Tag: Champions League 2015-16

မေ ၂၉၊ ၂၀၁၆
M-Media

– ယနေ့မနက်က ကစားခဲ့သည့် ချန်ပီယံလိဂ်ဖိုင်နယ်တွင် ရီးယဲလ်မက်ဒရစ်အား ရှုံးနိမ့်မှုမှာ ကျဆုံးမှုတစ်ခုဖြစ်သည်ဟု အက်သလက်တီကိုမက်ဒရစ်နည်းပြ ဒီယေဂို ဆီမြွန်နီက ပြောကြားလိုက်သည်။

ပွဲအစ ၁၅ မိနစ်တွင် ရီးယဲလ်က ရာမို့စ်၏ အဖွင့်ဂိုးဖြင့် ဦးဆောင်နိုင်ခဲ့သော်လည်း ၇၉ မိနစ်တွင် ယန်နစ် ဖာရီရာ ကာရက်စ်ကိုက အက်သလက်တီကိုအတွက် ချေပဂိုးသွင်းယူပေးခဲ့ပြီး ပွဲပြီးချိန်အထိ ၁ ဂိုးစီသရေကျခဲ့သည်။ ထို့ကြောင့် အချိန်ပို ဆက်ကစားရာ မည်သူမှ ဂိုးသွင်းနိုင်ခြင်းမရှိဘဲ ပင်နယ်တီတွင် ရီးယဲလ်က ၅ ဂိုး ၃ ဂိုးဖြင့် အနိုင်ရရှိခဲ့သည်။

ဒုတိယပိုင်းပွဲအစတွင် ဂရီဇ်မန်၏ ပင်နယ်တီကန်သွင်းမှု ဘားထိထွက်ခဲ့ပြီး၊ ဆီမြွန်နီက အသင်း၏ ရလဒ်အတွက် မကျေနပ်ခဲ့ပေ။

“ဒုတိယရတဲ့သူကို ဘယ်သူမှ မှတ်မထားပါဘူး။ ဖိုင်နယ် ၂ ခုစလုံး ရှုံးနိမ့်ရတာဟာ ကျဆုံးမှုပါပဲ။ အခုတော့ ကျွန်တော်တို့ အိမ်ပြန်ပြီး ဒဏ်ရာတွေကို ကုစားရပါတော့မယ်။ (ရှုံးနိမ့်မှု ၂ ခုမှာ) ဘယ်ရှုံးနိမ့်မှုက အနာကျင်ဆုံးလဲဆိုတာ ကျွန်တော် မသိပါဘူး။ ကျွန်တော့်အတွက် အနာကျင်ဆုံးက ငွေကုန်ကြေးကျခံပြီး လာကြည့်တဲ့သူတွေကို တွေ့မြင်ရတာပါပဲ” ဟု ဆီမြွန်နီက ပွဲအပြီးတွင် ပြောကြားခဲ့သည်။

Ref : Goal

မေ ၂၁၊ ၂၀၁၆
M-Media

– ချန်ပီယံလိဂ်ဗိုလ်လုပွဲတွင် မိမိတို့အသင်းနှင့် ရီးယဲလ် ဗိုလ်စွဲနိုင်ခြေမှာ ၅၀-၅၀ ရှိပြီး ခံစစ်အားပြုကာ တန်ပြန်တိုက်စစ်ကစားမည့် ရီးယဲလ်၏ ကစားကွက်အတွက် စိုးရိမ်မိသည်ဟု အက်သလက်တီကိုမက်ဒရစ်နည်းပြ ဒီယေဂို ဆီမြွန်နီက ပြောကြားလိုက်သည်။

ဘိုင်ယန်အား ဆီးမီးတွင် ဖြုတ်ချခဲ့သည့် အက်သလက်တီကိုမှာ မန်စီးတီးကို အနိုင်ယူကာ တက်လာခဲ့သည့် မြို့ခံပြိုင်ဘက် ရီးယဲလ်နှင့် မေလ ၂၈ ရက်တွေ့တွင် မီလန်၌ တွေ့ဆုံရမည်ဖြစ်သည်။ ထိုတွေ့ဆုံမှုမှာ ၃ နှစ်အတွင်း ချန်ပီယံလိဂ် ဗိုလ်လုပွဲ၌ ၂ ကြိမ်မြောက် တွေ့ဆုံမှုဖြစ်ပြီး ၂၀၁၃-၁၄ ဖိုင်နယ်တွင် ရီးယဲလ်က အချိန်ပို ၄ ဂိုး ၁ ဂိုးဖြင့် အနိုင်ရခဲ့သည်။

မန်စီးတီးနှင့် ဆီမီးဖိုင်နယ်တွင် ရီးယဲလ်မှာ ခံစစ်အားပြုကစားပုံကို ကစားခဲ့ပြီး ဆီမြွန်နီကမူ ဗိုလ်လုပွဲတွင်လည်း ထိုကဲ့သို့ ထပ်မံကစားမည်ဟု မျှော်လင့်နေသည်။

“မန်စီးတီးနဲ့ကစားတုန်းကပုံစံမျိုး ရီးယဲလ် ကစားမယ်လို့ ကျွန်တော် ထင်ပါတယ်။ သူတို့ သတိထားကစားမှာပါ။ ချန်ပီယံလိဂ်ပွဲတိုင်းမှာ သူတို့လုပ်သလိုမျိုး တန်ပြန်တိုက်စစ်ချောင်းကစားမှာပါ။ မန်စီးတီးနဲ့ပွဲတုန်းက ရီးယဲလ်ဟာ နည်းစနစ်ပိုင်းမှာ တော်တော်လေး တောင့်တင်းခဲ့ပါတယ်။ ဗိုလ်ပွဲမှာလည်း ဒီလိုပဲ ကစားမှာပါ” ဟု ဆီမြွန်နီက ယနေ့တွင် သတင်းထောက်များအား ပြောကြားခဲ့သည်။

ထို့ပြင် ချန်ပီယံလိဂ် ဗိုလ်စွဲနိုင်ချေမှာ ၅၀-၅၀ ဖြစ်သည်ဟုလည်း ၎င်းက ထည့်သွင်းပြောကြားခဲ့သည်။

Ref: Goal