News @ M-Media

Tag: Canada

  • တရုတ်အစိုးရရန်ကြောင့် ဥရောပ လွှတ်တော်နှင့် ကနေဒါအစိုးရရုံးများတွင် TikTok ကို ပိတ်ပင်

    တရုတ်အစိုးရရန်ကြောင့် ဥရောပ လွှတ်တော်နှင့် ကနေဒါအစိုးရရုံးများတွင် TikTok ကို ပိတ်ပင်

    မတ် ၁၊ ၂၀၂၃

    M-Media 


    -TikTok ကို အနောက်နိုင်ငံက အစိုးရ၀န်ထမ်းတွေ၊ အစိုးရနဲ့ပတ်သက်တဲ့ ကိရိယာတွေမှာ အသုံးပြုခွင့် ပိတ်ပင်တာ တိုးလာနေပြီး ဥရောပနဲ့ ကနေဒါအစိုးရတို့ကလည်း ပိတ်ပင်တာတွေ လုပ်လာပါတယ်။ 

    လွှတ်တော်အမတ်တွေဟာ သူတို့ရဲ့ ကိုယ်ပိုင်ဖုန်းတွေ၊ အဖွဲ့အစည်းအီးမေးလ်နဲ့ Network ကွန်ယက်တွေကို အသုံးပြုတဲ့ ကိုယ်ပိုင် ပစ္စည်းတွေမှာ TikTok အက်ပလီကေးရှင်းကို ဖျက်ထားရမယ်လို့ ဥရောပလွှတ်တော်က တနင်္လာနေ့မှာ ဆုံးဖြတ်ချက် ချခဲ့ပါတယ်။  

    TikTok ရဲ့ မိခင်ကုမ္ပဏီ ByteDance ဟာ တရုတ်နိုင်ငံအခြေစိုက် ဖြစ်ပါတယ်။ တရုတ်အစိုးရဟာ ပြည်တွင်းက ကုမ္ပဏီတိုင်းကို ထိန်းချုပ်ထားပြီး TikTok ကို အသုံးပြုကာ စောင့်ကြည့်တာတွေ၊ သူလျှိုလုပ်တာတွေ ရှိနိုင်တဲ့အတွက် လုံခြုံရေးဆိုင်ရာ အန္တရာယ်ရှိတယ်လို့ အနောက်နိုင်ငံတွေက သတိပေးထားတာဖြစ်ပါတယ်။ 

    ဥရောပကောင်စီနဲ့၊ ဥရောပကော်မရှင်တို့ကလည်း သူတို့အဖွဲ့အစည်းက ၀န်ထမ်းတွေရဲ့ ဖုန်း၊ လက်တော့တွေထဲမှာ TikTiok ကို အင်စတောမလုပ်ဖို့ ပြီးခဲ့တဲ့တစ်ပတ်မှာ အမိန့်ထုတ်ထားပါတယ်။ 

    ကနေဒါ

    ကနေဒါကလည်း အစိုးရအဖွဲ့အစည်းတွေ အသုံးပြုတဲ့ အီလက်ထရောနစ်ကိရိယာတွေမှာ ဖေဖော်၀ါရီ ၂၈ ရက်နေ့ကစပြီး TikTok ကို ဖယ်ရှားဖို့ အမိန့်ထုတ်လိုက်ပါတယ်။ 

    ဒီအက်ပလီကေးရှင်းဟာ ကိုယ်ရေးအချက်အလက် ပေါက်ထွက်မှု၊ လုံခြုံရေးဆိုင်ရာ အန္တရာယ်တွေ ကြီးကြီးမားမားရှိတယ်လို့ ကနေဒါ ဆက်သွယ်ရေး၀န်ကြီးက ပြောကြားခဲ့ပါတယ်။ 

    အမေရိကန်မှာ ပြည်ထောင်စုအဆင့် အစိုးရ၀န်ထမ်းတွေ TikTok မသုံးရလို့ ပြီးခဲ့တဲ့နှစ်မှာ တားမြစ်ခဲ့ပြီး၊ အစိုးရအဖွဲ့အစည်းတွေအနေနဲ့ နောက်ထပ် ရက် ၃၀ အတွင်း အက်ပလီကေးရှင်းကို အပြီးဖျက်ထားဖို့ ဖေဖော်၀ါရီ ၂၇ ရက်နေ့မှာ အိမ်ဖြူတော်က ထပ်မံအမိန့်ထုတ်ပြန်ခဲ့ပါတယ်။ 

    အမေရိကန်တက္ကသိုလ်တွေကလည်း သူတို့ရဲ့ Network ကွန်ယက်တွေကိုသုံးရင် TikTok ကို အင်စတောမလုပ်ဖို့ တားမြစ်ထားပါတယ်။ 

    TikTok ရဲ့ ပြောရေးဆိုခွင့်ရှိသူတစ်ဦးကတော့ ဒီဆုံးဖြတ်ချက်တွေ၊ အမိန့်တွေအတွက် စိတ်ပျက်ရတယ်လို့ တုန့်ပြန်ပြောကြားခဲ့ပါတယ်။ 

    Ref: BBC

  • ကနေဒါနိုင်ငံအလယ်ပိုင်းတွင် ဓားထိုးသတ်ဖြတ်မှုများ ဆက်တိုက်ဖြစ်ပွား

    ကနေဒါနိုင်ငံအလယ်ပိုင်းတွင် ဓားထိုးသတ်ဖြတ်မှုများ ဆက်တိုက်ဖြစ်ပွား

    စက်တင်ဘာ ၅၊ ၂၀၂၂
    M-Media

    သတ်ဖြတ်မှုအတွက် သံသယရှိသူများ

    -ကနေဒါအလယ်ပိုင်း ဆက်ကက်ချီ၀မ်ပြည်နယ်မှာ ဓားထိုးမှုတွေ ဆက်တိုက်ဖြစ်ပွားခဲ့တာကြောင့် အနည်းဆုံး လူ ၁၀ ဦး သေဆုံးခဲ့တယ်လို့ အာဏာပိုင်တွေက ထုတ်ပြန်ပါတယ်။

    အနည်းဆုံး နေရာ ၁၃ ခုမှာ ဖြစ်ပွားခဲ့တာဖြစ်ပြီး ဒဏ်ရာရသူက ၁၅ ဦး ရှိပါတယ်။ ကျူးလွန်တဲ့သူတွေဟာ ဒါမီယန် ဆန်ဒါဆန်နဲ့ မိုင်လက်စ် ဆန်ဒါဆန်တို့ဖြစ်ပြီး လက်နက်တွေ ကိုင်ဆောင်ထားကာ လက်ရှိမှာ ထွက်ပြေးနေတယ်လို့ ရဲတပ်ဖွဲ့က ထုတ်ပြန်ထားပါတယ်။

    လွတ်မြောက်နေသူတွေဟာ အန္တရာယ်ရှိတာကြောင့် မိမိတို့ အိမ်တွင်းမှာသာ နေထိုင်ဖို့ ပြည်နယ်အာဏာပိုင်တွေက အမိန့်ထုတ်ထားပါတယ်။ တိုက်ခိုက်မှု ဖြစ်ပွားခဲ့တဲ့ မြို့နယ်တစ်ချို့မှာ အရေးပေါ်အခြေအနေ ကြေငြာထားပါတယ်။

    ကနေဒါမှာ တစ်ချိန်တည်းတစ်ပြိုင်တည်း ဒီလို သတ်ဖြတ်မှု အမြောက်အများ ကျူးလွန်တာမျိုး ဖြစ်လေ့ဖြစ်ထ မရှိပါဘူး။

    ၀န်ကြီးချုပ် ဂျက်စတင် ထရူဒူကလည်း ဒီတိုက်ခိုက်မှုတွေကို ရှုတ်ချခဲ့ပါတယ်။

    “ဒီလိုရက်စက်ကြမ်းကြုတ်တဲ့ တိုက်ခိုက်မှုမျိုးအတွက် ၀မ်းနည်း ကြေကွဲရပါတယ်။ ကျူးလွန်သူတွေကို တရားဥပဒေရှေ့မှောက် မရောက်ရောက်အောင် ခေါ်လာမှာပါ”

    Ref: BBC

  • ကနေဒါ ဌာနေများအပေါ် ကက်သလစ်အသင်းတော်က ကျူးလွန်မှုအတွက် ပုပ်ရဟန်းမင်းကြီး တောင်းပန်

    ကနေဒါ ဌာနေများအပေါ် ကက်သလစ်အသင်းတော်က ကျူးလွန်မှုအတွက် ပုပ်ရဟန်းမင်းကြီး တောင်းပန်

    ဇူလိုင် ၃၁၊ ၂၀၂၂
    M-Media

    -ကနေဒါက ဌာနေတိုင်းရင်းသားတွေကို ခရစ်ယာန်ကက်သလစ်အသင်းတော်က အဓမ္မဘာသာပြောင်းမှု၊ ကျူးလွန်ခဲ့မှုတွေဟာ လူမျိုးတုန်းသတ်ဖြတ်မှု မြောက်တယ်လို့ ပုပ်ရဟန်းမင်းကြီး ဖရန်စစ်က ၀န်ခံ ပြောကြားလိုက်ပါတယ်။

    ပုပ်ရဟန်းမင်းကြီးဟာ ကနေဒါနိုင်ငံကို ပြီးခဲ့တဲ့တစ်ပတ်မှာ သွားရောက်ခဲ့တာ ဖြစ်ပါတယ်။ ကက်သလစ်အသင်းတော်ရဲ့ လုပ်ရပ်တွေအတွက်လည်း ကနေဒါ ဌာနေတိုင်းရင်းသားတွေကို ပုပ်ရဟန်းမင်းကြီးက တောင်းပန်ခဲ့ပါတယ်။

    ၁၈၀၀ ပြည့်နှစ်တွေကနေ ၁၉၉၀ ပြည့်နှစ်တွေအထိ ကနေဒါအစိုးရဟာ ဌာနေတိုင်းရင်းသား ကလေးငယ် ၁၅၀၀၀ လောက်ကို ကက်သလစ်အသင်းတော်က ဦးစီးဖွင့်လှစ်ထားတဲ့ သာသနာပြုကျောင်း ၁၃၉ ကျောင်းကို ပို့ဆောင်ကာ ဘာသာရေး၊ ဘာသာစကား၊ လူမျိုးရေးနဲ့ ယဥ်ကျေးမှုအမှတ်သညာတွေ ပျောက်သွားအောင် အဓမ္မဆောင်ရွက်ခဲ့တာ ဖြစ်ပါတယ်။

    ကလေးတွေအပေါ် ရုပ်ပိုင်းဆိုင်ရာ၊ စိတ်ပိုင်းဆိုင်ရာ၊ လိင်ပိုင်းဆိုင်ရာ စော်ကားတာမျိုးတွေ အများပြားဖြစ်ခဲ့ပြီး၊ အဟာရချို့တဲ့မှု၊ ရောဂါဘယတွေ၊ စွန့်ပစ်ထားမှုတွေကြောင့် ထောင်နဲ့ချီ သေဆုံးခဲ့ပါတယ်။

    ပုပ်ရဟန်းမင်းကြီးက ‘ကလေးတွေကို မိဘတွေထံက အဓမ္မခေါ်ဆောင်ပြီး ယဥ်ကျေးမှု ဓလေ့ထုံးတမ်းတွေ၊ စိတ်ပိုင်းဆိုင်ရာ၊ ရုပ်ပိုင်းဆိုင်ရာ၊ ဘာသာတရား၊ လူမျိုးရေး အမှတ်သညာတွေ ပပျောက်အောင် ဆောင်ရွက်မှုဟာ’ လူမျိုးတုန်းသတ်ဖြတ်မှုမြောက်တယ်လို့ မနေ့က ရောမကိုမပြန်ခင် ပြုလုပ်တဲ့ သတင်းစာရှင်းလင်းပွဲမှာ ၀န်ခံပြောကြားခဲ့ပါတယ်။

    “စိတ်ထဲမှာ စဥ်းစားလို့မရတဲ့အတွက် လူမျိုးတုန်းသတ်ဖြတ်မှု စကားလုံးကို မပြောခဲ့ပါဘူး။ ဒါပေမယ့် အဲဒီအနေအထားမျိုးဖြစ်ခဲ့တာကိုတော့ ရှင်းလင်းပြောဆိုခဲ့ပါတယ်။ ဒီလူမျိုးတုန်းသတ်ဖြတ်မှုအတွက် တောင်းပန်ခဲ့သလို ရှုတ်လည်းရှုတ်ချပါတယ်”

    ကက်သလစ်သာသနာပြုကျောင်းတွေမှာ ဌာနေတိုင်းရင်းသားတွေ ကြုံတွေ့ခဲ့ရတာဟာ စက်ဆုပ်ဖွယ်ဖြစ်တယ်လို့လည်း ပုပ်ရဟန်းမင်းက ခရီးစဥ်မှာ ထည့်သွင်းပြောဆိုခဲ့ပါတယ်။

    ၁၀ စုနှစ်ချီ အဓမ္မဘာသာပြောင်းမှု၊ လူမျိုးရေးအမှတ်သညာ ပပျောက်အောင် လုပ်ဆောင်မှု၊ စိတ်ပိုင်းဆိုင်ရာ၊ ရုပ်ပိုင်းဆိုင်ရာ၊ နာမ်ပိုင်းဆိုင်ရာ စော်ကားမှုတွေ ကက်သလစ်အသင်းတော်က ကျူးလွန်ခဲ့တာကိုလည်း ပုပ်ရဟန်းမင်းကြီးက ၀န်ခံခဲ့ပါတယ်။

    ကက်သလစ်သာသနာပြုကျောင်းတွေမှာ ဌာနေကလေးငယ်တွေ ထောင်နဲ့ချီ မြုပ်နှံထားတဲ့ နေရာတွေကို အခုနှစ် မေလက စတင် တွေ့ရှိခဲ့ရပြီးတဲ့နောက် ကနေဒါအစိုးရဟာ ဒီကိစ္စကို အလေးထား ကိုင်တွယ်လာတာ ဖြစ်ပါတယ်။

    ကနေဒါ ဌာနေတိုင်းရင်းသားတွေက ပုပ်ရဟန်းမင်းကြီးတဲ့ တောင်းပန်မှုကို လက်ခံခဲ့ပေမယ့် ဒီထက်ပိုပြီး ထိရောက်အောင် လုပ်ဆောင်သင့်တယ်လို့ ပြောကြားခဲ့ပါတယ်။

    Ref: Reuters

  • ရုရှားကျူးကျော်မှုကို ဖြိုခွင်းမယ့် စနိုက်ပါ၀လီ

    ရုရှားကျူးကျော်မှုကို ဖြိုခွင်းမယ့် စနိုက်ပါ၀လီ

    မတ် ၁၂၊ ၂၀၂၂

    M-Media 

    -ကနေဒါစစ်တပ်က နာမည်ကျော် စနိုက်ပါ လက်ဖြောင့်သေနတ်သမား ‘၀လီ’ ဟာ ရုရှားရဲ့ ကျူးကျော်တိုက်ခိုက်မှုကို တွန်းလှန်ဖို့အတွက် ယူကရိန်းကို ရောက်ရှိ တိုက်ပွဲ၀င်နေပါတယ်။ 

    အသက် ၄၀ အရွယ် ၀လီဟာ စစ်တပ်က အငြိမ်းစားယူကာ ကွန်ပျူတာ ပရိုဂရမ်မာအဖြစ် အသက်မွေးနေသူပါ။ ကနေဒါတော်၀င်ကြည်းတပ်ရဲ့ တပ်မ ၂၂ က လက်ဖြောင့်တပ်သားဖြစ်ပြီး ၂၀၀၉ ခုနှစ်ကနေ ၂၀၁၁ ခုနှစ်အထိ အာဖဂန်နစ္စတန်မှာ တာ၀န်ထမ်းဆောင်ခဲ့ဖူးပါတယ်။ 

    အဲဒီမတိုင်ခင် ၂၀၀၅ ခုတုန်းက ၀လီဟာ အီရတ်မှာ တာ၀န်ကျခဲ့တာပါ။ 

    ယူကရိန်းသမ္မတ ဇယ်လင်စကီးက ရုရှားရဲ့ ကျူးကျော် တိုက်ခိုက်မှုကို ကာကွယ်ရေး နိုင်ငံခြားက စေတနာ့၀န်ထမ်း တပ်သားတွေကို ကြိုဆိုတယ်လို့  ပြောခဲ့ပြီးနောက် မတ်လအစောပိုင်းမှာ ၀လီတစ်ယောက် အလုပ်ကထွက်ပြီး ယူကရိန်းကို ရောက်လာတာ ဖြစ်ပါတယ်။ 

    ကနေဒါမှာ အသက် ၁ နှစ်အရွယ် သားနဲ့ ဇနီးဖြစ်သူတို့ ကျန်ရစ်ခဲ့ပါတယ်။ 

    “ကျွန်တော် သူတို့ကို ကူညီချင်တယ်။ ဒါပါပဲ သိပ်ရှင်းပါတယ်။ ဥရောပသားသာ ဖြစ်ချင်ပြီး ရုရှားသား မဖြစ်ချင်တဲ့အတွက် ဗုံးကြဲခံနေရတဲ့သူတွေကို ကျွန်တော် ကူညီပေးရပါမယ်” 

    ‘၀လီ’ ဆိုတာ သူ့ရဲ့အမည်ပြောင်ဖြစ်ပြီး အာဖဂန်မှာ တာ၀န်ထမ်းဆောင်စဥ် ဒီနာမည် ရခဲ့တာပါ။ အာရဘီဘာသာစကားအရ ‘ကာကွယ်စောင့်ရှောက်သူ’ လို့ အဓိပ္ပါယ်ရပါတယ်။

    ယူကရိန်းမှာတော့ ၀လီဟာ ဗြိတိန်နဲ့ ကနေဒါစစ်ပြန်တွေ စုစည်းထားတဲ့ တပ်ဖွဲ့မှာ သွားရောက် ပူးပေါင်းခဲ့ပါတယ်။ ယူကရိန်းပြည်သူတွေက ၀မ်းပမ်းတသာ ကြိုဆိုတာကိုလည်း ၀လီက ပြန်ပြောင်း ပြောပြခဲ့ပါတယ်။ 

    “ကျွန်တော်တို့ရောက်လာတာကို သူတို့ အရမ်းပျော်နေကြတာဗျ။ ချက်ခြင်းကို သူငယ်ချင်းတွေ ဖြစ်သွားကြတယ်။ ပြီးခဲ့တဲ့တစ်ပတ်က ကျွန်တော် ကွန်ပျူတာ ပရိုဂရမ်ရေးတယ်။ အခုတော့ လူအစစ်တွေကို ချေမှုန်းဖို့အတွက် တင့်ဖျက်ဒုံးကျည် ကိုင်နေရပါပြီ။ ဒါဟာ ကျွန်တော့်ရဲ့ ပကတိ အခြေအနေပါပဲ”

    ၀လီဟာ ကမ္ဘာ့ထိပ်တန်း စနိုက်ပါ လက်ဖြောင့်တပ်သားတွေထဲက တစ်ဦးပါ။ တစ်ရက်ကို အများဆုံး ရန်သူ ၄၀ အထိ ချေမှုန်းနိုင်ပါတယ်။ 

    အာဖဂန်မှာ တာ၀န်ထမ်းဆောင်စဥ် ၃.၅ ကီလိုမီတာအကွာက ရန်သူကို ချေမှုန်းနိုင်ခ့ပြီး ဒါဟာ စနိုက်ပါလောကမှာ အ၀ေးဆုံးပစ်မှတ်ကို ထိအောင်ပစ်နိုင်တာ ဖြစ်ပါတယ်။ 

    ယူကရိန်းကို စရောက်ပြီး တစ်ပတ်အတွင်းမှာပဲ ရုရှားတပ်သား ၅ ဦးကို ၀လီက ချေမှုန်းထားနိုင်တယ်လို့ ယူကရိန်းမီဒီယာတွေက ဖော်ပြပါတယ်။ 

    Ref: Forceces.net 

  • ကနေဒါရှိ တိုင်းရင်းသားဒေသတွင် ခရစ်ယာန်ဘုရားကျောင်းနှစ်ခု မီးလောင်

    ကနေဒါရှိ တိုင်းရင်းသားဒေသတွင် ခရစ်ယာန်ဘုရားကျောင်းနှစ်ခု မီးလောင်

    ဇူလိုင် ၂၂၊ ၂၀၂၁
    M-Media

    -ကနေဒါနိုင်ငံအနောက်ပိုင်း ဌာနေလူမျိုးစုတွေနေတဲ့ ဘရစ်တစ်ရှ် ကိုလံဘီယာ​ပြည်နယ်မှာ မနေ့က ခရစ်ယာန်ကက်သလစ် ဘုရားကျောင်းနှစ်ခု မီးလောင်ခဲ့ပြီး ရဲတပ်ဖွဲ့က ရှို့မီးလို့ သတ်မှတ်ထားပါတယ်။

    ၁၉ ရာစုနဲ့ ၂၀ ရာစုက ခရစ်ယာန်ကက်သလစ်အဖွဲ့တွေဟာ သူတို့ရဲ့ သာသနာပြုကျောင်းတွေမှာ ဌာနေလူမျိုးစု ကလေးငယ်တွေကို ခရစ်ယာန်ဇာတ်ထဲ အဓမ္မသွတ်သွင်းခဲ့ပြီး၊ ညှင်းပမ်းနှိပ်စက်မှုတွေ လုပ်ခဲ့တယ်ဆိုတဲ့ သတင်းတွေ ကျယ်ကျယ်ပြန့်ပြန့်ထွက်ကာ ဌာနေလူမျိုးစုတွေအကြား မကျေနပ်ချက်တွေ ရှိနေတဲ့အချိန် ဒီမီးလောင်မှု ပေါ်ပေါက်လာတာ ဖြစ်ပါတယ်။

    နှစ်ပေါင်း ၁၀၀ ကျော်သက်တမ်းရှိတဲ့ Sacred Heart ဘုရားကျောင်းနဲ့ Gregory’s ဘုရားကျောင်းတို့ဟာ တနင်္လာနေ့မနက် အစောပိုင်းမှာ တစ်ချိန်တည်းလိုလို မီးလောင်ပြာကျခဲ့တာပါ။

    ရဲတပ်ဖွဲ့ကတော့ လောင်စာအရည်ကိုသုံးပြီး မီးရှို့ခဲ့တာဖြစ်တယ်လို့ သံသယရှိကြောင်း ထုတ်ပြန်ထားပါတယ်။ အခင်းဖြစ်ပွားခဲ့တဲ့ တနင်္လာနေ့ဟာ ကနေဒါက ‘ဌာနေလူမျိုးစုများနေ့’ လည်း ဖြစ်ပါတယ်။

    ဘရစ်တစ်ရှ် ကိုလံဘီယာပြည်နယ် ကမ်လုပ်မြို့က ကက်သလစ်သာသနာပြုကျောင်းတစ်ခုမှာ ဌာနေကလေးငယ် ၂၁၅ ဦးရဲ့ ရုပ်အလောင်းကို မေလအတွင်းက တွေ့ခဲ့ရပါတယ်။ အခုမီးလောင်ခဲ့တဲ့ ဘုရားကျောင်းနှစ်ခုဟာ ကမ်လုပ်မြို့နဲ့ ကီလိုမီတာ ၁၀၀ ပျော့ပျော့ ဝေးပါတယ်။

    ခရစ်ယာန်သာသနပြုအဖွဲ့တွေဟာ ၁၈၆၇ ခုနှစ်ကနေ ၁၉၉၆ ခုနှစ်အတွင်း ဌာနေ​က​လေးငယ် တစ်သိန်းခွဲကျော်ကို သူတို့ရဲ့ သာသနာပြုကျောင်းတွေမှာ တက်စေပြီး ဌာနေလူမျိုးစုတွေရဲ့ ယဉ်ကျေးမှု၊ ကိုးကွယ်ယုံကြည်မှု၊ ဘာသာစကား၊ ဓလေ့ထုံးတမ်းတွေ ပပျောက်အောင် အဓမ္မလုပ်ဆောင်တာ၊ လိင်ပိုင်းဆိုင်ရာ စော်ကားတာ၊ ညှင်းပမ်းနှိပ်စက်တာတွေ ရှိခဲ့ကြောင်း ကနေဒါအစိုးရရဲ့ စုံစမ်းစစ်ဆေးမှုမှာ တွေ့ခဲ့ရပါတယ်။ လစ်လျူရှုမှု၊ ရောဂါဘယဒဏ်တွေကိုလည်း ကလေးတွေ အကြီးအကျယ် ခံစားခဲ့ရပါတယ်။

    အဲဒီစနစ်ကြောင့် သေဆုံးသူဟာ ၃၂၁၃ ဦးရှိတယ်လို့ စာရင်းတွေက ဆိုပေမယ့် အမှန်တကယ်အရေအတွက်က အခုထက် ပိုများနိုင်တယ်လို့ ပညာရှင်တွေက သုံးသပ်ပါတယ်။

    တနင်္လာနေ့က ကက်သလစ်ဘုရားကျောင်းနှစ်ခု မီးလောင်မှုမှာ ကနဦးစစ်ဆေးမှုတွေအရ ရှို့မီးဆိုတာကို တွေ့ရကြောင်း၊ ဘာ့ကြောင့် ဒီလိုရှို့တယ်ဆိုတာ ဆက်လက်စုံစမ်းနေကြောင်း၊ ခရစ်ယာန်သာသနာပြုကျောင်းကိစ္စ လတ်တလော ပြဿနာတွေကို သိထားပေမယ့် မီးလောင်တဲ့အကြောင်းအရင်းက ဒီကိစ္စကြောင့်ဖြစ်တယ်လို့ မစွပ်စွဲလိုသေးကြောင်း ကနေဒါရဲတပ်ဖွဲ့က သတင်းထုတ်ပြန်ထားပါတယ်။

    Ref: BBC, The Guardian