဆန်ဟာ အတိုက်အခံနိုင်ငံရေးသမားတွေကို နှိပ်ကွပ်ညှင်းပမ်းမှုအတွက် နိုင်ငံတကာရဲ့ဝေဖန်မှုကို ခံနေရသူပါ။

    ကမ်းရိုးတန်းပြည်နယ် ပရီချ်သီဟာနုမှာ ဒီကနေ့မိန့်ခွန်းပြောခဲ့ပြီး သားဖြစ်သူ ဟွန်မာနက်ကို သူ့နေရာဆက်ခံမယ့်သူအဖြစ် ဟွန်ဆန်က အတည်ပြုခဲ့ပါတယ်။

    “ကျွန်တော်သား ဝန်ကြီးချုပ်အဖြစ် ဆက်ခံမှာကို ကျွန်တော်ထောက်ခံပါတယ်”

    အသက် ၄၄ နှစ်အရွယ် ဟွန်မာနက်ဟာ ကမ္ဘောဒီယား တော်ဝင်စစ်တပ်ရဲ့ ဒုတိယအကြီးအကဲနဲ့ စစ်ဦးစီးအရာရှိချုပ်အဖြစ် တာဝန်ယူထားသူပါ။ အမေရိကန်စစ်တက္ကသိုလ် West Point ကနေ ၁၉၉၉ ခုနှစ်က ဘွဲ့ရထားပြီး၊ ဗြိတိန် Bristol တက္ကသိုလ်ကနေလည်း စီးပွားရေးဆိုင်ရာ ဒေါက်တာဘွဲ့ကို ရရှိထားပါတယ်။

    ဟွန်ဆန်ရဲ့ အခုကြေငြာချက်ကြောင့် မာနက်ဟာ ၂၀၂၃ ခုနှစ်​ ရွေးကောက်ပွဲမှာ ဝန်ကြီးချုပ်အဖြစ် ဝင်ရောက်ယှဉ်ပြိုင်လာဖွယ် ရှိနေပါတယ်။

    နိုင်ငံရေးမင်းဆက် ထူထောင်နေတယ်ဆိုတဲ့ ဝေဖန်မှုတွေကို မနေ့က မိန့်ခွန်းမှာ ဟွန်ဆန်က ပြန်လည်ချေပခဲ့ပြီး ဂျပန်နိုင်ငံကို ထောက်ပြခဲ့ပါတယ်။

    “ဂျပန်မှာတောင် နိုင်ငံရေးမင်းဆက် ရှိနေတာပဲ။ (ဝန်ကြီးချုပ်ဟောင်း) အာ​ဘေးကိုကြည့်။ သူအဖိုးက ဝန်ကြီးချုပ် ကမ္ဘောဒီးယားကိုတောင် လာလည်သွားသေးတယ်။ သူ့အဖေက နိုင်ငံခြားရေးဝန်ကြီး။ သူက ဝန်ကြီးချုပ်”

    ဟွန်ဆန်ဟာ ၂၀၁၈ ခုနှစ်ရွေးကောက်ပွဲ မတိုင်ခင်မှာ အစိုးရဖြုတ်ချဖို့ ကြိုးစားတယ်ဆိုတဲ့ခေါင်းစဉ်နဲ့ အဓိကအတိုက်အခံပါတီကို ဖျက်သိမ်းခဲ့ပြီး နိုင်ငံရေးသမားအများအပြားကိုလည်း ဖမ်းဆီးနှိပ်စက်ခဲ့ပါတယ်။

    ဟွန်ဆန်ရဲ့ CPP ပါတီဟာ ၁၉၇၉ ခုနှစ်ကစတင်ကာ ရွေးကောက်ပွဲတိုင်းမှာ အနိုင်ရခဲ့ပြီး လက်ရှိ လွှတ်တော်အမတ် ၁၂၅ နေရာစလုံးကို CPP ကပဲ အနိုင်ရထားတာ ဖြစ်ပါတယ်။

    Ref: Reuters

  • ထိုင်းက ပြန်ပို့သည့် အတိုက်အခံ နိုင်ငံရေးသမား ၃ ဦးကို ကမ္ဘောဒီယားက ထောင်ချ

    ထိုင်းက ပြန်ပို့သည့် အတိုက်အခံ နိုင်ငံရေးသမား ၃ ဦးကို ကမ္ဘောဒီယားက ထောင်ချ

    နိုဝင်ဘာ ၂၂၊ ၂၀၂၁
    M-Media

    -ထိုင်းနိုင်ငံက ပြန်ပို့လိုက်တဲ့ အတိုက်အခံ တက်ကြွလှုပ်ရှားသူ နိုင်ငံရေးသမား ၃ ဦးကို ကမ္ဘောဒီးယားအစိုးရက ထောင်ဒဏ်တွေ ချမှတ်လိုက်ပါတယ်။

    ဆူပူအောင်လှုံဆော်မှု၊ အကြည်အညိုပျက်စေမှုတွေနဲ့ တရားစွဲဆို ထောင်ချခဲ့တာဖြစ်ပြီး ထိုင်းနိုင်ငံကတော့ ဖိနှိပ်ခံရမယ့်အန္တရာယ်ရှိနေသူတွေကို ပြန်ပို့တဲ့အတွက် ကုလသမဂ္ဂနဲ့ လူ့အခွင့်အရေးအဖွဲ့တွေရဲ့ ဝေဖန်မှုကို ခံနေရပါတယ်။

    ဝန်ကြီးချုပ် ဟွန်ဆန်ဦးဆောင်တဲ့ ကမ္ဘောဒီးယားအစိုးရဟာ ၂၀၁၈ ခုနှစ် ရွေးကောက်ပွဲ မစတင်ခင်ကတည်း အတိုက်အခံ နိုင်ငံရေးပါတီတွေကို ဖျက်သိမ်းတာ၊ နိုင်ငံရေးသမားတွေကို ဖမ်ဆီးနှိပ်ကွပ်တာတွေ လုပ်ဆောင်ခဲ့တာပါ။ ဒါ့ကြောင့် နိုင်ငံရေးသမားတွေနဲ့ တက်ကြွလှုပ်ရှားသူတွေဟာ နိုင်ငံအတွင်းမှာ ပုန်းအောင်နေရသလို၊ အိမ်နီးချင်း ထိုင်းနိုင်ငံကို ထွက်ပြေးရတာတွေ ရှိနေပါတယ်။

    အခု ထောင်ချခံရတဲ့ Veourn Veasna၊ Voeung Samnang နဲ့ Thavry Lanh တို့ဟာ ဟွန်ဆန်အစိုးရက ဖျက်သိမ်းထားတဲ့ အတိုက်အခံနိုင်ငံရေးပါတီက ဖြစ်ပါတယ်။ ထိုင်းနိုင်ငံမှာ ဒုက္ခသည်အဖြစ် ကုလသမဂ္ဂမှာ စာရင်းသွင်းပြီး ခိုလှုံနေသူတွေပါ။

    ကမ္ဘောဒီးယားရဲတပ်ဖွဲ့က သူတို့မှာ ဖမ်း၀ရမ်းရှိတဲ့အတွက် ဖမ်းဆီးခဲ့တာဖြစ်ပြီး ဒီလူ ၃ ဦးဟာ ထိုင်းနဲ့ ကမ္ဘောဒီးယားတို့က လူဝင်မှုကြီးကြပ်ရေး ဥပဒေတွေကို ချိုးဖောက်ထားသူတွေဖြစ်တယ်လို့ ပြောပါတယ်။ ကမ္ဘောဒီးယားမြို့တော် ဖနွမ်းပင်က ထိုင်းသံရုံးကတော့ ဒီကိစ္စအတွက် မှတ်ချက်မပေးခဲ့ပါဘူး။

    လူ့အခွင့်အရေးစောင့်ကြည့်အဖွဲ့ Human Rights Watch ရဲ့ အာရှဆိုင်ရာအကြီးအကဲ ဖီလ် ရောဘတ်ဆန်က ထိုင်းနဲ့ ကမ္ဘောဒီးယားအာဏာပိုင်တွေရဲ့ ဒီဆောင်ရွက်မှုဟာ ဒုက္ခသည်တွေရဲ့ အခွင့်အရေး၊ သူတို့ကို ကာကွယ်ပေးရေး ဥပဒေတွေကို ချိုးဖောက်မှုဖြစ်တယ်လို့ ဝေဖန်ပြောကြားခဲ့ပါတယ်။

    Ref: Bangkok Post

    #mmInternationalNews

  • တရုတ်ကိုအားမကိုးလျှင် အားကိုးစရာမရှိဟု ကမ္ဘောဒီယားအာဏာရှင်ပြော

    တရုတ်ကိုအားမကိုးလျှင် အားကိုးစရာမရှိဟု ကမ္ဘောဒီယားအာဏာရှင်ပြော

    မေ ၂၁၊ ၂၀၂၁
    M-Media

    -တရုတ်နိုင်ငံကို အားမကိုးရင် မိမိတို့မှာ အားကိုးစရာမရှိဘူးလို့ ကမ္ဘောဒီးယားဝန်ကြီးချုပ် ဟွန်ဆန်က ပြောကြားလိုက်ပါတယ်။

    တရုတ်ဟာ ဟွန်ဆန်အစိုးရကို အဓိကကျောထောက်နောက်ခံပေးနေတဲ့ နိုင်ငံဖြစ်ပါတယ်။ နိုင်ငံအတွင်း အခြေခံအဆောက်အဦး တည်ဆောက်ရေးအတွက် ဒေါ်လာ ဘီလီယံချီ ထုတ်ပေးထားတာပါ။

    ကမ္ဘောဒီးယားဟာ တရုတ်ကို မှီခိုလွန်းပြီး အကြွေးနွံထဲနစ်တော့မယ်ဆိုတဲ့ ဝေဖန်မှုတွေ ရှိလာပါတယ်။ မနေ့က အွန်လိုင်းကနေတစ်ဆင့်ပြုလုပ်တဲ့ Future of Asia အစည်းအဝေးမှာ ဝန်ကြီးချုပ် ဟွန်ဆန်က ဒီဝေဖန်မှုတွေကို ကာကွယ်ခဲ့ပါတယ်။

    “တရုတ်ကိုမမှီခိုရင် ကျွန်တော် ဘယ်သူ့ကို မီခိုရမလဲ။ တရုတ်ဆီမတောင်းရင် ဘယ်သူ့ဆီ ကျွန်တော်တောင်းရမလဲ”

    ကမ္ဘောဒီယားမှာလုပ်ပေးနေတဲ့ ဖွံဖြိုးရေးလုပ်ငန်းကိုမှီပြီး တရုတ်က ရေတပ်စခန်းဆောက်ဖို့ရှိနေတယ်ဆိုတဲ့ သတင်းတွေကိုလည်း ဟွန်ဆန်က ထပ်မံငြင်းဆိုခဲ့ပါတယ်။

    ဟွန်ဆန်ဟာ နိုင်ငံအတွင်းက အဓိကအတိုက်အခံပါတီ CNA ကို ဖျက်သိမ်းတဲ့အထိ နှိပ်ကွပ်ခဲ့ပြီး ခေါင်းဆောင်တွေကိုလည်း နို်ငငံတော်သစ္စာဖောက်မှုနဲ့ တရားစွဲဆိုထားပါတယ်။ ဟွန်ဆန်ရဲ့ အာဏာရှင်ဆန်မှုကြောင့် ဥရောပသမဂ္ဂနဲ့ အနောက်နိုင်ငံတွေက ပိတ်ဆို့မှုတစ်ချို့ ပြုလုပ်ထားပါတယ်။

    Ref: Nikkei Asia