အောက်တိုဘာ ၁၅၊ ၂၀၁၉
M-Media
စပိန် ကာတာလိုနီယာဒေသတွင် ဘောလုံးပွဲများကို ရပ်ဆိုင်း
စပိန်ကနေခွဲထွက်ရေး ၂၀၁၇ ခုနှစ် ပြည်သူဆန္ဒခံယူပွဲကို ဦးဆောင်ခဲ့တဲ့ ကတာလိုနီယာဒေသ ခွဲထွက်ရေးခေါင်းဆောင်ကို စပိန်တရားရုံးက ဒီကနေ့မှာ ထောင်ဒဏ်ချမှတ်ခဲ့ပြီးတဲ့နောက် ဒေသအာဏာပိုင်တွေက ဘောလုံးပွဲတွေအားလုံးကို ရပ်ဆိုင်းလိုက်ပါတယ်။ ကာတာလိုနီယာဒေသရဲ့မြို့တော် ဘာစီလိုနာဟာ နာမည်ကျော် လာလီဂါကလပ် ဘာစီလိုနာအသင်း အခြေစိုက်ရာမြို့ပါ။ အခုလို ဘောလုံးပွဲတွေရပ်ဆိုင်းတာဟာ ခွဲထွက်ရေးခေါင်းဆောင်နဲ့ တစ်သားတည်းရှိကြောင်း ပြသတာဖြစ်တယ်လို့ ကာတာလိုနီယာ ဘောလုံးအဖွဲ့ချုပ်က ပြောကြားခဲ့ပါတယ်။ ဒါပေမယ့် ရပ်ဆိုင်းမှုမှာ လာလီဂါပွဲစဉ်နဲ့ စပိန်လက်ရွေးစင်အသင်းပွဲစဉ်တွေ မပါဝင်ပါဘူး။
အင်္ဂလန် ဘောလုံးပရိတ်သတ်တစ်ဦး ဘူလ်ဂေးရီးယားတွင် သေဆုံး
ဒီကနေ့ည ယူရို ၂၀၂၀ ခြေစစ်ပွဲကို အားပေးဖို့ ဘူလ်ဂေးရီးယားနိုင်ငံ ဆိုဖီယာမြို့ကို ရောက်ရှိနေတဲ့ အသက် ၃၂ နှစ်အရွယ် အင်္ဂလန်ပရိတ်သတ်တစ်ဦးဟာ မြို့လယ်ကောင်က နာမည်ကျော်ပန်းခြံ Borisova အနီးမှာ ထူးထူးဆန်းဆန်း အမူအရာတွေ ပြုလုပ်ပြီးတဲ့နောက် သေဆုံးသွားခဲ့ပါတယ်။ ရဲတပ်ဖွဲ့က သူ့ကို ဆေးရုံခေါ်ဆောင်သွားစဉ် လမ်းမှာသေဆုံးသွားတာဖြစ်ပြီး၊ သေဆုံးရတဲ့အကြောင်းအရင်းကို မသိရသေးပါဘူး။ မူးယစ်ဆေးသုံးစွဲပြီးတဲ့နောက် ဒီလိုဖြစ်တာလို့ ဒေသတွင်းရင်းမြစ်တွေက ပြောကြားပေမယ့် အတည်မပြုနိုင်ပါဘူး။ ပြီးခဲ့တဲ့ရက်အနည်းငယ်ကလည်း အင်္ဂလန်ဘောလုံးပရိတ်သတ် ၁၈ ဦးဟာ ဆိုဖီယာမြို့ဟောင်းမှာ ရမ်းကားနေတဲ့အတွက် ရဲတပ်ဖွဲ့က လုံးထွေးဖမ်းဆီးခဲ့ရပါတယ်။ လက်ရှိမှာ ဆိုဖီယာမြို့ကို ရောက်ရှိနေတဲ့ အင်္ဂလိပ်ဘောလုံးပရိတ်သတ် ၃၄၀၀ လောက် ရှိမယ်လို့ ခန့်မှန်းထားပါတယ်။
Ref: Daily Mail, BBC
